Pengo Bible
ଜିସାଇୟ 9
ବାବି ରାଜା
ମତର୍ ଆଗେ ଇମ୍ଣି ଦେସ୍ ନନାକା ମାଚାତ୍, ହେଦାଂ ମାଜ୍ଗାଜ଼ି ମାନୁତ୍ । ଆଗେନି କାଡ଼୍ଦ ହେୱାନ୍ ସବୁଲୁନ୍ ଦେସ୍ ଆରି ନପ୍ତାଲି ଦେସ୍ତିଂ ବେକାର୍ନିକା ଇଞ୍ଜିମାଚାର୍, ମତର୍ ହାରିହାରା କାଡ଼୍ଦ ହେୱାନ୍ ହେଦେଲିଂ ହାମ୍ଦୁର୍ ହାଜ଼ିନି ଲାଗେନିକା, ଜର୍ଦନ୍ନି ହେପାଡ଼୍କା, କୁଟୁମ୍ନି ଗାଲିଲିତ ମାଜାନ୍ କିନାନ୍ । ଇମ୍ଣି କୁଟୁମ୍ ମାଜ୍ଗାତ ବୁଲାତାର୍, ହେୱାର୍ ବେସିଅଜଡ଼୍ ହୁଡ଼୍ତାର୍ଣ୍ଣା; ଇମ୍ଣାକାର୍ ହାକିହିତ୍ଡ଼ି ଦେସ୍ତ ବାହା କିତାର୍, ହେୱାର୍ ଜପି ଅଜଡ଼୍ ହତ୍ତାତ୍ନା । ଏନେଙ୍ଗ୍ ହେ ଦେସ୍ନି ମାନାୟାରିଂ ବେସିହେନି ଆଜ଼ି ହେୱାର୍ତି ୱାରି ବାଡାୟ୍ କିତାୟ୍ନା; ହେୱାର୍ ତାସ୍ ତ୍ରେସ୍ଦି ୱାରିତିଂ ଆଦିକ୍ ୱାରି କିନାର୍, କ୍ଡିସ୍ତାକା ବାଟା କିନି ସମୁ ଲାକେ ସାର୍ଦା କିନାର୍, ଇନେକିଦେଂକି ମିଦିୟନନି ଦିନ୍ତ ଇନେସ୍, ହେଲାକେ ଏନେଙ୍ଗ୍ ତା ବଜ୍ ଲାକେ ଟେଙ୍ଗା ଆରି ନିପିନି କାଉଡ଼଼ି, ତା ପାଟ୍କାର୍ ବେଡ୍ଗା ଡ୍ରିକ୍ଚି ତୁହିତାଇନା । ଇଦାଂ କାଜିଂ ରାଟୁତ ମେହାତି ମାନାୟ୍ତି ୱିଜ଼ୁ ଆତ୍ଆତିୟାର୍ ଆରି ନେତେର୍ତ ମେହାତି ହେନ୍ଦ୍ରାସବୁ ଆହ୍ନି ଜିନିସ୍ତ, ନାଣି କାଜିଂ ୱେଜ଼୍ଗୁ ଲାକେ ଆନାତ୍ । ଇନେକିଦେଂକି ମା କାଜିଂ ର କାଡ୍ଦେ ଜଲମ୍ ଆତାନ୍ନା, ମାଙ୍ଗ୍ ର ମାଜ଼ିଂ ହିତ୍ତାର୍ଣ୍ଣା ଆରି ତା ନିପିତ ସବୁବଜ୍ ଇଟ୍ୟାନାତ୍; ଆରେ, ତା ତର୍ କାବାନାକା, ମତ୍ରି, ସାକ୍ତିକାଟି ପର୍ମେସ୍ୱର୍, ୱିଜ଼୍ୱିଦିନ୍ନି ଆବା, ସୁସ୍ତାରାଜା ଆନାନ୍ । ତା କିଜ଼ିମାନି କାମାୟ୍ତିଂ ବାଡାନାକା ଆରି ସୁସ୍ତାନି ହାନ୍ଦି ମାନ୍ଗୁତ୍, ହେୱାନ୍ ଦାଉଦ୍ତି ଗାଦିତ ଆରି ତା ରାଜିତ କୁଚ୍ଚି ନିୟାଁୟ୍ବିଚାର୍ ଆରି ଦାର୍ମିନିକା ଇକାଡ଼୍ତାଂ ୱିଜ଼୍ୱି କାଡ଼୍ ପାତେକ୍ ହେଦାଂ ତିର୍ ଆରି ଆଟ୍ୱା କିନାନ୍ । ମେଲ୍ୟା ଆଦିକାରି ନିତ୍ରେମାପ୍ରୁତି ତ୍ରିକାଡ଼୍ ଇଦାଂ ପୁରା କିନାର୍ ।
ନିତ୍ରେମାପ୍ରୁ ଇସ୍ରାଏଲ୍ନି ଡଣ୍ଡ୍ହିନାକାନ୍
ଜାକୁବ୍ ବିତ୍ରେତାଂ ମାପ୍ରୁ ର ବଚନ୍ ପକ୍ତାନ୍ ଆରି ହେଦାଂ ଇସ୍ରାଏଲ୍ ଜପି ଆର୍ତାତ୍, ଆରେ, ୱିଜ଼ାର୍ ମାନାୟାର୍, ଇପ୍ରୟିମ୍ ଆରି ସମରିୟାନିକାର୍ ନେ ହେଦାଂ ପୁନାର୍; ହେୱାର୍ ଆକାର୍ତ ଆରି ଗରବ୍ତାଂ ଇନାର୍, ଇଟାଂସବୁ କାଡ଼୍ଜି ହାଚିକ୍ନା ହାତେନେ, ମତର୍ ଆସେଙ୍ଗ୍ ରାସ୍ତି କାଲ୍ଦ ରଚ୍ନାସ୍; ତଗା ମାର୍ ସବୁ କାତ୍ତାର୍ଣ୍ଣା ହାତେନେ, ମତର୍ ଆସେଙ୍ଗ୍ ହେବେ ବାଦ୍ଲାୟ୍ ଏରସ୍ ମାର୍ ଗାଜାୟ୍ କିନାସ୍ । ଇଦାଂ କାଜିଂ ନିତ୍ରେମାପ୍ରୁ ତା ବିରୁଦତ ରସିନ୍ନି ବିରୁଦ୍ନିକାରିଂ ଉନ୍ତି କିନାନ୍ ଆରି ସାତ୍ରୁରିଂ ରିସାକିୟ୍ କିନାନ୍; ମୁମ୍ଦ ଅରାମ୍ୟ ଆରି ତାକଚଣ୍ ପଲେସ୍ଟିୟର୍ ଆନାର୍; ଆରେ, ହେୱାର୍ ଚାଲାନି ମୁମ୍ଦ ଇସ୍ରାଏଲ୍ତିଂ ୱିହ୍ନାର୍ । ଇସବୁ ଆତିସ୍ ନେ ହେୱାର୍ତି ରିସା ବନ୍ଦ୍ ଆଉତ୍, ମତର୍ ହେୱାର୍ତି କେଇ ଆଗେ ଲାକେ ଲାମା ଆତାତ୍ନା । ଆତିସ୍ପା ମାନାୟାରିଂ ଇନେନ୍ ଅସ୍ତାନ୍ନା, ତା ଲାଗାଂ ହେୱାର୍ ମାସ୍ୱାତାର୍ଣ୍ଣା, କି ହେୱାର୍ ମେଲ୍ୟାର୍ଆଦିକାର୍ ନିତ୍ରେମାପ୍ରୁ ଦାହ୍ୱାର୍ଣ୍ଣା । ଇଦାଂ କାଜିଂ ନିତ୍ରେମାପ୍ରୁ ଇସ୍ରାଏଲ୍ନି କାପ୍ଡ଼ା ଆରି ନିଙ୍ଗୁଣ୍, କାଜ୍ରିଆକିଂ ଆରି ଏଜ଼ୁଙ୍ଗ୍ କାଚ୍ରା ର ନାଜିଂ କାତ୍ନାର୍ । ପାରାଚିନାର୍ ଆରି ମାଜାନ୍ ଲକୁ ହେ କାପ୍ଡ଼ା, ଆରେ, ମିଚ୍ ହିକ୍ୟାହିନାକାର୍ ବେଣ୍ବାକ୍ଣାୟ୍କିନାକାନ୍ନ୍ତି ନିଙ୍ଗୁଣ୍, ଇନେକିଦେଂକି ଇ ମାନାୟାର୍ତି ହାଜ଼ିବୁଲାନାକାର୍ ହେୱାରିଂ ବୁଲ୍କାୟ୍ କିନାର୍, ଆରେ, ଇମ୍ଣାକାର୍ ହେୱାର୍ ହୁକେ ହାଜ଼ି ନକିକିନାର୍, ହେୱାର୍ ନାସ୍ ଆନାର୍ । ଲାଗିଂ ନିତ୍ରେମାପ୍ରୁ ହେୱାର୍ ବେଣ୍ଡ୍ୟାର୍ ତାକେ ୱାରି କିଉନ୍, କି ହେୱାର୍ତି ବାୱାହିଲିଟୁରା କାଡ଼୍ଦେ ଆରି ରାଣ୍ଡିକ୍ କାଜିଂ ଦୟା କିଉନ୍; ଇନେକିଦେଂକି ଜାଣ୍କେ ମାନାୟ୍ ଦରମ୍ହିଲ୍ୱାକାର୍ ଆରି ବିନ୍ କାମାୟ୍ ଆରି ୱିଜ଼ାର୍ ମୁମ୍ ମିଚ୍ୱାର୍ । ଇସବୁ ଆତିସ୍ ନେ ତା ରିସା ବନ୍ଦ୍ ଆଉତ୍, ମତର୍ ତା କେଇ ଆଗେ ଲାକେ ମେଙ୍ଗ୍ତାତ୍ନା । ଇନେକିଦେଂକି ବାନ୍ୟା ନାଣି ଲାକେ କାଡ୍ନାନ୍; ହେଦାଂ ଲେକାଜାମୁ ଆରି ୱାଡ଼ି ମାର୍ ୱିହ୍ନାତ୍; ଆରେ; ହେଦାଂ ରାନ୍ନି ବେସିମେହାତି ବାହାତ କାଡ଼୍ଜି ବାଦାଡ଼୍ ଲାକେ କଦା ଆଜ଼ି ଜପି ନିଙ୍ଗ୍ନାତ୍ । ମେଲ୍ୟାର୍ଆଦିକାରି ନିତ୍ରେମାପ୍ରୁତି ରିସାତ ଦେସ୍ କାଡ୍ନାତା; ପା ମାନାୟାର୍ ନାଣି କାଜିଂ ୱେଜ଼୍ଗୁ ଲାକେ ଆତାର୍ଣ୍ଣା; ଇନେର୍ ଜାର୍ ଟଣ୍ଡେନିଂ ଦୟା କିଉନ୍ । ହେବେ ମାନାୟାର୍ ତିନିକେଇଦାଂ ଜାଲ୍ଜି ଅନାର୍, ଆରେ, ନାସ୍କି ଆନାର୍ ଆରେ ଡେବା କେଇଦ ତିନାର୍ ଆରି ପଟ ପାଞ୍ଜୁର୍; ହେୱାର୍ ଜାଣ୍କେ ଜାର୍ ଜାର୍ ବାପାଂନି ଜେଇ ତିନାର୍; ମନଃସି ଇପ୍ରୟିମତି ଆରି ଇପ୍ରୟିମ୍ ମନସିତି, ଆରେ, ହେୱାର୍ ରବେ ଆଜ଼ି ଜିହୁଦାନି ବିରୁତ୍ଦ୍ନିକାର୍ ଆନାର୍ । ଇସବୁ ଆତିସ୍ ନେ ତା ରିସା ଉଣା ଆଉତ୍, ମତର୍ ତା କେଇ ଆଗେ ଲାକେ ମେଙ୍ଗ୍ତାତ୍ନା ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.