Pengo Bible
ଜିସାଇୟ 13
ବାବିଲ୍ନି ଦାଣ୍ଡ୍
ବାବିଲ୍ ବିସ୍ରେନି କାବୁର୍, ଆମସ୍ତି ମେହି ଜିସାଇୟ ଇ ଦର୍ସନ ପାୟାତାନ୍ । ଏପେଙ୍ଗ୍ ମାର୍କୁ ହିଲିୱିମାଡ଼ି ଜପି ପତ୍କା ରୁଜ଼଼ାଟ୍, ମାନାୟାର୍ କାଜିଂ ଗାଜା କାଟ୍ କିୟାଟ୍, କେଇ ଜଲାୟ୍କିୟାଟ୍, ହେୱାର୍ ସାସନ୍କାର୍ୟା ଗାଡ଼୍ ଦୁୱେର୍ତ ହଣାଟ୍ । ଆପ୍ ଜାର୍ ପୁଇପୁୟା ମାନାୟାରିଂ ବଲ୍ କିତାପ୍ନା, ଆଁ, ଆପେଙ୍ଗ୍ ଜାର୍ କାକ୍ରି ପୁରାକିଦେଂ ମା ବିରରିଂ, ଇଚିସ୍, ମା ଲାହାଂ ଗରବ୍ ସାର୍ଦା କିନାକାରିଂ କୁକ୍ତାପ୍ନା । ମାଡ଼ିତାଂ ଗାଜାଦାଡ଼୍ନି ନିୟମ୍ ମାନାୟାର୍ତାକେ କାଟ୍ ଆନାତା । ରବେମେହାତି କୁଟୁମ୍ ଲାହାଂ ରାଜିନିକାର୍ ରାଟୁ ଆନାତା । ମେଲ୍ୟାଆଦିକାରି ନିତ୍ରେମାପ୍ରୁ ଜୁଜ୍ତିଂ ମେଲ୍ୟାର୍ ରୁଣ୍ଡାୟ୍ କିନାନା । ହେୱାର୍, ଇଚିସ୍, ନିତ୍ରେମାପ୍ରୁ ଆରି ତା କାକ୍ରିଆତି ଅତିୟାର୍ ସବୁ ଦେସ୍ ଚିନ୍ବିନ୍ କିନି କାଜିଂ ଦେହାନି ଦେସ୍, ଆକାସିଂନି ହାନ୍ଦି ବାଗ୍ତାଂ ୱାନାରା । ଏପେଙ୍ଗ୍ କାକୁଲ୍ତି; ଇନାକିଦେଂକି ନିତ୍ରେମାପ୍ରୁତି ଦିନ୍ ଲାଗେ ୱାନାତା; ୱିଜ଼଼ୁତିଂ ସାକ୍ତିକାଟି ନିପଣ୍ଡାଂ କୁଡ଼୍କୁନାସ୍ ନିୟାୟ୍ ହେଦାଂ ୱାନାତ୍ । ଇଲାକେ ୱିଜ଼଼ାର୍ କେଇ ନାଦାର୍ ଆନାତ୍ ଆରି ଜାଣ୍କେ ମାନାୟ୍ ନେଞ୍ଜେଡାକି ରୁଗ୍ଜି ହାନାତ୍; ଆରେ, ହେୱାର୍ ପାଣ୍ଡ୍ରାନାର୍; ନନାକା ଆରି ବେଦନ୍ ହେୱାରିଂ ଆହ୍ନାତ୍; ହେୱାର୍ ଗାଟାନି କଗ୍ଲେ ଲାକେ ନନାକା ଆନାତ୍; ହେୱାର୍ ହାରି ବିସ୍ରେ ଚାନ୍ୟାଆନାର୍; ହେୱାର୍ତି ମୁମ୍ ନାଣିପଙ୍ଗ୍ନି ଲାକେ ଆନାତ୍ । ହୁଡ଼ାଟ୍, ଦେସ୍ ନାସ୍ କିଦେଂ ଆରି ହେ ବିତ୍ରେତାଂ ପାପ୍ୟାର୍ରିଂ ବୁଡାୟ୍ କିଦେଂ ନିତ୍ରେମାପ୍ରୁତି ଦିନ୍ ବୟଁକାର୍; କାକ୍ରି ଆରି ବେସି କାକ୍ରି ମେହାଜ଼଼ି ୱାନାତା । ଇନାକିଦେଂକି ଆକାସିଂନି ହୁକାଙ୍ଗ୍ ଆରି ହେବେନି ହୁକାଂ ଅଜଡ଼୍ ହିଉକ୍; ୱେଡ଼ା ଜାର୍ ହତ୍ନି ନିପଣ୍ଡାଙ୍ଗ୍ ମାଜ୍ଗାଜ଼଼ି ହାନାତ୍ ଆରି ଲେଞ୍ଜ୍ ଜାର୍ ଅଜଡ଼୍ ଚଚୁତ୍ । ଆରେ, ଆପ୍ ଜଗତ୍ତ ବାନ୍ୟା କାଜିଂ ଆରି ବାନ୍ୟାନିକାରିଂ ହେୱାର୍ତି ଅ ଦାର୍ମି କାଜିଂ ଡାଣ୍ଡ୍ ହିନାସ୍ ଆରି ଆପ୍ ଆକ୍ରିୟାରିରିଂ ଗାର୍ବି ଟେବାୟ୍ କିନାସ୍ ଆରି ବାଡ଼୍କାସ୍ ମାନାୟ୍ତି ଗରବ୍ତିଂ ଡିକ୍ନାଂ । ଆପ୍ ହାର୍ଦି ହନା ବାଟା ପୁର୍ତିତିଂ ହେ ଲାକେ ଓପିରନି ହନା ବାଟା