पजन 118

जीतणे रिया तँईं तन्यवाद

1प्रभुए रा तन्यवाद करो, कऊँकि से पला ए

ओर तेसरी करूणा सदा री ए!

2इस्राएली लोक बोलो, “प्रभुए री करूणा सदा री ए।”

3हारूणो रे वंशो रे पुरोईत ये बोलो, “प्रभुए री करूणा सदा री ए।”

4प्रभुए री पग्ती करने वाल़े ये बोलो, “प्रभुए री करूणा सदा री ए।”

5मैं मुसीबता दे परमेशरो खे आका पाईया,

यहोवे माखे उत्तर दित्तेया ओर आऊँ मुसीबता ते छुड़ाया।

6प्रभु मेरे पक्षो रे ए, मां नि डरना।

माणूं मेरा कुछ नि करी सकदा।1

7प्रभु मेरे पक्षो रे ए, से मेरी मताद करने वाल़ा ए;

माखे आपणियां आखी ते दिशणा कि मेरे दुश्मण आरी गे।

8प्रभुए री शरणा रे जाणा,

माणूंआ पाँदे परोसा राखणे ते खरा ए।

9प्रभुए री शरणा रे जाणा,

परदाना पाँदे परोसा राखणे ते खरा ए।

10सबी जातिये आऊँ केरी ला रा;

पर प्रभुए रे नाओं ते मां सेयो पक्का नाश करी देणे।

11तिने आऊँ केरी ला रा, पक्का तिने आऊँ केरी ला रा;

पर प्रभुए रे नाओं ते मां सेयो पक्का नाश करी देणे।

12तिने आऊँ पँऊरी जेड़ा केरी ता रा, सेयो कांडेया री आगी जेड़े चट बीजी गे;

पर प्रभुए रे नाओं ते मां सेयो पक्का नाश करी देणे।

13माखे रूड़ाणे रिया तँईं तैं माखे जोरे की ताक्का तो दित्तेया था,

पर यहोवे मेरी मताद कित्ती।

14यहोवा मेरी तागत ओर पजनो रा विषय ए;

तिने आँऊ दुश्मणा ते बचाई राखेया।

15परमेशरो रे तर्मी लोका रे तम्बूए दे जयजयकार ओर उद्धारो री आवाज ऊणे लगी री,

यहोवे रिये पराक्रमी तागती ये करी राखेया ए।

16यहोवे रा दाँणा आथ महान् ऊईरा,

यहोवे रे दाँणे आथो ते पराक्रमो रा काम ओआ!

17आऊँ नि मरना, बल्कि जिऊँदा रणा

ओर मां यहोवे रे कामा रा बखाण करदे रणा।

18परमेशरे माखे बऊत कष्ट तो दित्तेया,

पर आऊँ मौता रे वशो रे नि कित्तेया।2

19माखे न्याय रे मन्दरो रे द्वार खोलो,

मां तिदे जाई की यहोवे रा तन्यवाद करना।

20प्रभुए रा द्वार येईए,

इदे तर्मिया प्रवेश करना।3

21ओ प्रभु, मां तेरा तन्यवाद करना,

कऊँकि तैं मेरी प्रार्थना सुणी की माखे उत्तर देई राखेया,

तैं आऊँ मेरेया दुश्मणा ते बचाई राखेया।

22जो पात्थर राजमिस्त्रिए नबाग ठराया था,

सेई कुणे री निऊँआ रा पात्थर बणीगा।4

23ये काम प्रभुए राए

ओर ये म्हारी नजरा रे अद्भुत ए।

24आजका दिन प्रभुए बणाई राखेया;

आसे इदे मगन ओर खुश ओईये।

25ओ प्रभु, आसे तांते बिनती करूँए, आसा खे बचा!

ओ प्रभु, आसे तांते बिनती करूँए, आसा खे कामयाबी दे!

26तन्य ए से माणूं, जो प्रभुए रे नाओं ते आओआ!

आसे ताखे प्रभुए रे मन्दरो ते आशीर्वाद देई राखेया।5

27परमेशर यहोवा ए ओर तिने आसा खे प्रयासा देई राखेया।

यज्ञो रे डांगरो खे बेदिया रे सींगो ते रस्सिया साथे बानो!

28ओ प्रभु, तूँई मेरा परमेशर ए, मां तेरा तन्यवाद करना;

तूँ मेरा परमेशर ए, मां तेरा गुणगाण करना।

29प्रभुए रा तन्यवाद करो, कऊँकि से पला ए;

ओर तेसरी करूणा सदा बणी री रणी!