Powari Standard Project
1 योहन 5
संसार पर जीत पावनो
जोन को यो भरोसा से का यीसु च मसीह से, अना परमेस्वर को टूरा से। जोन दाअजी ला माया करासे उ ओको टूरा ला भी माया करासे। एने परकार जबा आमी परमेस्वर ला माया करासेजन अना ओकी हुकूम ला मानासेजन, ता आमी जाना सेजन का आमी परमेस्वर की सन्तानगीन लक माया करासेजन। काहेका परमेस्वर लक माया राखनो को मायना से का आमी ओको हुकूम गीन ला मानबिन अना ओको हुकूम कठीन नहाती। काहेका जोन कोनि परमेस्वर को टूरा बन जासे, उ जग पर जीत पावसे। अना जग को वरता आमला जोको लक जीत मिलासे, उ आमरो भरोसा से। वाच जग पर जीत पावसे जोन यो भरोसा करासे की यीसु परमेस्वर को टूरा से।
यीसु मसीह को बारे मा गवाही
जोन पानी अना रकत को कन लक आयो होतो, मनजे सच्चो यीसु मसीह, उ ना ता केवल पानी लक पर पानी अना रकत दुही को कन लक आयो होतो। ओको तीन गवाह सेत। आतमा, पानी अना रकत; अना तीनच को एकच जसी गवाही सेत। जबा आमी मानूस को गवाही मान लेसेजन, ता परमेस्वर को गवाही ता ओको लक बढके सेत; अना परमेस्वर को गवाही यो से का उ आपरो टूरा को बारे मा गवाही देसे जोन परमेस्वर को टूरा पर बिस्वास करासे उ आपरो मा गवाही राखासे। जेना परमेस्वर पर बिस्वास नही कियोसेस ओना ओला खोटो ठहरायीसेस, काहेका ओना ओनो गवाही पर बिस्वास नही करीन जोन परमेस्वर ना आपरो टूरा को बारे मा देयीसेस। अना ओकी गवाही यो से का परमेस्वर ना आमला अमर जिंदगी देईसेस, यो जिंदगी ओको टूरा कन लक मिलयो से। जोको जवर टूरा से, ओको जवर जिंदगी से, अना जेनको जवर परमेस्वर को टूरा नहाती, ओको जवर जिंदगी भी नहाति।
अमर जिंदगी
परमेस्वर को टूरा मा भरोसा राखन वालो, तुमला यो गोस्टी मी एकोलाय लिख रही सेऊ जेनको लक तुमी यो जान लेव का अमर जिंदगी तुमरो जवर से। आमरो परमेस्वर मा यो भरोसा से का अदि आमी ओको मरजी को कन लक ओकोलक बिनती करबीन ता उ आमरो आयकासे। जबा आमी जानासेजन का जोन काही आमी मांगासेजन उ आमरी आयकासे; ता यो जानासेजन की जोन काही आमिना ओकोलक मांगीसेजन, उ पायो सेजन।
अदि, कोनी आपरो भाऊ ला असो पाप करतो दिसो जेनको फर मिरतु नही होहे, ता बिनती करेत, अना परमेस्वर ओला उनको लाई, जिनना असो पाप करीसेस जेनको फर मिरतु नही होहे। जिंदगी देहे। असो भी पाप से जेनको फर मिरतु से; ऐको बारे मा मि बिनती करन को लाई नही कव्हसू। सबच परकार को अधरम ता पाप से, पर असो भी पाप से जेनको फर मिरतु नही।
आमी जानासेजन, का जोन कोनी परमेस्वर को टूरा बन गयी से भयी, उ पाप नही करत रव्हा पर परमेस्वर को टूरा, ओकी रक्सा करत रव्हसे। उ दुस्ट ओला छुय नही सकासे।
आमी जानासेजन का आमी परमेस्वर लक सेजन, अना सप्पा जग ओना दुस्ट को कब्जा मा से।
लेकिन आमी यो भी जानासेजन का परमेस्वर को टूरा आय गयो से अना ओना आमला उ गियान देइसेस, मनजे यो का आमी ओमाच रव्हसेजन, जोन खरो से, मोठयो परमेस्वर च खरो परमेस्वर से अना ओच अमर जिंदगी से।
ओ लेकरागीन, आपरो आपला मुरत गीन लक बचाव राखबीन।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.