Baghlayani Bible
पजन 119
परमेशरो रा बिदान सबी ते खरा ए
आलेफ
सेयो माणूं बऊत ई तन्य ए जिना रा चाल-चलण निर्दोष ए,
ओर जो प्रभुए रे बिधि-बिधानो पाँदे हांडोए!
सेयो बऊत ई तन्य ए, जो प्रभुए री चतौणिया खे मानोए,
ओर आपणे पूरे मनो ते प्रभुए खे टोल़ोए!
तेबे सेयो बुरे काम नि करदे,
बल्कि यहोवे री बताई रिया बाटा रे हांडोए।
ओ यहोवा, तैं आसा खे आपणे नियम देई राखे,
ओर बोलेया कि आसे तिना रा ईमानदारिया ते पाल़न करूँगे।
पला ऊँदा कि तेरी बिदिया खे मानणे रिया तँईं
मेरा चाल-चलण मजबूत ऊई जांदा!
प्रभु, तेबे मां तेरी सारिया आज्ञा रिया तरफा खे आपणा त्यान लगाए रे राखणा
ओर मेरी उम्मीद नि टूटणी।
जेबे मां तेरे तार्मिक नियम सीखणे,
तेबे निष्कपट दिलो ते मां तेरा तन्यवाद करना।
मां तेरिया बिदिया रा पाल़न करना:
प्रभु, तूँ माखे कदी पनि छाडेया!
परमेशरो रे बिधानो खे मानणा
बेथ
जवान आपणे चाल-चलणो खे किंयाँ शुद्ध राखी सकोआ?
प्रभु, तेरे वचनो रा पाल़न करने ते।
पूरे दिलो ते आऊँ तेरी सेवा करने री कोशिश करूँआ;
माखे तू आपणियां आज्ञा ते पटकणे नि देया!
मैं तेरे वचन आपणे दिलो रे तारण करी राखे,
ताकि तेरे खलाफ पाप नि करुँ।
ओ प्रभु, तूँ तन्य ए;
माखे आपणी बिदिया सखाई दे!
तेरे सारे नियमा रा बखाण
मैं आपणे मुंए ते करी राखेया।
आऊँ तेरिया चतौणिया रिया बाटा ते खुश ऊईरा,
मानो कि आँऊ सब प्रकारा री तअन-दौलता ते खुश ऊईरा।
मां तेरे उपदेशा पाँदे त्यान करना
ओर मां तेरिया बताईया रिया बाटा रिया तरफा खे नजर राखणी
मां तेरी बिदिया ते खुश रणा
ओर मां तेरे वचन नि पूलणे।
परमेशरो रे बिधानो दे खुशी
गिमेल
प्रभु, आपणे दासो पाँदे उपकार कर ताकि आऊँ जिऊँदा रई सकूँ
ओर तेरे वचना रा पाल़न करी सकूँ।
तूँ मेरिया आखी खोली दे,
ताकि आऊँ तेरे बिधानो रिया सच्चाईया रिया नौखिया गल्ला देखी सकूँ।
आऊँ तो तरतिया पाँदे परदेशी ए;
प्रभु, आपणियां आज्ञा मांते नि लको।
आऊँ तो हर बखत तेरे नियमा रा पाल़न करना चाऊँआ। आऊँ इजी खे सबी चीजा ते जादा चाऊँआ।
तूँ कमण्डिया खे, जो स्रापित ए, डाँटेया,
सेयो तेरिया आज्ञा ते पटकी गे रे।
आऊँ तेरिया बिदिया रा पाल़न करूँआ।
इजी खे लोक मेरी निन्दा नि करी सको, एड़ा नि ओ कि आऊँ बेज्जत ऊई जाऊँ।
परदान बी बैठी की मेरे खलाफ गल्ला करो थे,
पर आऊँ तेरी बिदिया खे मनो दे सोचदा रऊँआ।
तेरिया बिदिया ते माखे खुशी मिलोई!
तेरिया बिदिया मेरिया तँईं सलाई देणे वाल़े जेड़िया ए।
परमेशरो रे बिधानो खे मानणे रा संकल्प
दाल्थ
आऊँ चट ई मरने वाल़ा ए,
प्रभु, तूँ आपणे वचनो रे मुताबिक माखे फेर जिऊँदा कर!
जेबे मैं आपणे चाल-चलणो रे बारे तांगे बताया,
तेबे तैं माखे उत्तर दित्तेया; तूँ माखे आपणी बिदिया सखाई दे!
तेरिया बिदिया खे समजणे खे मेरी मताद कर,
तेबे मां तेरे अचम्बे रे कामा पाँदे त्यान करना।
आऊँ इतणा उदास ऊईगा रा ए कि मांदे ओर तागत नि ए।
तूँ आपणे वचनो रे मुताबिक माखे सम्बाल़!
प्रभु, तूँ माखे गल़त काम करने ते रोक,
ओर माखे आपणी बिधान सखाई की मां पाँदे दया कर।
मैं सच्चाईया री बाट चूणी ली री,
आऊँ तेरे नियमा रिया तरफा खे चित्त लगाई राखूँआ।
ओ प्रभु, आऊँ तेरिया शिक्षा दे चिपकेया राए,
माखे शर्मिंदा नि ऊणे देया!
आऊँ हर बखत तेरिया आज्ञा रा पाल़न करना चाऊँआ।
तिना खे जादा ते जादा समजणे रे मेरी मताद कर।
समजा रिया तँईं प्रार्थना
हे
ओ यहोवा, माखे आपणियां बिदिया रा मतलब सखाई दे,
ओर मां से जिन्दगी पर मानदे रणा।1
माखे समजदे, ताकि आऊँ तेरे बिधानो खे मानदा रऊँ
ओर पूरे मनो ते तिजी रा पाल़न करुँ।
आपणी आज्ञा रिया बाटा रे माखे चला,
कऊँकि आऊँ तिजी तेई खुश ए।
प्रभु, मेरे दिलो खे लाल़चो रिया तरफा खे नि,
पर आपणियां शिक्षा रिया तरफा खेई फेरी दे।
चूठेया देवतेया रिया तरफा ते मेरिया आखी टाई दे;
तूँ माखे आपणी बाटा रिया तँईं जिन्दगी दे।
तेरा वादा जो तेरा डर मानणे वाल़ेया खे ए,
तिजी खे आपणे दासो रिया खातर बी पूरा कर।
मेरी निंदा दूर कर, तिजी ते आऊँ डरूँआ;
कऊँकि तेरे नियम सबी ते खरे ए।
आऊँ तेरिया बिदिया रे मुताबिक आपणा जीवन जिऊणा चाऊँआ;
माखे नवां जीवन दे कऊँकि तूँ तर्मी आ।
परमेशरो रे बिधानो पाँदे परोसा
वाव
ओ यहोवा, तूँ एसा गल्ला खे प्रकट कर कि तूँ मांते कितणा प्यार करेया,
तूँ माखे बचा जेड़ा तैं आपू बोलेया ए।
तेबे आऊँ मेरी निंदा करने वाल़ेया खे कुछ उत्तर देई सकूँआ,
कऊँकि आँऊ तेरे वचना पाँदे परोसा करूँआ।
माखे सच्चे वचन बोलणे ते नि रोक,
कऊँकि मेरी उम्मीद तेरे नियमा पाँदे ए।
मां तेरे बिधानो रा लगातार
जुगो-जुगो तक पाल़न करदे रणा;
मां आजादिया साथे आपणी जिन्दगी बिताणी;
कऊँकि आऊँ तेरे उपदेशा रा पाल़न करने री कोशिश करूँआ।
मां राजेया रे सामणे तेरिया शिक्षा री चर्चा करेया करनी
ओर शर्म नि करनी,2
कऊँकि आऊँ तेरिया आज्ञा ते खुश ए
ओर तिना ते आऊँ प्यार करूँआ।
मां तेरिया आज्ञा रिया तरफा खे, जिना ते आऊँ प्यार करूँआ,
आपणे आथ फैलाणे ओर तेरिया बिदिया पाँदे त्यान करना।
परमेशरो रे बिधानो पाँदे उम्मीद
जै़न
प्रभु, आपणे दासो ते कित्ते रे वादे खे याद कर,
कऊँकि तैं माखे उम्मीद देई राखी।
मेरे दु:खो दे माखे शान्ति तिजी तेई ऊई री,
कऊँकि तेरे वचनो रे जरिए मैं जिन्दगी पाई राखी।
जबकि कमण्डी माणूंए मेरा बऊत मजाक डवाया,
तेबे बी आऊँ तेरे बिधि-बिधानो ते नि अटेया।
ओ प्रभु, मैं तेरे पुराणे नियम याद करी की
शान्ति पाई राखी।
जिने दुष्ट माणूंए तेरा बिधान छाडीता रा,
तिना रिया बजा ते आऊँ गुस्से ते लाल ऊणे लगी रा।
