Pogoro Bible Version

Ayubu 25

Bildadi kamwakula kayi Ayubu

Shakapanu Bilidadi, muntu gwa kulawa Shuhi, kankula.

Mlungu ndo yakana uwezu mkulu,

wantu woseri wamguwiri.

Yomberi katula ponga mpaka kumpindi kwakuyi.

Gaa yakaweza kuwalanga mashonta gakuyi?

Gaa yakamulikirwandiri na lulangala lyakuyi?

Muntu kaweza hashi, kutenda yagamfiriziya Mlungu?

Ama muntu kaweza hashi kuwera kaherepa?

Kwa Mlungu ata lyezi ling'eleng'etandiri nentu,

viraa ndondu ziherepandiri kulongolu kwakuyi Mlungu,

ntambu gaa vinu muntu mweni ndo shigongolu,

muntu mweni ndo shikwitakwita hera!

Pogoro Bible Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.