Pengo Bible
ଜିସାଇୟ 42
ନିତ୍ରେମାପ୍ରୁତି ବାଚିକିତି ଆଡ଼ିଏନ୍
ଇନେରିଂ ଆପ୍ ଆସ୍ତାପ୍ନା, ଇଲାକେ ମା ଆଡ଼ିଏନିଂ, ଇନେର୍ତାକେ ମା ଜିବୁନ୍ ସାରି, ଇଲାକେ ମା ବାଚିକିତି ମାନାୟ୍ତିଂ ହୁଡ଼ାଟ୍; ଆପ୍ ତା ଜପି ଜାର୍ ଜିବୁନ୍ ହିତାପ୍ନା; ହେୱାନ୍ ସବୁଜାତି ବିତ୍ରେତାଂ ନିୟାୟ୍ ବିଚାର୍ ତାହିୱାନାନ୍ । ହେୱାନ୍ କିକିରାଡ଼ିଂ କି ଗାଜା କାଟ୍ କିଉର୍, କି ଅହାର୍ହାଜ଼଼ିତ ଜାର୍ ୱେଇ ୱେନିକିଉର୍ । ହେୱାନ୍ ଡ୍ରିଂତିନାଡ଼଼ା ଡ୍ରିକୁନ୍ ଆରି କାଚାନି ବାଡ଼୍ତାତିଂ ପାଗୁନ୍; ହେୱାନ୍ ହାତ୍ପାତାକେ ନିୟାୟ୍ ବିଚାର୍ ତାହିୱାନାନ୍ । ହେୱାନ୍ ପୁର୍ତିତ ନିୟାୟ୍ ବିଚାର୍ ବାହାତ କିୱିପାତେକ୍ ଅଜଡ଼୍ ଆକାୟ୍ ଆରି ହିନ୍ସାସ୍ ଆଉଦେର୍; ଆରେ, ଏସ୍କୁପ୍ଲି ହେୱାନ୍ତି ବିଦିତ କାସି ମାନାର୍ । ଇନେନ୍ ଆକାସିଂ ଉବ୍ଜାୟ୍ କିଜ଼ି ମେକ୍ତାନ୍; ଇନେନ୍ ବୁଇଁତାରେନ୍ ଆରି ହେବେଉବ୍ଜାତି ସବୁ ମାନାୟ୍ତିଂ ନେଞ୍ଜ୍ନାକା ପୁଣ୍ଡାହିନାକା ଆରି ହେ ବିତ୍ରେ ହାନାୱାନାକାରିଂ ଜିବୁନ୍ ହିନାନ୍, ହେ ନିତ୍ରେମାପ୍ରୁ ପର୍ମେସ୍ୱର୍ ଇ କାତା ଇନାନ୍; “ଆପ୍ ନିତ୍ରେମାପ୍ରୁ, ଦାର୍ମିନିକା ମିଙ୍ଗେଙ୍ଗ୍ କୁକ୍ତାତାପ୍ନା ଆରି ମି କେଇ ଆସ୍ତି ମିଙ୍ଗେଙ୍ଗ୍ ରାକ୍ୟା କିଦ୍ନାପ୍, ଆରେ କାଣାର୍ତି କାଣ୍କୁ ଜେଇ କିଦେଂ, ବନ୍ଦିନିକାରିଂ ଜୟ୍ଲ୍ଇଞ୍ଜାଙ୍ଗ୍ ଆରି ମାଜ୍ଗାତ କୁଚ୍ଚିମାନି ମାନାୟ୍ତିଂ ଜୟ୍ଲ୍ଇଞ୍ଜାଙ୍ଗ୍ ହପ୍ଚି ତାନି କାଜିଂ, ଆପ୍ ମିଙ୍ଗେଙ୍ଗ୍ ମନାୟାର୍ତି ନିୟମ୍ ଲାକେ ଆରି ସବୁ ଦେସ୍ନିକାର୍ତି ଅଜଡ଼୍ ଲାକେ କିଜ଼଼ି ବାଚି କିନାପ୍ । ଆନ୍ ନିତ୍ରେମାପ୍ରୁ; ଇଦାଂ ନା ତର୍; ଆରେ, ଆନେଂ ଜାର୍ ଗାଜା ଜାଜ୍ମାଲ୍ନି ବିନ୍ତିଂ, କି ଜାର୍ ୱାରିନି କାର୍ତି ରଚ୍ଚି ପୁତ୍ଡ଼ାକାଂ ହିଉପ୍ । ହୁଡ଼ାଟ୍, ଆଗେ ବିସ୍ରେନିକା ସିଦ୍ ଆତାତ୍, ଆରେ ଆପ୍ ପୁନି ବିସ୍ରେନିକିୟାଂ ହପ୍ନାପ୍; ହେ ଗାଜାତିସ୍ ଆଗେ ହେବିସ୍ରେ ଆପେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାପ୍ ।”
ର ୱାରିନି କେର୍କଣ୍
ହେ ହାମ୍ଦର୍ତ ହାନାକାର୍ ଆରି ହାମ୍ଦୁର୍ ମାଦିନି ୱିଜ଼଼ାଦେର୍, ଏ ଏସ୍କୁପ୍ଲିଂ ଆରି ହେବେବାହାନିକାଦେର୍, ଏପ୍ ୱିଜ଼଼ାଦେର୍ ନିତ୍ରେମାପ୍ରୁତି ଇସାପ୍ରେ ପୁନି କେର୍କଣ୍ ଆରି ପୁର୍ତିନି ହାନ୍ଦିତାଂ ହେୱାନ୍ତି ୱାରିନି କେର୍କଣ୍ କେରାଟ୍ । ବାଟା ଆରି ତା ଗାଡ଼୍ସବୁ, କେଦାର୍ତ କୁଚ୍ଚି ନାସ୍କୁ ସବୁ ଗାଜା କାଟ୍ତାଂ ଇନେର୍; କାଲ୍ନିକାଦେର୍ କେରାଟ୍, ମାଡ଼ିନି ଗବାତାଂ ହେୱାର୍ ଗାଜା କାଟ୍ତାଂ ୱାରି କିୟାର୍ । ହେୱାର୍ ନିତ୍ରେମାପ୍ରୁତିଂ ଗାଜା ଜାଜ୍ମାଲ୍ ହିଏର୍ ଆରି ଏସ୍କୁପ୍ଲିଂ ବିତ୍ରେ ୱାରିକିୟ୍କିଏର୍ ଆରି ପର୍ଚାର୍ କିଏର୍ । ନିତ୍ରେମାପ୍ରୁ ବିର ଲାକେ ୱାନାନ୍; ହେୱାର୍ ସାକ୍ତିନି ନିୟାୟ୍ ଜାର୍ତିଂ ତ୍ରିକାଡ଼୍ କେଦି କିଦ୍ନାନ୍; ହେୱାର୍ ଗାଜା ଚେଗାୟ୍ କିନାର୍, ଆଁ, ହେୱାର୍ ଡାଟ୍କାତା ଇନାର୍; ହେୱାର୍ ଜାର୍ ସାତୃର୍ ବିରୁତ୍ତ ବେସି କାମାୟ୍ କିନାନ୍ ।
ପର୍ମେସ୍ୱର୍ ଜାର୍ ଲୁଗାଂ ଉପ୍କାର୍ କିଦେଂ ପାର୍ମାଣ୍
ଆପ୍ ଲାମାନି କାଡ଼୍ଦ ଚିମ୍ରା ଆତାପ୍ନା; ଆପ୍ ତିର୍ଆଜ଼଼ି ଜାର୍ତିଂ ଜମି କିତାପ୍ନା; ନଂ ଆସେଙ୍ଗ୍ ଗାଟାନି କଗ୍ଲେ ଲାକେ ହିର୍ବାନାସ୍; ଆପ୍ ରଞ୍ଜେମାଟ୍ ବେସି ନେନ୍ଞ୍ଜି ବେସି ବିଲ୍କି ଆନାକା । ଆପ୍ ମାଡ଼ି ଆରି ଜପ୍ଣିମାଡ଼ିତାଂ ଦହନ୍ କିନାକା ଆରି ହେବେନି ରାନ୍ ସବୁ ୱାଚି କିନାପ୍; ଆରେ, ଆପ୍ ହାମ୍ଦୁର୍ତିଂ ଏସ୍କୁପ୍ଲି ଆରେ ନାଗୁଡ଼୍ତିଂ ୱାଚି କିନାସ୍ । ଆରେ, ଆପ୍ କାଣାରିଂ ହେୱାର୍ତି ବୁଦିହିଲ୍ୱି ହାଜ଼ିତିଂ ତାନାସ୍; ଇମ୍ଣି ହାଜ଼ି ହେୱାର୍ ପୁନ୍ୱାତାର୍ନା, ହେ ସବୁ ହାସିତ ହେୱାରିଂ ଅସିହାନାସ୍; ଆପ୍ ହେୱାର୍ ମୁମ୍ଦ ମାଜ୍ଗାତାଂ ଅଜଡ଼୍ ଆରି ବାଙ୍ଗ୍ଟାରିଂ ସଲକ୍ କିନାକା । ଇସବୁ କାମାୟ୍ ଆପ୍ କିଜ଼ି ହେୱାରି ପିହୁସ୍ । ଇମ୍ଣାକାର୍ତି ପୁତ୍ଡ଼ାକାଂ ଆରି ଚାଚ୍ତ ୱାକ୍ତି ପୁତ୍ଡ଼ାକାଂ ଏପେଙ୍ଗ୍ ମା ଇସ୍ୱର୍ ଇଞ୍ଜି ଇନାର୍, ହେୱାର୍ ମୁମ୍ରାତ୍ତି ଆରି ବେସି ଲାଜାନାର୍ ।
