Pengo Bible
ଜିସାଇୟ 15
ମୟାବ କାଜିଂ ବେଣ୍ବାକାଣ୍ୟ୍ କିନାକା
ମୟାବ ବିସ୍ରେନି ବେଣ୍ବାକ୍ଣାୟ୍କିନାକା । ମୟାବନି ଅରେର କିର୍ ଗାଡ଼୍ ର ନାଣା ବିତ୍ରେ ବୁଡ଼଼ାତାତ୍ । ହେୱାର୍ ଆଡ଼୍ବିନି କାଜିଂ ବୈତେଲ୍ତ ଆରି ଦିବନ୍ତ, ଉଚ୍ବାହାତ ହାଲ୍ଜି ମାଚାର୍; ନବ ଆରି ମେଦବାର୍ ବିସ୍ରେ ମୟାବ ତରହର ଆନାନା; ଜାଣ୍କେତି କାପ୍ଡ଼଼ାଂ ହେନ୍ନାରା, ୱିଜ଼ାର୍ ଟଡଙ୍ଗ୍ ରେଚ୍ନାରା । ହେୱାର୍ତି ସବୁ ରାସ୍ତାତ ହାଗାଡ଼୍ତ ମାନାୟାର୍ ହିରୁ ବାସ୍ତାହେନ୍ଦ୍ରା ଉସ୍ପାନାରା; ଜାର୍ ଜାର୍ ଇଲ୍ନି ଚାତ୍ ଜପି ଆରି ଡେଡ଼ା ବାହାନି ୱିଜ଼ାର୍ ଲକ୍ ବେସି ରାଗାଂ ଆଡ଼୍ବିସ୍ ତରହର୍ ଆନାରା । ହିସ୍ବନ୍ ଆରି ଇଲିୟାଲି ଆଡ଼୍ବାନାରା; ହେୱାର୍ତି କାଟ୍ ଜହସ୍ ପାତେକ୍ ୱେନ୍ୟାନାତା; ଇ ଲାକେ ମୟାବନି ମେଲ୍ୟାର୍ ଆଡ୍ବାତାର୍ନା; ତା ପାରାଣ୍ ତା ବିତ୍ରେ ଚାନ୍ୟା ଆନାତା । ମା ୱାସ୍କି ମୟାବ କାଜିଂ ଆଡ଼୍ବାନାତା; ତାଦି ପାଲାରି ସୟର୍ ପାତେକ୍ ଇଗ୍ଲତ୍ ସଲିସିୟାତ ହନ୍ତାର୍ନା; ଇନାକିଦେଂକି ହେୱାର୍ ଆଡ଼୍ଜି ଆଡ଼୍ଜି ଲୁହିତ୍-ଗାଟି ଜପି ହାଲ୍ଜି ମାଚାର୍; ହରନୟିମ୍ ହାଜ଼ିତ ବୁଡାନି କାଜିଂ ହେୱାର୍ ଆଡ୍ବାନାରା । ଇନାକିଦେଂକି ନିମ୍ରିମ୍ନି ନାଗୁଡ଼୍ ପାତେକ୍ ୱାରାକା ଆନାତ୍; କାଚ୍ରା ୱାଚ୍ଚାତ୍, ମାର୍ ଦେର୍ ସବୁ ଜିବୁନ୍ମାନୁକ୍ । ଏଲେଙ୍ଗ୍ ହେୱାର୍ ଜାର୍ତି ପାୟାତି ଦନ୍ ଆରି ଇଡ଼୍ତି ଜିନିସ୍ ସବୁ ବାଇସି ତର୍ ମାର୍ ଜାରାଣ୍ ଲାଗାଂ ଅନାର୍ । ଇନାକିଦେଂକି ମୟାବନି ଚାରିବେଣ୍ତାଂ ଇଗ୍ଲୟିମ୍ ଆଡ୍ବାନାକା ୱେନ୍ୟା ଆନାତା । ଇନାକିଦେଂକି ଦିମନ୍ନି ନାଗୁଡ଼୍ ପାତେକ୍ ନେତେର୍ ଆତାତ୍ନା; ଆରି, ଆପ୍ ଦିମନ୍ନି ଜପି ଆରେ ଦୁକ୍ ଆରି ମୟାବନି ହନ୍ଚି ହାଚି ଲକ୍ ଜପି ଆରି ଦେସ୍ତ ବାକି ଜପି ର ସିୟଁ ବୁର୍କା ତାହିୱାନାସ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.