Pengo Bible
ଆଦି 11
ବାବିଲ୍ ମେଡ଼୍
ପୁର୍ବେ ସବୁ ପୁର୍ତିତ ର ବାସା ଆରି ର ଲାକେ ସୁୱା ମାଚାତ୍ ଆରେ ଗଟ୍ଣା ଦାଡ଼ିତାଂ ଲକୁ ୱେଡ଼ାହନି ନିପ ବୁଲା ଆଜ଼ି ଆଜ଼ି ସିନିୟନି ଦେସ୍ତ ର ବାଟା ଗାଟାଜ଼ି ହେବେ କୁଚ୍ଚାର୍ । ଇଦାଂପାଚେ ହେୱାର୍ ହାରି ଇନ୍ବାତାର୍, “ୱାଡ, ଆସେଙ୍ଗ୍ ଇଟା ରଚ୍ଚି ହାର୍ କିଜ଼ି ହୁଜ଼୍ନାସ୍ ।” ହେବେଣ୍ଡାଂ ଇଟା ହେୱାର୍ତି କାଲ୍ ଲାକେ ଆରି ଚିଣ୍ଡା ଚିକ୍ଲା1 ହେୱାର୍ତି ପିଟ୍ୱା ଲାକେ ଆତାତ୍ । ଆରେ, ହେୱାର୍ ଇଚାର୍, “ୱାଡ, ଆସେଙ୍ଗ୍ ଜାର୍ କାଜିଂ ର ଗାଡ଼୍ ଆରି ଆକାସ୍ନି ରଞ୍ଜାଙ୍ଗ୍ ପାନ୍ତି ମେଡ଼୍ ରଚ୍ନାସ୍; ହେବେ ମା ତର୍ ଡାକ୍ପୁଟା ଆନାତ୍, ଆରେ, ଆସେଙ୍ଗ୍ ପୁର୍ତିତ ଜେତେକେତେ ଆଉସ୍ ।”
ଇଦାଂପାଚେ ମାନାୟ୍ ହିମ୍ଣାଙ୍ଗ୍ ଇମ୍ଣି ଗାଡ଼୍ଦ ଆରି ମେଡ଼୍ ରଚ୍ଚି ମାଚାର୍, ହେଦାଂ ହୁଡ଼୍ଦେଂ ନିତ୍ରେମାପ୍ରୁ ଜୁଜ଼ି ୱାତାନ୍ । ଆରେ, ନିତ୍ରେମାପ୍ରୁ ଇଚାନ୍, “ହୁଡ଼ାଟ୍, ଇ ଲକୁ ୱିଜ଼ାର୍ ଏକ୍ ଆରି ଇୱାର୍ତି ବାସା ନେ ରଞ୍ଜାଙ୍ଗ୍, ଆରେ ନଂ ଇୱାର୍ ଇ କାମାୟ୍ତ ବେସି ଆନାତା; ଇଦାଂପାଚେ ଇନା ଇନାକା କିଦେଂ ମାନ୍ କିନାର୍, ତାପାଚେ ନିଜେ ଆଉର୍ । ଇଦାଂ କାଜିଂ ହେୱାର୍ ଇନେସ୍ ହାରି ବାସା ବୁଜାଦେଂ ଆଡୁର୍, ଇଦାଂ କାଜିଂ ୱାଡ, ଆସେଙ୍ଗ୍ ଜୁଜ଼ି ହାଲ୍ଜି ହେ ବାହାତ ହେୱାର୍ ବାସାତିଂ ବାର୍ବିନ୍ ଉବ୍ଜାୟ୍ କିନାସ୍ ।” ଇ ଲାକେ ନିତ୍ରେମାପ୍ରୁ ହେ ବାହାତାଂ ହେୱାରିଙ୍ଗ୍ ପୁର୍ତିନି ସବୁନିପ ଚିନ୍ବିନ୍ କିତାନ୍; ଲାଗିଂ ହେୱାର୍ ଗାଡ଼୍ ରଚ୍ଚେଙ୍ଗ୍ ବନ୍ଦ୍ କିତାର୍ । ହେଦାଂ କାଜିଂ ହେ ଗାଡ଼୍ନି ତର୍ ବାବିଲ ଆତାତ୍; ଇନେକିଦେଂକି ନିତ୍ରେମାପ୍ରୁ ହେ ବାହାତ ୱିଜ଼ୁ ପୁର୍ତିନି ବେରଣ୍ ବାର୍ବିନ୍ ଉବ୍ଜାୟ୍ କିତାନ୍, ଆରେ, ହେ ବାହାତାଂ ହେୱାରିଂ ସବୁ ପୁର୍ତିତ ଚିନ୍ବିନ୍ କିତାନ୍ ।
