Pengo Bible
ଜାତ୍ରା 32
ହନା ବାଚି
(୨ ବିବରଣି ୯:୬-୨୯)
ଇଦାଂପାଚେ ମସାତି ମାଡ଼ିତାଂ ୱାନାକା ମାଲାନାକା ହୁଡ଼୍ଜି ମାନାୟାର୍ ହାରଣତି ଲାଗାୟ୍ ରୁଣ୍ଡାଜ଼ି ତାଂ ଇଚାର୍, “ନିଙ୍ଗା, ମା ଆଗେହାନି ଆନି କାଜିଂ ମା କାଜିଂ ପେନ୍ ରଚା, ଇନାକିଦେଂକି ଇମ୍ଣି ମୁଣିକା ମିସର୍ ଦେସ୍ତାଂ ମାଂ ହପ୍ଚି ତାହିୱାତ୍ତାନ୍, ହେ ମସାତି କାଜିଂ ଇନାକା ଗିଟାଆତାତ୍ନା, ହେଦାଂ ଆପେଙ୍ଗ୍ ପୁନୁପ୍ ।” ପାଚେ ହାରଣ ହେୱାରିଂ ଇଚାନ୍, “ତେବେ ଏପେଙ୍ଗ୍ ଜାର୍ ଜାର୍ ଡକ୍ରି ଆରି ହିମ୍ଣାୱାକ୍ଡ଼ାର୍ତି କିତୁଲ୍ତାଂ ହନା ମୁଦ୍ରାଂ ଦାକ୍ଚି ନା ଲାଗେ ତାହିୱାଡ ।” ପାଚେ ସବୁ ଲଗୁ ଜାର୍ ଜାର୍ କିତୁଲ୍ତାଂ ହନା ମୁଦ୍ରାଂ ସବୁ ଉନ୍ଦି ହାରଣତି ଲାଗେ ତାହିୱାତାର୍ । ହେୱାନ୍ ହେୱାର୍ କେଇଦାଂ ହେଦାଂ ଅଜ଼ି ରଚ୍ନିଚାଚ୍ତ ଚାଚ୍ ରଚ୍ଚି ର ୱାକ୍ନି ବାଚି ରଚ୍ଚାର୍; ପାଚେ ଲକୁ ଇଚାର୍, “ଏ ଇସ୍ରାଏଲ୍, ଇମ୍ଣି ପେନ୍ ନିଂ ମିସର୍ ଦେସ୍ତାଂ ହପ୍ଚି ତାହିୱାତ୍ତାନ୍, ହେୱାନ୍ ଇୱାନ୍ ।”
ପାଚେ ହାରଣ ହେଦାଂ ହୁଡ଼୍ଜି ତା ମୁମ୍ଦ ର ଗାର୍ଣି ରଚ୍ଚାନ୍, ଆରେ, ୱିଗା ନିତ୍ରେମାପ୍ରୁତି ଉଦେସ୍ତ ପାର୍ବୁ ଆନାତ୍, ଇଦାଂ ସୁଣାୟ୍କିୟ୍ କିତାନ୍ । ଇବେ ମାନାୟାର୍ ଆର୍କାତ୍ନାଞ୍ଜିଙ୍ଗ୍ ନାଡ଼ିହିଂ ନିଙ୍ଗ୍ଜି କାଟ୍ପୁଜା କିତାର୍ ଆରି ହାର୍ଦି ଆକାତ୍ ତାହିୱାତାର୍; ପାଚେ ମାନାୟାର୍ ଚିଞ୍ଜେଙ୍ଗ୍ ଆରି ଉଣ୍ଡେଙ୍ଗ୍ କୁଚ୍ଚାର୍; ଇଦାଂପାଚେ ୱାରି କିଦେଂ ଲାଗାତାର୍ ।
