Powari Standard Project
1 योहन 4
आतमा ला परखो
ओ चहेतो, हरेक आतमा को भरोसा नोको करो पर आतमा ला परखो का वय परमेस्वर को कन लक सेत का नही; काहेका लगत सा खोटो भविस्यवक्ता संसार मा हिटके उभो होयी सेत। परमेस्वर को आतमा तुमी ऐना रीती लक ओरख सकासेव, जोन आतमा मान लेवासे का यीसु मसीह तन मा होयके आयिसे उ परमेस्वर को कन लक से, जोन आतमा यीसु ला नही मानासे उ परमेस्वर को कन लक नहाती; वाच ता मसीहबिरोधी को आतमा से, जेनको चरचा तुमी आयक लेईसेव का उ आवनवालो से, अबा भी संसार मा से।
ओ लेकराहून तुमी परमेस्वर का सेव तुमी ना उन पर जीत पायासेव काहेका जोन तुमी मा से उ ओकोलक जोन संसार मा से, मोठो से। वय संसार का सेत, एने कारन वय संसार को गोस्टी सांगासेत, अना संसार उनकी आयकासे। आमी परमेस्वर का सेजन। जोन परमेस्वर ला जानासे, उ आमरो आयकासे; जोन परमेस्वर ला नही जानासे उ आमरो नही आयकासे। ऐना रीती लक आमी सच्चो आतमा अना भरम को आतमा ला ओरख लेसेजन।
परमेस्वर माया से
ओ चहेतोहुन आमी आपसी मा माया राखबिन; काहेका परमेस्वर माया लक से। जोन कोनी माया करासे, उ परमेस्वर लक पैदा लेइसेस अना परमेस्वर ला जानासे। जो माया नही राखा उ परमेस्वर ला नही जाना, काहेकि परमेस्वर माया से। जोन माया परमेस्वर आमी लक राखासे, उ एकोच लक आयीसेस का परमेस्वर ना आपरो एकच टूरा ला संसार मा धाड़ीसेस का आमी ओको लक जिंदगी पावबिन। माया ऐमा नहाती का आमिना परमेस्वर लक माया करिया सेजन, पर ऐमा से का ओना आमी लक माया करीसेस अना आमरो पाप को पस्तावा को साठी आपरो टूरा ला धाड़ीस।
ओ चहेतोहुन, जब परमेस्वर ना आमी लक असो माया करीसेस, ता आमला भी आपसी मा माया करनो जरुरी से। परमेस्वर ला कबा च कोनी ना नही चोयीसेस; अदि आपस मा माया राखबिन, ता परमेस्वर आमी मा बनयो रव्हसे अना ओको माया आमी मा सिध्द भयी गयो से।
एकोच लक आमी जाना सेजन का आमी ओमा बनयो रव्हसेजन, अना उ आमी मा; काहेका ओना आपरो आतमा मा लक आमला देयीसेस। आमिना चोय भी लियासेजन अना गवाही देसेजन का बाबूजी ना टूरा ला संसार को सुटकारा देवनवालो करके धाड़ीसेस। जोन कोनी यो मान लेवासे का यीसु परमेस्वर को टूरा से, परमेस्वर ओमा बनयो रव्हसे, अना उ परमेस्वर मा।
जो माया परमेस्वर आमी लक राखासे, ओला आमी जान गयासेजन अना आमला ओको भरोसा से। परमेस्वर माया से, अना जोन माया मा बनो रव्हसे उ परमेस्वर मा बनो रव्हसे, अना परमेस्वर ओमा बनो रव्हसे। एकोच लक माया आमिमा सिध्द भयो का आमला नियाव को दिवस हिम्मत होहे; काहेका जसो उ से वसोच संसार मा आमी भी सेजन। माया मा कोनी भेव नाहती, पर भरपूर माया भेव ला दूहुर करासेत। काहेका भेव को तालुक सजा लक होवासे, जोन भेव राखासे उ माया मा सिध्द नही भयो।
आमी एकोलाय माया करासेजन, का पयले ओना आमिलक माया करीसेस। अदि कोनी कव्हेत, “मि परमेस्वर लक माया राखासेऊ,” अना आपरो भाऊ लक ईरसा राखेह ता उ खोटो से; काहेका जोन आपरो भाऊ लक जेने ओला चोयीसेस माया नही राखा, ता उ परमेस्वर लक भी जेनला ओना नही चोयीसेस माया नही राख सकासे। ओकोलक आमला यो हुकूम मिलीसेस, का जोन कोनी परमेस्वर लक माया राखासे उ आपरो भाऊ लक भी माया राखेह।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.