Pengo Bible
ଆଦି 10
ନହ ମେହିର୍ତି ଲାତ୍ରା
(୧ ବଂସାବଲି ୧:୫-୨୩)
ସେମ, ହାମ, ଜେପତ୍ ତର୍ନି ନହତି ମାଜ଼ିର୍ତି ଲାତ୍ରା ଇଦାଂ । ଏସ୍ବାର୍ହା ପାଚେ ହେୱାର୍ତି ଇ ୱିଜ଼ୁ ହିମ୍ଣାଙ୍ଗ୍ ଜଲମ୍ ଆଜ଼ି ମାଚାର୍ ।
ଗମର୍, ମାଗଗ୍, ମାଦିୟ, ଜବନ, ତୁବଲ, ମେସକ୍ ଆରି ତିରସ୍, ଇୱାର୍ ଜେପତ୍ତି ହିମ୍ଣାଙ୍ଗ୍ । ଅସ୍କିନସ୍ ଆରି ରିପତ୍ ଆରି ତଗର୍ମ, ଇୱାର୍ ଗମର୍ନି ହିମ୍ଣାଙ୍ଗ୍ । ଆରେ, ଇଲିସା ଆରି ତର୍ସିସ ଆରି କିତିମ ଆରି ଦଦାନିମ, ଇୱାର୍ ଜବନତି ହିମ୍ଣାଙ୍ଗ୍ । ଇୱାର୍ତାଂ ବିନ୍ଦେସ୍ତାକାର୍ ଏସ୍କୁପ୍ଲିନିକାର୍ ଜାର୍ତି ଦେସ୍ବିଦେସତ ଜାର୍ ଜାର୍ ବାସାଇସାପ୍ରେ ମେଙ୍ଗ୍ତି ଜାର୍ ଜାର୍ ଲାତ୍ରା ଆରି କୁଟୁମ୍ ଇସାବ୍ରେ ବାଟା ଆତାର୍ ।
କୁସ, ମିସର୍, ପୁଟ୍ ଆରି କିଣାନ୍, ଇୱାର୍ ହାମର ହିମ୍ଣାଙ୍ଗ୍ । ସବା, ହବିଲା, ସପ୍ତା, ରୟମା ଆରି ସପ୍ତକା, ଇୱାର୍ କୁସନି ହିମ୍ଣାଙ୍ଗ୍ । ସିବା ଆରି ଦାଦାନ୍, ଇୱାର୍ ରୟମାନି ହିମ୍ଣାଙ୍ଗ୍ । ନିମ୍ରଦ୍ କୁସନି ମାଜ଼ି; ହେୱାନ୍ ପୁର୍ତି ବିତ୍ରେ ବିର ଆଦେଂ ଲାଗାତାନ୍ । ହେୱାନ୍ ନିତ୍ରେମାପ୍ରୁତି ମୁମ୍ଦ ଗାଜାସାକ୍ତି ଡୁକା ଆତାତ୍; ଲାଗିଂ ଲକୁ ଇପାତେକ୍ ଇ ଉତର୍ମୁଡ଼୍ ଇନାନ୍, “ନିତ୍ରେମାପ୍ରୁ ମିଙ୍ଗ୍ ବାଣ୍ୱାତ ନିମ୍ରଦ୍ ଲାକେ ।” ଆରେ, ସିନିୟନି ଦେସ୍ତ ବାବିଲ ଆରି ଏରକ ଆରି ଅକ୍କଦ୍ ଆରି କଲନି, ଇସବୁ ଗାଡ଼୍ ହେୱାନ୍ତି ପର୍ତୁମ୍ ରାଜି ଆତାତ୍ । ହେ ଦେସ୍ତାଂ ଆସୁର୍ ହସି ୱାଜ଼ି ନିନିବି ଆରି ରହବତ୍ ପୁରି ଆରି କେଲହ, ଆରେ, ନିନିବି ଆରି କେଲହନି ମାଦ୍ଣାକା ରେସନ୍ ଗାଡ଼୍ ରଚି କିତାନ୍; ଇ ରେସନ୍ ଗାଜା ଗାଡ଼୍ ।
ଆରେ, ଲୁଦିୟ ଆରି ଅନାମିୟ ଆରି ଲହାବିୟ ଆରି ନପ୍ତୁହିୟ ଆରେ ପତ୍ରସିୟ ଆରି ପଲେସ୍ଟିୟର୍ତି ଆକ କସ୍ଲୁହିୟ ଆରି କପ୍ତରିୟ, ଇୱାର୍ ମିସରନି ହିମ୍ଣାଙ୍ଗ୍ ।
