Pengo Bible
ଜିସାଇୟ 47
ବାବିଲନ୍ନି ବିଚାର୍
ଆଗ ବାବିଲନ୍ନି ଡିଣ୍ଡା ଗାଡ଼୍ଚେ, ଏନେଙ୍ଗ୍ ଜୁଜ଼଼ି ଦୁଡ଼ିତ କୁଚା; ଆଗ କଲଦିୟନି ଗାଡ଼୍, ଗାଦି ପିସ୍ତି, ବୁଇଁତ କୁଚା; ଇନାକିଦେଂକି ଏନ୍ ଆରେ କଆଣ୍ ଆରି ଡିଣ୍ଡାଗାଡ୍ଚେ ଇଞ୍ଜି ଡାକ୍ପୁଟା କିୟାଆଉୟ୍ । ଜାତାକାଲ୍ ଅଜ଼଼ି ତାସ୍ ନୁଜ଼଼ାଟ୍, ମି ହେନ୍ଦ୍ରା ଉନ୍ଦାଟ୍, ମୁକ୍ତାକା ଜେସି ତୁହିୟା, ପାନା ୱାରାକା କିୟାଟ୍, ନାଗୁଡ଼୍ତ ତାଙ୍ଗ୍ଜି ହାଲା । ମି ନାଗ୍ଡ଼ା ହନାତ୍, ଆଁ, ମି ଲାଜୁନି ବିସ୍ରେନିକା ଲାକେ ଆନାତ୍; ଆପ୍ ତାବାଦୁଲ୍ ଅନାସ୍, ଆରେ ଇନେର୍ ମାନାୟ୍ତି ଗୱାରି ମାନି କିଉଙ୍ଗ୍ । ମା ରାକ୍ୟାକାରିୟା ଇସ୍ରାଏଲ୍ନି ପୁଇପୁୟା ଇସ୍ୱର୍ ଲାକେ, ମେଲ୍ୟାଦିକାରି ନିତ୍ରେମାପ୍ରୁ, ତା ତର୍ । ଆଗ କଲଦିୟାନି ଗାଡ଼୍, ଏନ୍ ମାଜ୍ଗାତ ହାଲ୍ଜି ଚିମ୍ରାଜ଼଼ି କୁଚା; ଇନାକିଦେଂକି ରାଜି ୱିଜ଼଼ୁତିଂ କିତାକାୟ୍ ଇଞ୍ଜି ଏନ୍ ଆରେ ଡାକ୍ପୁଟା ଆଉତ୍ । ଆପ୍ ଜାର୍ ମାନାୟାର୍ କାଜିଂ କାକ୍ରି ଆଜ଼଼ି ତା ଆଦିକାର୍ତିଂ ରାଡ଼ା କିତାପ୍ ଆରି ମି କେଇଦ ହେୱାରିଂ ହେଲାୟ୍ କିତାୟ୍; ଏନ୍ ହେୱାର୍ କାଜିଂ ଅଲପ୍ପା ଦୟା ହପ୍ୱାତାୟ୍; ଏନ୍ ବୁଡ଼୍ହି ମାନାୟ୍ ଜପି ମି ଜୁୱାଣ୍ଡ୍ ଗାଜାଟି କିଜ଼଼ି ଇଡ଼୍ତାୟ୍ । ଆରେ, ଏପ୍ ଇଚାଦେର୍, “ଆପ୍ ସବୁୱେଡ଼ାଂ କିନିକାମାୟ୍ ଆଜ଼଼ି ମାନ୍ଗାନାସ୍; ଇଲାକେ ଏନ୍ ଇ ସବୁ ବିସ୍ରେ ମାନ୍ଦିୟାନ୍ କିୱାତାୟ୍, କି ହେବେନି ହାରିହାରା ପାଡ଼୍ ଏତ୍ କିୱାତାୟ୍ ।” ଇଲାକେ ଗ ସୁକ୍ନିକାୟ୍, ନଙ୍ଗ୍ ଇଦାଂ ୱେନା, ଏନ୍ ପାଣ୍ଡ୍ରାୱାଦାଂ ବାହା କିଜ଼ି ମାନ୍ତ ମାନ୍ତ ଇନାୟା, “ଆପ୍ ମାନାପ୍, ମାଙ୍ଗ୍ ପିସ୍ତି ଆରେ ଇନେର୍ ହିଲୁର୍; ଆସେଙ୍ଗ୍ ରାଣ୍ଡି ଲାକେ କୁଚୁସ୍, କି ହିମ୍ଣାଂ-ହିଲ୍ୱାକା ପୁନୁସ୍,” ମାତର୍ ହିମ୍ଣାଙ୍ଗ୍ ବିନେଆନାର୍ ଆରି ବିବାନାକା ଇ ରିଣ୍ଡି ରଞ୍ଜେମାଟ୍, ରଞ୍ଜେଦିନି ମି କାଜିଂ ଗିଟାଆଦ୍ନାତ୍; ଏପେଙ୍ଗ୍ ଜାର୍ ପାଞ୍ଜ୍ୟାର୍ ଆରି ଏଚେକ୍ ବେସି