Pengo Bible
ଜିସାଇୟ 35
ମୁକୁଡ଼ାୟ୍କିନି ହାଜ଼ି
ବାଲିବାଟା ଆରି ଚିମ୍ରା ବାହାତ ୱାର୍ଆ ଆନାତ୍; ଆରେ, ବାଲିବାଟା ସାର୍ଦାଜ଼଼ି ଗଲାପ୍ ଲାକେ ୱାରିୟା ଆନାତ୍ । ହେଦାଂ ଏଚେକ୍ ୱାରିୟା ଆନାତ୍, ଆରେ ୱାରି ଆରି କେର୍ଜି ସାର୍ଦା ଆନାତ୍; ଲିବାନନ୍ତି ସାକ୍ତି, କର୍ମିଲ୍ ଆରି ସାରଣତି ହଲ୍ନାକା ତାଙ୍ଗେଙ୍ଗ୍ ହିଆ ଆନାତ୍; ହେୱାର୍ ନିତ୍ରେମାପ୍ରୁତି ଆରି ମା ପର୍ମେସ୍ୱର୍ତି ଜାଜ୍ମାଲ୍ ହୁଡ୍ନାର୍ । ଏପେଙ୍ଗ୍ ନାଦାର୍ କେଇଦିଂ ସାକ୍ତି କିୟାଟ୍ ଆରି ତ୍ରିଗ୍ନି ମେଣ୍ଡାକାଂ ସୁସ୍ତା କିୟାଟ୍ । ପାଣ୍ଡ୍ରାନି ମାନାୟାରିଂ ଇନାଟ୍, ସାସ୍ ଆଡ, ପାଣ୍ଡ୍ରା ଆମାଟ୍; ହୁଡ଼ାଟ୍, ମି ପର୍ମେସ୍ୱର୍ ତାବାଦୁଲ୍ ହୁଦାଂ, ପର୍ମେସ୍ୱର୍ତି ପାତିପାଡ଼୍ ହୁଦାଂ ୱାନାନ୍; ହେୱାନ୍ ୱାଜ଼଼ି ମିଙ୍ଗେଙ୍ଗ୍ ମୁକ୍ଡ଼ାୟ୍ କିଦ୍ନାନ୍ । ହେପଦ୍ନା କାଣାତି କାଣ୍କୁ ଜେୟା ଆନିକ୍ ଆରି ବୈରାର୍ତି କିତୁଲିଂ ଜେୟାଆନିକ୍ । ହେପଦ୍ନା ମେଟା ଲଗୁ କଟ୍ରା ଲାକେ ଗୁମ୍ନାର୍ ଆରି କନ୍ଦାତି ୱେନ୍ଦୁଲ୍ କେର୍ନାତ୍; ଇନାକିଦେଂକି ବାଟାତ ଏଜ଼ୁଙ୍ଗ୍ ଆରି ବାଲିବାଟାତ ଜଡ଼଼ି ହତ୍ନାତ୍ । ଆରେ, କଟ୍ରାଏସ୍କି ଏଜ଼ୁଙ୍ଗ୍ ଆନିକ୍ ଆରି ୱାଚ୍ଚି ବୁଇଁ ନାଗୁଡ଼୍ ଆନାତ୍; କଲ୍ୟାଙ୍ଗ୍ ତିନି ବାହା ବିତ୍ରେ, ହେୱାଙ୍ଗ୍ତି ହୁଞ୍ଜିନି ବାହାତ କାଚ୍ରା, ନାଡ଼ା ଆରି ରାନ୍ ଆନାତ୍ । ଆରେ, ହେବେ ର ଅହାର୍ହାକ୍ଡ଼ି ଆରି ହାଜ଼ି ଆନାତ୍, ହେଦାଂ ପୁଇପୁୟା ହାଜ଼ି ଇଞ୍ଜି ତର୍ ଆନାତ୍; ହେଦାଂ କେବଲ୍ ହେୱାର୍ତି କାଜିଂ ଆନାତ୍, ମାତର୍ ଇନେର୍ପା ରାଡ଼ା ନିକାର୍ ହେ ଜପି ହାଞ୍ଜେଙ୍ଗ୍ ଆଡୁର୍; ହାଜ଼଼ି ତାଂନାକାର୍ ଆରି ବୁଦିହିଲ୍ୱାକାର୍ ପା ହେବେ ବୁଲ୍କା ଆଉର୍ । ହେବେ ଇମ୍ଣାକାପା ସିୟଁ ମାନୁତ୍, କିବା ଇମ୍ଣାକାପା ବୟଙ୍କାର୍ନି ଜାତ୍ ତା ଜପି ହାଲୁକ୍, ହେୱାଙ୍ଗ୍ ହେବେ ଡିହାଆଦୁକ୍; ମାର୍ ମୁକ୍ଡ଼ାତି ମାନାୟ୍ ହେବେ ହାଞ୍ଜେଙ୍ଗ୍ ଆଡ୍ନାର୍; ଆରେ, ନିତ୍ରେମାପ୍ରୁତି ମୁକ୍ତିପାୟାତି ମାନାୟାର୍ ମାସ୍ଦି ୱାନାର୍ ଆରି କେର୍ଜି ସିୟନ୍ତ ଏକାନାର୍ ଆରି ନିତ୍ରେତିର୍ ୱାରି ହେୱାର୍ତି କାପ୍ଡ଼ାତ ଟପ୍ରି ଆନାତ୍; ହେୱାର୍ ୱାରି ଆରି ସାର୍ଦା ପାୟାଆନାର୍, ଆରି ଦୁକ୍ ଆରି ଆଡ଼୍ବାନାକା ଦେହା ହାନାତ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.