जेती आऊँ परदेशी ऊई की रऊँआ,
तेती तेरिया बिदिया, मेरे गीत बणी रे।
ओ प्रभु, आँऊ राती तेरा नाओं याद करूँआ
ओर तेरे बिधानो रा पाल़न करूँआ।
ये मांते इजी बजा ते ऊआ,
कऊँकि मैं तेरे उपदेश माने।
परमेशरो रे बिधानो रिया तँईं पग्ती
हेथ
प्रभु, तूँ मेरा सब कुछ ए;
मैं पक्का निश्चा करी ला रा कि मां तेरे वचनो रे मुताबिक चलणा।
आऊँ तांते ते पूरे दिलो ते बिनती करूँआ कि तुँ मां पाँदे दया कर,
जेड़ा तैं आपू वादा कित्तेया था।
मैं आपणे बर्ताओ रे बारे दे सोचेया,
ओर मैं तेरिया बिदिया रा पाल़न करने रा फैंसला कित्तेया ए।
मैं बिना देर कित्ते
तेरी आज्ञा मानणे खे फुर्ती कित्ती।
दुष्ट माणूंए मेरे खलाफ जाल़ बिछाई राखेया ए,
पर आऊँ तेरे बिधानो खे नि पूलदा।
तेरे तर्मो रे नियमा रिया बजा ते
मां आदिया राती तेरा तन्यवाद करने खे उठणा।
आऊँ तिना सबी रा दोस्त आ जो तेरा आदर करोए,
तिना रा जो तेरिया बिदिया रा पाल़न करोए।
ओ प्रभु, तरती तेरी करूणा साथे परी रिये;
तूँ माखे आपणी बिदिया सखा!
परमेशरो रे बिधानो रा मोल
टेथ
ओ प्रभु, तैं आपणे वादे रे मुताबिक
आपणे दास मां साथे पलाई करी राखी।
माखे बुद्धि ओर ज्ञान दे,
कऊँकि आऊँ तेरिया आज्ञा पाँदे परोसा करूँआ।
दु:खी ऊणे ते पईले आऊँ पटकी गा था;
पर एबे आऊँ तेरे वचना खे मानूँआ।
ओ यहोवा, तूँ पला ए ओर पलाई करेया;
माखे आपणी बिदिया सखा।
कमण्डी माणूंए तो मेरे खलाफ चूठिया गल्ला बणाईया,
पर आँऊ तेरे उपदेशा खे पूरे दिलो ते मानूँआ।
तिना चूठेया माणूंआ खे बुद्धि नि ए,
पर आऊँ तेरे बिधानो दे खुश रऊँआ।
माखे जो सजा मिली, से माखे ठीक ई ऊआ,
जेतेते आऊँ तेरिया बिदिया सीखी सकूँ।
सूईने-चाँदिए रे ह्जारो टुकड़ेया रे बजाए
तेरा बिधान माखे बऊत खरा ए।
परमेशरो रे बिधानो रा न्याय
योध
तैं आपणे आथा साथे आऊँ बणाई राखेया ओर माखे आकार दित्तेया;
एबे माखे समजदे, ताकि आऊँ तेरिया आज्ञा खे सिखी सकूँ।
जो तांते डरोए, सेयो माखे देखी की खुश ऊणे,
कऊँकि मैं तेरे वचना पाँदे उम्मीद लगाई राखी।
ओ यहोवा, माखे पता ए कि तेरा न्याय सच्चा ए,
ओर तैं माखे तेड़ी सजा दित्ती कऊँकि तूँ वफादार ए।
माखे आपणी करूणा साथे शान्ति दे,
कऊँकि तैं आपणे दासो ते एड़ा ई वादा करी राखेया।
तेरी असीम दया मां पाँदे ओ, जेतेते आऊँ जिऊँदा रऊँ;
कऊँकि आऊँ तेरे बिधानो ते खुश ए।
कमण्डी माणूं शर्मिंदा ओ, तिने मां पाँदे चूठा आरोप लगाया ए,
पर मां तेरे उपदेशा पाँदे त्यान करना।
जो तांते डरोए, सेयो मां कनारो खे फिरो,
जेतेते सेयो तेरिया शिक्षा खे समजी लओ।
आऊँ निष्कपट दिलो ते बिदिया रा पाल़न करुँ,
ताकि माखे शर्मिंदा नि ऊणा पड़ो।
छुटकारे रिया तँईं प्रार्थना
क़ाफ
ओ यहोवा, आऊँ मरने पाँदे आ, न्याल़ेया करूँआ कि तां आऊँ बचाणा;
पर आऊँ तेरे वचना पाँदे परोसा करूँआ।
मेरिया आखी तेरा वादा पूरा ऊँदे ऊए देखणे रिया तँईं बेचैन इया
ओर आऊँ ये पुछूँआ कि तां माखे कदी शान्ति देणी?
