Pengo Bible
ଆଦି 3
ମାନାୟ୍ତି ବଲ୍ ଉଡ଼ାନାକା
ନିତ୍ରେମାପ୍ରୁ ଇସ୍ୱର୍ତି ରଚ୍ଚି ବୁଇଁତ ବୁଲାନି ପସୁକାଂ ବିତ୍ରେ ରାଚ୍ ୱିଜ଼ୁତିଂ ଚାତୁର୍ ମାଚାତ୍ । ଦିନେକ୍ ହେ କଗ୍ଲେଂ ଇଚାତ୍, “ଆଗ, ଇଦାଂ କି ହାତ୍ପା, ବାଡ଼୍ନି ଇମ୍ଣାକାପା ମାର୍ନି ପାଡ଼୍ ଚିଞ୍ଜେଙ୍ଗ୍ ଇସ୍ୱର୍ ମିଂ ମୁନା କିତ୍ତାନ୍ନା ।”
କଗ୍ଲେ ରାଚ୍ତିଂ ଇଚାତ୍, “ଆପ୍ ବାଡ଼୍ନି ୱିଜ଼ୁ ମାର୍ନି ପାଡ଼୍ ଚିଞ୍ଜେଙ୍ଗ୍ ଆଡ୍ନାପ୍; କେବଲ୍ ବାଡ଼୍ନି ମାଦ୍ଣି ମାର୍ନି ପାଡ଼୍ ବିସ୍ରେ ଇସ୍ୱର୍ ଇଞ୍ଚାନ୍ନା, ଏପ୍ ହେଦାଂ ତିନୁଦେର୍ କି ଡୁଉଦେର୍, ହେଦାଂ କିତିସ୍ ହାନାଦେର୍ ।”
ରାଚ୍ କଗ୍ଲେଂ ଇଚାତ୍, “ଏପ୍ ଇନେସ୍ ଆତିସ୍ପା ହାଉଦେର୍; ଇଚିସ୍ ଇସ୍ୱର୍ ପୁନାନ୍ ଏପେଙ୍ଗ୍ ଇମ୍ଣି ଦିନ୍ ହେଦାଂ ତିନାଦେର୍, ହେ ଦିନ୍ ମି କାଣ୍ଗା ଜେୟାନାତ୍ ହେବେ ଏପ୍ ଇସ୍ୱର୍ତି ଲାକେ ହାର୍ ଆରି କାରାପ୍ନି ଗିୟାନ୍ ପାୟାନାଦେର୍ ।”
ଇବେଣ୍ଡାଙ୍ଗ୍ କଗ୍ଲେ ହେ ମାର୍ତିଂ ହୱାଦ୍କାଦିନି ଆହ୍ନାକା ଆରି କାଣ୍ଗାନି ଲବତ୍ତିଂ ଆରି ବୁଦି ହିନି ମାନ୍ନି ଇଚା ହୁଡ଼୍ଜି ହେବେନି ପାଡ଼୍ ଏଜ୍ଜି ଚିଚାତ୍, ଆରେ, ଜାର୍ ହାଂଦି ଡକ୍ରାହିଂ ହିତିଲେ, ହେୱାନ୍ ପା ଚିଚାନ୍ । ହେବେ ହେୱାର୍ତି କାଣ୍କୁ ଜେୟା ଆତାର୍, ହେୱାର୍ ଜାର୍ତି ନାଗ୍ଡ଼ାନିକା ପୁନ୍ଞ୍ଜି ତଗା ମାର୍ନି ଆକି ଡ଼ଜ୍ଜି ତାର୍ଲା ରଚ୍ଚାର୍ ।
ହେବେ ୱେଡ଼ାହାନି ୱେଡ଼ାଲିଂ ବାଡ଼୍ ବିତ୍ରେ ହାଲ୍ଜିୱାନି ନିତ୍ରେମାପ୍ରୁ ଇସ୍ୱର୍ତି ବେଣ୍ ୱେନ୍ଜି ଆଦମ୍ ଆରି ହେୱାନ୍ତି ଡକ୍ରି ନିତ୍ରେମାପ୍ରୁ ଇସ୍ୱର୍ତି ମୁମ୍ଦାଂ ବାଡ଼୍ଦ ମାର୍କୁ ବିତ୍ରେ ଡ଼ୁକ୍ତାର୍ । ହେବେ ନିତ୍ରେମାପ୍ରୁ ଇସ୍ୱର୍ ଆଦମ୍ତିଂ କୁକ୍ଚି ଇଚାନ୍, “ଏପ୍ ଇମେତାକେ ?”
