Baghlayani Bible
रोमियों 5
परमेशरो साथे मेल
जेबे आसे विश्वासो रे जरिए तर्मी ठईरे, तो आपणे प्रभु यीशु मसीह रे जरिए जो तिने आसा खे करी राखेया परमेशरो साथे मेल राखिए। मसीह रे जरिए विश्वासो री बजअ ते आसा री पऊँछ तेसा कृपा तक ऊई री, जिदे आसे एबे बणे रे। आसे एसा गल्ला पाँदे कमण्ड करूँए कि आसा खे परमेशरो री महिमा रे इस्सेदार बणने री उम्मीद ए। बस येई नि, बल्कि आसा खे क्ल़ेशो पाँदे बी कमण्ड करना चाईयो, ये जाणी की कि क्ल़ेशो ते सब्र और सब्रो ते खरा निकल़ना और खरे निकल़ने ते उम्मीद जागोई और उम्मीदा ते शर्म नि ऊँदी, कऊँकि पवित्र आत्मा, जो परमेशरे आसा खे देई राखेया तिजी रे जरिए परमेशरो रा प्यार आसा रे मनो रे पाई राखेया। कऊँकि जेबे आसे कमजोर ई थे, तेबे मसीह ठीक बखतो पाँदे भक्तिहीना री खातर मरेया।
केसी तर्मी जणे खे कोई मरो, ये तो मुश्किल ए। फेर बी ऊई सकोआ कि केसी खरे माणूंए री खातर कोई मरने खे त्यार ऊई जाओ। पर जेबे आसे पापी ई थे, तेबुई मसीह आसा री खातर मरेया। इजी ते परमेशरे आसा रिया तँईं आपणे प्यारो रा सबूत दित्तेया। जे आसे मसीह रे खूनो रे जरिए तर्मी ठराई राखे, तो आसे पक्का ई मसीह रे जरिए परमेशरो रे रोषो ते बची जाणे। जेबे आसे परमेशरो रे बैरी ई थे तो तेसरे पुत्रो री मौत ऊणे रे जरिए आसा रा मेल परमेशरो साथे ऊआ, तेबे मेल ऊई जाणे पाँदे, तेसरे जीवनो री बजअ ते आसा उद्धार कऊँ नि पाणा? और बस येई नि, पर एबे तो आसा रे प्रभु यीशु मसीह रे जरिए परमेशरो ते मेल ऊईगा रा इजी खे आसे परमेशरो रे खुश ए।
माणूंए रे जरिए मौत, मसीह रे जरिए जीवन
तेबेई जेड़ा एक माणूं आदमो रे जरिए पाप दुनिया रे आया और पापो रे जरिए मृत्यु आयी और ईंयां ई मृत्यु सबी माणूंआ रे फैली गी, कऊँकि सबी पाप करी राखेया। मूसे रा बिधान आऊणे ते पईले ई दुनिया रे पाप था। पर जेती बिधान निए, तेती पाप नि गिणेया जांदा। तेबे बी आदमो ते लयी कि मूसे तक मौते तिना लोका पाँदे बी राज कित्तेया, जिने आदमो जेड़ा आज्ञा तोड़ने रे जरिए पाप नि कित्तेया। आदम तेस माणूंए रा चिह्न् था जो आऊणे वाल़ा था।
पर आदमो रे पाप और परमेशरो री दया ते परी री कृपा रे बऊत बड़ा फर्क ए। कऊँकि जेबे एक माणूंए रे पापो री बजअ ते बऊत सारे माणूं मरे। तिंयाँ ई परमेशरो री कृपा और धार्मिकता रा तोफा जो तिने आसा खे यीशु मसीह रे जरिए दित्तेया बऊत सारे लोका रा पाप माफ करने खे बऊत बड़ा दान ए। परमेशरो रा दित्तेया रा तोफा आदमो रे पापो जेड़ा निए। कऊँकि एक ई पाप मौता री सजा लयी की आया। पर बऊत सारे अपराधा ते बाद परमेशरे जो बरदान दित्तेया तिजी रे जरिए पापो खे माफ करी की आपणी नजरा रे तर्मी बणाईते। कऊँकि जेबे एक माणूंए रे पापो री बजअ ते मौते तेस एक ई री बजअ ते सारे लोका पाँदे राज कित्तेया, तो जेबे सेयो लोक कृपा और धर्मरूपी बरदान बऊत जणेया ते पाओ ए, सेयो एक माणूंए ते, मतलब प्रभु यीशु मसीह रे जरिए तिना पक्का अनन्त जीवनो रा राज करना।
तेबे जेड़ा एक पाप सबी माणूंआ खे मौता री सजा री बजअ ऊआ, तेड़ा ई एक तर्मो रा काम बी सबी माणूंआ रे जीवनो खे तर्मी ठराणे री बजअ ऊआ। कऊँकि जेड़ा एक माणूंए री आज्ञा ना मानणे ते बऊत लोक पापी ठईरे तिंयाँ ई एक माणूंए री आज्ञा मानणे ते बऊत लोक तर्मी ठईरने। बादो ते मूसे रा बिधान दित्तेया ताकि लोक एड़ा समजी सको कि से कितणा पापी ए। पर जेती पाप बऊत ऊआ, तेती कृपा तिजी ते बी केथी जादा ऊई। ताकि जेड़ा पापे मौत फैलांदे ऊए सारे लोका पाँदे राज कित्तेया, तेड़ा ई आसा रे प्रभु यीशु मसीह रे जरिए परमेशरो री कृपा तिना खे धार्मिक बणाओई और अनन्त जीवन देओई।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.