कऊँकि आऊँ तुएँ ते तुँदल़िया पड़ी री कुप्पिया जेड़ा ऊईगा रा,
तेबे बी आऊँ तेरिया बिदिया खे नि पूलेया।
ओ यहोवा, आऊँ तेरी सेवा करूँआ, आऊँ एते दु:खो दे कदुओ तक पड़ेया दा रणा?
जो मेरा पीछा करने लगी रे; तिना खे सजा तां कदी देणी?
कमण्डी लोक जो तेरे बिधानो रे मुताबिक नि चलदे,
तिने माखे रूड़ाणे रिया तँईं गड्डे खणी राखे।
तेरिया सारिया आज्ञा परोसा करने जोगिया ए;
सेयो लोक चूठो खेई मां पीछे पड़ी रे; प्रभु, तूँ मेरी मताद कर!
सेयो माखे तरतिया पाँदा ते तकरीबन मिटाणे ई वाल़े थे,
पर मैं तेरे उपदेश नि छाडे।
प्रभु, आपणियां दया ते माखे फेर जिऊँदा कर,
ताकि आऊँ तेरिया दित्ती रिया शिक्षा रा पाल़न करी सकूँ।
ओ यहोवा, तेरा वचन,
सर्गो दे सदा खे बणेया रा रओ।
तेरी सच्चाई पीढ़िया ते पीढ़िया तक बणी री रओई;
तैं तरती स्थिर कित्ती, तेबेई तो से बणी री ए।
सर्ग ओर तरती तेरे नियमा रे मुताबिक आजो तक बणे रे ए;
कऊँकि सारी सृष्टि तेरे वशो दे ए।
जे आऊँ तेरे बिधानो ते खुश नि ऊँदा,
तो आऊँ बिपदा रेई बखते नाश ऊई जांदा।
मां तेरे उपदेश कदी नि पूलणे;
कऊँकि तिना रेई जरिए तैं आऊँ जिऊँदा करी राखेया।
ओ यहोवा, आऊँ तेरा ईए, तूँ मेरी रक्षा कर;
आऊँ तेरिया बिदिया रिया सारिया गल्ला मानदा रया।
दुष्ट मेरा नाश करने रिया तँईं मेरिया ताका रे लगी रे;
पर आऊँ तेरिया शिक्षा पाँदे त्यान करूँआ।
जितणी गल्ला पुरिया लगोईया, सेयो सब मैं अदूरिया पाईया,
पर तेरिया आज्ञा रा विस्तार बड़ा ए।
परमेशरो रे बिधानो रिया तँईं प्यार
मीम
आह्! आऊँ तेरे बिधानो ते कितणा प्यार करूँआ!