ଆରେ, କିଣାନ୍ନି ପାଣ୍ୱା ମାଜ଼ି ସିଦନ୍, ତା ପାଚେ ଜେତି ମାଜ଼ି ହେତ୍ । ଆରି ଜିବୁସିୟ ଆରି ଇମରିୟ ଆରି ଗିର୍ଗାସିୟ ଆରି ହିବିୟ ଆରି ଅର୍କିୟ ଆରି ସିନିୟ ଆରି ଅର୍ବଦିୟ ଆରି ସମାରିୟ ଆରି ହମାତିୟ; ଇଦାଂପାଚେ କିଣାନିୟାର୍ତି ଲାତ୍ରା ମେଙ୍ଗ୍ତାର୍ । ହେବେ ସିଦନ୍ତାଂ ଗରାର ନିପ ଗସା ପାତେକ୍, ଆରେ, ସଦମ ଆରି ହମରା ଆରି ଅଦ୍ମା ଆରି ସବୟିମ୍ ନିପ ଲେସା ପାତେକ୍ କିଣାନିୟାର୍ତି କୁଚ୍ଚି ହାନ୍ଦି ମାଚାତ୍ । ଜାର୍ ଜାର୍ ଦେସ୍ ଆରି କୁଟୁମ୍ତ ହେୱାର୍ତି ଲାତ୍ରା ଆରି ବାସାଇସାବ୍ରେ ଇୱିଜ଼ାର୍ ହାମନି ହିମ୍ଣାଙ୍ଗ୍ ।
ଜେପତ୍ତି ଗାଜା ଟଣ୍ଡେନ୍ ସେମତି ପା ହିମ୍ଣାୱାକ୍ଡ଼ା ମାଚାର୍, ଇଚିସ୍, ହେୱାନ୍ ଏବରନି ହିମ୍ଣାଙ୍ଗ୍ତି ଆକ ମାଚାନ୍ । ସେମନି ଇ ସବୁ ହିମ୍ଣାଙ୍ଗ୍, ଏଲମ୍ ଆରି ଅସୁର ଆରି ଅର୍ପକ୍ସଦ ଆରି ଲୁଦ ଆରି ଅରାମ୍ । ଅରାମ୍ନି ହିମ୍ଣାଙ୍ଗ୍ ଇୱାର୍ ଉସ୍ ଆରି ହୁଲ ଆରି ଗେତର ଆରି ମସ୍ । ଆରେ, ଅର୍ପକ୍ସଦନି ହିମ୍ଣାଙ୍ଗ୍ ସେଲହ ଆରି ସେଲହନି ହିମ୍ଣାଙ୍ଗ୍ ଏବର । ଏବରନି ରି ମାଜ଼ିର୍ ମାଚାର୍; ରକାନ୍ତି ତର୍ ପେଲଗ୍ ରିବାଗ୍, ଇନାକିଦେଂକି ହେ ୱେଡ଼ାଂ ପୁର୍ତି ବାଗ୍ ଆତାତ୍; ହେୱାନ୍ତି ଟଣ୍ଡେନ୍ତି ତର୍ ଜକ୍ତନ୍ । ଆରେ, ଜକ୍ତନ୍ନି ମାଜ଼ିର୍ ଅଲମଦଦ ଆରି ସେଲପ୍ ଆରି ହତ୍ସର୍ମାବତ୍ ଆରି ଜେରହ ଆରି ହଦରାମ ଆରି ଉସଲ୍ ଆରି ଦିକ୍ଲ ଆରି ଓବଲ ଆରି ଅବିମାୟେଲ୍ ଆରି ସିବା ଆରି ଓପିର ଆରି ହବିଲା ଆରି ଜବବ୍, ଇୱାର୍ ୱିଜ଼ାର୍ ଜକ୍ତନ୍ତି ହିମ୍ଣାଙ୍ଗ୍ । ମେସାତାଂ ୱେଡ଼ାହତ୍ନି ଦିଗ୍ ସପାର ମାଡ଼ି ପାତେକ୍ ହେୱାର୍ତି ହାନ୍ଦି ମାଚାତ୍ । ଜାର୍ ଜାର୍ ଦେସ୍ତ ହେୱାର୍ତି ଲାତ୍ରା ଆରି ବାସା ଆରି ଲାତ୍ରା ଇସାବ୍ରେ ଇ ୱିଜ଼ାର୍ ସେମତି ହିମ୍ଣାଙ୍ଗ୍ ।
ଜାର୍ ଜାର୍ କୁଟୁମ୍ତ ହେୱାର୍ତି ଲାତ୍ରା ଇସାବ୍ରେ ଇୱାର୍ ନହତି ହିମ୍ଣାଙ୍ଗ୍ତି ଲାତ୍ରା ମାଚାର୍; ଆରେ, ଏସ୍ବାର୍ହା ପାଚେ ଇୱାର୍ତାଂ ଜଲମ୍ଆତି ବାର୍ବିନ୍ କୁଟୁମ୍ ପୁର୍ତିତ ବାଗ୍ ଆତାର୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.