ଲାଗିଂ ନିତ୍ରେମାପ୍ରୁ ମସାଂ ଇଚାନ୍, “ଏନ୍ ଜୁଜ଼ି ହାଲା, ଇନେକିଦେଂକି ମି ଇମ୍ଣି ମାନାୟାରିଂ ଏନ୍ ମିସର୍ ଦେସ୍ତାଂ ହପ୍ଚି ତାହିୱାତାୟ୍, ହେୱାର୍ ଜାର୍ତିଂ ବିନେ କିତାର୍ଣ୍ଣା ।” ଆପ୍ ହେୱାରିଂ ଇମ୍ଣି ହାଜ଼ି ବିସ୍ରେ ବଲ୍ ହିତାପ୍, ହେୱାର୍ ବେଗି ହେବେଣ୍ଡାଂ ମାସ୍ତାର୍ଣ୍ଣା; ହେୱାର୍ ଜାର୍ କାଜିଂ ର ଚାଚ୍ତ ୱାକ୍ତି ବାଚି ରଚ୍ଚି ତାଂ ପୁଜା କିତାର୍, ଆରେ, ତା ଲାଗାଂ ଟୁଣ୍ଚି ଇଚାର୍, “ଏ ଇସ୍ରାଏଲ୍, ଇମ୍ଣି ପେନ୍ ନିଂ ମିସର୍ ଦେସ୍ତାଂ ହପ୍ଚି ତାହିୱାତ୍ତାନ୍, ହେୱାନ୍ ଇଦାଂ ।” ନିତ୍ରେମାପ୍ରୁ ମସାଂ ଆରେ ଇଚାନ୍, “ଆପ୍ ଇ ମାନାୟାରିଂ ହୁଡ଼୍ତାପ୍ନା; ହୁଡ଼ା, ହେୱାର୍ ବେସି ଜିଦ୍ ଲଗୁ ।” ଲାଗିଂ ଏନ୍ ନଂ ମାଂ ପିସ୍ତି ହିଦା, ନା ରିସା ହେୱାର୍ତି ସବୁ କୁଟୁମ୍ତ ଜାଜ୍ମାଲ୍ ଆଏତ୍, ହେବେଣ୍ଡାଂ ଆପ୍ ହେୱାରିଂ ଆହ୍ନାପ୍; ମତର୍ ଆପ୍ ମିଂ ଗାଜା କୁଟୁମ୍ କିଦ୍ନାପ୍ ।
ହେବେଣ୍ଡାଂ ମସା ଜାର୍ ନିତ୍ରେମାପ୍ରୁ ପର୍ମେସ୍ୱର୍ ଗୱାରି କିଜ଼ି ଇଚାନ୍, “ଏ ନିତ୍ରେମାପ୍ରୁ, ଏନ୍ ଜାର୍ତି ଇମ୍ଣି ମାନାୟାରିଂ ଜାର୍ ବାଡ଼୍କାସ୍ତାଂ ଆରି ମାରା ସାକ୍ତିତ ମିସର୍ ଦେସ୍ତାଂ ହପ୍ଚି ତାହିୱାତାୟ୍, ହେୱାର୍ତି ସବୁ କୁଟୁମ୍ତ ନି ରିସା ଇନେକିଦେଂ ଜାଜ୍ମାଲ୍ ଆନାତ୍ ? ହେ ମାଡ଼ି ନାସ୍କୁକାଂ ହେୱାରିଂ ନସ୍ଟ କିଜ଼ି ପୁର୍ତିତାଂ ବୁଡାୟ୍ କିନି କାଜିଂ, ନସ୍ଟ କାଜିଂ ହପ୍ଚି ତାହିୱାତାନ୍ନା, ଏଲେଙ୍ଗ୍ କାତା ମିସ୍ରିୟର୍ ଇନେକିଦେଂ କାତାଂ କିନାର୍ ? ଏପ୍ ଜାର୍ତି ବେସି ରିସାତାଂ ମାସ୍ନାକା ଆରି ଜାର୍ ମାନାୟାର୍ତି ବିରୁଦ୍ତ ଏଲେଙ୍ଗ୍ ଅନିସ୍ଟ ବିସ୍ରେ ଚିମ୍ରା ଆ । ଜାର୍ ଆଡ଼ିଏନ୍ ଅବ୍ରାହାମ୍ ଆରି ଇସ୍ହାକ୍ ଆରି ଇସ୍ରାଏଲ୍ତିଂ ଏତ୍ କିୟା, ଏପ୍ ଜାର୍ ନିଜ୍ ତର୍ଦ ପାର୍ମାଣ୍ କିଜ଼ି ହେୱାରିଙ୍ଗ୍ ଇଚାୟ୍ନା, ଆପ୍ ଆକାସ୍ନି