ହିକାୟ୍ କିନି କାଜିଂ ଇସ୍ରାଲ୍ନିକା ଆଡ୍ୱାତାତ୍
ଏ ବଇରାର୍, ୱେନାଟ୍; ଏ କାଣାର୍, ଏପେଙ୍ଗ୍ ହୁଡ଼୍ନି କାଜିଂ ଏରିକିଆଟ୍ । ମା ଆଡ଼ିଏନ୍ ପିସ୍ତି କାଣା ଇନେନ୍ ? କି ମା ପକ୍ୟାତି କାବୁର୍ କାରିଆ ଲାକେ ବଇରା ଇନେନ୍ ? ମା ଲାହାଙ୍ଗ୍ ମେହାଜ଼଼ି ମାନି ଲକ୍ ଲାକେ କାଣା ଆରି ନିତ୍ରେମାପ୍ରୁତି ଆଡ଼ିଏନ୍ ଲାକେ କାଣା ଇନେନ୍ ? ଏପ୍ ବେସି ବିସ୍ରେ ହୁଡ଼୍ନାଦେରା, ମାତର୍ ମାନ୍ଦିୟାନ୍ କିଉଦେରା; ତା କିତୁଲିଂ ଜେୟାତାତ୍ନା, ମାତର୍ ହେୱାନ୍ ୱେନୁନା । ନିତ୍ରେମାପ୍ରୁ ଜାର୍ ଦାର୍ମି କାଜିଂ ବିଦିତିଂ ଗାଜାକିଦେଂ ଆରି ୱାରିକିଦେଂ ସାରି ଆତାନ୍ । ମାତର୍ ଇ ମାନାୟାର୍ ଚରିକିଆତାର୍ଣ୍ଣା ଆରି ଚର୍କିୟାଜ଼଼ି; ହେ ୱିଜାର୍ କ୍ଡଇଦ ଡ଼ୁକା ଆରି ଜୟିଲ୍ଇଞ୍ଜ ଡ଼ୁକ୍ତାର୍ନା; ହେୱାର୍ ମୁକ୍ଡ଼ାନି କାଜିଂ ମାନାର୍, ଆରେ ଉଦାର୍କାରିୟା ଇନେର୍ ହିଲୁର୍; ହେୱାର୍ ଚର୍କିୟାତି ଲାକେ ଆନି କାଜିଂ ମାନାର୍ ଆରି ମାସ୍ତି ହିଦାଟ୍ ଇନି କାଜିଂ ଇନେର୍ ହିଲୁର୍ । ଇ କାତାତ ଇନେନ୍ କିତୁଲ୍ ୱେନାନ୍ ଆରି ୱେନ୍ଞ୍ଜି ବେଣ୍ବାକ୍ଣାୟ୍ କିନାକାନ୍ କାଜିଂ ମାନ୍ଦିୟାନ୍ କିନାନ୍, ମି ବିତ୍ରେ ଏଲେଙ୍ଗ୍ ବାର୍ତି ଲକ୍ ଇନେର୍ ମାନାର୍ ? ଜାକୁବ୍ତିଂ ଚର୍କିତି ଲାକେ ଆନି କାଜିଂ ଆରି ଇସ୍ରାଏଲ୍ତିଂ ଉପ୍କାର୍କିନାକାର୍ କେଇଦ ଇନେର୍ ହେଲାୟ୍ କିତାର୍ ? ଇନେର୍ତି ବେରୁତ ଆପେଙ୍ଗ୍ ପାପ୍ କିତାପ୍ନା ଆରି ଇନେର୍ତି ହାଜ଼ିତ ମାନାୟାର୍ ହାଞ୍ଜେଙ୍ଗ୍ ଇଚା କିୱାତାର୍, ଇଚିସ୍ ହେୱାର୍ ଇନେର୍ତି ବିଦି ବଲ୍ ୱେନାକାର୍ ଆୱିତିସ୍, ହେ ନିତ୍ରେମାପ୍ରୁ କି ଇଦାଂ କିୱାତାନ୍ନା ? ଇଲାକେ ହେୱାନ୍ ତା ଜପି ଜାର୍ କାକ୍ରି ଚାଣ୍ଡେନି ଆରି ଜୁଜ୍ ବେସି ୱାକ୍ଚି ହିତାନ୍; ତାପାଚେ ହେଦାଂ ଚାରିବେଣ୍ତାଂ ନାଣି ଆସ୍ତି ନିଙ୍ଗ୍ତାତ୍, ମାତର୍ ହେୱାନ୍ ପୁନ୍ୱାତାନ୍; ଆରେ, ନାଣି ତାଂ କାଚାତାତ୍, ଆତିସ୍ପା ହେୱାନ୍ ମାନ୍ଦିୟାନ୍ କିୱାତାନ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.