Pengo Bible
ହିକ୍ୟାହିନାକା 8
ରାଜାତି ବଲ୍ ମାନିକିନାକା
ଗିଆନି ଲାକେ ଇନେର୍ ମାନାନ୍ ? ଆରି ଇନେନ୍ ବିସ୍ରେନି ବାବ୍ନା ପୁନାନ୍ ? ମାନାୟ୍ତି ଗିୟାନ୍ ହେୱାନ୍ତି ମୁମ୍ ୱାରି କିନାତ୍ ଆରି ହେୱାନ୍ତି ଆଟ୍ୱା ବାଦ୍ଲାୟ୍ ଆନାତ୍ ।
ଏପ୍ ରାଜାତି ବଲ୍ ମାନିକିଆଟ୍, ଆନ୍ ଇଦାଂ ୱେଚ୍ଚାନାଙ୍ଗା ଆରି ପର୍ମେସ୍ୱର୍ତି ମୁମ୍ଦ ପାର୍ମାଣ୍ କିନି କାଜିଂ ହେଦାଂ କିୟାଟ୍ । ହେୱାନ୍ତି ମୁମ୍ଦାଂ ହସି ହାଞ୍ଜେଙ୍ଗ୍ ତିର୍କାଡ଼୍ ଆମାଟ୍; ଇମ୍ଣାକାପା ବାନ୍ୟା ବିସ୍ରେ ଜିଦ୍ଆମାଟ୍; ଇନାକିଦେଂକି ଇନାକା ହେୱାନ୍ତି ଇଚା, ହେୱାନ୍ ହେଦାଂ କିନାନ୍ । ଇନାକିଦେଂକି ରାଜାତି କାତା ସାକ୍ତିକାଟାକା; ଆରେ, ଏପ୍ ଇନାକା କିନାଦେରା, ଇଦାଂ ହେୱାନିଂ ଇନେର୍ ଇଞ୍ଜେଙ୍ଗ୍ ଆଡ୍ନାର୍ ? ଇନେନ୍ ବଲ୍ ମାନି କିନାନ୍, ହେୱାନ୍ ଇମ୍ଣାକାପା ବାନ୍ୟା ବିସ୍ରେ ପୁନୁନ୍; ଆରେ ଗିଆନିତି ମାନ୍ ସମୁ ଆରି ବିଚାର୍ ପୁନାନ୍; ଇନାକିଦେଂକି ସବୁ ଆହା କାଜିଂ ସମୁ ଆରି ବିଚାର୍ ମାନାତ୍ ଇନାକିଦେଂକି ମାନାୟ୍ତି ଦୁକ୍ ତା ପାକ୍ୟାତ ବେସି; ଇନାକିଦେଂକି ଇନାକା ଗିଟାନାତ୍, ହେଦାଂ ହେୱାନ୍ ପୁନୁନ୍ ଆରି ଇନେସ୍ବାନି ହେଦାଂ ଗିଟାନାତ୍, ଇଦାଂ ଇନେର୍ ହେୱାନିଂ ୱେଚ୍ଚେଙ୍ଗ୍ ଆଡ୍ନାନ୍ ? ହାନାକାଦ୍ଲିଙ୍ଗ୍ ଇନେର୍ ଇଡ୍ଦେଂ ଆଡ୍ନାର୍ କିବା ହାନି ଦିନ୍ତିଙ୍ଗ୍ ଜପି ମାନାୟ୍ତି ମୁଡ଼େ ଆଦିକାର୍ ହିଲୁତ୍ ଆରେ ଜୁଜ୍ତାଂ ରକ୍ୟା ପାୟାଉନ୍; ଆରି ଦୁସ୍ଟନିକା ଆହାନି ଲଗାଂ ଦୁସ୍ଟନିକା ଉଦାର୍ କିଉତ୍ ।
ଦୁସ୍ଟ ଆରି ଦାର୍ମି
ଇସବୁ ଆନ୍ ହୁଡ଼୍ତାଂନା ଆରି ୱେଡ଼ା ତାରେନ୍ ଜେ ସବୁ କାମାୟ୍ କିତିସ୍, ହେବେନି ଆନ୍ ମାନ୍ଦିଆନ୍ କିତାଂନା; ଇନା ଇନାୱେଡ଼ାଂ ର ମାନାୟ୍ତି ବିନ୍ ଜପି ହେୱାନ୍ତି ବାନ୍ୟା କାମାୟ୍ କାଜିଂ କେମ୍ତା ମାନ୍ଗାନାତ୍ । ଆରେ, ଅଦାର୍ମି ଲଗୁ ହାତାର୍ ଆରି ମୁଚ୍ୟାତାର୍, ହାତାକାର୍ ତାକେ ଏକାତାର୍; ଆରେ, ସମାନ୍ ମାନାୟାର୍ ପୁଇପୁୟା ବାହାତ ହାଚାର୍ ଆରି ଗାଡ୍ଦ ମେଙ୍ଗ୍ତାର୍; ଇଦାଂ ନେ ଆହାର୍ ହୁଡ୍ତାଂ । ବାନ୍ୟାକାମାୟ୍ ବେରୁତ ବେଗି ଡାଣ୍ଡ୍ବଲ୍ ପୁରା ଆୱିତିଲେ ମାନାୟ୍ ହିମ୍ଣାଂତି ମାନ୍ ବାନ୍ୟା କିଦେଂ ପୁରାନାତ୍ । ଜଦିପା ପାପ୍ୟା ସଏ ହଟ୍ ବାନ୍ୟାକାମାୟ୍ କିଜ଼ି ଲାମାଜିବୁନ୍ ଆତିସ୍, ଆତିସ୍ପା ଆନ୍ ନିଚୟ୍ ପୁନାଙ୍ଗ୍ ଜେ, ପର୍ମେସ୍ୱର୍ତିଂ ପାଣ୍ଡ୍ରାନାକାର୍ ହେୱାନ୍ତି ମୁମ୍ଦ ପାଣ୍ଡ୍ରାନାର୍ ଇଞ୍ଜି ହେୱାର୍ତି ମଙ୍ଗଲ୍ ଆନାତ୍; ମତର୍ ଅଦାର୍ମିତି ମଙ୍ଗଲ୍ ଆଉତ୍, କିବା ହେୱାନ୍ ଜାର୍ ଡ଼ିଗା ଲାକେ ଆଇଁସ୍ ବାଡାୟ୍ କିଉନ୍; ଇନାକିଦେଂକି ହେୱାନ୍ ପର୍ମେସ୍ୱର୍ତି ଲାଗେ ପାଣ୍ଡ୍ରାଉନ୍ । ପୁର୍ତିତ ଇଦାଂ ରଞ୍ଜାଙ୍ଗ୍ ବେକାର୍ନିକା ପୁରା ଆନାତ୍; ଇନା ଇନାୱେଡ଼ାଂ ଦାର୍ମିରିଂ ଦୁସ୍ଟର୍ତି କାମାୟ୍ଇସାବ୍ରେ ପାଡ଼୍ ଗିଟାନାତ୍, ଆରେ ଇନା ଇନାୱେଡ଼ାଂ ଦୁସ୍ଟରିଙ୍ଗ୍ ଦାର୍ମିର୍ତି କାମାୟ୍ଇସାବ୍ରେ ପାଡ଼୍ ଗିଟାନାତ୍; ଆନ୍ ଇଚାଙ୍ଗ୍, ଇଦାଂ ନେ ବେକାର୍ । ଲାଗିଂ ଆନ୍ ୱାରିତାଂ କେର୍ତାଂ, ଇନାକିଦେଂକି ତିନାଉଣାକା ଆରି ୱାରି କିନି ବାଟା ୱେଡ଼ା ତାରେନ୍ ମାନାୟ୍ କାଜିଂ ଇନାକାପା ହାର୍ଦି ବିସ୍ରେ ହିଲୁତ୍; ଲାଗିଂ ହେୱାନ୍ ୱେଡ଼ା ତାରେନ୍ ପର୍ମେସ୍ୱର୍ତି ହିତ୍ତାକା ତା ଆଇଁସ୍ ବିତ୍ରେ ଇମ୍ଣି ଇମ୍ଣି କସ୍ଟ କିନାନ୍, ହେସବୁତ ଇଦାଂ ନେ ତାତାଂ ଆଡାନାକା ଆନାତ୍ । ଏଚେକାଡ଼୍ଦ ଆନ୍ ଗିଆନ୍ନି ଡ଼ୁକ୍ତିକାତା ପୁଞ୍ଜେଙ୍ଗ୍ ଆରି ପୁର୍ତିତ କିତିକାମାୟ୍ ହୁଡ଼୍ଦେଂ ମାନ୍ଦିଆନ୍ କିତାଂ; ଇନାକିଦେଂକି ୱେଡ଼ାନାଣା ଇନେର୍ତି କାଣ୍ଗା ହୁଞ୍ଜୁତ୍, ଏଲେଙ୍ଗ୍ ଲଗୁ ପା ମାନାର୍; ହେଚେକାଡ଼୍ଦ ଆନ୍ ପର୍ମେସ୍ୱର୍ତି ସବୁ କାମାୟ୍ ବିସ୍ରେ ହୁଡ଼୍ତାଂ ଜେ, ମାନାୟ୍ ୱେଡ଼ା ତାରେନ୍ କିତି କାମାୟ୍ନି ଡ଼ୁକ୍ତିକାତା ଗାଟାଉନ୍; ଇନାକିଦେଂକି ହେଦାଂ ଡେକ୍ନି କାଜିଂ ମାନାୟ୍ ଏଚେକ୍ କସ୍ଟ କିତିସ୍ପା ହେଦାଂ ଗାଟାଉନ୍; ଆରେ, ଗିଆନି ଲଗୁ ହେଦାଂ ପୁଞ୍ଜେଙ୍ଗ୍ ଚିନ୍ତା କିତିସ୍ପା ହେବେନି ଡ଼ୁକ୍ତିକାତା ଗାଟାଦେଂ ଆଡୁନ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.