Pengo Bible
ଆଦି 2
ଇଲାକେ ଆକାସିଂ ଆରି ପୁର୍ତିନି, ଆରେ, ହେ ରିବାହାନି ୱିଜ଼ୁ ଆଡ଼୍ମାଡ଼୍ନି ଉବ୍ଜାଣ୍ ୱିସ୍ତାତ୍ । ଇଦାଂପାଚେ ଇସ୍ୱର୍ ସାତ୍ ଦିନ୍ତ ଜାର୍ତି କାମାୟ୍ ୱିସ୍ତି ହେ ସାତ୍ ଦିନ୍ତ ଜାର୍ତି କିତି ୱିଜ଼ୁ କାମାୟ୍ତାଂ ଜମ୍ତାନ୍ । ଆରେ, ଇସ୍ୱର୍ ସାତ୍ ଦିନ୍ତ ଆର୍ସିବାଦ୍ କିଜ଼ି ପୁଇପୁୟା କିଜ଼ି ସୁଣାୟ୍ କିତାନ୍ । ହେଲାକେ ହେ ଦିନ୍ତ ଇସ୍ୱର୍ ଉବ୍ଜାତାକା ଲାକେ ଜାର୍ତି କିତି ୱିଜ଼ୁ କାମାୟ୍ତାଂ ଜମ୍ତାନ୍ ।
ଏଦନ୍ ବାଡ଼୍
ଉପ୍ଜାଣ୍ ୱେଡ଼ାଲିଂ ଆକାସିଂ ଆରି ପୁର୍ତିନି କାତା ଇଦାଂ । ଇମ୍ଣି ୱେଡ଼ାଲିଂ ନିତ୍ରେମାପ୍ରୁ ଇସ୍ୱର୍ ଆକାସିଂ ଆରି ପୁର୍ତି ରଚ୍ଚାନ୍, ହେ ୱେଡ଼ାଲିଂ ଜମିତ ଇମ୍ଣାକାପା କାଚ୍ରା ହିଲାତାତ୍ ଆରି ବୁଇଁତ ଇମ୍ଣାକା କୁଚା ହିଲାତାତ୍; ଇନେକିଦେଂକି ନିତ୍ରେମାପ୍ରୁ ଇସ୍ୱର୍ ପୁର୍ତିତ ବାର୍ହା କିୟ୍କିୱାଦାଂ ମାଚାନ୍ ଆରେ କାମାୟ୍ କିଦେଂ ମାନାୟ୍ ପା ହିଲ୍ୱାତାର୍ । ଆରେ, ପୁର୍ତିତାଂ ର ଗୁକ୍ଟା ନିଙ୍ଗ୍ଜି ସବୁ ମେଦ୍ନିତ ଅସ୍ ତିର୍ତାତ୍ ।
ଇଦାଂପାଚେ ନିତ୍ରେମାପ୍ରୁ ଇସ୍ୱର୍ ମେଦ୍ନିନି ଦୁଡ଼ି ହୁକେ ମାନାୟାତିଂ ରଚ୍ଚି ତା ମୁଙ୍ଗେଲ୍ତ ତୁବ୍ଜି ପାରାଣ୍ଦୁକା ହଟପାତାନ୍; ହେବେ ମାନାୟ୍ ଜିତାନ୍ ।
ଆରେ ନିତ୍ରେମାପ୍ରୁ ଇସ୍ୱର୍ ୱେଡ଼ାହନିବାଗାଂ ଏଦନ୍ ତର୍ନି ବାହାତ ର ବାଡ଼୍ ଜାଲ୍ଦି କିଜ଼ି ହେବେ ଜାର୍ରଚ୍ଚି ମାନାୟ୍ତିଂ ଇଡ଼୍ତାନ୍ । ନିତ୍ରେମାପ୍ରୁ ଇସ୍ୱର୍ ହେ ବୁମିତାଂ ବାର୍ବିନ୍ଜାତି ଲାକେ ଆରି ହୱାଦ୍କାଦି ମାର୍କୁ, ଆରି, ହେ ବାଡ଼୍ନି ମାଦ୍ଣିବାହାତ ଆମୃତ୍ ମାର୍ ଆରି ବଲ୍ମନ୍ଦ୍ ସଦ୍ସତ୍ ପୁନିକିନି ମାର୍ ରୁସ୍ତାନ୍ ।
ବାଡ଼୍ଦ ଏସ୍ତିର୍ତେଂ ଏଦନ୍ତାଂ ର ନାଗୁଡ଼୍ ହସି ହେ ବାହାତାଂ ବିନ୍ ବିନ୍ ଚାରିଗଟା ଆତିକ୍ । ପାର୍ତୁମ୍ ନାଗୁଡ଼୍ନି ତର୍ ପିସନ୍; ହେଦାଂ ହନା ରଚ୍ନି ହବିଲା ଦେସ୍ତିଂ ବେଡ଼ିକିନାତ୍ । ହେ ଦେସ୍ନି ହନା ହାର୍ଦାକା, ଆରେ, ହେବେ ହାର୍ଦି ବାସ୍ନା ଆରି ବେସିମଲ୍ନି ଗମେଦକ ମଣି ଉବ୍ଜା ଆନାତ୍ । ଜେତି ନାଗୁଡ଼୍ନି ତର୍ ଗିହନ୍, ଇଦାଂ ସବୁ କୁସ୍ ଦେସ୍ ବେଡ଼ି କିନାତ୍ । ତିନ୍ ନାଗୁଡ଼୍ନି ତର୍ ହିଦେକଲ୍, ଇଦାଂ ଅସୁରିୟାର୍ ଦେସ୍ନି ହାଣ୍କୁ ହିଜ଼ି ହାନାତ୍ । ଚାରିଗଟା ନାଗୁଡ଼୍ନି ତର୍ ପରାତ୍ ।