ମାନାୟ୍ତିଂ ନାଦାର୍ କିନାପ୍ । ଇ ଲାକେ ଆପ୍ ଆକାସ୍ତିଂ କମ୍ପାନାକା କିନାସ୍, ଆରେ ମେଲ୍ୟାଆଦିକାରିର୍ନି ନିତ୍ରେମାପ୍ରୁତି ରିସା ଆରି ତା ବେସି କାକ୍ରିନି ଦିନ୍ତ ପୁର୍ତି ଗୁର୍ଜି ହେ ବାହାତାଂ ପେଜ୍ୟା ଆନାତ୍ । ତାପାଚେ ଇଲାକେ ଗିଟାନାତ୍ ଜେ, ମାଡ୍ଚିଚି ମାଙ୍ଗେସ୍ ନିୟାୟ୍ ଆରି ଗଡ଼଼ିୟାହିଲ୍ୱି ମେଣ୍ଡା ଲାକେ ମାନାୟାର୍ ପେସ୍ୟାନି ନିୟାୟ୍ ଆରି ରାକ୍ୟା ହିଲ୍ୱି ମେଣ୍ଡାଙ୍ଗ୍ ଲାକେ ମାନାୟାର୍ ୱିଜ଼଼ାର୍ ଜାର୍ ଜାର୍ କୁଟୁମ୍ କାଜିଂ ମାସ୍ଦି ହାନାର୍ ଆରି ୱିଜ଼଼ାର୍ ଜାର୍ ଜାର୍ ଦେସ୍ ନିପ ହାନାର୍ । ଇନେନ୍ ଇମ୍ଣି ମାନାୟ୍ତି ଉଦେସ୍ ମିହାନାତ୍, ହେୱାନ୍ ଏଚ୍ୟାନାନ୍ ଆରି ଇମ୍ଣି ମାନାୟ୍ତିଂ ଆହ୍ନାର୍, ହେୱାନ୍ କାଣ୍ଡାତ ହାନାନ୍ । ହେୱାର୍ତି ହିମ୍ଣାଙ୍ଗ୍ ପା ହେୱାର୍ତି ମୁମ୍ଦ ତୁସିହିବାନାର୍; ହେୱାର୍ ଇଞ୍ଜ ଚର୍ ହଣାର୍ ଆରି ହେୱାର୍ତି ଡକ୍ରୁହିକ୍ ବଲକ୍ତାର୍ତ ବାନ୍ୟା କିୟାନିକ୍ । ହୁଡ଼ାଟ୍, ଆପ୍ ହେୱାର୍ତି ବିରୁଦ୍ତ ମାଦିୟନିକାରିଂ ଉସ୍କାୟ୍ କିନାସ୍, ହେୱାର୍ ରୁପାତିଂ ହୁଡ଼ୁର୍ ଆରି ହନାତିଂ ୱାର୍ୟା ଆଉର୍ । ହେୱାର୍ତି ୱିଲ୍ ବେଣ୍ଡିୟାରିଂ ତୁସିବାନାର୍ ଆରି ହେୱାର୍ ପଟନି ହିମ୍ଣା କାଜିଂ ଅଲପ୍ ପା ଦୟା କିଉର୍, ହିମ୍ଣାଙ୍ଗ୍ କାଜିଂ ହେୱାର୍ତି ଦୟାନିକା ଆଉତ୍ । ଆରେ, ସବୁରାଜିନି ଜାଜ୍ମାଲ୍ ଆରି କଲଦିୟାର୍ତି ଗରବନି ହାର୍ଦାକା ଲାକେ ଜେ ବାବିଲ୍, ହେଦାଂ ପର୍ମେସ୍ୱର୍ତି କାଜିଂ ନସ୍ଟ କିତାକା ସଦମ୍ ଆରି ହମରାନିକା ଲାକେ ଆନାତ୍ । ହେଦାଂ ଇନାୱାଡ଼଼ାଙ୍ଗ୍ ପା ବାହାକିଦେଂ ଆଡୁର୍, ଆଣ୍ଡ୍ରାଂ ଆଣ୍ଡ୍ରାଂତି ଇସାପ୍ରେ ଇନେର୍ ହେବେ ବାହା କିଦେଂ ଆଡୁର୍; ଆରବିୟ ମାନାୟ୍ ହେବେ ତୁମ୍ ପ୍ଡାକ୍ତେଂ ଆଡୁର୍, କି ମେଣ୍ଡା ଗଡ଼଼ିଆର୍ ଜାର୍ ଜାର୍ ମାନ୍ଦା ହେବେ ମାଗିକିଉର୍ । ମାତର୍ ରାନ୍ତି ପସୁଙ୍ଗ୍ ହେ ବାହାତ ହୁଞ୍ଜ୍ନିକ୍ ଆରି ହେୱାଙ୍ଗ୍ତି ଇଞ୍ଜ କିକିରାଡ଼଼ାଂ କିନି ହୁଣ୍ଡାର୍ ବାର୍ତି ଆନିକ୍; କୁର୍ୱା ପଟି ହେବେ ବାହା କିନିକ୍ ଆରି ଅଡାଂ ହେବେ ଏନ୍ଦ୍ନିକ୍ । ଆରେ, ହୁଣ୍ଡାର୍ରିଂ ହେୱାଙ୍ଗ୍ ହାକ୍ଡ଼଼ିତ ଆରି ବିଲାଇଙ୍ଗ୍ ତା ହାର୍ଦି କୁୱାଡ଼୍ତ ଆଡ଼ବିନିକ୍; ତା କାଡ଼ ଲାଗାୟ୍ ଆରି ତା ଦିନ୍ ସବୁ ବେସି ଲାମ୍ ଆଉତ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.