ହୁକାଂ ନିୟାୟ୍ ମି ବଁସ୍ ବାଡାୟ୍ କିନାସ୍ ଆରି ଇ ଇମ୍ଣି ସବୁ ଦେସ୍ନି କାତା ଇଞ୍ଚାପ୍ନା, ହେଦାଂ ମି ବଁସ୍ତିଂ ହିଦ୍ନାପ୍, ହେୱାର୍ ୱିଜ଼୍ୱିକାଡ଼୍ ପାତେକ୍ ହେଦାଂ ଆଦିକାର୍ କିନାର୍ ।” ତେବେ ନିତ୍ରେମାପ୍ରୁ ଜାର୍ ମାନାୟ୍ କାଜିଂ ଇମ୍ଣି ନସ୍ଟ କିନି କାତା ଇଞ୍ଜିମାଚାନ୍, ହେବେଣ୍ଡାଂ ଚିମ୍ରା ଆତାନ୍ ।
ଇଦାଂପାଚେ ମସା ମୁମ୍ ତାରେନ୍କିଜ଼ି ସାକି ଲାକେ ରିଣ୍ଡି କାଲ୍ ପାଟା କେଇଦ ଅଜ଼ି ମାଡ଼ିତାଂ ଜୁତ୍ତାନ୍; ହେ କାଲ୍ ପାଟାନି ରିକଣ୍ଡାଙ୍ଗ୍ ପା ଲେକାଜ଼ି ମାଚାତ୍ । ହେ କାଲ୍ ପାଟା ପର୍ମେସ୍ୱର୍ତି ରଚ୍ଚାକା; ଆରେ, କାର୍ତି ଲେକାତାକା ନେ ପର୍ମେସ୍ୱର୍ତି ଲେକିକିତାକା ମାଚାତ୍ ।
ଇଦାଂପାଚେ ଲକୁ ଗାଜା କାଟ୍ କିତିଲେ, ଜିହସୁୟ ମାନାୟାର୍ତି କଲ୍କଲ୍ ୱେନ୍ଞ୍ଜି ମସାଂ ଇଚାନ୍, “ଚାଉଣିତ ଜୁଜ୍ ଗାଜେର୍ ଆନାତା ।” ହେବେ ହେୱାନ୍ ଇଚାନ୍, “ଇଦାଂ ଜିଣାକାଟ୍ନି ସବଦ୍ ଆକାୟ୍, କିବା ଆରାତି କାଟ୍ ଆକାୟ୍, ମତର୍ ଆନ୍ କେର୍ଣ୍ଣି କାଟ୍ ୱେନାଙ୍ଗା ।”
ଇବେଣ୍ଡାଂ ହେୱାନ୍ ଚାଉଣି ଲାଗେ ଆତି ଦାପ୍ରେ ହେ ବାଚି ଆରି ଏନ୍ଦ୍ନାକା ହୁଡ଼୍ତାନ୍; ହେବେ ମସାତି ରିସା ବେସି ଆତାତ୍; ଲାଗିଂ ହେୱାନ୍ ଜାର୍ କେଇଦାଂ ହେ ରିଣ୍ଡି କାଲ୍ ପାଟା ତୁହି ହିଜ଼ି ମାଡ଼ି ତାରେନ୍ ହେଦାଂ ଡ୍ରିକ୍ତାନ୍ । ଆରେ, ହେୱାର୍ତି ରଚ୍ଚି ବାଚି ଅଜ଼ି ନାଣିତ ହୁସ୍ତାନ୍ ଆରି ଗୁଣ୍ଡାକିଜ଼ି ଦୁଡ଼ି କିତାନ୍, ଆରେ ଏସ୍ ଜପି ଡ଼ିଉଜି ଇସ୍ରାଏଲ୍ ମାଜ଼ିରିଂ ଉଟ୍ପାତାନ୍ । ପାଚେ ମସା ହାରଣଙ୍ଗ୍ ଇଚାନ୍, “ଇ ଲକୁ ନି କାଜିଂ ଇନାକା କିତାର୍ ଜେ, ଏନ୍ ହେୱାର୍ ଜପି ଏଲେଂ ବେସି ପାପ୍ ଲାଦିକିତାୟ୍ନା ?”
