Pengo Bible
୨ ତିମତି 4
ଆନ୍ ଇସ୍ୱର୍ତି ମୁମ୍ଦ, ଆରେ ଇମ୍ଣି କ୍ରିସ୍ଟ ଜିସୁ ଜିତାକା ଆରି ହାତି ହାରିତିଂ ବିଚାର୍ କିଦେଙ୍ଗ୍ ହାନାନା, ତାଦାଂ ଆରେ ୱାନାକା ଆରି ରାଜିନି ପାର୍ମାଣ୍ ହିଜ଼ି ମିଙ୍ଗେଙ୍ଗ୍ ଇ ଆଟ୍ୱା ବଲ୍ ହିଦ୍ନାଙ୍ଗା, ବଚନ୍ ସୁଣାୟ୍ କିୟାଟ୍, ସମୁତ କି ଅସମୁତ ହେବେ ୱାରିୟା ଆଡ, ପୁରା ହୁଦାର୍ତାଂ ଲାହାଂ ହିକ୍ୟା ହିଜ଼ି ଲେତାଟ୍, ଆରେ ଦାକା ଆରି ୱାରିନିଦାନ୍ କିୟାଟ୍ । ଇନେକିଦେଂକି ସମୁ ୱାନାତ୍, ଏଚେକାଡ଼୍ଦ ହେୱାର୍ ହାର୍ଦି ହିକ୍ୟା ହୁଞ୍ଜେଙ୍ଗ୍ ଆଡୁର୍, ମତର୍ ୱେଞ୍ଜେଙ୍ଗ୍ ହାର୍ଦି କାତାତ ସାରି ଆଜ଼ି ଆହା ଇସାବେ ଜାର୍ କାଜିଂ ବେସିହେନି ଗୁରୁରିଂ ରୁଣ୍ଡାୟ୍ କିନାର୍, ଆରେ ସତ୍ କାତାତ କିତୁଲ୍ ହିୱାଦାଂ ମାନ୍ତରଚ୍ଚି କାତା କାଜିଂ ମାନ୍ ହିନାର୍ । ମାତର୍ ଏପେଙ୍ଗ୍ ୱିଜ଼ୁ ବିସ୍ରେ ଜାଗ୍ରତ୍ ଆଡୁ, ଦୁକ୍ ହୁଞ୍ଜାଟ୍, ନେକ୍ରିକାବୁର୍ ସୁଣାୟ୍ କିୟାଟ୍, କାମାୟ୍ କିୟାଟ୍, ମି ହେବାନି କାମାୟ୍ ପୁରା କିୟାଟ୍ ।
ନା ଜିବୁନ୍ତିଂ ପୁଜା ହିଜ଼ି ଇ ଜଗତ୍ତିଂ ପିସ୍ତି ହାନି ସମୁ ଏକା ୱାତାତେ । ଆନ୍ ହାର୍ଦି ହାଜ଼ିରିଜ଼ି ଜୁଜ୍ କିତାଂନା, ବାଚିକିତି ହାଜ଼ିନି ୱିସ୍ତି ପାତେକ୍ ହନ୍ତାଂନା, ଆନ୍ ପାର୍ତି ରାକ୍ୟା କିତାଂନା; ନେଞ୍ଜେଙ୍ଗ୍ ନା କାଜିଂ ଦାର୍ମିନି ମୁକୁଟ୍ ଇଟ୍ୟାତାତ୍ନା; ହେଦାଂ ହେ ସିଗ୍ଦିନ୍ତ ନ୍ୟାୟ୍କାରିୟା ବିଚାର୍କାର୍ୟା ମାପ୍ରୁ ନାଙ୍ଗେଙ୍ଗ୍ ହିଦ୍ନାନ୍, ଆରେ କେବଲ୍ ନାଙ୍ଗେଙ୍ଗ୍ ଆକାୟ୍, ମତର୍ ଜିଉନନି ଏଚେଜାଣ୍ ହେୱାନ୍ତି ୱାନାକା ଆଗେ କାସି ମାନାର୍, ହେ ୱିଜ଼ାରିଂ ହିନାନ୍ ।
ଜାର୍ତି କାତା
ବେଗି ନା ତାକେ ୱାଦେଙ୍ଗ୍ ଚେସ୍ଟା କିୟାଟ୍; ଇନେକିଦେଂକି ଦିମା ଇ ନଙ୍ଗ୍ନି ସଁସାର୍ତ ଜିଉନଜ଼ି ନାଙ୍ଗେଙ୍ଗ୍ ପିସ୍ତାତାତ୍ନା ଆରି ତେସ୍ଲନିକି ତାକେ ହାଚାନ୍ନା; କ୍ରେସ୍କେନ୍ସ୍ ଗାଲାତିଆତ ଆରି ତିତସ୍ ଦଲ୍ମତିୟାତ ହାନାନ୍ନା 1କେବଲ୍ ଲୁକ ନା ଲାହାଂ ମାନାନ୍ । ମାର୍କଙ୍ଗ୍ ମି ଲାହାଂ ତାହିୱାଡୁ, ଇନାକିଦେଂକି ନା ହେବା କାଜିଂ ଉପ୍କାର୍ କିଦ୍ନାନ୍ । 2ତୁକିକତିଂ ଆନେଙ୍ଗ୍ ଏପିସତାକେ ପକ୍ତାତାଂନା । ତ୍ରୟାତ କାର୍ପତି ଲାଗେ ଆନ୍ ଇମ୍ଣି ଉସ୍ପିନି ହେନ୍ଦ୍ରା ପିସ୍ତି ୱାତାଂନା, ଏପେଙ୍ଗ୍ ୱାନି ସମୁତ ହେଦାଂ ଆରି ପତିଙ୍ଗ୍, ଇନେସ୍କିତିସ୍ପା ତଲ୍ ପତିଙ୍ଗ୍ ତାଇୱାନାଦେର୍ ।