ହେୱାନ୍ ଉତର୍ ହିତାନ୍, “ଆନ୍ ବାଡ଼୍ ବିତ୍ରେ ନି ବେଣ୍ ୱେନ୍ଜି ନିଜାର୍ ନାଗ୍ଡ଼ା କାଜିଂ ପାଣ୍ଡ୍ରାଜ଼ି ଡ଼ୁକ୍ତାଂନା ।”
ଇସ୍ୱର୍ ଇଚାନ୍, “ଏପ୍ ନାଗ୍ଡ଼ା ମାନାଦେର୍, ଇଦାଂ ଇନେର୍ ମିଂ ୱେଚ୍ଚାତାର୍ ? ଆପ୍ ଇମ୍ଣି ମାର୍ନି ପାଡ଼୍ ଚିଞ୍ଜେଙ୍ଗ୍ ମୁନାକିଜ଼ି ମାଞ୍ଚାପ୍, ହେଦାଂ କି ଏପ୍ ଚିଚାଦେର୍ଣ୍ଣା ?”
ଆଦମ୍ ଇଚାନ୍, “ଏନ୍ ଇମ୍ଣି କଗ୍ଲେଙ୍ଗ୍ ନା ହାଙ୍ଗ୍ଦାକା ଆଦେଂ ହିତ୍ତାୟ୍ନା, ହେଦେଲ୍ ନାଂ ହେ ମାର୍ନି ପାଡ଼୍ ହିତ୍ତାତ୍, ହେଦାଂ ଆନ୍ ଚିଚାଙ୍ଗ୍ ।”
ହେଏଚେକାଡ଼୍ଦ ନିତ୍ରେମାପ୍ରୁ ଇସ୍ୱର୍ କଗ୍ଲେଙ୍ଗ୍ ଇଚାନ୍, “ଇଦାଂ ଇନାକିଦେଂ କିତାୟ୍ ?”
କଗ୍ଲେ ଇଚାତ୍, “ରାଚ୍ ନାଂ ହୁତ୍ରାଇକିତ୍ତାତ୍, ହେବେଣ୍ଡାଂ ଆନ୍ ଚିଚାଙ୍ଗ୍ ।”
ନିତ୍ରେମାପ୍ରୁତି ଡାଣ୍ଡ୍ନିବଲ୍
ହେବେ ନିତ୍ରେମାପ୍ରୁ ଇସ୍ୱର୍ ରାଚ୍ତିଂ ଇଚାନ୍, “ଇ କାମାୟ୍ କିତି କାଜିଂ ଏନ୍ ସବୁ ନାଟି ଆରି ରାନ୍ତି ପସୁ ଆଦିକ୍ ସାଇପ୍ ପାୟାତାୟ୍, ଏନ୍ ଜାର୍ ପଟ ହିଜ଼ି ତାଂଗନାୟ୍ ଆରି ହାନି ପାତେକ୍ ଦୁଡ଼ି ତିନାୟ୍ । ଆରେ ଆପ୍ ମିଦାଂ ଆରି କଗ୍ଲେକ୍ ବିତ୍ରେ, ଆରେ, ମି କୁଟୁମ୍ ବିତ୍ରେ ସାତ୍ରୁ ଉବ୍ଜାୟ୍ କିନାପ୍; ହେଦେଲ୍ ନି କାପ୍ଡ଼ାତ ଅସ୍ତାନାତ୍ ଆରି ଏନ୍ ହେୱାର୍ ଗାଟିତ ଡନାୟ୍ ।”
ତାପାଚେ ହେୱାନ୍ କଗ୍ଲେଙ୍ଗ୍ ଇଚାନ୍, “ଆପ୍ ନି ଗରବ୍ନିକସ୍ଟ ବେସି ବାଡାୟ୍ କିନାପ୍, ଏନ୍ ନନିତ ହିମ୍ଣା ଗାଟାନାୟ୍; ଆରେ, ଆଣ୍ଡ୍ରେନ୍ କାଜିଂ ନି ମାନ୍ ମାନ୍ଗାନାତ୍, ହେୱାନ୍ ନି ଜପି ରାଜ୍ କିନାନ୍ ।”
