Baghlayani Bible
नसीअता 18:10
Verse 10 is marked below, with the whole chapter around it. Read from the start
जो माणूं ओरी ते मिली की नि रंदा, से आपणी ई इच्छा पूरी करने खे एड़ा करोआ,
जो गल्ला ओरी सबी खे ठीक लगोईया तिना खे से सुणने खे बी ना करी देओआ।
मूर्ख माणूंए रा मन समजा रिया गल्ला रे नि लगदा, से बस आपणे ई मनो री गल्ल बताणा चाओआ।
जेती बुरिया गल्ला ओईया तेती बेज्जती बी ओई ओर नरादर ओर निंदा बी ओई।
बुद्धिमान माणूंए रे मुंए रिया गल्ला समुद्रो रे डूगे पाणिए जेड़िया गईरिया ओईया,
ओर बुद्धिया री सूबल बह्यींदिया नदिया जेड़ी ओई।
दुष्टो कनारो खे ऊणा ओर तर्मिये साथे अन्याय करना, ठीक नि ए;
मूर्खो रिया गल्ला मुकद्दमा खड़ा करने वाल़िया ओईया,
ओर से आपू खे मार खाणे जोगा करी देओआ।
मूर्खो रा नाश तेसरी आपणियां गल्ला ते ई ओआ,
ओर तेसरिया गल्ला ई तेसरे प्राणो खे फन्दा बणोईया।
चूगली करने वाल़े रिया गल्ला स्वाद खाणे जेड़िया लगोईया;
सेयो पेटो दे पची जाओईया।
जो काम करने रे आल़स करोआ, से चीजा खे नाश करने वाल़े रा पाई ठईरोआ।
यहोवे रा नाओं मजबूत गढ़ो जेड़ा ए;
तर्मी तिजी रे नठी की सारिया बुराईया ते बचोआ।
अमीर माणूं ये सोचोआ कि तेसरा पैसा शईरो रे चऊँ कनारे रिया ऊच्चिया दवाला रे जेड़ा तेसरी रक्षा करोगा।
कमण्डी माणूं नाश ऊई जाओआ,
ओर नम्र सबाओ रे माणूंए खे महिमा मिलोई।
मूर्ख माणूं बिना गल्ल सुणे जबाव देओआ,
ओर तेसरी बेईजती बी ओई।
बमारिया रे माणूं आपणियां ईम्मती ते सम्बाल़ूँआ,
पर जेबे से ईम्मत ई आरी जाओ तो तेसखे मरने रा ई इन्तजार करना चाईयो।
अक्लमंद माणूं जादा ते जादा सिखणा चाओए,
एड़े लोक जिना गल्ला खे पईले ते जाणोए तिना ते तृप्त नि ऊँदे।
जेबे तुसे केसी बड़े माणूंए खे कोई तोफा देओए,
तो से तुसा खे तेसते गल्ला करने खे बाट खोली देओआ।
मकद्दमे रे जो पईले बोलोआ, सेई तर्मी लगोआ,
पर बादो ते दूजे पक्षो रा आई की जेबे बोलोआ तेबे से परखेया जाओआ कि से सच्च बोलोआ कि नई।
न्याय रिया तँईं चिट्ठी पाणे ते चगड़े बंद ओए,
ओर तागतवरा री लड़ाईया रा अन्त ऊई जाओआ।
नराज ऊए रे पाईए खे मनाणा मजबूत शईरो रे लणे ते कठण ओआ,
ओर चगड़े राजमईलो रे फाटको जेड़े ए।
माणूंए रा पेट मुंए रिया गल्ला रे फलो ते परोआ,
ओर बोलणे ते जो कुछ मिलोआ, तिजी ते से रज्जोआ।
तुसे जो बोलोए से जिन्दगिया खे बचाई या नाश करी सकोआ,
इजी खे तुसा खे आपणियां गल्ला रे परिणामो खे मानणा चाईयो।।
जिने जवाणस ब्यायी ली, तिने किमती चीज पाई ली,
ओर यहोवे री आशीष तेस पाँदे ऊई री।
गरीब गिड़गिड़ाई की बोलोआ,
पर अमीर सीदे मुंए गल्ल नि करदा।
कुछ दोस्ती लाम्बे बखतो तक नि चलदी,
पर एड़ा दोस्त बी ओआ, जो पाईया ते बी जादा मिली की रओआ।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.