Ayubu

Shitabu sha

Ayubu

ULONGULERU

Shitabu sha Ayubu shitakulira muntu yumu yakaweriti na haki yawamshema Ayubu mweni katabikiti nentu ata hangu katendandiri vidoda vya kumtendera Mlungu (Ayubu shipandi 1:22). Kwahera yakamana kuwela shitabu sha Ayubu shilembwa shaka gaa, Ayubu kalikaliti shaka shivuwa handa Abrahamu, toziya kalikaliti kwa vinja miya arubaini. Wasomi waliholandiri kuwera Ayubu kalembiti shitabu mweni, kumbiti mlemba yumonga yakamanikandiri kawoniti mbaka kuwagambira wantu wamonga hadisi ayi ya Ayubu na kuyilemba.

Shitabu sha Ayubu shitakulira ntabiku. Shetani kajimiritwi kumtabisiya Ayubu toziya yomberi ndo yakawonekaniti kuwera kaweza kumlewelera Ayubu kumguwira Mlungu (Ayubu shipandi 1:12). Seemu nkulu ya shitabu sha Ayubu shitakulira mayoweru ga Ayubu na waganja wakuyi toziya yomberi katabika. Waganja wakuyi waliholiti kuwera Ayubu katenditi vidoda, kumbiti Ayubu kamaniti kuwera yomberi kahera vidoda, paaga Mlungu kayowera na Ayubu, Kumbiti kamgambilitindiri ntambu gaa katabiki hangu. Ayubu pakavimaniti kuwera Mlungu kaweza kutenda shoseri shakashifira na wantu hapeni wavimani makulu gakatenda Mlungu, su Mlungu kamtekelera kayi Ayubu kwa ulunda na wana.

Yagawera amu Mushitabu sha Ayubu

Mirandu yakatenditi Ayubu na kutabisiwa nentu kwakuyi yakujegitwi na Shetani gawera mushipandi sha kwanja na sha pili

Mayowera ga Ayubu na waganja wakuyi toziya ya kutabika kwakuyi ga mushitabu sha tatu mpaka sha selasini na saba.

Mlungu kayowera na Ayubu shipandi sha selasini na nani mpaka arubaini mstali gwa sita.

Kuhepelera kwa Ayubu na Mlungu ntambu yakamtekeleriti nentu gamu shipandi sha arubaini mstali gwa saba mpaka kumi na saba shitakulira.