ଆରେ, ନିତ୍ରେମାପ୍ରୁ ଇସ୍ୱର୍ ହେ ମାନାୟ୍ତିଂ ଅଜ଼ି ଏଦନ୍ ବାଡ଼୍ଦିଂ ଜାଲ୍ଦି କିଦେଂ ଆରି ହୁଡ଼୍ଜି ରାକ୍ୟା କିଦେଂ ବାଚି କିତାନ୍ । ମାତର୍ ନିତ୍ରେମାପ୍ରୁ ଇସ୍ୱର୍ ହେ ମାନାୟ୍ତିଂ ବଲ୍ ହିଜ଼ି ଇଚାନ୍, “ଏପ୍ ବାଡ଼୍ନି ୱିଜ଼ୁ ମାର୍ନି ପାଡ଼୍ ମାନ୍ଇଚା ଚିଞ୍ଜେଙ୍ଗ୍ ଆଡ୍ନାୟ୍, ମତର୍, ସଦ୍ସତ୍ ଗିୟାନ୍ ମାର୍ନି ପାଡ଼୍ ତିନ୍ମାଟ୍ ଇନେକିଦେଂକି ଇମ୍ଣି ଦିନ୍ ହେଦାଂ ତିନାଦେର୍, ହେ ନାଞ୍ଜିଙ୍ଗ୍ ନିଜେ ହାନାୟ୍ ।”
ଇଦାଂ ପାଚେ ନିତ୍ରେମାପ୍ରୁ ଇସ୍ୱର୍ ଇଚାନ୍, “ମାନାୟ୍ ରୱାନ୍ ମାନାକା ହାର୍ ଆକାୟ୍, ଆପ୍ ତା କାଜିଂ ତାବାର୍ତି ହାଗଂଦାକାଦ୍ଲିଂ ରଚ୍ନାସ୍ ।” ଆରେ ନିତ୍ରେମାପ୍ରୁ ଇସ୍ୱର୍ ବୁମିତାଂ ଆଟ୍ଲାନି ପସୁକାଂ ଆରି ଉମ୍ନି ପଟିକାଂ ରଚ୍ଚି ଆଦମ୍ ହେୱାକାଂ ଇନା ତର୍ ହିନାନ୍, ଇଦାଂ ପୁଞ୍ଜେଙ୍ଗ୍ କାଜିଂ ୱିଜ଼଼େକାଂ ମାନାୟ୍ ଲାଗାୟ୍ ତାହିୱାତାନ୍ । ହେବେ ଆଦମ୍ ହେ ପାରାଣିକାଂ ବିତ୍ରେ ଇମ୍ଣିକାଂ ଇମ୍ଣି ତର୍ ହିତାନ୍, ହେଦେଲିଂ ହେ ତର୍ ଆତାତ୍ । ଏଲେଂ ଲାକେ ଆଦମ୍ ପସୁ, ହାରୁ ପଟିଂ ଆରି ଆଟ୍ଲାନି ଜାଣ୍କେ ଜାତ୍ନି ତର୍ ହିତାନ୍; ମତର୍, ମାନାୟ୍ କାଜିଂ ହେୱାନ୍ତି ଲାଗ୍ଦି ହାଂଦାକାଦେଲ୍ ଚଞ୍ଜ୍ୟାୱାତାତ୍ ।
ଇଦାଂପାଚେ ନିତ୍ରେମାପ୍ରୁ ଇସ୍ୱର୍ ଆଦମ୍ତିଂ ଇଞ୍ଜ ହୁଚ୍ପିସ୍ ହେ ହୁଞ୍ଚି ୱେଡ଼ାଲିଂ ହେୱାନ୍ତି ଇମ୍ଣି ମାର୍ଗାଣ୍ପ୍ଡେନ୍ ଅଜ଼ି ଜେଇ ହୁକେ ହେ ବାହା ବାର୍ତି କିତାନ୍ । ଆରେ ନିତ୍ରେମାପ୍ରୁ ଇସ୍ୱର୍ ଆଦମ୍ତାଂ ଇମ୍ଣି ମାର୍ଗାଣ୍ପ୍ଡେନ୍ ଅଲପ୍ ଅତାନ୍, ତାଲାହାଙ୍ଗ୍ ର କଗ୍ଲେ ରଚ୍ଚି ଆଦମ୍ ଲାଗାୟ୍ ତାହିୱାତାନ୍ । ଲାଗ୍ ଆଦମ୍ ଇଚାନ୍,
“ନଂଗୟ୍ ଆତାତ୍;
ଇଦେଲ୍ ନା ପ୍ଡେନ୍ନି ପ୍ଡେନ୍ ଆରି ଜେଇନି ଜେଇ;
ଇଦେଲ୍ତି ତର୍ କଗ୍ଲେ, ଇନେକିଦେଂକି ଇଦେଲ୍ ନାର୍ତାଂ ରଚ୍ୟା ଆତାତ୍ନା ।”
ଇଦାଂକାଜିଂ ମାନାୟ୍ ଜାର୍ ଆବାଆୟାକାଂ ପିସ୍ସି ଜାର୍ କଗ୍ଲେତାକେ ଆହା ଆନାନ୍, ଆରେ ହେୱାର୍ ରୱାର୍ ଆନାର୍ ।
ଆଦମ୍ ଆରି ତା ଡକ୍ରୁହି, ରିୟାର୍ ନାଗ୍ଡ଼ା ମାଚିସ୍ପା ହେୱାର୍ତି ଲାଜୁ ହିଲ୍ୱାତାତ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.