କଂସାରି ଆଲେକ୍ଜାଣ୍ଡର୍ ନାଦାଙ୍ଗ୍ ବେସି ନସ୍ଟ କିତାନ୍ନା; ମାପ୍ରୁ ତା କାମାୟ୍ ଇସାପ୍ତାଂ ତାଙ୍ଗେଙ୍ଗ୍ ପାର୍ତି ପାଡ଼୍ ହିନାନ୍; ଏପେଙ୍ଗ୍ ପା ତାତାକେନ୍ଣ୍ଡାଂ ଜାଗ୍ରତ୍ ମାନାଟ୍, ଇନେକିଦେଂକି ହେୱାନ୍ ମାଙ୍ଗ୍ ବଚନ୍ନି ଜବର୍ ବେରୁ କିଜ଼ି ମାନ୍ଚାନ୍ ।
ନା ବିଚାର୍ ପର୍ତୁମ୍ ୱେନି ୱେଡ଼ାଙ୍ଗ୍ ଇନେର୍ ନା ପାକ୍ୟାତ ଆୱାତାର୍, ମତର୍ ୱିଜ଼ାର୍ ନାଙ୍ଗେଙ୍ଗ୍ ପିସ୍ତାତାର୍; ଇଦାଂ ହେୱାର୍ ବେରୁତ ଦସ୍ ଆହ୍ମେର୍ । ମାତର୍ ମାପ୍ରୁ ନା ପାକ୍ୟା ଆଜ଼ି ନାଙ୍ଗେଙ୍ଗ୍ ବାପୁ କିତ୍ତାନ୍, ଆରେ ଆନ୍ ସିହଁ ୱାଇଦାଂ ରାକ୍ୟାତାଂ, ଇନେସ୍କି ନା ହୁଦାଂ ନେକ୍ରିକାବୁର୍ ପୁରା ଲାକେ ସୁଣାୟ୍ ଆଦେଂ ଆଡ଼୍ଦାନାତ୍ ଆରି ପାର୍ତିକିୱି ଜିହୁଦି ୱିଜ଼ାର୍ ହେଦାଂ ୱେଞ୍ଜେଙ୍ଗ୍ ଆଡ୍ନାର୍; ମାପ୍ରୁ ନାଙ୍ଗେଙ୍ଗ୍ ସବୁ ବାନ୍ୟା କାମାୟ୍ତାଂ ମୁକ୍ତି କିଦ୍ନାନ୍ ଆରି ନାଙ୍ଗେଙ୍ଗ୍ ବାଚାୟ୍ କିଜ଼ି ଜାର୍ ସାର୍ଗେ ରାଜିତ ହଟ୍ପାଦ୍ନାନ୍; ଜୁଗ୍ ଜୁଗ୍ ତାଦାଙ୍ଗ୍ ଜାଜ୍ମାଲ୍ ଆୟେତ୍, ଆମେନ୍ ।
ହାରିହାରାନି ଜୁୱାର୍
ପ୍ରିସ୍କା ଆରି ଆକ୍ୱିଲା ଆରେ ଅନିସିପର୍ତି କୁଟୁମ୍ତିଙ୍ଗ୍ ନା ଜୁୱାର୍ ୱେଚାଟ୍ । 4ଏରାସ୍ଟ କରନ୍ତ ତାକେ ମାନାର୍, ମାତର୍ ତ୍ରପିମ୍ ବେମାର୍ ଆତିଲେ ଆନ୍ ତାଙ୍ଗେଙ୍ଗ୍ ମିଲିତତ ପିସ୍ତି ୱାତାଂନା । ଏପେଙ୍ଗ୍ ପିନିମାସ୍ ଆଗେତାଂ ୱାଦେଙ୍ଗ୍ ସେସ୍ଟା କିୟାଟ୍ । ଇଉବୁଲ୍, ପୁଦେନସ୍, ଲିନ୍, କଲୌଦିୟା ଆରି ଟଣ୍ଡାର୍ ୱିଜ଼ାର୍ ମିଙ୍ଗେଙ୍ଗ୍ ଜୁୱାର୍ ଜାଣାୟ୍କିଦ୍ନାରା ।
ମାପ୍ରୁ ମି ଜିବୁନ୍ନି ଲାହାଙ୍ଗ୍ ଆଏନ୍ ମି କାଜିଂ ଦୟା ଆଏତ୍ ।
Source notes (4)
- Cross-reference କଲସିୟ ୪:୧୪; ପିଲିମନ୍ ୧:୨୪; ପକ୍ୟାତାକା ୧୨:୧୨,୨୫; ୧୩:୧୩; ୧୫:୩୭-୩୯; କଲସିୟ ୪:୧୦; ପିଲିମନ୍ ୧:୨୪.
- Cross-reference ପକ୍ୟାତାକା ୨୦:୪; ଏପିସିୟ ୬:୨୧,୨୨; କଲସିୟ ୪:୭,୮.
- Cross-reference ପକ୍ୟାତାକା ୧୮:୨; ୨ ତିମତି ୧:୧୬,୧୭.
- Cross-reference ପକ୍ୟାତାକା ୧୯:୨୨; ରମିୟ ୧୬:୨୩; ପକ୍ୟାତାକା ୨୦:୪; ୨୧:୨୯.
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.