Baghlayani Bible
नसीअता 17
चैनी साथे रोटिया रा सूका टुकड़ा, तेस कअरो ते खरा ए,
जेते कअरो दे बड़ी पाट्टी बी सुखो साथे नि खाई सकदे।
जो ल्वाद आपणे माए-बाओ री बेज्जती कराओई, तेसा ल्वादा पाँदे तेते कअरो रे दासो राज करना जो बुद्धिया साथे चलणे वाल़ा ए,
ओर से दास आपणे मालको रे कराने बीचे इस्सेदार ऊई जाणा।
जिंयाँ चाँदिए खे परखणे खे कुठाल़ी ओर सूईने खे परखणे खे पट्ठी ओई,
तियाँ ई मनो खे यहोवा परखोआ।1
बुरे काम करने वाल़ा बुरिया गल्ला खे त्यानो साथे सुणोआ,
ओर चूठा माणूं बुरिया गल्ला रिया तरफा खे कान लगाओआ।
जो माणूं गरीबो रा मजाक उडाओआ,
से तेसरे बनाणे वाल़े परमेशरो री निंदा करोआ,
ओर जो कोई केसी दूजे रे दु:खो पाँदे आसोआ, तेसखे पक्का सजा मिलणी।
स्याणेया री शोभा तिना रे पोते-दोईतेया ते ओई,
ओर बाल-बच्चेया री शोभा तिना रे माये-बाओ ए।
मूर्खा रे मुंए ते खरिया गल्ला ठीक नि लगदिया,
ओर जादा करी की चूठिया गल्ला परदानो रे मुंए ते ठीक नि लगदिया।
कुछ लोका खे लगोआ कि रिश्वत केसी मणिया जेड़ी ए,
तिना रा ये मानणा ए कि इजी ते सारे काम सानिया दे ऊई सकोए।
जो दूजे रे पापा खे माफ करी देओआ, से प्यारो खे टोल़ने वाल़ा ओआ,
पर जो दूजेया रिया गल्ला री चर्चा ओरे-पोरे करोआ, से पक्के दोस्ता बीचे बी फूट पाई देओआ।
एक समजदार माणूं थिड़कणे ते जितणा सिखोआ,
तिथणा ई सौ बार मार खाणा मूर्खो रे मनो रे असर नि करदा।
बुरा माणूं दंगे री ई कोशिश करोआ,
तेबेई तो तेसगे कठोर मनो वाल़ा दूत सजा देणे खे पेजेया जाणा।
मूर्खता रे डूबे रे मूर्ख माणूंए साथे मिलणे ते खरा ए,
जेसा रीछणिया रा बच्चा राची रा ओ तेसा रा सामणा करना।
जो कोई माणूं पले कामा रे बदले बुरे काम करोआ,
तेसरे कअरो ते बुराई कदी बी दूर नि ऊणी।
चगड़े री शुरूआत पाणिए ते परे डईमो दे छेद ऊणे जेड़ी ए,
चगड़ा बढ़ने ते पईले तिजी खे छाडणा खरा ए।
यहोवा एड़ेया माणूंआ ते नफरत करोआ जो माणूं दोषिये खे निर्दोष,
ओर जो निर्दोषो खे दोषी ठराओए।
मूर्ख माणूंए रिया पढ़ाईया पाँदे खर्चा करने रा कोई फाईदा नि ए,
कऊँकि तेसगे समज ई नि ए।
सच्चा दोस्त हर बखत प्यार राखोआ,
ओर मुसीबता रे बखते पाई बणी जाओआ।
मूर्ख माणूं आथो पाँदे आथ मारोआ,
ओर आपणे पड़ोसिये सामणे तेसरा कर्जदार ओआ।
जेसखे लड़ाई-चगड़ा करना अच्छा लगोआ,
तेसखे पाप करना बी अच्छा लगोआ,
जे तुसे हर बखत आपणी बढ़ाई करदे रओए, तो तुसे आपणियां तँईं विपत्तिया खे बुलाओए।
जेस माणूंए रे मनो रे बुरे बचार ओए, तेसरा पल्ला नि ऊँदा,
ओर जो माणूं उल्ट फेरो रिया गल्ला करोआ से मुसीबता रे पड़ोआ।
जो माए-बाओ मूर्खो खे जन्म देओए तिना खे तेसते दु:ख ई मिलोआ;
ओर मूर्खो रे बाओ खे आपणियां ल्वादा ते कदी बी खुशी नि मिलदी।
मनो री खुशी ई सबी ते बड़ी दवा ए, पर जेबे मन टूटोआ तेबे आड्डिया बी सूकी जाओईया।
दुष्ट माणूं न्याय बिगाड़ने खे, आपणियां जेबा दे रिश्वत परोआ।
बुद्धि समजदार माणूंआ रे सामणे ई रओई,
पर मूर्खा रिया आखी तरतिया रे दूर-दूर देशो रे लगी रिया रओईया।
मूर्ख पाऊए रिया बजा ते बाओ उदास रओआ,
ओर तेसरिया माया खे दु:ख ओआ।
ये दोनो ई काम ठीक नि ए कि बेकसुर माणूंए खे सजा देणी,
ओर परदाना खे तिना रिया सिधाईया री बजा ते कूटाणा।
जो माणूं सोची-समजी की ओर कम बोलोआ, से ज्ञानी ठईरोआ;
ओर जो आपणे मनो खे शान्त राखोआ, सेई समजदार माणूं ठईरोआ।
मूर्ख बी जेबे चुप रओआ, तेबे अक्लमंद गिणेया जाओआ,
ओर जो आपणा मूँ बन्द राखोआ, से समजदार गिणेया जाओआ।
Source notes (1)
- Footnote 1 पत 1:17
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.