Pengo Bible
ଜିସାଇୟ 50
ଇସ୍ରାଏଲ୍ନି ପାପ୍
ନିତ୍ରେମାପ୍ରୁ ଇ କାତା ଇନାନ୍, “ଆପ୍ ଇମ୍ଣି ଆକି ହୁଦାଂ ମି ଆୟାଙ୍ଗ୍ ପିସ୍ତାପ୍ନା, ତାଦାଂ ହେ ହେଲଆକି ଇମେତ୍ ? ଇଚିସ୍ ମା ବେପ୍ରେୟାର୍ ବିତ୍ରେତାଂ ଇନେର୍ ଲାଗାଂ ମିଙ୍ଗେଙ୍ଗ୍ ପ୍ରତ୍ତାପ୍ନା ? ହୁଡ଼ାଟ୍, ଏପେଙ୍ଗ୍ ଜାର୍ ଅପ୍ରାଦ୍ କାଜିଂ ପ୍ରୟାତାଦେର୍ନା ଆରି ମି ଅଦାର୍ମି କାଜିଂ ମି ଆୟା ଦେହା କିୟାଜ଼଼ି ମାଚାତ୍ । ଆପ୍ ଏଚେକାଡ଼୍ଦ ୱାତାପ୍ ଇନାକିଦେଂ ଇନେର୍ ୱାୱାଦାଂ ମାଚାର୍ ? ଆପ୍ ଏଚେକାଡ଼୍ଦ କୁକ୍ତାତାପ୍ ଇନାକିଦେଂ ଇନେର୍ ଉତର୍ ହିଦ୍ଦେଂ ହିଲ୍ୱାତାର୍ ? ମା କେଇ କି ଅଲପ୍ ହିରୁ ଆତାତ୍ନା ଜେ, ହେଦାଂ ମୁକ୍ଡ଼ାୟ୍ କିଦ୍ଦେଂ ଆଡୁତ୍ ? କି ରାକ୍ୟା କିନି କାଜିଂ କି ମା ସାକ୍ତି ଆକାୟ୍ ? ହୁଡ଼ାଟ୍, ଆପ୍ ଦାକାକିନିତ ନାଗୁଡ଼୍ତିଂ ୱାଚି କିନାପ୍, ଆପ୍ ହାମ୍ଦୁର୍ତିଂ ବାଟା କିନାପ୍; ହେବେମାଚି ମିନ୍କୁ ଏଜ଼ୁଙ୍ଗ୍ ଗାଟାୱାଦାଂ ଏସ୍କି ଆଜ଼଼ି ହାଜ଼଼ି ହାଲ୍ଜି ଗାନ୍ଦା ଆନିକ୍ । ଆପ୍ ଆକାସ୍ମଣ୍ଡଲତିଂ କାର୍ହାତାକା ଉସ୍ପିକିନାସ୍ ଆରି ହିରୁହେନ୍ଦ୍ରାତିଂ ହେ ସବୁନି ଡାବାୟ୍ କିଏତ୍ ।”
ବଲ୍ ମାନିକିନାକାନ୍ ମାପ୍ରୁତି ଆଡିୟେନ୍
ଆନ୍ ଇନେସ୍ ୱାସ୍ତି ମାନାୟ୍ତିଂ ବଚନ୍ କାଜିଂ ସୁସ୍ତା କିଦେଂ ଆଡ୍ନାଂ, ଇଦାଂ କାଜିଂ ମାପ୍ରୁ, ନିତ୍ରେମାପ୍ରୁ ନାଙ୍ଗ୍ ହିକିତ୍ ମାନାୟାର୍ତି ୱେନ୍ଦୁଲ୍ ହିତାନ୍ନା; ହେଦାଂ କାଜିଂ ନାଣାଙ୍ଗେ ଜାଗ୍ରତ୍ କିଦ୍ନାନ୍, ହିକିତ୍ ଲକ୍ ଲାକେ ୱେନି କାଜିଂ ହେୱାନ୍ ନା କିତୁଲ୍ତିଂ ଜାଗ୍ରତ୍ କିଦ୍ନାନ୍ । ମାପ୍ରୁ, ନିତ୍ରେମାପ୍ରୁ ନା କିତୁଲ୍ ରିକ୍ତାତାନ୍ନା, ଆରେ ଆନ୍ ବିରୁଦ୍ ଆୱାତାଂନା, କି ପାଚ୍ବାଗାଂ ହାଲ୍ୱାତାଂନା । ଆନ୍ ଟ୍ରାକ୍ନାକାନ୍ କାଜିଂ ଜାର୍ ଗାଗାଡ଼୍, ଟଡଙ୍ଗ୍ ଜାଲ୍ନି ମାନାୟାର୍ କାଜିଂ ଜାର୍ କୁର୍ୱା ଚଚ୍ଚି ହିତାଂ; ଆନ୍ ଅପ୍ମାନ୍ ଆରି ଏୱିଡ଼ିଂ ଚୁପ୍ୟାନି କାଜିଂ ନା ମୁମ୍ ଡ଼ୁକ୍ୱାତାଂନା । ଇନାକିଦେଂକି ମାପ୍ରୁ, ନିତ୍ରେମାପ୍ରୁ ନାଙ୍ଗେଙ୍ଗ୍ ସାଇଜ କିଦ୍ନାନ୍; ଇଦାଂକାଜିଂ ଆନ୍ ବିପ୍ତି ଆୱାତାଂନା; ଇଦାଂକାଜିଂ ଆନ୍ ଅର୍ଙ୍ଗାକାଲ୍ ଲାକେ ନା ମୁମ୍ ଇଡ଼୍ତାଂନା, ଆରେ ଆନ୍ ଜେ ଲାଜା ଆଉଙ୍ଗ୍, ଇଦାଂ ପୁନାଙ୍ଗ୍ । ଇନେନ୍ ନାଙ୍ଗ୍ ଦାର୍ମିନିକା କିଦ୍ନାନ୍, ହେୱାନ୍ ଲାଗେ ୱାଏନ୍; ଇନେନ୍ ନା ଲାହାଙ୍ଗ୍ ବେରୁ କିଦ୍ନାନ୍ ? ୱାଡ, ଆସେଙ୍ଗ୍ ରବେ ନିଲ୍ନାସ୍; ନା ବେରିୟା ଇନେନ୍ ? ହେୱାନ୍ ନା ଲାଗାଂ ୱାଏନ୍ । ହୁଡ଼ାଟ୍, ମାପ୍ରୁ, ନିତ୍ରେମାପ୍ରୁ ନା ସାଇଜ କିଦ୍ନାନ୍; ନାଙ୍ଗ୍ ଦସି କିଦ୍ନାନ୍ ଇନେନ୍ ? ହୁଡ଼ାଟ୍, ହେୱାର୍ ୱିଜ଼଼ାର୍ ହେନ୍ଦ୍ରା ଲାକେ ପ୍ଡାନାକାର୍ ଆନାର୍; ପ୍ଡିକୁ ହେୱାରିଂ ଗୁହ୍ନିକ୍ । ଇନେନ୍ ନିତ୍ରେମାପ୍ରୁଙ୍ଗ୍ ପାଣ୍ଡ୍ରା ଆନାନ୍ ଆରି ତା ହେବାକାରିତି କାତା ପାଲି କିନାନ୍, ମି ବିତ୍ରେ ଇଲାକେ ଇନେର୍ ମାନାନ୍ ? ଇମ୍ଣି ମାନାୟ୍ ମାଜ୍ଗାତ ହାନାର୍ ଆରି ଅଜଡ଼୍ ଗାଟା ଆଉର୍, ହେୱାନ୍ ନିତ୍ରେମାପ୍ରୁତି ତର୍ଦ ପାର୍ତି କିଏନ୍ ଆରି ଜାର୍ ପର୍ମେସ୍ୱର୍ତି ଜପି ବାର୍ସି କିଏନ୍ । ନାଣି ଆହିକିନାଦେରା, ନାଣିହୁଡ୍ଲା ଜାର୍ତିଂ ହୁର୍ୟାନାଦେରା ଜେ ଏପେଙ୍ଗ୍, ଏପ୍ ୱିଜ଼଼ାଦେର୍ ହୁଡ଼ାଟ୍; ଏପେଙ୍ଗ୍ ଜାର୍ତି ନାଣିଦୁଦ୍ୱା ଆରି ଜାର୍ତିଂ କାଚାନି ନାଣିହୁଡ୍ଲା ବିତ୍ରେ ହାଲାଟ୍ । ନା କେଇଦାଂ ଇଦାଂ ଏପେଙ୍ଗ୍ ପାୟାନାଦେର୍; ଏପେଙ୍ଗ୍ କାନ୍ଦାଣ୍ତ ହୁଞ୍ଜ୍ନାଦେର୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.