Pengo Bible
ଜିସାଇୟ 32
ରୱାନ୍ ଦାର୍ମି ରାଜା
ହୁଡ଼ାଟ୍, ରୱାନ୍ ରାଜା ଦାର୍ମିନିକା ଇସାପ୍ରେ ରାଜ୍ କିନାନ୍ ଆରି ଆଦିକାରିର୍ ନ୍ୟାୟ୍ଇସାପ୍ରେ ସାସନ୍ କିନାନ୍ । ଆରେ, ଜାଣ୍କେ ଦୁକାତିଂ ଆହ୍ର ବାହା ଆରି ଡ଼଼ୁଇବାର୍ହାନି ଆହ୍ର, ୱାଚ୍ଚି ବାହାତ, ଜାରାଣ୍, କେତ୍ତାକା ବୁମିତ ବେସି ଗାଜା କାଲ୍ନି ହିତ୍ଡ଼଼ି ଲାକେ ଆନାନ୍ । ଆରେ, କ୍ଡେଞ୍ଜ୍ନାକାର୍ କାଣ୍କୁ ଜାଲ୍ୟା ଆଉକ୍ ଆରି ୱେନାକାର୍ କିତୁଲିଂ ମାନ୍ଦିୟାନ୍ କିନିକ୍ । ଆରେ, ବୁଦି ହିଲ୍ୱାର୍ ମାନ୍ ପାୟାଆନାନ୍ ଗିୟାନ୍ ପାୟାନାର୍ ଆରି ତତ୍ଲାର୍ତି ୱେନ୍ଦୁଲ୍ ଆଡ଼୍ୱାତାଂ ବେଣ୍ କିନାନ୍ । ବୁଦିହିଲ୍ୱି ମାନାୟ୍ତିଂ ଗାଜାକାନ୍ ଲାକେ ଇନ୍ୟାଆଉତ୍, ହୁଜାଣି ମାନାୟାତିଂ ଆଦିକ୍ ସନ୍ମାନ୍ ହିୟାଆଉତ୍ । ଇନାକିଦେଂକି ମୁର୍କିଆ କାମାୟ୍ କିନି କାଜିଂ ଆରି ନିତ୍ରେମାପ୍ରୁତି ବିରୁଦ୍ତ ବୁଲ୍କାନାକା କାତା ଇନି କାଜିଂ, ନାସ୍କିନି ପାରାଣ୍ ୱାରାକା କିନି କାଜିଂ ଆରି ଏସ୍କିନି ଏଜ଼଼ୁଙ୍ଗ୍ ମୁନା କିନି କାଜିଂ ବୁଦିହିଲ୍ୱି ମାନାୟ୍ ବାନ୍ୟା କାତା ଇନାନ୍ ଆରି ତା ନେଞ୍ଜାଡାକି ଅଦରମ୍ ହାନ୍ଦାୟ୍ କିନାନ୍ । ଆରେ, କାପ୍ଟିଆ ମାନାୟ୍ତି ଉପାୟ୍ସବୁ ବାନ୍ୟା; ହେୱାନ୍ ହୁଦାର୍ ମାନାୟ୍ତିଂ, ଇଚିସ୍, ହାତ୍ପା କାତା ଇନିହିଂ ଅର୍କିତ୍ରିଂ ମିଚ୍ କାତା ହୁଦାଂ ନାସ୍ କିନି କାଜିଂ ଜଜନା କିନାନ୍ । ମତର୍ ଗାଜାକାନ୍ ଗାଜା ଜଜନା କିନାନ୍ ଆରିଗାଜାକାନ୍ ସେସ୍ଟାତ ତିର୍ ମାନ୍ଗାନାତ୍ ।
ବିଚାର୍ ଆରି ଉଦାର୍
ଏ ସୁକ୍ନି କଗ୍ଲେକ୍, ଏପେଙ୍ଗ୍ ନିଂଜି ନା କାତା ୱେନାଟ୍, ଏ ଚିନ୍ତାହିଲ୍ୱି ଗାଡ଼୍ଚେକ୍, ନା ବଚନ୍ତ କିତୁଲିଂ ହିୟାଟ୍ । ଏ ଚିନ୍ତାହିଲ୍ୱି କଗ୍ଲେକ୍, ଏପେଙ୍ଗ୍ ର ବାର୍ହୁ ଜପି ଏଚେହଟ୍ ବିପ୍ତି ଆନାଦେର୍; ଇନାକିଦେଂକି ଅଙ୍ଗୁର୍ପାଡ଼୍ ଅକେଟ୍ ଆଦ୍ନାତ୍, ପାଡ଼୍ ହେନ୍ତେଙ୍ଗ୍ ସମୁ ୱାଉତ୍ । ଏ ସୁକ୍ନି କଗ୍ଲେକ୍, ଏପେଙ୍ଗ୍ ତ୍ରିଗାଟ୍; ଏ ଚିନ୍ତାହିଲ୍ୱିକାଦେର୍, ବିପ୍ତି ଆଡ; ମି ହେନ୍ଦ୍ରା ଦାକ୍ଚି ନାଗ୍ଡ଼଼ା ଆଡ ଆରି ମି ମ୍ଡେଙ୍ଗାତ ହିରୁ ବାସ୍ତା ଉସ୍ପାଟ୍ । ହେୱେକ୍ ହୁଡ୍ନି କାଜିଂ ମାନ୍ଜାଲ୍ନି ଉସାସ୍ ବୁଇଁ ଆରି ପାଡ଼୍ଆହ୍ନି ଅଙ୍ଗୁର୍କୁଡ଼଼ି କାଜିଂ ନେଞ୍ଜାଡାକିତ ଇଡ଼଼ିୟା ଆନିକ୍ । ନା ମାନାୟାର୍ ବୁମିନି ୱାଡ଼଼ି ଲାକେ ଆରି ଲେକାଜାମୁ ମାର୍ଲାକେ ଆନାତ୍; ଆଁ, ୱାରିନିକାଦେର୍ ଗାଡ଼୍ନି ବାର୍ବିନ୍ ୱାରି ଇଲ୍ ହେଦାଂ ହେଲାକେ ନେ ଆନାତ୍; ଇନାକିଦେଂକି, ରାଜାଗାଡ଼୍ ଲକ୍ ବାର୍ତି ଆରି ଗାଡ୍ ଲକ୍ହିଲ୍ୱାକା ଆନାତ୍; ମାଡ଼଼ି ଆରି ଜାଗ୍ୱାଡ଼଼ାର୍ ମାଚା ସବୁକାଡ଼୍ ପାତେକ୍ ପାରା ଆନାତ୍, ରାନ୍ତି ଗଦ ସାର୍ଦା ବୁଇଁ ଆରି ପସୁ ମାନ୍ଦା ହାରାନି ବାହା ଆନାତ୍; ହାରିହାରା ଜପିତାଂ ମା ଜପି ଜିବୁନ୍ ଡ଼ୟାଆତିସ୍ ବାଟାନି ଉସାସ୍ ବାଟା ଆନାତ୍ ଆରି ଉସାସ୍ ବାଡ଼୍ ରାନ୍ ଇଞ୍ଜି ଇନ୍ୟାଆନାତ୍ । ହେ ପଦ୍ନା ବାଟାତ ନିୟାୟ୍ ବିଚାର୍ ବାହା କିନାତ୍ ଆରି ଉସାସ୍ ବାଡ଼୍ଦ ଦର୍ମ୍ନିକା କାତା ବାହା କିନାର୍ । ଆରେ, ଦାର୍ମିନିକା କାମାୟ୍ ସାନ୍ତିନିକା ଆନାତ୍; ଆରେ, ଦରମ୍କାତାନି ପାଡ଼୍ ନିଜେ ସୁସ୍ତାନିକା ଆରି ପାଣ୍ଡ୍ରାୱାକା ଆନାତ୍ । ଆରେ, ନା ମାନାୟାର୍ ସାନ୍ତିତାଂ କୁଚ୍ଚି ବାହାତ, ଡାଟ୍ ବାହାତ ଆରି ସୁସ୍ତାତ ଜମ୍ନି ବାହାତ ବାହା କିନାର୍ । ମାତର୍ ରାନ୍ତି ବାହାତ ଆଞ୍ଜ୍ଗାବାର୍ହା ଆନାତ୍ ଆରି ଗାଡ଼୍ ପୁରା ଲାକେ ବୁଡାନାତ୍ । ହାର୍ ଏଜ଼଼ୁଙ୍ଗ୍ ବାହାତ ବିୟାନ୍ ୱିତ୍ତାଦେର୍ନା ଆରି କଡିଂ ଗଦକାଂ ବାର୍ତ ପକ୍ନାଦେରା ଜେ ଏପେଙ୍ଗ୍, ଏପେଙ୍ଗ୍ ଦନ୍ୟ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.