Pengo Bible
ଜାତ୍ରା 22
ହୁଜାନି ବିସ୍ରେ ବିଦି
ଜଦି ଇନେର୍ କଡି କି ମେଣ୍ଡା ମ୍ଡାସି ଅହ୍ନାନ୍ କି ପ୍ରନାନ୍, ତେବେ ହେୱାନ୍ ର କଡି ହୁଜାଦେଂ ପାଞ୍ଚ୍ଗଟା କଡିଙ୍ଗ୍ ମାନ୍ଦା ଆରି ର ମେଣ୍ଡା ହୁଜାଦେଂ ଚାର୍ ମେଣ୍ଡା ହିନାନ୍ । ଆରେ ରୱାନ୍ ଚରେନ୍ ଦାରାପଡ଼ାତିସ୍, ଜଦି ଇନେର୍ ତାଂ ଅହୁ ଅହୁ ଅସ୍ତିସ୍, ତେବେ ହେୱାନ୍ ନେତେର୍ ହପ୍ତିତ ଦସି ଆଉନ୍ । ମତର୍ ଜଦି ୱେଡ଼ାହତି ପାଚେ ତାଂ ଅସ୍ତିସ୍, ତେବେ ନେତେର୍ ହପ୍ତିତ ଦସି ଆନାନ୍; ଆରି ମ୍ଡାତି ଜିନିସ୍ ହୁଜାଦେଂ କିନାକା ଚର୍ତି କାମାୟ୍; ଜଦି ହେୱାନ୍ତି ମୁଡ଼େ ହିଲିତିସ୍, ତେବେ ମ୍ଡାତି କାଜିଂ ହେୱାନ୍ ପ୍ରୟାନାନ୍ । କଡି କି ଗଦ କି ମେଣ୍ଡା ମ୍ଡାତି ଜିନିସ୍ ଜଦି ମ୍ଡାତି ଜିନିସ୍ ମ୍ଡାକେନ୍ କେଇଦ ଜିତାକା ଗାଟାତିସ୍, ତେବେ ହେୱାନ୍ ହେବେନି ରି ଗୁଣ୍ ହିଦ୍ନାନ୍ ।
ଆରେ ଇନେର୍ ଜଦି ବିନ୍ନିକାନ୍ ଜମିତ କି ଅଙ୍ଗୁର୍ ବାଡ଼୍ଦ କଡିଂ ହାରାୟ୍କିନାନ୍, କି ଜାର୍ ପସୁତିଂ ପିସ୍ତି ହିତିସ୍ ଜଦି ହେଦାଂ ବିନ୍ ଜମିତ ହାରତିସ୍, ତେବେ ହେ ମାନାୟ୍ ହେବେନି ବାଦୁଲ୍ ହେଦେଲିଂ ତା ଜମିନି ହାର୍ଦି ତାସ୍ କି ତା ଅଙ୍ଗୁର୍ ବାଡ଼୍ନି ନେକ୍ରି ପାଡ଼୍ ହିନାନ୍ ।
ଆରେ ନାଣି ଆସ୍ତି ୱାଡ଼ିଂ ରାନ୍ତ ଆସ୍ତିସ୍ ଜଦି ଇନେର୍ତି କୁପାନି ତାସ୍ କାଡ଼୍ତିସ୍, ତେବେ ହେ ନାଣି ଆହିକିତି ମାନାୟ୍ ନିଜେ ହେବେନି ମଲ୍ ହିନାନ୍ । ଆରେ, ଇନେର୍ ଜଦି ଜାର୍ତି ପାଡ଼୍ହାଇଞ୍ଜି ଲାଗାୟ୍ ଡାବୁଙ୍ଗ୍ କି ଆରେ ଇନାକାପା ଜିନିସ୍ ଇଟ୍ନି କାଜିଂ ହେଲାୟ୍ କିନାନ୍, ହେଦାଂ ଜଦି ଇନେର୍ ହେ ମାନାୟ୍ତି ଇଞ୍ଜାଙ୍ଗ୍ ମ୍ଡାତିସ୍ ଆରି ହେ ମ୍ଡାକେନ୍ ଦାରାପଡ଼ାତିସ୍, ତେବେ ହେୱାନ୍ ହେବେନିକା ରି ଗୁଣ୍ ହିନାନ୍ । ଜଦି ମ୍ଡାକେନ୍ ଦାରାପଡ଼ା ଆୱିତିସ୍, ତେବେ ଇଲ୍ନି ଡକ୍ରା ପାଡ଼୍ହା ଇଞ୍ଜିନି ଜିନିସ୍ତ କେଇ ହିତାନ୍ନା କି ଆକାୟ୍, ଇଦାଂ ପୁଞ୍ଜେଙ୍ଗ୍ କାଜିଂ ହାଉକାର୍ ପର୍ମେସ୍ୱର୍1 ମୁମ୍ଦ ଏକାନାନ୍ ।
ଆରେ, ସବୁବାନି ଅଦରମ୍ ବିସ୍ରେ, ଇଚିସ୍, କଡିଂ, ଗଦଂ, ମେଣ୍ଡାଙ୍ଗ୍ କି ହେନ୍ଦ୍ରାଂ, ଇମ୍ଣାକାପା ଜାଙ୍ଗ୍ତି ଜିନିସ୍ ବିସ୍ରେ ଜଦି ଇନେର୍ ଇନାର୍, ଇଦାଂ ହେ ଜିନିସ୍, ତେବେ ହାରି ପାକ୍ୟାନି କାତା ପର୍ମେସ୍ୱର୍2 ମୁମ୍ଦ ଏକାନାତ୍; ହେବେ ଇସ୍ୱର୍ ଇନେରିଂ ଦସି କିନାନ୍, ହେୱାନ୍ ତା ପାଡ଼୍ହା ଲଗାଂ ରି ଗୁଣ୍ ହିନାନ୍ ।
ଆରେ ଜଦି ଇନେର୍ ପାଡ଼୍ହାଇଞ୍ଜି ଲାଗାଂ ଜାର୍ ଗଦ, କଡି, ମେଣ୍ଡା, କି ଇମ୍ଣାକାପା ପସୁ ପହାପାଲି କିଦେଂ ଇଟ୍ନାନ୍, ଆରେ, ଜଦି ଇନେର୍ତି ହୁଡ଼୍ୱାଦାଂ ହେ ପସୁ ହାତିସ୍, କି ଡ୍ରିଂତିସ୍ କି ଏଡ଼ାୟ୍ କିଜ଼ି ଅତିସ୍, ତେବେ ହେୱାନ୍ ପାଡ଼୍ହାଇଞ୍ଜି ଜିନିସ୍ କେଇ ହିତାନ୍ନା କି ଆକାୟ୍, ଇ ବିସ୍ରେ ହାରି (ରିଆର୍) ବିତ୍ରେ ନିତ୍ରେମାପ୍ରୁତିନି ପାର୍ମାଣ୍ ଅନାନ୍; ପସୁନି ହାଉକାର୍ ହେ ପାର୍ମାଣ୍ ଅନାନ୍, ଆରେ, ହେୱାନ୍ ହୁଜା ଆଉନ୍ । ମତର୍ ଜଦି ତା ଲାଗାଂତାଂ ଚରି ଆତାତ୍ନା, ତେବେ ହେୱାନ୍ ପସୁ ହାଉକାର୍ତିଂ ତା ମଲ୍ ହିନାନ୍ । ଜଦି ହେ ପସୁ ରାନ୍ତି ଜନ୍ତୁ କାଜିଂ ଗାଓଦାଓ କିତିସ୍, ତେବେ ହେୱାନ୍ ପାର୍ମାଣ୍ କାଜିଂ ହେଦାଂ ତାଏନ୍; ହେୱାନ୍ ହେ ଗାଓଦାଓ ପସୁନି ମଲ୍ ହିଉନ୍ ।
