Pengo Bible
ଜିସାଇୟ 38
ହିଜକିୟତି ନାଦାର୍ ଆରି ଉଜ୍ଆନାକା
ହେ ସମୁତ ହିଜକିୟତି ଅବସ୍ତା ନାଦାର୍ ଆଜ଼଼ିମାଚାନ୍ । ତାପାଚେ ଆମସ୍ତି ମେହି ଜିସାଇୟ ବେଣ୍ବାକ୍ଣାୟ୍ ବେଣ୍ବାକ୍ଣାୟ୍କିନାକାନ୍ ତା ଲାଗାଂ ୱାଜ଼଼ି ଇଚାନ୍, “ନିତ୍ରେମାପ୍ରୁ ଇ କାତା ଇନାନ୍, ଏପେଙ୍ଗ୍ ଜାର୍ ଇଲ୍ ବିସ୍ରେ ଗାଡିକିୟାଟ୍; ଇନାକିଦେଂକି ଏପେଙ୍ଗ୍ ହାନାଦେର୍, ଜିଉଦେର୍ ।” ଇବେତାଂ ହିଜକିୟ କାତିନିପ ମୁମ୍ ହୁଡ଼୍ଜି ନିତ୍ରେମାପ୍ରୁ ତାକେ ପାର୍ତାନା କିଜ଼଼ି ଇଚାନ୍; “ଏ ନିତ୍ରେମାପ୍ରୁ, ଆନ୍ ଗୱାରି କିଦ୍ନାଙ୍ଗା, ଆନ୍ ଇନେସ୍କିଜ଼ି ହାତ୍ପାତ ଆରି ହୁଦାର୍ ୱାସ୍କିତ ମି ମୁମ୍ଦ ୱାନାଙ୍ଗା ଆରି ନି କାଣ୍କୁତ ହାର୍ କାମାୟ୍ କିତାଂନା, ଇଦାଂ ନଂ ଏତୁକିଦା ।” ଆରେ, ହିଜକିୟ ବେସି ଆଡ଼୍ବାତାନ୍ । ହେପଦ୍ନା ଜିସାଇୟ ଲାଗାଂ ନିତ୍ରେମାପ୍ରୁତି ବଚନ୍ ୱାତାତ୍ । ଏପ୍ ହାଲ୍ଜି ହିଜକିୟଙ୍ଗ୍ ଇନାଟ୍, ନିତ୍ରେମାପ୍ରୁ, ମି ଆକର୍-ଦାଉଦ୍ନି ପର୍ମେସ୍ୱର୍ ଇ କାତା ଇନାନ୍, “ଆପ୍ ମି ପାର୍ତାନା ୱେଚାପ୍ନା, ମି କାଣେଲିଂ ହୁଡ଼୍ତାପ୍ନା, ହୁଡ଼ା, ଆପ୍ ମି ଆଇଁସ୍ ପନ୍ଦର୍ ବାର୍ହୁ ବାଡାୟ୍ କିନାପ୍ । ଆରେ, ଆପ୍ ମିଙ୍ଗେଙ୍ଗ୍ ଆରି ଇ ଗାଡ଼୍ତିଂ ଅସୁରିୟ ରାଜା କେଇଦାଂ ରାକ୍ୟା କିନାକା ଆରି ଆନ୍ ଇ ଗାଡ଼୍ନି ପାକ୍ୟା ଆନାପ୍ । ଆରେ, ନିତ୍ରେମାପ୍ରୁ ଜାର୍ ୱେଚ୍ଚି ବଚନ୍ ଜେ ପୁରା ନିତ୍ରେମାପ୍ରୁତି ଇ ଚିନ୍ ଆନାତ୍; ହୁଡ଼ାଟ୍, ଆପ୍ ଆହସ୍ର ୱେଡ଼ା ଗିଟାନିତାକେ ୱେଡ଼ାନି ଅଜ୍ଡ଼୍ ଏଚେକ୍ ଆଗ୍ଦ ହାନାତା, ହେଦାଂ ଦସ୍ ପାଦ୍ ପାଚ୍ବାଗାଂ ମାସ୍ତି ତାନାସ୍ ।” ତାପାଚେ ଗିଟାନିତ ୱେଡ଼ା ଇମ୍ଣି ଦସ୍ ପାଦ୍ ଆଗେ ହାଲ୍ଜି ମାଚାତ୍, ପାଚ୍ବାଗାଂ ହେଏଚେକ୍ ମାସ୍ଦି ୱାତାତ୍ । ହିଜକିୟନି ରାଜା ନାଦାର୍ ଆଜ଼଼ି ଜାର୍ ନାଦାର୍ତାଂ ଉଜ୍ ଆତି ପାଚେ ଇଦାଂ ଲେକିକିତାନ୍, ଇଚିସ୍, ଆନ୍ ଇଚାଙ୍ଗ୍, “ଆନ୍ ଜାର୍ ଆଇଁସ୍ନି ୱେଡ଼ାନି ମୁଣ୍ଡାମେଦାନ୍ ସମୁତ ପାତାଡ଼୍ନି ହଣିଦୁୱେର୍ତ ହଣାଙ୍ଗ୍; ଆନ୍ ବାର୍ହୁ ସବୁନି ବାକି ଗାଟାନିତାକେ ଗାଟାଆୱାତାଂ । ଆନ୍ ଇଚାଙ୍ଗ୍ ନିତ୍ରେମାପ୍ରୁ, ଜିତାକାର୍ ଦେସ୍ତ ନିତ୍ରେମାପ୍ରୁଙ୍ଗ୍ ହୁଡ଼ୁଙ୍ଗ୍; ଆନ୍ ଜଗତ୍ନିକାର୍ ଲାହାଙ୍ଗ୍ ମାନାୟ୍ତିଂ ଆରେ ହୁଡ଼ୁଙ୍ଗ୍ । ନା ଆଇଁସ୍ ପୁରାଆନାତା ଆରି ମେଣ୍ଡାଗଡ଼ିୟା ତୁମ୍ଲାକେ ନା ତାଂ ଗୁଚାତାତ୍ନା; ଆନ୍ ସିଲାଣି ମିସିନ୍ ଲାକେ ନା ଜିବୁନ୍ କିନ୍ଦ୍ରାଆଦ୍ନାତା; ହେୱାନ୍ ନାଂ ଡ଼ଚ୍ନିନୁଲ୍ଲାକେ ରାସ୍ଦି ତୁଇଦାନାର୍; ର ନାଣା ବିତ୍ରେ ହେୱାନ୍ ନାଂ ସେସ୍ କିଦ୍ନାନ୍ । ହାର୍ତାନାଣା ଆନ୍ ନନାକାତ କାନ୍ଦାଣ୍ ଆତାଂ ଇନେସ୍କି ସିୟଁ, ହେଲାକେ ହେୱାନ୍ ନା ପ୍ଡେକୁ ସବୁ କୁଦ୍ରି କିନାନା; ର ନାଣା ବିତ୍ରେ ଏନେଙ୍ଗ୍ ନାଂ ସେସ୍ କିଦ୍ନାୟ୍ । ଇନେସ୍କି ହିରୁ ପଟିଂ ଲାକେ ଆଡ୍ବିନିଂ, ହେଲାକେ ଆନ୍ ଚିଙ୍ଗ୍ ଚିଙ୍ଗ୍ତ ସବଦ୍ କିତାଂ; ଆନ୍ ବୁଡାନି ଲାକେ କାନ୍ଦାଣ୍ ଆତାଙ୍ଗ୍; ଜପି ହୁଡ଼୍ଜି ହୁଡ଼୍ଜି ନା କାଣ୍କୁ ରାତାଂ ଆତ୍ତିକେ; ଏ ନିତ୍ରେମାପ୍ରୁ, ଆନ୍ ଜାତୁନ୍ଆୱାଦାଂ, ଏନେଙ୍ଗ୍ ନା ସାକା ଆଦା । ଆନ୍ ଇନାକା ଇଞ୍ଜ୍ନାଂ ? ହେୱାନ୍ତ ନାଂ ଇନ୍ଚାନ୍ନା, ନିଜେ ପା ହେଦାଂ ସାଦୁନ୍ କିତାନ୍ନା; ଆନ୍ ଜାର୍ ପାରାଣ୍ତିଂ ଦୁକ୍ତ କାଜିଂ ସବୁ ବାର୍ହୁ କାଲେ କାଲେ ହାନାଙ୍ଗ୍ । ଏ ମାପ୍ରୁ, ଇସବୁ ହୁଦାଂ ମାନାୟ୍ ଜିନାର୍, ଆରେ ହେବେ ଆଁ ପୁରା ଲାକେ ନା ୱାସ୍କିନି ଜିବୁନ୍ ମାନାତ୍, ଇଲାକେ ଏନ୍ ନାଙ୍ଗେଙ୍ଗ୍ ଉଜ୍କିଜ଼଼ି ଜିପ୍ତା । ହୁଡ଼ା, ଆନ୍ ଜାର୍ତି ସାନ୍ତି କାଜିଂ ଗାଜା ଦୁକ୍ ଗାଟାତାଂ; ମାତର୍ ଏନେଂ ନା ଜିବୁନ୍ କାଜିଂ ଜିଉନଜ଼଼ି ବୁଡାନିତାଂ ଉଦାର୍ କିତ୍ତାୟ୍; ଇନାକିଦେଂକି ଏନେଙ୍ଗ୍ ଜାର୍ ପାଚ୍ ବାଗାଂ ନା ପାପ୍ସବୁ ତୁହିତାୟ୍ନା । ଇନେସ୍କି ପାତାଡ଼୍ ନିଦାଂ ୱାରିକିଇ କିଦେଂ ଆଡୁତ୍, ହାକିତାଂ ଗୁଣ୍ କେର୍ଦେଂ ଆଡୁତ୍; କ୍ଡୟିଦ ହାଚାକାନ୍ ନି ହାତ୍ପାନିକା ପାୟାଜ଼଼ି ଆହା ଇଚା କିଦେଂ ଆଡୁର୍ । ଇନେସ୍କି ନଙ୍ଗ୍ ଆନ୍ ଇଞ୍ଜ୍ନାଙ୍ଗା, ହେଲାକେ ଜିତି ମାନାୟ୍, କେବଲ୍ ଜିତି ମାନାୟ୍ ନି କେର୍କଣ୍ କିନାର୍; ଆବା ମାଜ଼଼ିରିଂ ନି ହାତ୍ପାନିକା ପୁନି କିନାନ୍ । ନିତ୍ରେମାପ୍ରୁ ନାଂ ମୁକ୍ଡ଼ାୟ୍ କିଦ୍ଦେଂ ଜାଗ୍ରତ୍; ଇଲାକେ ଆସେଙ୍ଗ୍ ଜିବୁନ୍ ମାନିପାତେକ୍ ନିତ୍ରେମାପ୍ରୁତି ଇଞ୍ଜ ଚାପଡ଼ିଂ ଆରି ଡୁଡୁଙ୍ଗାଂ ହୁଦାଂ କେର୍କଣ୍ କେର୍ତାଂ ।” ଜିସାଇୟ ଇଚାନ୍, “ହେୱାର୍ ତଗା ମାର୍ ପାଲା ଅଜ଼଼ି ଗାଅ ଜପି କାସାଟ୍, ତାପାଚେ ହେୱାନ୍ ଉଜ୍ନାନ୍ ।” ହିଜକିୟ ପା ଇଞ୍ଜିମାଚାନ୍, “ଆନ୍ ଜେ ନିତ୍ରେମାପ୍ରୁତି ଇଞ୍ଜ ହାନାଂ, ଇବେନି ଚିନ୍ ଇନାକା ?”
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.