Pengo Bible
ଜିସାଇୟ 40:8
Verse 8 is marked below, with the whole chapter around it. Read from the start
ଇସ୍ୱରତି ଲକ୍ତିଂ ବାର୍ସିନି କାବୁର୍
“ନା ଲକୁରିଂ” ଦୁକ୍ସାରାୟ୍ କିୟା, ଦୁକ୍ସାରାୟ୍ କିୟା, ଇଦାଂ ମି ପର୍ମେସ୍ୱର୍ ଇନାନ୍ । ଏପ୍ ଜିରୁସାଲମ୍ତ ମାନ୍ତି କାତା ୱେଚାଟ୍, ଆରେ ତା ଲାଗାନାକା ୱିସ୍ତାତ୍, ତା ଅପ୍ରାଦ୍ କେମା ଆତାତ୍, ହେୱାନ୍ ନିତ୍ରେମାପ୍ରୁତି କେଇଦ ଜାର୍ତି ସବୁ ପାପ୍ କାଜିଂ ରି ଗୁଣ୍ ପାୟାତାତ୍ନା ଇଞ୍ଜି ତା ତାକେ ସୁଣାୟ୍ କିୟା । ରୱାନ୍ତି କାଟ୍ ପର୍ଚାର୍ କିୟା, ଏପେଙ୍ଗ୍ ବାଟାତ ନିତ୍ରେମାପ୍ରୁତି ହାଜ଼ି ଜାଲ୍ଦି କିୟାଟ୍, ବାଲିବାଟା ବିତ୍ରେ ମା ପର୍ମେସ୍ୱର୍ତି କାଜିଂ ଅହାର୍ ହାଡ଼଼ାକ୍ ହାଣ୍କୁ କିୟାଟ୍ । ଜାଣ୍କେତି ଏସ୍କୁପ୍ଲି ଉଚ୍ କିୟାନାତ୍, ୱିସୁ ମାଡ଼ିଂ ଆରି ପାନ୍ତିମାଡ଼ିତିଂ ତାରେନ୍ କିୟାନାତ୍ ଆରି ବାଙ୍ଗ୍ଟା ହାଣ୍କୁ କିୟାନାତ୍, ଆରେ କଦ୍ରା ବାହା ସବୁ ସମାନ୍ କିୟାନାତ୍; ଆରେ, ନିତ୍ରେମାପ୍ରୁତି ଗାଜା ପାଣ୍ ହପ୍ୟାଆନାତ୍ ଆରି ୱିଜ଼଼ାର୍ ଜଗତ୍ନି ଲକୁ ବାରବିନି ପୁର୍ତି ରଞ୍ଜେମାଟ୍ ହେଦାଂ ହୁଡ଼୍ନାର୍; ଇନାକିଦେଂକି ନିତ୍ରେମାପ୍ରୁତି ମୁମ୍ ଇଦାଂ ଇଚାନ୍ନା । ରୱାନ୍ତି କାଟ୍ ଇନାନ୍, “ପର୍ଚାର୍ କିୟାଟ୍,” ତାପାଚେ ରୱାନ୍ ଇଚାନ୍, “ଇନାକା ପର୍ଚାର୍ କିନାସ୍ ?” “ପ୍ରୁର୍ତି ମାତର୍ କାଚ୍ରା ଲାକେ ଆରି ତା ସବୁ ହଲ୍ନାକା ବାଡ୍ତାକେମାନି ପୁଇ ଲାକେ; କାଚ୍ରା ୱାଜ୍ଜି ହାନାତ୍, ପୁଇ କମ୍ଜା ଆନାତ୍; ଇନାଦେଂକି ତା ଜପି ନିତ୍ରେମାପ୍ରୁତି ନେଞ୍ଜ୍ନି ଦୁକାଆନାତ୍, ନିଚୟ୍ ମାନାୟାର୍ କାଚ୍ରା ଲକେ । କାଚ୍ରା ୱାଜ୍ଜି ହାନାତ୍, ପୁଇ କମ୍ଜା ଆନାତ୍; ମାତର୍ ମା ପର୍ମେସ୍ୱର୍ତି