Pengo Bible
ଜିସାଇୟ 27
ଇସ୍ରାଏଲ୍ନି ଉଦାର୍
ହେ ନାଞ୍ଜିଙ୍ଗ୍ ନିତ୍ରେମାପ୍ରୁ ଜାର୍ନି ଦୟାହିଲ୍ୱି, ଗାଜା ଆରି ସାକ୍ତିକାଟି କାଣ୍ଡା ହୁଦାଂ ବେସି ଚାଣ୍ଡ୍ନି ରାଚ୍ ଲିବିୟାତନ୍ତିଂ ଆରି ବାଂଟାଆନି ରାଚ୍ ଲିବିୟାତନ୍ତିଂ ଡାଣ୍ଡ୍ ହିନାନ୍; ଆରେ, ହେୱାନ୍ ହାମ୍ଦୁର୍ନି ଗାଜା ଜାତ୍ତିଂ ବୁଡାୟ୍ କିନାନ୍ । ହେ ନାଞ୍ଜିଙ୍ଗ୍ ର ଅଙ୍ଗୁର୍ବାଡ଼ ମାନାତ୍, ଏପେଙ୍ଗ୍ ହେବେନି ଉଦେସ୍ତ କେରାଟ୍ । “ଆପ୍ ନିତ୍ରେମାପ୍ରୁ ହେଦାଂ ରାକ୍ୟାକିନାପ୍; ଆପ୍ ମିଟ୍କିୱାଦାଂ ହେବେ ଏଜ଼ୁଙ୍ଗ୍ ତିର୍ନାସ୍; ଇନେର୍ ଇନେସ୍କି ହେୱାନ୍ତି ବୁଡା ଆଉତ୍, ଇଦାଂକାଜିଂ ଆପ୍ ୱେଡ଼ାନାଣା ହେଦାଂ ରାକ୍ୟା କିନାପ୍ । ମା ତାକେ କାକ୍ରି ହିଲୁତ୍; ଆ, ଜଦି ଲେକାଜାମୁ ଆରି ୱାଡ଼ିଂ ମାର୍କୁ ସବୁ ଜୁଜ୍ତ ମା ବିନ୍ପାକ୍ୟା ଆନାନ୍, ଲାଗିଂ ଆପ୍ କାସି ହେ ୱିଜ଼଼ାରିଂ ରଞ୍ଜେମାଟ୍ କାଡି କିନାପ୍ । ତାଆତିସ୍ ମା ଲାହାଙ୍ଗ୍ ମେହାଆଦ୍ନି କାଜିଂ ହେୱାନ୍ ମା ସାନ୍ତିତାକେ ୱାଏନ୍; ଆଁ, ହେୱାନ୍ ମା ଲାହାଙ୍ଗ୍ ମେହା ଆଏନ୍ ।” ୱାନି କାଡ଼ଦ ଜାକୁବ୍ ଚିରା ଗାଚ୍ନାନ୍; ଇସ୍ରାଏଲ୍ ମୁକ୍ଡ଼ାୟ୍କିନାତ୍ ଆରି ୱାରିହପ୍ନାନ୍ ଆରି ହେୱାର୍ ବୁମିମଣ୍ଡଲ୍ତ ପାଡ୍ଦ ପୁରା କିନାନ୍ । ତାଂ ଟ୍ରାକ୍ତାକାରିଂ ହେୱାନ୍ ଇନେସ୍କି ଟ୍ରାକ୍ତିସ୍, ହେଲାକେ ହେୱାନ୍ କି ତାଙ୍ଗେଙ୍ଗ୍ ଟ୍ରାକ୍ତାନ୍ନା ? କି, ତା କାଜିଂ ହାତି ମାନାୟ୍ତି ବାଦୁଲ୍ ହେୱାନ୍ ହାତାନ୍ନା ? ଏପ୍ ତାଂ ଦେହା ପକ୍ନି ୱେଡ଼ାଲିଂ ମୁକ୍ଡ଼ାୟ୍କିନି ବିସ୍ରେ ତା ଲାହାଙ୍ଗ୍ ଗଣ୍ଡ୍ଗଲ୍ କିତାଦେର୍ନା; ହେୱାନ୍ ୱେଡ଼ାହତ୍ନି ନିପ୍ଣି ଦୁକା