ଆରେ, ଇନେର୍ ଜଦି ଜାର୍ ପାଡ଼୍ହାଇଞ୍ଜିନି ପସୁ ଏନ୍ଚି ଅନାନ୍ ଆରି ତା ହାଉକାର୍ ତା ଲାହାଂ ହିଲ୍ୱାଦାଂ ହେୱାନ୍ ଡ୍ରିଂନାନ୍ କି ହାନାନ୍, ତେବେ ହେୱାନ୍ ନିଜେ ତା ମଲ୍ ହିନାନ୍ । ମତର୍ ତା ହାଉକାର୍ ତା ଲାଗାୟ୍ ମାଚିସ୍, ତେବେ ତା ମଲ୍ ହିଉନ୍; ଜଦି ହେୱାନ୍ ବାଡ଼ାନି ପସୁ ଆତିସ୍, ତେବେ ହେଦାଂ ବାଡ଼ା ଅତି ଲାକେ ଆନାତ୍ ।
ମଣ୍ଡ୍ଲିତ ଆରି ଦାର୍ମିର୍ ବିଦି
ଆରେ, ଇନେର୍ ଅର୍କିତ୍ ଗାଡ଼୍ଚେଂ ଲାଲ୍ସା କିଜ଼ି ତା ଲାହାଂ ହୁଞ୍ଚିସ୍, ତେବେ ହେୱାନ୍ ତାଂ ଜଡ଼ାଡାବୁଂ ହିଜ଼ି ବିବା କିନାନ୍ । ଜଦି ଲାତ୍ରାହି ତା ଲାହାଂ ଜାର୍ ଗାଡ଼ିଂ ବିବା ହିଦେଂ ରାଜି ଆୱିତିସ୍, ତେବେ ହେୱାନ୍ ଗାଡ଼୍ତି ମଲ୍ ବିଦିତ ରୁପା ଡାବୁଙ୍ଗ୍ ହିନାମାନ୍ । ଏପେଙ୍ଗ୍ ଡାଣିକଗ୍ଲେକାଂ ଜିବୁନ୍ ଇଟୁଦେର୍ ।
ଇନେର୍ ପସୁ ଲାହାଂ ନାଂଗ୍ରା କାମ୍ ଇଟ୍ନାର୍, ତାଦି ନିଜେ ପାରାଣ୍ଡାଣ୍ଡ୍ ଆନାତ୍ । ଇମ୍ଣି ମାନାୟ୍ କେବଲ୍ ନିତ୍ରେମାପ୍ରୁତିଂ ପିସ୍ତି ଇମ୍ଣାକାପା ପେନ୍କୁ ଲାଗାୟ୍ ପୁଜା କିନାନ୍, ହେୱାନ୍ ପୁରା ନାସ୍ ଆନାନ୍ ।
ଏପ୍ ବିଦେସ୍ୟା କାଜିଂ ଅନ୍ୟାୟ୍ ଆରି ତା କାଜିଂ ଉତ୍ପାତ୍ କିଉଦେର୍, ଇନେକିଦେଂକି ଏପେଙ୍ଗ୍ ମିସର୍ ଦେସ୍ତ ବିଦେସ୍ ମାଚାଦେର୍ । ଏପେଙ୍ଗ୍ ଇମ୍ଣାକାଦ୍ଲିଂ ରାଣ୍ଡିଙ୍ଗ୍ କି ଆବାହିଲ୍ୱି ମାଜ଼ିରିଂ ଦୁକ୍ ହିଉଦେର୍ । ଏପ୍ ହେୱାକାଂ ଇମ୍ଣାକାପା ଦୁକ୍ ହିତିସ୍, ହେୱେକ୍ ଜଦି ମା ଲାଗାୟ୍ ୱିଗାଲିଂ କୁକ୍ତିତିସ୍, ତେବେ ଆପ୍ ନିଜେ ହେୱେକ୍ କୁକ୍ନାକା ୱେନାପ୍ । ଆରେ, ମା ରିସା ବେସି ଆତିସ୍, ଆପ୍ ମିଂ କାଣ୍ଡା ହୁକେ ଟୁଣ୍ତାନାପ୍; ହେବେ ମି କଗ୍ଲେକ୍ ରାଣ୍ଡି ଆନିକ୍ ଆରି ହିମ୍ଣାଙ୍ଗ୍ ଆବାହିଲ୍ୱାକାର୍ ଆନାର୍ ।