ସେମତି ଲାତ୍ରାରିଂ
(୧ ବଂସାବଲି ୧:୨୪-୨୭)
ସେମତି ଲାତ୍ରା ଏଲେଙ୍ଗ୍ । ଏସ୍ବାର୍ହାନି ରି ବାର୍ହୁ ପାଚେ ସେମ ସଏ ବାର୍ହୁ ବୟଁସ୍ତ ଅର୍ପକ୍ସଦତିଂ ଜଲମ୍ କିତାନ୍ । ଅର୍ପକ୍ସଦ ଜଲମ୍ ଆତି ପାଚେ ସେମ ପାଞ୍ଚ୍ସ ବାର୍ହୁ ଜିଜ଼ି ଆରେ ହିମ୍ଣାୱାକ୍ଡ଼ା ଗାଟା ଆତାନ୍ ।
ଆରେ, ଅର୍ପକ୍ସଦ ତିରିସ୍ ପାଞ୍ଚ୍ ବାର୍ହୁ ବୟଁସ୍ତ ସେଲହତିଂ ଜଲମ୍ କିତାନ୍ । ସେଲହନି ଜଲମ୍ ପାଚେ ଅର୍ପକ୍ସଦ ଚାରିସ ତିନି ବାର୍ହୁ ଜିଜ଼ି ମାନ୍ଞ୍ଜି ଆରେ ମାଜ଼ିକଡ଼ିୟା ଗାଟା ଆତାନ୍ ।
ଆରେ, ସେଲହ ତିରିସ୍ ବାର୍ହୁ ବୟଁତ ଏବରତିଂ ଜଲମ୍ କିତାନ୍ । ଏବରନି ଜଲମ୍ ପାଚେ ସେଲହ ଚାରିସ ତିନି ବାର୍ହୁ ଜିଜ଼ି ଆରେରଗ ମାଜ଼ିକଡ଼ିୟା ଗାଟାତାନ୍ ।
ଆରେ, ଏବର ତିରସ୍ ଚାର୍ ବାର୍ହୁ ବୟଁସ୍ତ ପେଲଗ୍ତିଂ ଜଲମ୍ କିତାନ୍ । ପେଲଗ୍ତି ଜଲମ୍ ପାଚେ ଏବର ଚାରିସ ତିରିସ୍ ବାର୍ହୁ ଜିଜ଼ି ଆରେ ମାଜ଼ିକଡ଼ିୟା ଗାଟାତାନ୍ ।
ପେଲଗ୍ ତିରିସ୍ ବାର୍ହୁ ବୟଁସ୍ତ ରିୟୁତିଂ ଜଲମ୍ କିତାନ୍ । ରିୟୁର୍ ଜଲମ୍ ପାଚେ ପେଲଗ୍ ଦୁଇସ ନଅ ବାର୍ହୁ ବାଚାଜ଼଼ି ଆରେ ମାଜ଼ିଗାଡ଼୍ ଗାଟାତାନ୍ ।
ରିୟୁ ତିରିସ୍ ଦୁଇ ବାର୍ହୁ ବୟଁସ୍ତାଂ ସରୁଗଙ୍ଗ୍ ଗାଟାତାନ୍ । ସରୁଗତି ଜଲମ୍ ପାଚେ ରିୟୁ ଦୁଇସ ସାତ୍ ବାର୍ହୁ ବାଚାଜ଼଼ି ଆରେ ମାଜ଼ିଗାଡ଼୍ ଗାଟାତାନ୍ ।
ଆରେ, ସରୁଗ ତିରିସ ବାର୍ହୁ ବୟଁସ୍ତ ନାହରଙ୍ଗ୍ ଗାଟାତାନ୍ । ନାହରତି ଜଲମ୍ ପାଚେ ସରୁଗ ଦୁଇସ ବାର୍ହୁ ବାଚାଜ଼଼ି ଆରେ ମାଜ଼ିଗାଡ଼୍ ଗାଟାତାନ୍ ।
