Pengo Bible
ହିକ୍ୟାହିନାକା 4
ଜଗତ୍ନି ଅନ୍ୟାୟ୍
ଇଦାଂପାଚେ ଆନ୍ ମାସ୍ଦି ୱେଡ଼ା ତାରେନ୍ କିତି ଅନ୍ୟାୟ୍ ସବୁ ହୁଡ଼୍ତାଂ; ଆରେ ହୁଡ଼ାଟ୍, ଅନ୍ୟାୟ୍ ପାୟାତି ଲକୁ ସାକ୍ତିନିକାନ୍ ଆରି ହେୱାରିଂ ସୁସ୍ତାକିନାକାର୍ ଇନେର୍ ହିଲୁର୍; ଆରେ, ହେୱାର୍ତି ଅନିୟାୟ୍କାରିର୍ତି ପାକ୍ୟାତ ବାପୁ ମାନାତ୍, ମତର୍ ଅନିୟାୟ୍ପାୟାତି ମାନାୟାର୍ତି ସୁସ୍ତାକିନାକାର୍ ଇନେର୍ ହିଲୁର୍ । ଲାଗିଂ ଆନ୍ ନଂ ଜିତି ଲକ୍ତାଂ ଇଦାଂ ଆଗେ ହାତାକାରିଂ ବେସି ୱାରି କିତାଂ; ମତର୍ ଇମ୍ଣି ମାନାୟ୍ ନେଞ୍ଜେଙ୍ଗ୍ ପାତେକ୍ ଜଲମ୍ ଆୱାତାନ୍ନା ଆରି ୱେଡ଼ା ତାରେନ୍ କିତି ବାନ୍ୟା କାମାୟ୍ ହୁଡ଼୍ୱାତାନ୍ନା, ଇ ରାୟାରିଂ ଆନ୍ ହେ ବୟଙ୍କାର୍ ବାଟା ଆଦିକ୍ ହାର୍ ଗିଆନ୍ କିତାଂ । ହେବେ ଆନ୍ ୱିଜ଼ୁ କସ୍ଟ ଆରି ସବୁ ଆଡ୍ନି କାମାୟ୍ ହୁଡ଼୍ତାଂ ଜେ, ତା କାଜିଂ ମାନାୟ୍ ଜାର୍ ପାଡ଼୍ହାଇଞ୍ଜିନି ଡାରା ଲଗୁ ଆତିସ୍ । ଇଦାଂ ନେ ବେକାର୍ ଆରି ଡ଼ୁଇନି ପାଚେ ହାନାକା ମତର୍ । ମୁର୍କିୟା ଜାର୍ କେଇ ରବେ ମୁଟା କିଜ଼ି ଜାର୍ ଜେଇ ତିନାନ୍ । କସ୍ଟ ଆରି ଡ଼ୁଇନି ପାଚେହାଲ୍ଜି ରି ମୁଟାତାଂ ସାନ୍ତି ବାଟା ର ମୁଟା ହାର୍ । ତେବେ ଆନ୍ ମାସ୍ଦି ୱେଡ଼ା ତାରେନ୍ ବେକାର୍ନିକା ହୁଡ଼୍ତାଂ । ଇମ୍ଣି ଲକୁ ରୱାନ୍ ମାଚିସ୍ ଆରି ହେୱାନ୍ତି ପାଚେ ଇନେର୍ ହିଲୁର୍, କିବା ହେୱାନ୍ତି ମାଜ଼ି କି ଟଣ୍ଡେନ୍ ହିଲୁନ୍; ଆତିସ୍ପା ହେୱାନ୍ତି ସବୁ କସ୍ଟନି ହାନ୍ଦି ହିଲୁତ୍, କିବା ଦନ୍ତ ହେୱାନ୍ତି କାଣ୍ଗା ସାରି ଆକାୟ୍ । ହେୱାନ୍ ଇନାନ୍, ତେବେ ଆନ୍ ଇନେର୍ କାଜିଂ କସ୍ଟ କିନାଙ୍ଗା ଆରି