ଏପ୍ ଜଦି ମା ମାନାୟାର୍ ବିତ୍ରେ ମି ପାଡ଼୍ହାଇଞ୍ଜାକାରିଙ୍ଗ୍ ଇମ୍ଣାକାପା ଅର୍କିତ୍ ଲଗାଂ ଡାବୁଙ୍ଗ୍ ରିଣ୍ ହିତିସ୍, ତେବେ ତା କାଜିଂ ମାଜାନ୍ ଲାକେ ଆଉନ୍ ଆରି ତା ତାଂ କଲନ୍ତର୍ ଅଉଦେର୍ । ଜଦି ଏନ୍ ନି ପାଡ଼୍ହାଇଞ୍ଜି ହେନ୍ଦ୍ରାଂ ବାନ୍ଦା ଇଟ୍ନାଦେର୍, ତେବେ ଏପ୍ ୱେଡ଼ାହାନି ଆଗେ ହେଦାଂ ତାଂ ଉଲ୍ଟି ହିନାଦେର୍ । ଇନେକିଦେଂକି ହେଦାଂ ତା ରଞ୍ଜାଙ୍ଗ୍ ମତର୍ ପର୍ନାକା ଆରି ତଲ୍ ପର୍ନି ହେନ୍ଦ୍ରା; ହେୱାନ୍ ଇନେକିଦେଂ ହୁଞ୍ଜ୍ନାନ୍ ? ଆରେ, ହେୱାନ୍ ଜଦି ମା ଲାଗାୟ୍ କୁକ୍ତିତିସ୍, ତେବେ ଆପ୍ ହେଦାଂ ୱେନାପ୍, ଇନେକିଦେଂକି ଆପ୍ ଦୟାନିକାପ୍ ।
ଏନ୍ ଜାର୍ ପର୍ମେସ୍ୱର୍ ଉଡ଼ା ଆଉଦେର୍, ଆରେ, ନି ମାନାୟାର୍ତି ମୁଣିକାରିଂ ସାଇପ୍ ହିଉଦେର୍ ।
ଏପେଙ୍ଗ୍ ଜାର୍ ତାସ୍ନି ବାର୍ତିତାଂ ଆରି ପାଡ଼୍ନି ରାସ୍ତାଂ ପୁଜା କିଦେଂ ମାଲା ଆମାଟ୍ । ଏପ୍ ଜାର୍ ପର୍ତୁମ୍ ଜଲମ୍ଆତି ମାଜ଼ିରିଙ୍ଗ୍ ମାଂ ହିଦ୍ନାଦେର୍ । ଆରେ, ନି କଡି ଆରି ମେଣ୍ଡାଙ୍ଗ୍ କାଜିଂ ତାଲାକେ କିନାଦେର୍; ହେୱାନ୍ ସାତ୍ ଦିନ୍ ଜାର୍ ଆୟା ଲାହାଂ ମାନାନ୍, ଆଟ୍ ଦିନ୍ତ ଏପ୍ ମାଂ ହିଦ୍ନାଦେର୍ । ଆରେ, ଏପେଙ୍ଗ୍ ମା ଉଦେସ୍ତ ପୁଇପୁୟା ମାନାୟ୍ ଆନାଦେର୍; ଇଦାଂକାଜିଂ ରାନ୍ତି ପସୁ ହୁଦାଂ ହାତି ଜେଇ ତିନୁଦେର୍; ଏପେଙ୍ଗ୍ ହେଦାଂ ନିକୁଡ଼ିଂ ମୁମ୍ଦ ତୁହିନାଦେର୍ ।
Source notes (2)
- Footnote ପର୍ମେସ୍ୱର୍ ବିଚାର୍କାର୍ୟା
- Footnote ପର୍ମେସ୍ୱର୍ ବିଚାର୍କାର୍ୟା
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.