Pengo Bible
ଜିସାଇୟ 55:8
Verse 8 is marked below, with the whole chapter around it. Read from the start
ଇସ୍ୱର୍ତି ଦୟା
“ଏ ନାସ୍କି ମାନାୟ୍ ୱିଜ଼ାକାଦେର୍, ଏପ୍ ଏଜ଼ୁଙ୍ଗ୍ ଲାଗାଂ ୱାଡ, ଆରେ ଇନେର୍ତି ଇନାକା ଡାବୁଙ୍ଗ୍ ହିଲୁକ୍, ହେୱାନ୍ ୱାଏନ୍; ଏପେଙ୍ଗ୍ ୱାଡ, କଡ଼ାଟ୍ ଆରି ତିନାଟ୍; ଆଁ, ୱାଡ, ଡାବୁଙ୍ଗ୍ ଆରି ମଲ୍ ପିସ୍ତି ଅଙ୍ଗୁର୍ ରାସ୍ ଆରି ପାଲ୍ କଡ଼ାଟ୍ । ତିନ୍ୱିକାଦି ଜିନିସ୍ କାଜିଂ ଏପେଙ୍ଗ୍ ଇନାକିଦେଂ ରୁପା ବେପାର୍ କିନାଦେରା ? ଆରି ଇନାକା ସାରି ଆକାୟ୍, ହେଦାଂ କାଜିଂ ଇନେକିଦେଂ ଏପେଙ୍ଗ୍ କସ୍ଟ କିନାଦେରା ? ମାନ୍ଦିଆନ୍ କିଜ଼ି ମା କାତା ୱେନାଟ୍ ଆରି ହାର୍ଦି ଜିନିସ୍ ତିନାଟ୍ ଆରି ଗାଗାଡ଼୍ତ ଆସ୍ତିନି ଜିନିସ୍ତ ମିଦାଂ ପାରାଣ୍ତିଂ ସାରି ଆଦେଂ କିୟାଟ୍ । କିତୁଲ୍ତ ୱେନାଟ୍ ଆରି ମା ଲାଗାଂ ୱାଡ; ୱେନାଟ୍, ହେବେ ମି ପାରାଣ୍ ବାଚାନାତ୍; ଆରେ, ଆପ୍ ମି ଲାହାଂ ର ନିତ୍ରେତିର୍ ନିୟମ୍, ଇଚିସ୍, ଦାଉଦ୍ କାଜିଂ ହାତ୍ପାନେ ଦୟା ତିର୍ କିନାପ୍ । ହୁଡ଼ାଟ୍, ଆପ୍ ତାଙ୍ଗେଙ୍ଗ୍ କୁଟୁମ୍ନିକାର୍ ସାକି ଲାକେ, କୁଟୁମ୍ନିକାର୍ ଆଗେଆନାକାନ୍ ଆରି ବଲ୍ହିଦ୍ନାକାନ୍ ମୁଣିକା ଲାକେ ବାଚି କିତ୍ତାପ୍ନା ।” ହୁଡ଼ାଟ୍, ଇମ୍ଣି କୁଟୁମ୍ତିଂ ଏପ୍ ପୁନ୍ୱାତାଦେର୍ନା, ହେୱେରିଂ ଏପେଙ୍ଗ୍ କୁକ୍ନାଦେର୍ ଆରି ଇମ୍ଣି କୁଟୁମ୍ ମିଙ୍ଗେଙ୍ଗ୍ ପୁଞ୍ଜ୍ୱାତାର୍, ହେୱାର୍ ମି ଲାଗାଂ ହନ୍ତାନାର୍, ନିତ୍ରେମାପ୍ରୁ ନି ପରମେସ୍ୱର୍ତି ଆରି ଇସ୍ରାଏଲ୍ନି ଦାର୍ମିଲାକେ କାଜିଂ ଇଦାଂ ଗିଟା ଆଦ୍ନାତ୍; ଇନେକିଦେଂକି ହେୱାନ୍ ମିଙ୍ଗେଙ୍ଗ୍ ଜାଜ୍ମାଲ୍ କିତ୍ତାନ୍ନା । ଏଚେକ୍ପାତେକ୍ ନିତ୍ରେମାପ୍ରୁତି ଉଦେସ୍ ଗାଟା ଆତ୍ତାନ୍ନା, ହେପାତେକ୍ ଏପେଙ୍ଗ୍ ହେୱାନିଂ ଦାହାଟ୍, ହେପାତେକ୍ ହେୱାନ୍ ଲାଗେ ମାନାନ୍, ହେପାତେକ୍ ତାତାକେ ପାର୍ତାନା କିୟାଟ୍ । ବାନ୍ୟାର୍ ଜାର୍ତି ହାଜ଼ି ଆରି ପାର୍ତିକିୱାକାନ୍ ଜାର୍ ଜଜନାନି ହାଜ଼ି ପିହେନ୍; ଆରେ ହେୱାନ୍ ନିତ୍ରେମାପ୍ରୁ ନିପ ମାସ୍ଦେନ୍, ହେବେ ହେୱାନ୍ ହେୱେନିଂ ଦୟା କିନାନ୍; ଆରେ, ମା ପରମେସ୍ୱର୍ ନିପ ୱାଏନ୍, ଇନେକିଦେଂକି ହେୱାନ୍ ବେସି ବାବ୍ରେ କେମା କିନାନ୍ । ଇନେକିଦେଂକି ନିତ୍ରେମାପ୍ରୁ ଇନାନ୍, “ମା ଜଜନା ସବୁ ମି ଜଜନା ଲାକେ ଆକାୟ୍, ନଲେ ମିଦାଂ ହାଜ଼଼ି ସବୁ ମା ହାଜ଼ି ଲାକେ ଆକାୟ୍ ।” “ଇନେକିଦେଂକି ପୁର୍ତି ବାଟା ଆକାସିଂ ଇନେସ୍ ଉଚା, ହେଲାକେ ମା ହାଜ଼ିସବୁ ମି ହାଜଡ଼଼ି ବାଟା ଆରି ମା ଜଜନା ସବୁ ମିଦାଂ ଜଜନାତିଂ ପିସ୍ତି ବେସି ଉଚା ଆନାତ୍ । ଇନେକିଦେଂକି ଇନେସ୍ ବାର୍ହା ଆରି ଲେକର୍ ଆକାସ୍ତାଂ ତାରେନ୍ ୱାନାତ୍ ଆରି ହେବେ ମାସ୍ଦି ହାଲୁତ୍, ମତର୍ ବୁଇଁତିଂ ଉଦି କିନାତ୍, ଆରେ ପାଡ଼୍ଆହିକିନାତ୍ ଆରି କାଚ୍ରା ଉବ୍ଜାୟ୍ କିଜ଼ି ୱିତ୍ନାକାରିଂ ବିୟାନ୍ ଆରି ତିନାକାରିଂ ଚିଞ୍ଜେଙ୍ଗ୍ ହିନାତ୍; ମା ୱେଇଦାଂ ହତ୍ନି ବଚନ୍ ହେଲାକେ ଆନାତ୍; ହେଦାଂ ପଲ୍ୟାପାଡ଼୍ ଆଜ଼ି ମା ଲାଗାଂ ମାସ୍ଦି ୱାଉତ୍, ମତର୍ ଆସ୍ ଇନାକା ଇଚା ଇଚାକିନାସ୍, ହେଦାଂ ପୁରା କିନି କାଜିଂ ଆରି ଇମ୍ଣି କାମାୟ୍ କାଜିଂ ଆସେଙ୍ଗ୍ ପକ୍ନାସ୍, ହେବେ କିତାକା ପୁରା ଆନାତ୍ । ଲାଗିଂ ଏପେଙ୍ଗ୍ ୱାରିତାଂ ହସି ସୁସ୍ତାତାଂ ଆଗେ ଆଗେ ଅୟାନାଦେର୍; ମାଡ଼ି ଆରି କୁପ୍ଲିଂ ମି ମୁମ୍ଦ ଗାଜା କାଟ୍ତାଂ କେର୍ନିକ୍ ଆରି ବାଡ଼୍କୁନି ମାର୍କୁସବୁ ଚାପୁଡ଼ିଂ ଇଡ଼୍ନିକ୍ । ୱାଡ଼ି ମାର୍କୁ ବାଦୁଲ୍ ଦେବଦାରୁ ଆରେ ଲେକାଜାମୁ ୱାଡ଼ି ବାଦୁଲ୍ ବେତ୍ଲାମାର୍ ଉବ୍ଜା ଆନିକ୍; ଆରେ, ହେଦାଂ ନିତ୍ରେମାପ୍ରୁତି କିତିକାମାୟ୍ ଇସାବ୍ରେ ଆରି ଜୁଗ୍ଜୁଗ୍ ନିତ୍ରେତିର୍ ଚିନ୍ ଲାକେ ଆନାତ୍ ।”
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.