ବଚନ୍ ୱିଜ୍ୱିକାଡ଼୍ ପାତେକ୍ ତିର୍ ମାନାତ୍ ।” ଏ ସିୟନ୍ ତାକେ ନେକ୍ରିକାବୁର୍ ପର୍ଚାର୍ କିନାକାୟ୍, ଏପ୍ ପାନ୍ତି ମାଡ଼ିତ ହାଲାଟ୍; ଏ ଜିରୁସାଲମ୍ ତାକେ ନେକ୍ରିକାବୁର୍ ପର୍ଚାର୍ କିନାକାୟ୍, ମି ହାର୍କିଜ଼଼ି ଗାଜା କାଟ୍ କିୟା, ଗାଜା କାଟ୍ କିୟା, ପାଣ୍ଡ୍ରାମା; ଜିହୁଦାନି ଗାଡ଼୍ଦିଂ ଇନା, ଇୱାନ୍ ହୁଡ଼ାଟ୍, ମି ପର୍ମେସ୍ୱର୍ । ହୁଡ଼ାଟ୍, ମାପ୍ରୁ ନିତ୍ରେମାପ୍ରୁ ବାଡ଼୍କାସ୍ନିକାନ୍ ଲାକେ ୱାନାନ୍ ଆରି ତା ମାରା ତା କାଜିଂ କାମାୟ୍ ସାସନ୍ କିନାତ୍; ହୁଡ଼ା, ତା ଲାହାଙ୍ଗ୍ ତା ଇନାମ୍ ମାନାତ୍ ଆରି ହେୱାନ୍ତି ଆଗେ ତା ପାତିପାଡ଼୍ ମାନାତ୍ । ହେୱାନ୍ ମେଣ୍ତାଗଡ଼ିଆ ଲାକେ ଜାର୍ ମାନ୍ଦା ହାରାୟ୍ କିନାନ୍, ମେଣ୍ଡାହିମ୍ଣାକାଂ ହେୱାନ୍ ଜାର୍ ମାରାତ ରୁଣ୍ଡାୟ୍ କିନାନ୍ ଆରି ଜାର୍ ୱାକ୍ତ ହେୱାକାଂ ଏତ୍ଦି ଅନାନ୍, ଆରେ, ମାୟ୍ଉଣିକିୟାଙ୍ଗ୍ କାଲେ କାଲେ ତାଙ୍ଗିକିନାନ୍ ।
ଇସ୍ରାଏଲ୍ନି ଇସ୍ୱର୍ ଲାହାଙ୍ଗ୍ ଇନେର୍ ହିଲୁର୍
ଇନେର୍ ଜାର୍ କେଇନି ହାତ୍ତ ଏସ୍ରାସି ଲାଚ୍ଚାନ୍ନା, ପାନା ହୁଦାଂ ଆକାସିଂନି ଇସାପ୍ କିତାନ୍ନା ଆରି ଟପାତ ପୁର୍ତିନି ଦୁଡ଼ିସବୁ ପ୍ରତ୍ତାନ୍ନା, ମାଡ଼ିତିଂ ଲିଟ୍କିତ ଆରି ପାନ୍ତିମାଡ଼଼ିତଂ ଲାଚ୍ନି ବାଡ୍ଗେତାଂ ତୁଡ଼଼ାୟ୍ କିଦେଂ ଆଡ୍ନାର୍ କି ? ନିତ୍ରେମାପ୍ରୁତି ଜିବୁନ୍ତିଂ ଇନେର୍ ଆଦେସ୍ ହିତାର୍ନା, କି ମତ୍ରି ଆଜ଼଼ି ଇନେର୍ ତାଂ ହିକ୍ୟା ହିତାର୍ନା ? ହେୱାନ୍ ଇନେର୍ ଲାହାଙ୍ଗ୍ କୁଟ୍ କିତାର୍, ଇନେନ୍ ତାଂ ହିକ୍ୟା ହିତାନ୍ ଆରି ବିଚାର୍ନି ହାଜ଼ି ତାଂ ହିକାୟ୍ କିତାନ୍ ଆରି ବୁଦି ହିକ୍ୟା ହିତାନ୍ ଆରି ଚିନ୍ତାକିନିସାକ୍ତିନି ହାଜ଼ି ତାଙ୍ଗେଙ୍ଗ୍ ଚଚ୍ଚାନ୍ ? ହୁଡ଼ାଟ୍, କୁଟୁମ୍ନିକାର୍ ଗାଗ୍ରିନି ଏସ୍ଟପା