पूरा दिन मेरा त्यान तिजी पाँदे ई लगेया रा रओआ।
तूँ आपणी आज्ञा रे जरिए माखे आपणे दुश्मणा ते जादा अक्लमंद बणाएया,
कऊँकि सेयो सदा मेरे मनो रे रओईया।
आऊँ आपणे सबी गुरूआ ते बी जादा समज राखूँआ,
कऊँकि मेरा त्यान तेरिया शिक्षा पाँदे लगी रा।
आऊँ बुजुर्गा ते बी जादा समजदार ए,
कऊँकि आऊँ तेरे उपदेशा खे मानूँआ।
आऊँ सब बुरे आचरणो ते दूर रया,
कऊँकि आऊँ तेरे वचना रा पाल़न करना चाऊँआ।
आऊँ तेरे नियमा ते पीछे नि अटेया,
कऊँकि तैंई माखे शिक्षा देई राखी।
तेरे वचन माखे बऊत मीठे लगोए,
सेयो मेरे मुंए दे सईतो ते बी मीठे ए।
तेरे उपदेशा साथे आऊँ समजदार ऊई जाऊँआ,
इजी री खातर आऊँ सारिया चूठिया बाटा ते कृणा करूँआ।
परमेशरो रे बिधानो रा प्रयासा
नून
तेरा वचन माखे सला देणे वाल़ा दिऊए जेड़ा ए
ओर बाटा रिये चलणे खे प्रयासे जेड़ा ए।
मैं कसम खाई की ठाणी ला रा,
कि मां तेरे तार्मिक नियमा रे मुताबिक चलणा।
आऊँ बऊत जादा दु:खो रे पड़ी रा;
ओ प्रभु, आपणे वचनो रे मुताबिक माखे फेर जिऊँदा कर।
ओ प्रभु, आऊँ बिनती करूँआ कि मेरे मुंए री स्तुति-बलि ग्रहण कर
ओर आपणे नियम माखे सखा।
आऊँ आपणी जान जोखिमो दे पाणे खे हमेशा त्यार आ;
तेबे बी आऊँ तेरे बिधानो खे नि पूलेया।
दुष्ट लोके मेरिया तँईं जाल़ बछाई राखेया,
पर आऊँ तेरे उपदेशा ते नि पटकेया।
तेरिया शिक्षा सदा माखे सबी ते किमती सम्पति ओर मेरिया खुशिया री बजा ए।
मैं आपणा मन इजी गल्ला पाँदे लगाई राखेया,
कि अंतो तक तेरिया बिदिया पाँदे सदा चलदा रऊँ।
परमेशरो रे बिधानो दे सलामती
सामेख
आऊँ दूई तरफा खे चलणे वाल़े माणूंए ते कृणा करूँआ,
पर तेरे बिधानो साथे प्यार राखूँआ।
मेरे शरण लणे री जगा ओर माखे बचाणे वाल़ा तूँ ई ए।;
आऊँ तेरे वचना री उम्मीद करूँआ।
ओ बुरे काम करने वाल़ेयो, मांते दूर ऊई जाओ,
ताकि आऊँ आपणे परमेशरो रिया आज्ञा खे मानूँ।
ओ प्रभु, आपणे वचनो रे मुताबिक माखे सम्बाल़,
ताकि आऊँ जिऊँदा रऊँ ओर मेरी उम्मीद टूटणे नि देया!
प्रभु, माखे साअरा दे ताकि आऊँ बचेया रा रऊँ
ओर मां लगातार तेरिया बिदिया पाँदे चित्त लगाई की राखणा।
जो माणूं तेरिया बिदिया ते पटकी जाओए,
तिना सबी खे तूँ तुच्छ जाणेया, कऊँकि तिना री उशयारी चूठी ए।
जिंयाँ धातुआ रा मैल तोया जाओआ तिंयाँ तूँ तरतिया रे सारे दुष्टा खे तोई देया;
इजी बजा ते आऊँ तेरिया शिक्षा साथे प्यार राखूँआ।
प्रभु, तेरे डरो रे मारे मेरा शरीर थरथराओआ
ओर आऊँ तेरे नियमा ते डरूँआ।
परमेशरो रे बिधानो खे मानणा
ऐन
मैं सेई काम करी राखे जो न्याय ओर सच्चे ए।
तूँ माखे मेरेया दुश्मणा बीचे नि छाडेया!
आपणे दास मेरिया पलाईया खे तूँ आपू जमानत दे,
ताकि कमण्डी मां पाँदे अन्देर नि करी सको।
मेरिया आखी तांते उद्धार पाणे खे
ओर तेरा तार्मिक वादा पूरा ऊँदे ऊए देखणे रिया तँईं बेचैन इया।
आपणे दास मां साथे आपणी करूणा रे मुताबिक बर्ताव कर
ओर आपणियां बिदिया माखे सखा।
आऊँ तेरा दास ए, तूँ माखे समजदे,
ताकि आऊँ तेरिया शिक्षा खे समजी सकूँ।
ओ यहोवा, एबे तेरे काम करने रा बखत आईगा रा!