ଆରେ, ନାହର୍ କଡ଼େ ନ ବାର୍ହୁ ବୟଁସ୍ତ ତେରହଙ୍ଗ୍ ଗାଟାତାନ୍ । ତେରହତି ଜଲମ୍ ପାଚେ ନାହର୍ ସହେ ଅଣିସ୍ ବାର୍ହୁ ବାଚାଜ଼଼ି ଆରେ ମାଜ଼ିଗାଡ଼୍ ଗାଟାତାନ୍ ।
ଆରେ, ତେରହଙ୍ଗ୍ ସତୁରି ବାର୍ହୁ ବୟଁସ୍ ଆତାତ୍ । ହେୱାନ୍ ଅବ୍ରାମ୍ ଆରି ନାହର୍ ଆରି ହାରଣ୍, ଇୱାରିଂ ଗାଟାତାନ୍ ।
ତେରହତି ଲାତ୍ରା
ତେରହତି ଲାତ୍ରା । ତେରହ ଅବ୍ରାମ୍ ଆରି ନାହର୍ ଆରି ହାରଣ୍ତିଂ ଗାଟାତାନ୍ । ଆରେ, ହେ ହାରଣ ଲତଙ୍ଗ୍ ଗାଟାତାନ୍; ମାତର୍ ହାରଣ୍ ତା ଲାତ୍ରାହି ତେରହ ମୁମ୍ଦ କଲଦିୟ ତର୍ତି ଉର୍ ତର୍ନି ଜାର୍ ଜଲମ୍ ଦେସ୍ତ ହାତାନ୍ । ଇଦାଂପାଚେ ଅବ୍ରାମ୍ ଆରି ନାହର୍ ବିବା ଆତାନ୍; ଅବ୍ରାମ୍ ଡକ୍ରୁହିତି ତର୍ ସାରି ନାହରତି ଡକ୍ରୁହି ତର୍ ମିଲ୍କା, ହେଦେଲ୍ ହାରଣ୍ତି ଡକ୍ରୁହି ମାଚାତ୍; ହେ ହାରଣ ମିଲ୍କା ଆରି ଜିସ୍କାର୍ ଲାତ୍ରାହି ମାଚାନ୍ । ହେ ସାରି ବାଞ୍ଜି ମାଚାତ୍, ତାଙ୍ଗେଙ୍ଗ୍ ଇମ୍ଣି ହିମ୍ଣାୱାକ୍ଡ଼ା ହିଲ୍ୱାତାନ୍ ।
ଇଦାଂପାଚେ ତେରହ ଜାର୍ ମାଜ଼ି ଅବ୍ରାମ୍ତିଂ ଆରି ହାରଣ୍ ମେହି ଲତ ତର୍ନି ନାତିହିଂ, ଆରେ, ଅବ୍ରାମ୍ତି ଡକ୍ରୁହି ସାରି ତର୍ନି କଡ଼ିୟାଙ୍ଗ୍ ରଚେ ଅଜ଼ି ହାଚାର୍; ଆରେ ହେୱାର୍ ୱିଜ଼଼ାର୍ କଲଦିୟରିଂ ଉର୍ତାଂ କିଣାନ୍ ଦେସ୍ ଉଦେସ୍ତାଂ ହାଲ୍ଜି ହାରଣ ଗାଡ଼୍ଦ ଜୁଜ଼ି ବାହା କିତାର୍ । ଆରେ, ତେରହ ହାରଣ୍ ଗାଡ଼୍ଦ ମାନ୍ଜି ଦୁଇସ ପାଞ୍ଚ୍ ବାର୍ହୁ ବୟଁସ୍ତ ହାତାନ୍ ।
Source notes (1)
- Footnote ଇଟାଂ ଇଟ୍ନି କାଜିଂ ଲଡ଼ାଜ଼ିମାନି ରବାନି ଚିକାଣ୍
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.