ଲାକେ ଆରି ଲିଟ୍କିନି ଦୁଡ଼ିହତ୍ନି କାଣା ଲାକେ ଗାଣାକିନାକାନ୍ ଆନାନ୍; ହୁଡ଼ା, ହେୱାନ୍ ଏସ୍କୁପ୍ଲି ବେସି ହିରୁ ଜିନିସ୍ ଲାକେ ନିକ୍ନାନ୍ । ଆରେ, ଲିବାନନ୍ ମାର୍ ଡାହାୟ୍କିନି କାଜିଂ ଆରି ହେବେନି ପସୁଙ୍ଗ୍ ପୁଜାଗାର୍ଣି କାଜିଂ ଜଚେସ୍ଟ ଆକାୟ୍ । ସବୁ ଦେସ୍ନିକାର୍ ତା ଲାଗାୟ୍ ଇନାକା ଆକାୟ୍, ହେୱାର୍ ତା ଲାଗାୟ୍ ମଲ୍ ହିଲୁତ୍ । ଲାଗିଂ ଏପେଙ୍ଗ୍ ଇନେର୍ ଲାହାଙ୍ଗ୍ ପର୍ମେସ୍ୱର୍ତିଂ ତୁଲାୟ୍ କିନାଦେର୍ ? କି ଇମ୍ଣି ପୁତ୍ଡ଼ାତିଂ ତା ଲାକେ କିନାଦେର୍ ? ହନାରିର୍ ପୁତ୍ଡ଼ାଙ୍ଗ୍ ଚାଚ୍ତ ୱାକ୍ତିସ୍ ଆରି ହନାନି ହେଦାଂ ରଚ୍ନାକାନ୍, ଆରେ ତା କାଜିଂ ରୁପା ହିକିଡ଼ିଙ୍ଗ୍ ଜାଲ୍ଦି କିନାର୍ । ଇମ୍ଣି ଲକ୍ ଇ ବାନି ଇନାମ୍ କାଜିଂ ଏଚେକ୍ ଅର୍କିତ୍, ହେୱାନ୍ ନସ୍ଟକିନି ଇମ୍ଣି ମାର୍ ବାଚି କିନାନ୍, ହେୱାନ୍ ଗୁଚାୱି ର କାର୍ତି ପୁତ୍ଡ଼ା ରଚ୍ନି କାଜିଂ ରୱାନ୍ ହାର୍ଦାକାନ୍ ରଚ୍ନାକାନିଂ ଡେକ୍ନାନ୍ । ଏପ୍ କି ପୁନୁଦେରା ? ଏପେଙ୍ଗ୍ କି ୱେନୁଦେରା ? ଆଗେତାଂ କି ମିଙ୍ଗେଙ୍ଗ୍ ୱେଚ୍ଚାୱାତାପ୍ନା ? ପୁର୍ତି ବୁଡାତିତାଂ କି ଏପେଙ୍ଗ୍ ବୁଜାଉଦେରା ? ହେୱାନ୍ ପୁର୍ତି ଜପି କୁଚ୍ଚାନାନ୍ ଆରେ ତାରେନ୍ ମାନାୟ୍ ପାମିଙ୍ଗ୍ ଲାକେ; ହେୱାନ୍ ଲେଞ୍ଜ୍କେଦ୍ତି ଲାକେ ଆକାସିଂ ପାହ୍ନାନ୍, ଆରେ କୁଚ୍ନି କାଜିଂ ତୁମ୍ ଲାକେ ହେଦାଂ ମେଙ୍ଗ୍ନାନ୍; ହେୱାନ୍ ମାଜାନାରିଂ ତାରେନ୍କିନାନ୍; ହେୱାନ୍ ପୁର୍ତିନି ବିଚାର୍କାରିୟାରିଂ ମଲ୍ହିଲ୍ୱାକାନ୍ କିନାନ୍ । ଆଁ, ହେୱାର୍ ରୁଜ୍ୟା ଆୱାତାର୍ନା; ଆଁ, ହେୱାର୍ ୱିତ୍ୟାୱାତାର୍ନା; ଆଁ, ହେୱାର୍ତି ମୁଣ୍ଡିନି ଚିରାଙ୍ଗ୍ ବୁଇଁତ ଆର୍ୱିତିକ୍ନା, ଆରେ ହେୱାନ୍ ହେୱାର୍ତି ଜପି ତୁବ୍ନାର୍, ତାପାଚେ ହେୱାର୍ ୱାଜ୍ଜିହାନାର୍ ଆରି ହୁଜ଼଼ାୱାଣି ପିରି ଲାକେ ହେୱାରିଂ ଉପ୍ଚି ଆନାତ୍ । ଇଲାକେ ହେ ଦାର୍ମି ପୁଇପୁୟା ମାନାୟ୍ ଇନାର୍, ଆପ୍ ଇନେର୍ତି ସମାନ୍ ଆଦେଂ ଆଡ୍ନାପ୍, ଇଲାକେ ଇନେର୍ ଲାହାଙ୍ଗ୍ ଏପେଙ୍ଗ୍ ନାଂ ଡାଡ଼଼ାୟ୍ କିନାଦେର୍ ? ଜପି ମୁମ୍ କିଜ଼଼ି ହୁଡ଼଼ାଟ୍, ଇ ପୁର୍ତି ୱିଜ଼଼ୁ ଇନେର୍ ଉବ୍ଜାୟ୍ କିତାନ୍ନା ? ହେ ମେଲ୍ୟାର୍ସବୁନି ନ୍ୟାୟ୍ ଏଜ୍କିନି ଇସାବ୍ରେ ହେୱାରିଂ ହପ୍ଚି ତାହିୱାନାର୍; ହେୱାନ୍ ୱିଜ଼଼ାର୍ ତର୍ ଆସ୍ତି ହେୱାରିଂ କୁକ୍ନାନ୍, ହେୱାନ୍ ବେସି ସାକ୍ତିତ ଗାଜାଜିବୁନ୍ ହୁଦାଂ ଆରି ହେ ସାକ୍ତି ହୁଦାଂ ହେଦାଂ ରଞ୍ଜାଙ୍ଗ୍ ପା ଡ଼଼ୁଗ୍ଜି ମାନୁତ୍ । ମା ହାଜ଼ି ନିତ୍ରେମାପ୍ରୁତି ତାକେ ଡ଼ୁକ୍ତାକା ଆରି ମା ବିଚାର୍ ମା ପର୍ମେସ୍ୱର୍ତି ଗିୟାନ୍ନି ଏଚେକ୍ ଆଗେନିକା, ଏ ଜାକୁବ୍, ଏନ୍ ଇନାକିଦେଂ ଇଦାଂ ଇନାୟା, ଏ ଇସ୍ରାଏଲ୍, ଏନ୍ ଇନାକିଦେଂ ଇଦାଂ ଇନାୟା ? ଏପ୍ କି ପୁନୁଦେରା ? ଏପ୍ କି ୱେନୁଦେରା ? ପୁର୍ତିନି ବାଟାସବୁ ଉପ୍ଜାଣ୍କାର୍ୟା ଆଗେତାଂମାନି ୱିଜ୍ୱି ପର୍ମେସ୍ୱର୍ ନିତ୍ରେମାପ୍ରୁ ୱାହୁନ୍, କି ଜମୁନ୍; ହେୱାନ୍ତି ବୁଦି ବୁଜାଦେଂ ଆଗେଆନାକାନ୍ । ହେୱାନ୍ ୱାସ୍ତି ଲଗାଂ ସାକ୍ତି ହିନାନ୍ ଆରି ବାଡ଼୍କାସ୍ ହିଲ୍ୱାକାରିଂ ବାଡ଼୍କାସ୍ ବାଡାୟ୍ କିନାନ୍ । କ୍ଡଗେକାର୍ ହିନା ୱାହ୍ନାର୍ ଆରି ଜମ୍ନାର୍, ଆରେ ବେଣ୍ଡିୟାର୍ ଇନେସ୍ଆତିସ୍ପା ଗୁର୍ନାର୍; ମାତର୍ ଇମ୍ଣାକାର୍ ନିତ୍ରେମାପ୍ରୁ କାସିମାନାର୍, ହେୱାର୍ ପୁନି ପୁନି ବପୁ ପାୟାନାର୍; ହେୱାର୍ ଚେଚାଣ୍ ପଟି ଲାକେ ମାରାଙ୍ଗ୍ତାଂ ଜପି ନିଙ୍ଗ୍ନାର୍; ହେୱାର୍ ଜମ୍ୱାଦାଂ ଉମ୍ନାର୍: ହେୱାର୍ ୱାହ୍ୱାଦାଂ ହାନାର୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.