कऊँकि लोक तेरिया बिदिया रा पाल़न नि करने लगी रे।
इजी बजा ते आऊँ तेरी आज्ञा खे सूईने ते
बल्कि कुन्दनो ते बी जादा प्यारा करूँआ।
इजी बजा ते आऊँ तेरे सारे उपदेशा रे मुताबिक आपणा चाल-चलण सई करूँआ
ओर सबी चूठिया बाटा ते कृणा करूँआ।
परमेशरो रे बिधानो पाँदे चलणे री इच्छा
पे
तेरिया शिक्षा नऊखिया ए;
इजी बजा ते आऊँ तिना खे आपणे पूरे मनो ते मानूँआ।
तेरेया वचना री समज मेरे दिलो दे प्रयासा देओई,
तिजी ते पोल़े लोका खे समज मिलोई।
आऊँ तेरे वचना रा त्याया ए;
कऊँकि आऊँ तेरिया आज्ञा री इच्छा करूँआ।
जिंयाँ तूँ आपणे नाओं रे पग्ता रिया तँईं करेया,
तिंयाँ ई मेरिया तरफा खे फिरी की मां पाँदे दया कर।
आपणे वादे रे मुताबिक मेरे पैर मजबूत कर
ओर केसी बी अनर्थ गल्ला खे मां पाँदे राज नि करने दे।
माणूंआ रे अत्याचारो ते माखे छुड़ाई लओ,
ताकि आऊँ तेरे उपदेशा खे मानी सकूँ।
प्रभु, आपणे मुंए री ज्योति आपणे दासो मां पाँदे चमकाई दे,
ओर तूँ आपणी बिदिया माखे सखा।
मेरिया आखी ते पाणिए रिया तारा निकल़दिया रओईया,
कऊँकि लोक तेरे बिधानो रा पाल़न नि करदे।
परमेशरो रे बिधानो रा न्याय
सांदे
ओ प्रभु, तूँ तर्मी ए,
ओर तेरे नियमा रे पक्षपात नि ऊँदा।3
तेरिया सारिया शिक्षा तार्मिक ओर परोसे जोगिया ए।
आऊँ गुस्से दे आगी जेड़ा जल़ने लगी रा,
कऊँकि मेरे दुश्मण तेरिया आज्ञा खे पूली गे रे।
तेरा वचन पुरिया तरअ ते ताया राए,
इजी बजा ते तेरा दास तिजी साथे प्यार राखोआ।
आऊँ छोटा ओर तुच्छ ए,
तेबे बी आऊँ तेरे उपदेशा खे नि पूलदा।
तेरी तार्मिकता सदा बणी री रणी,
ओर तेरा बिधान सच्चा ए।
जबकि आऊँ कष्टा रे ओर दु:खो रे फसी रा,
तेबे बी आऊँ तेरिया आज्ञा ते खुश ए।
तेरिया शिक्षा सदा न्याय रिया ए;
तूँ माखे समजदे ताकि आऊँ जिऊँदा रऊँ।
छुटकारे रिया तँईं प्रार्थना
क़ाफ
ओ यहोवा, आऊँ आपणे पूरे दिलो ते प्रार्थना करूँआ,
माखे उत्तर दे! मां तेरिया बिदिया मानदे रणा।
मैं तांते प्रार्थना करी राखी, तूँ माखे बचाई लओ,
ताकि आऊँ तेरिया शिक्षा खे मानेया करुँ।
मैं प्यागा त्याड़ा निकल़ने ते पईले तूँ मतादा रिया तँईं पुकारेया;
मेरी उम्मीद तेरे वचना पाँदे थी।
आऊँ सारी रात नि सऊँदा,
ओर आऊँ तेरिया गल्ला रे बारे दे मनो दे सोचदा रऊँआ।
आपणी करूणा रे मुताबिक मेरी सुणी लओ;
ओ प्रभु, आपणे नियमा रे मुताबिक माखे फेर जिऊँदा कर।
मेरा पीछा करने वाल़े नेड़े आईगे रे;
तिने षड़यन्त्र रची राखेया; सेयो तेरे बिधानो खे नि मानदे।
पर ओ प्रभु, तूँ नेड़े ए
ओर तेरिया सब आज्ञा सच्चिया ए।
बऊत दिना ते आऊँ तेरिया शिक्षा खे जाणी चूकी रा,
कि तैं तिना री निऊँ सदा रिया तँईं पाई राखी।
मतादा रिया तँईं बिनती
रेश
प्रभु, मेरे दु:खो खे देख ओर माखे छुड़ाई लओ,
कऊँकि आऊँ तेरे बिधानो खे नि पूली रा।
मेरे पक्षो दे आपणा फैंसला दे ओर माखे छुड़ाई लओ;
आपणे वादे रे मुताबिक माखे फेर जिऊँदा कर।
दुष्ट लोक नि बची सकदे,
कऊँकि सेयो तेरिया बिदिया रा पाल़न नि करदे।
ओ प्रभु, तेरी दया तो महान ए,
इजी री खातर आपणे नियमा रे मुताबिक माखे फेर जिऊँदा कर।
मेरा पीछा करने वाल़े लोक ओर माखे सताणे वाल़े बऊत ए,
तेबे बी आऊँ तेरिया शिक्षा ते नि अटदा।
आऊँ विश्वासघातिया खे देखी की तिना ते कृणा करूँआ;
कऊँकि सेयो तेरे वचना रा पाल़न नि करदे।
देख, आऊँ तेरे उपदेशा ते कितणा प्यार राखूँआ!