ୱେଡ଼ାଲିଂ ଜାର୍ ବେସି ଦୁକା ହୁଦାଂ ତାଂ ଗୁଚାୟ୍ କିତାନ୍ନା । ଇଲାକେ ଇଦାଂ କାଜିଂ ଜାକୁବ୍ତି ଦସ୍ନିକା କେମା ଆନାତ୍ ଆରି ତା ପାପ୍ ଦେହାଆନି କାଜିଂ ସବୁ ପାଡ଼୍ ଇଦାଂ; ହେୱାନ୍ ପୁଜାଗାର୍ଣିନି କାଲ୍ ସବୁତିଂ ପିଟ୍ୱାନି ଡ୍ରିଂତି କାଲ୍ ଲାକେ କିତାନ୍, ଆସେର୍ ପୁତ୍ଡ଼ା ଆରେ ୱେଡ଼ା ପୁତ୍ଡ଼ାଙ୍ଗ୍ ସବୁ ଆରେ ନିଙ୍ଗ୍ଜି ମାଞ୍ଜେଙ୍ଗ୍ ଆଡୁକ୍ । ଇନାକିଦେଂକି ଆଟ୍ୱା ଗାଡ଼୍ ବାଟାତ ଲାକେ ସିଣ୍ଦା, ଲକୁ ପିହିନାକାର୍ ଆରି ୱାସ୍ସି କୁଚ୍ଚି ବାହା ଆତାତ୍ନା; ହେ ବାହାତ କଡିଂ ହାରାନିକ୍ ଆରି ହୁଞ୍ଜ୍ନିକ୍, ଆରେ, ମାର୍ନି କେନ୍ଦାଂ ସବୁ ତିନିକ୍ । ହେବେ ଡାଡ଼୍ ସବୁ ୱାଚ୍ଚିସ୍ ଡ୍ରିକ୍ୟାନାତ୍: କଗ୍ଲେକ୍ ୱାଜ଼଼ି ହେବେ ନାଣି ଆହିକିନିକ୍; ଇନାକିଦେଂକି ହେ ଲଗୁ ବୁଦି ହିଲ୍ୱିକିଂ; ଇଲାକେ ଇନେନ୍ ହେୱେକ୍କାଂ ରଚ୍ଚାନ୍, ହେୱାନ୍ ହେୱେକ୍ କାଜିଂ ଦୟା କିଉନ୍ ଆରି ଇନେନ୍ ହେୱାରିଂ ରସ୍ତାନ୍, ହେୱାନ୍ ହେୱେକ୍ତି କାଜିଂ ଉପ୍କାର୍ କିଉନ୍ । ହେ ନିଞ୍ଜିଙ୍ଗ୍ ନିତ୍ରେମାପ୍ରୁ ବୁଡାଆନି ପରାତ୍ ନାଗୁଡ଼୍ ହାନ୍ଦି ମିସର୍ନି ବଡ଼଼ାନି ପାତେକ୍ ଜାର୍ ପାଡ଼୍ ଡ଼଼ାତ୍ନାନ୍, ଆରେ, ଏ ଇସ୍ରାଏଲ୍ ମାଜ଼଼ିର୍, ଏପେଙ୍ଗ୍ ରୱାଦେର୍ ରୱାଦେର୍ ଆଜ଼ି ରବେକିୟାନାତ୍ । ଆରେ, ହେ ନାଞ୍ଜିଙ୍ଗ୍ ର ଗାଜା ମରି ଆଡ଼୍ନାତ୍; ଆରେ, ଆସୁର୍ ଦେସ୍ନି ନସ୍ଟିୟାର୍ ଆରି ମିସର୍ ଦେସ୍ତ ଦୁକ୍ପାୟାତି ମାନାୟାର୍ ୱାନାର୍; ଆରେ, ହେୱାର୍ ଜିରୁସାଲମ୍ନି ପୁଇପୁୟା ମାଡ଼ିତ ନିତ୍ରେମାପ୍ରୁତିଂ ଜୁଆର୍ କିନାର୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.