ହେବେ ହାରଣ ଇଚାନ୍, “ମା ମାପ୍ରୁତି ରିସା ଜାଜ୍ମାଲ୍ ଅମେତ୍; ଏନେଙ୍ଗ୍ ପୁଚାୟ୍ନା ଜେ, ଇ ଲକୁ ବାନ୍ୟା କାମାୟ୍ତ ଆହାତାର୍ଣ୍ଣା ।” ଇୱାର୍ ନାଙ୍ଗ୍ ଇନ୍ଞ୍ଚାର୍, “ମା ଆଗେହାନି କାଜିଂ ମା କାଜିଂ ପେନ୍ ରଚାଟ୍, ଇନାକିଦେଂକି ଇମ୍ଣି ଲକୁ ମାଙ୍ଗେଙ୍ଗ୍ ମିସର୍ ଦେସ୍ତାଂ ହପ୍ଚି ତାହିୱାତ୍ତାନ୍, ହେ ମସାତି ଇନାକା ଆତାତ୍ନା; ହେଦାଂ ଆପେଙ୍ଗ୍ ପୁନୁପ୍ ।” ଲାଗ୍ ଆନ୍ ଇଚାଙ୍ଗ୍, “ମି ବିତ୍ରେ ଇନେର୍ତି ଇନେସ୍ବାର୍ତାକାପା ହନା ମାନାତ୍, ହେଦାଂ ଏପେଙ୍ଗ୍ ଉନ୍ଦି ହିୟାଟ୍; ପାଚେ ହେୱାର୍ ନାଙ୍ଗ୍ ହେଦାଂ ହିତ୍ତାର୍; ଆନ୍ ହେଦାଂ ଅଜ଼ି ନାଣିତ ତୁହିହିତାଂ, ପାଚେ ଇ ବାଚି ହସି ୱାତାତ୍ ।” ଆରେ ମସା ମାନାୟାରିଂ କାରାପ୍ ହୁଡ଼୍ତାନ୍, ଇନାକିଦେଂକି ହାରଣ୍ ହେୱାରିଂ ସାତ୍ରୁର୍ ବିତ୍ରେତାଂ ଗ୍ରେଚ୍ନି ଲାକେ କାରାପ୍ କିଜ଼ି ପିସ୍ତି ମାଚାନ୍ । ଇବେଣ୍ଡାଂ ମସା କେପ୍ ଦୁୱେର୍ତ ନିଲ୍ଚି ଇଚାନ୍, “ନିତ୍ରେମାପ୍ରୁତି କଚଣ୍ତ ଇନେର୍ ମାନାନ୍ ? ହେୱାନ୍ ନା ଲାଗାଂ ୱାଏନ୍,” ହେବେ ଲେବିତି ହିମ୍ଣାଂ ତା ଲାଗାୟ୍ ରୁଣ୍ଡା ଆତାର୍ । ପାଚେ ହେୱାନ୍ ହେୱାରିଂ ଇଚାନ୍, “ଇସ୍ରାଏଲ୍ନି ନିତ୍ରେମାପ୍ରୁ ପର୍ମେସ୍ୱର୍ ଇ କାତା ଇନାନ୍, ଏପେଙ୍ଗ୍ ୱିଜ଼ାକାଦେର୍ ଜାର୍ ଜାର୍ କୁଟାତ କାଣ୍ଡା ଗାଚାଟ୍ କେପ୍ ବିତ୍ରେ ହିଜ଼ି ର ଦୁୱେର୍ତାଂ ବିନ୍ ଦୁୱେର୍ ପାତେକ୍ ବୁଲାଚାଲା ଆଡ, ୱିଜ଼ାର୍ ଜାର୍ ଜାର୍ ଟଣ୍ଡେନ୍ ସାଙ୍ଗ ଆରି ପାଡ଼୍ହା ଇଞ୍ଜାକାରିଂ ଅହାଟ୍ ।” ପାଚେ ଲେବିର୍ ହିମ୍ଣାଂ ମସାତି କାତା ଇସାବ୍ରେ ହେଲାକେ କିତାର୍, ହେ ଦିନ୍ ଲକୁର୍ ବିତ୍ରେତାଂ ଉଣା ଆଦିକ୍ ତିନି ହାଜାର୍ ଜାଣ୍ ମାନାୟାର୍ ହାତାର୍ । ଆରେ ମସା ଇଚାନ୍, “ଏପ୍ ୱିଜ଼ାକାଦେର୍ ଜାର୍ ଜାର୍ ମାଜ଼ି ଆରି ଟଣ୍ତାର୍ତି ବିନ୍ପାକ୍ୟା ଆଜ଼ି ନିତ୍ରେମାପ୍ରୁ ଉଦେସ୍ତ ଜାର୍ତିଂ ବାଚିକିୟାଟ୍, ପାଚେ ହେ ଇ ଦିନ୍ତ ମିଙ୍ଗେଙ୍ଗ୍ ଆର୍ସିବାଦ୍ କିଦ୍ନାନ୍ ।”
ପାଚେ ଆର୍କାତ୍ ଦିନ୍ ମସା ମାନାୟାରିଂ ଇଚାନ୍, “ଏପେଙ୍ଗ୍ ବେସି ପାପ୍ କିତାଦେର୍ନା, ନଙ୍ଗୟ୍ ଆନ୍ ନିତ୍ରେମାପ୍ରୁ ଲାଗାଂ ଦୁମ୍ନାଙ୍ଗା; ଜଦି ଆତିସ୍, ଲାଗିଂ ଆନ୍ ମିଂ ପାପ୍ନି ମାନ୍ବାଦ୍ଲାୟ୍ କିନାଙ୍ଗ୍ ।” ଇକାଜିଂ ମସା ନିତ୍ରେମାପ୍ରୁତାକେ ହାଲ୍ଜି ଇଚାନ୍, “ହାୟ, ହାୟ, ଇ ମାନାୟାର୍ ବେସି ପାପ୍ କିଜ଼ି ଜାର୍ କାଜିଂ ହନା ପେନ୍କୁ ରଚ୍ଚାର୍ନା । ଆତିସ୍ପା ନଂ, ଏପ୍ ଜଦି ହେୱାର୍ତି ପାପ୍ କେମା କିନାଦେର୍ ମାତର୍ ଜଦି କିୱିତିସ୍, ତେବେ ଆନ୍ ଗୱାରି କିଦ୍ନାଙ୍ଗା, ନି ଲେକିକିତି ପତିତାଂ ନା ତର୍ କାଟିକିୟା ।”
ପାଚେ ନିତ୍ରେମାପ୍ରୁ ମସାଂ ଇଚାନ୍, “ଇମ୍ଣି ମାନାୟ୍ ନା ବିରୁଦ୍ତ ପାପ୍ କିତାନ୍ନା, ଆପ୍ ନା ପତିତାଂ ତା ତର୍ କାଟିକିନାସ୍ । ନଂ ହାଲା, ଆପ୍ ଇମ୍ଣି ଦେସ୍ ବିସ୍ରେ ନିଂ ଇଞ୍ଚାପ୍ନା, ହେ ଦେସ୍ତ ମାନାୟ୍ତିଂ ଅଜ଼ି ହାଲା ହୁଡ଼ା, ମା ଦୁତ୍ ମି ଆଗେ ଆଗେ ହାନାନ୍; ମତର୍ ଆପ୍ ଡାଣ୍ଡ୍ ହିନି ଦିନ୍ତ ହେୱାର୍ତି ପାପ୍ନି ଡାଣ୍ଡ୍ ହେୱାରିଂ ହିନାସ୍ ।”
ଆରେ, ନିତ୍ରେମାପ୍ରୁ ମାନାୟ୍ରିଂ ଇଡ଼୍ତାନ୍, ଇନାକିଦେଂକି ହାରଣ ୱେଚ୍ମାଚି ବାଚି ଲାକେ ହେୱାର୍ ରଚ୍ଚି ମାଚାର୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.