ओ प्रभु आपणी करूणा रे मुताबिक माखे फेर जिऊँदा कर।
तेरे सारे वचन सच्चे ए,
तेरिया शिक्षा दे सच्चाई ए ओर तेरी तर्मो री बिधि सदा री ए।
परमेशरो रे बिधानो रिया तँईं समर्पण
शीन
परदान बिना मतलबो तेई मां पीछे पड़ी रे,
पर मेरा दिल तेरे वचना रा डर मानोआ।4
जिंयाँ कोई बड़ी लूट पाणे वाल़ा माणूं खुश ओआ,
तिंयाँ ई आऊँ बी तेरे वचना ते खुश ए।
चूठो ते आऊँ बैर ओर कृणा राखूँआ,
पर तेरे बिधानो ते प्यार राखूँआ।
तेरे तार्मिक नियमा रिया बजा ते,
आऊँ दिनो रे सात बार तेरी स्तुति करूँआ।
प्रभु, तेरे बिधानो साथे प्यार राखणे वाल़ेया खे बऊत ई शान्ति मिलोई,
ओर तिना खे कोई ठोकर नि लगदी।
ओ यहोवा, आऊँ तेरी बाट देखूँआ कि तूँ माखे बचाए,
ओर जो तूँ आज्ञा देआ से करूँआ।
आऊँ तेरिया शिक्षा रा जिऊए ते पाल़न करदा आई रा
ओर तिना ते बऊत प्यार करूँआ।
आऊँ तेरिया शिक्षा ओर तेरिया आज्ञा रा पाल़न करूँआ;
तूँ सब कुछ देखेया जो आऊँ करूँआ।
परमेशरो ते मताद पाणे रिया तँईं प्रार्थना
ताव
ओ प्रभु, मेरी पुकार तां तक पऊँचो;
तूँ आपणे वचनो रे मुताबिक माखे समजदे!
मेरी बिनती तां तक पऊँचो;
तूँ आपणे वचनो रे मुताबिक माखे छुड़ाई लओ।
मां सदा तेरी जयजयकार करनी,
कऊँकि तूँ माखे आपणी बिदिया सिखाएया।
मां तेरिया बिदिया रे बारे दे गाणा,
कऊँकि तेरिया सारिया आज्ञा दे तार्मिकता ए।
प्रभु, तेरा आथ मेरी मताद करने रिया तँईं त्यार रओआ,
कऊँकि मैं तेरे उपदेश अपनाई राखे।
ओ यहोवा, माखे उम्मीद ए कि तां आऊँ बचाई लणा,
कऊँकि आऊँ तेरे बिधानो ते खुश ए।
प्रभु, माखे जिऊँदा कर ताकि आऊँ तेरी स्तुति करी सकूँ,
तेरे नियम मेरी मताद करो।
आऊँ राची रिया पेडा जेड़ा बाटा ते पटकी गा रा;
प्रभु, आपणे दास माखे टोल़, कऊँकि आऊँ तेरिया आज्ञा खे याद राखूँआ।
Source notes (4)
- Footnote मेरा ईनाम तिना खे राखणे दे ऊणा
- Footnote रोमी 1:16
- Footnote पजन 145:17
- Footnote पजन 119:23
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.