ଆରେ ହେୱାନ୍ ଆଦମ୍ତିଂ ଇଚାନ୍, “ଇମ୍ଣି ମାର୍ନି ପାଡ଼୍ ତିନି ବିସ୍ରେ ଆନ୍ ନିଙ୍ଗେଙ୍ଗ୍ ବଲ୍ ହିଜ଼ି ଇଞ୍ଜି ମାନ୍ଚାଙ୍ଗ୍, ହେଦାଂ ତିନୁଦେର୍, ଏନ୍ ଜାର୍ କଗ୍ଲେନି କାତା ୱେନ୍ଜି ହେଦାଂ ଚିଚାୟାନା; ଲାଗିଂ ନି କାଜିଂ ବୁୟ୍ତ ସାଇପ୍ ଆତାତ୍; ଏନ୍ ହାନିପାତେକ୍ କସ୍ଟତାଂ ହେବେନିକା ଚିଞ୍ଜେଙ୍ଗ୍ ଗାଟାନାୟ୍ । ହେବେ ୱାଡ଼ିଙ୍ଗ୍ ଆରି କାଚ୍ରା ଉପ୍ଜା ଆନିଙ୍ଗ୍, ଆରେ, ଏପ୍ ବୁଇଁନି କୁଚା ତିନାଦେର୍ । ଏପ୍ ଇମ୍ଣି ଚିକ୍ଲାତାଂ ରଚ୍ୟା ଆତାଦେର୍, ହେବେ ମେହାଆୱି ପାତେକ୍ ମୁମ୍ନି ରୁମିଙ୍ଗ୍ତ କାଦି ତିନାଦେର୍; ଇନେକିଦେଂକି ଏପ୍ ଦୁଡ଼ି ଆରି ଦୁଡ଼ିତ ଆରେରଗ ମେହାନାଦେର୍ ।”
ଇଦାଂପାଚେ ଆଦମ୍ ଜାର୍ ଡକ୍ରିତି ତର୍ ହବା1 ହିତାନ୍, ଇନେକିଦେଂକି ହେଦେଲ୍ ଜିତି ମାନାୟ୍ତି ତେହି ଆନାତ୍ । ଆରେ ନିତ୍ରେମାପ୍ରୁ ଇସ୍ୱର୍ ପସୁ ତଲ୍ନି ହେନ୍ଦ୍ରା ଜାଲ୍ଦି କିଜ଼ି ଆଦମ୍ ଆରି ତା ଡକ୍ରିଙ୍ଗ୍ ଉସ୍ପିକିତାନ୍ ।
ଆଦମ୍ ଆରି ହବା ବାଡ଼୍ଦାଂ ହପ୍ୟାତାକା
ଇଦାଂପାଚେ ନିତ୍ରେମାପ୍ରୁ ଇସ୍ୱର୍ ଇଚାନ୍, “ହୁଡ଼ାଟ୍, ମାନାୟ୍ ହାର୍ ଆରି ବାନ୍ୟାନିକା ପୁଞ୍ଜେଙ୍ଗ୍ ଆଡ୍ଜି ମା ଲାକେ ରୱାନ୍ ଆତାନ୍ନା, ଆରେ ନଂ ହେୱାନ୍ ଇନେସ୍ କେଇ କିଜ଼ି ଆମ୍ରୁତ୍ ମାର୍ନି ପାଡ଼୍ ପା ଏଜ୍ଜି ତିନ୍ଜି ୱିଜ଼ିୱି ଜିବୁନ୍ ଆମେନ୍ ।” ଇଦାଂକାଜିଂ ନିତ୍ରେମାପ୍ରୁ ଇସ୍ୱର୍ ଏଦନ୍ ବାଡ଼୍ଦାଂ ତାଙ୍ଗ୍ ହପ୍ଚି ତୁଇତାନ୍ ଆରି ହେୱାନ୍ ଇମ୍ଣି ଚିକ୍ଲାତାଂ ରଚ୍ୟାଜ଼ି ମାଚାନ୍, ହେବେନି ତାସ୍ କାମାୟ୍ କିଦେଂ ତାଙ୍ଗ୍ ବାଚି କିତାନ୍ । ଇଦାଂକାଜିଂ ହେୱାନ୍ ଆଦମ୍ତିଂ ପେସ୍ତାନ୍; ଆରେ, ଆମ୍ରୁତ୍ ମାର୍ନି ହାଜ଼ି ରାକ୍ୟା କିନି କାଜିଙ୍ଗ୍ ଏଦନ୍ ବାଡ଼୍ନି ୱେଡ଼ାହନିନିପ ଦୁତ୍କାଂ ଆରି ଚାରିବେଣ୍ତ ହୁଜ଼ାୱାଣିଙ୍ଗ୍ ନାଣିବାର୍ତି କାଣ୍ଡା ରଚ୍ଚାନ୍ ।
Source notes (1)
- Footnote ହବା ଅରତ୍ ଜିବୁନ୍
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.