ଚୁଟ୍କିୟାର୍ ମାଚିସ୍ପା, ହେୱାନ୍ ରିଣ୍ଡି ପୁରା ସମାନ୍ବାବ୍ରେ ମି କାଜିଂ ଗିଟାଆଦ୍ନାତ୍ । ଇନାକିଦେଂକି ଏପ୍ ଜାର୍ ବାନ୍ୟାତ ବେବାର୍ କିନାଦେରା; ଏପ୍ ଇନାଦେରା, ଇନେର୍ ମାଙ୍ଗେଙ୍ଗ୍ ହୁଡ଼୍ଦାନା ଦେରା, ମି ଗିୟାନ୍ ଆରି ବିଦ୍ୟା ମିଙ୍ଗେଙ୍ଗ୍ ବିପତ୍ନିକାନ୍ କିଦ୍ନାତା; ଆରେ ଏପ୍ ଜାର୍ ମାନ୍ତ ମାନ୍ତ ଇନାଦେରା, ଆପ୍ ମାନାପ୍, ମାଙ୍ଗ୍ ପିସ୍ତି ଆରେ ଇନେର୍ ହିଲୁର୍; ଇଲାକେ ମି କାଜିଂ ପାପ୍ ଗିଟାଆଦ୍ନାତ୍, ଏପ୍ ହେବେନି ଇସାପ୍ ପୁନୁଦେର୍; ଆରି, ମି ଜପି ବିପଦ୍ ଗିଟା ଆଦ୍ନାତ୍, ଏପ୍ ହେଦାଂ ଦେହା କିଦେଂ ଆଡୁଦେର୍; ଆରି, ଇନାକା ଏପ୍ ପୁନୁଦେରା, ଇଲାକେ ବୁଡାନାକା ହାଚାଟ୍ରେ ମି ଜପି ଗିଟାଆଦ୍ନାତ୍ । ଏପ୍ ବେଣ୍ଡିୟା କାଡ଼୍ଦାଂ ଜାର୍ତି ଇମ୍ଣି ଚୁଟ୍କିୟାର୍ତାଂ ଆରି ଡିହୁରିର୍ ଇନ୍ୟାସି କସ୍ଟ କିନାଦେର୍, ନଙ୍ଗ୍ ହେଦାଂ ପିହାଟ୍ । ଇନେସ୍କି ଏପ୍ ଉପ୍କାର୍ ପାୟାଦେଂ ଆଡ଼୍ନାଦେର୍, ଇନେସ୍କି ଏନ୍ ଜିତାଦେଂ ଆଡ୍ନାଦେର୍ । ଏପ୍ ଜାର୍ତି ବେସି ଜଜନାତ ୱାସ୍ତାୟ୍ନା; ନଙ୍ଗ୍ ଚୁଟ୍କିୟାର୍, ହୁକାଜଗ୍ହୁଡ଼୍ନାକାର୍, ହାର୍ପାଞ୍ଜି ହୁଡ଼୍ନାକାର୍ ନିଲେର୍ ଆରି ମି କାଜିଂ ଇନାକା ଗିଟାଆଦ୍ନାତ୍, ତାପାଚେ ମିଙ୍ଗେଙ୍ଗ୍ ମୁକ୍ତି କିଏନ୍ । ହୁଡ଼ା, ହେୱାର୍ ପିରି ଲାକେ ଆନାର୍; ନାଣି ହେୱାରିଂ କାଡି କିନାତ୍; ହେୱାର୍ ନାଣିନି କେତ୍ତିତାଂ ଜାର୍ତିଂ ରାକ୍ୟା କିଦେଂ ଆଡୁର୍ । ହେଦାଂ ଉହୁମ୍ ଆନି କାଜିଂ କାଚାନି ଗଡାକାଂ କି ତା ମୁମ୍ଦ କୁଚ୍ନି କାଜିଂ ନାଣି ଲାକେ ଆଉତ୍ । ଇମ୍ଣି ଇମ୍ଣି ବିସ୍ରେ ଏପ୍ କସ୍ଟ କିନାଦେରା, ହେ ସବୁ ମି କାଜିଂ ଇଲାକେ ଗିଟାନାତ୍; ମିଦାଂ ବେଣ୍ଡିୟାତାଂ ଇମ୍ଣାକାର୍ ମି ଲାହାଙ୍ଗ୍ ବେପାର୍ କିନାଦେରା, ହେୱାର୍ତି ୱିଜ଼଼ାର୍ ଇନିହାନି ବୁଲାଜ଼଼ି ଜାର୍ ଜାର୍ ବାହାତ ହାନାଦେର୍, ମିଙ୍ଗେଙ୍ଗ୍ ରାକ୍ୟା କିଦ୍ଦେଂ ଇନେର୍ ମାନୁର୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.