Powari Standard Project
2 तीमुथियुस 4
परमेस्वर अना मसीह यीसु की गवाहि करके जोन जित्तो अना मरयो हुयो को न्याय करेहे अना ओको परगट होवनो अना राज की हेत कराय के मी तोला हुकूम देवासु। का तु बचन को परचार करतो बेरा अखीन हर बेरा तैय्यार रहवो सब पिरकार की सहनसीलता अना सिक्सा को संग बढ़ावा देव अना उलाहना देके समझावो। काहेकी असो बेरा आहे जबा लोक खरो सिक्सा नही सह सको पर कान गीन की खुजली को कारन अपरी आस को जसो अपरो लाई लगत सी सिक्सक बटोर लेहेत। अना अपरो कान खराई लक अलग करके, कथा कहानी गीन पर लगायहेत। पर तु सब गोस्टी गीन मा तैय्यार रहवो दुख उठाव साजरी खबर को परचार को काम करो अखीन अपरी सेवा ला पूरो करो।
काहेकी अबा मोरो बलिदान होन को बेरा आय गयो से। काहेकि ऐना जिंदगी को तजन को बेरा जवर से। मी साजरी कुस्ती लड़ चुकी सेउ मीना अपरी दौड पूरी कर लेई सेस मीना बिस्वास की देख-रेख करीसेस। अबा मोरो लाई धरम को उ मुकुट सजायके राखयो गयो से जोन पिरभू नेक अना न्याय करन वालो सेव मोला वोना दिवस देहे अना मोला च नही वरन वय सब ला जोन पिरेम को संग वोको परगट होवन को बाट चोविसेत।
मोरो जवर लवकर आवन को जतन करो। काहेकि देमास न एना संसार लक जादा माया करके मोला छोड़ देईसेत अखीन थिस्सलुनीके ला चली गयो क्रेसक्रेंस गलातिया ला अना तीतुस दलमतिया ला चली गयो। बल्कि लूका मोरो संग से मरकुस ला आन कन चली आयो काहेकी सेवा को लाई उ मोरो लगत काम को से। तुखिकुस ला मीना इफिसुस धाडिस सेस। जोन जामा मी तोरआस नगर मा करपुस को यहान छोड़ आईसेऊ जबा तु आवजोस त वोला किताब गीन को पक्को करके चमड़ा को चिठ्ठी गीन ला आनजोस।
सिकन्दर कसार मोरो लक लगत बुराई करीसेस पिरभू वोला वोको काम गीन को जसो बदल देहे। तु भी वोको लक होसियार रहवो काहेकी वोना हमारो गोस्टी को लगत बिरोध करीसेस। मोरो पहेल विवाद को बेरा कोनी न भी मोरो संग नही देइस वरन सब न मोला छोड़ देईन भला होय का इनको उनको लेखा देनो नही पड़ेहे। पर पिरभू मोरो सहायक रहयो अना मोला ताकत देइस ताकी मोरो कन पूरो-पूरो परचार होहे अना सब परजात आयक लेहेत मी सेर को टोन्ड लक सुड़ायो गयो सेउ। अना पिरभू मोला हर एक बुरो काम लक छुड़ाय लेहेत, अना अपरो सरगीय राज मा सुरक्सित पहुचायहे वोकी महिमा जुगनजुग होवती रह आमेन।
अखट्ट नमस्कार
प्रिस्किल्ला अना अक्विला को अखीन उनेसिफुरुस को खानदान ला नमस्कार। इरास्तुस कुरिन्थुस मा रहगयो अना तुरफियुस को मीना मिलेतुस नगर मा बीमार छोड़ीसेस।
दव को पयले चली आवन को जतन करीया यूबूलुस अना पूदेंस अना लीनुस अना क्लौदिया अखीन सब भाऊगीन ला तोरो नमस्कार।
पिरभू तोरी आतमा को संग रहयो
तुमरो पर किरपा होवतो रह।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.