ଜାର୍ ପାରାଣ୍ ମଙ୍ଗଲ୍ତାଂ ବାଚାୟ୍ କିନାଙ୍ଗା ? ଇଦାଂ ନେ ବେକାର୍ ଆରି ନିତ୍ରେ, କସ୍ଟନିକା । ରୱାନ୍ତାଂ ରିୟାର୍ ହାର୍, ଇନାକିଦେଂକି ହେୱାର୍ ଜାର୍ ଜାର୍ କସ୍ଟତାଂ ନେକ୍ରି ପାଡ଼୍ ପାୟାନାର୍ । ହେୱାର୍ ଆର୍ତିସ୍, ରୱାନ୍ ଜାର୍ ହାଂଦାକାନିଂ ନିକ୍ନାନ୍; ମତର୍ ଇନେନ୍ ଆର୍ନି ୱେଡ଼ାଲିଂ ରୱାନ୍ ମାଚିସ୍ ଆରି ଇନେନିଂ ନିକ୍ତେଂ ବିନ୍ଲଗୁ ମାନ୍ୱିତିସ୍, ହେୱାନିଂ ରାଣ୍ନିକାନ୍ । ଆରେ, ରିୟାର୍ ରଚେ ହୁଞ୍ଚିସ୍ ଉହୁମ୍ ଆନାର୍; ମତର୍ ରୱାନ୍ ଇନେସ୍ ରୱାନ୍ ଉହୁମ୍ ଆଦେଂ ଆଡ୍ନାନ୍ ? ଏଚେକାଡ଼୍ଦ ଇନେନ୍ ରୱାନ୍ ମାନି ଲଗାଂ ଆରାୟ୍ କିନାନ୍, ତେବେ ରିୟାର୍ ହେୱାନ୍ତି ଉଲ୍ଟି ବାଦା ହିନାର୍; ଆରେ, ତିନି ଗୁଣ୍ ଡରି ବେଗି ନାଡୁତ୍ । ଇମ୍ଣି ବୁଡ଼୍ହି ଆରି ମୁର୍କିୟା ରାଜା ଆରେ ଇମ୍ଣାକାପା ବୁଜାୟ୍କିତାକା ଇଡ୍ଦେଂ ପୁନୁନ୍, ତା ବାଟା ଅର୍କିତ୍ ଆରି ଗିଆନ୍ନିକାନ୍ ବେଣ୍ଡିୟା ଲଗୁ ହାର୍ । ଇନାକିଦେଂକି ହେୱାନ୍ ରାଜା ଆନି କାଜିଂ ଜୟିଲ୍ତାଂ ହସି ୱାତାନ୍; ଆରେ, ହେୱାନ୍ ହେୱାନ୍ତି ରାଜିତ ଅର୍କିତ୍ ଆଜ଼ି ଜଲମ୍ ଆସି ମାଚାନ୍ । ଆନ୍ ୱେଡ଼ା ତାରେନ୍ ହାନି ୱିଜ଼ୁ ପାରାଣିକାଂ ହୁଡ଼୍ତାଂ ଜେ, ହେୱାର୍ ହେ ବେଣ୍ଡ୍ଆ, ଇମ୍ଣି ରିୟାର୍ ମୁଣିକା ଇ ବାହାତ ନିଂତାନ୍, ହେୱାନ୍ତି ହାଂଦାକାନ୍ । ହେୱାନ୍ ଇମ୍ଣାକାର୍ତି ମୁଣିକା ଆତାନ୍, ହେ ମାନାୟାର୍ ବେସିହେନି; ଆତିସ୍ପା ଆଗେନିଲଗୁ ତାତାକେ ୱାରି କିଉର୍ । ନିଚୟ୍ ଇଦାଂ ନେ ବେକାର୍ ଆରି ଡ଼ୁଇ ପାଚେ ହାନାକାର୍ ମତର୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.