Baghlayani Bible
नसीअता 13
अक्लमंद पाऊ आपणे बाओ रिया शिक्षा त्यान देई की सुणोआ,
पर मजाक करने वाल़ा पाऊ थिड़कणे ते बाद पनि सुणदा।
सजण माणूं आपणियां खरिया गल्ला रे जरिए बड़िया चीजा पाओआ,
पर तोखा देणे वाल़े लोका रा पेट बुरिया गल्ला साथे परोआ।
जो माणूं सोची-समजी की बोलोआ, से आपणे प्राणा खे बचाओआ,
पर जो माणूं बिना सोचे-समजे बोलोआ, तेसरा नाश ऊई जाओआ।
आल़सी माणूं इच्छा तो बड़ी पारी करोआ,
पर तेसखे कुछ पनि मिलदा,
पर काम करने वाल़े माणूं तगड़े ऊई जाओए।
तर्मी माणूं चूठिया गल्ला ते बैर राखोआ,
पर दुष्ट माणूंए रा सारा काम शर्मा जोगा ओआ ओर बेज्जती कराओआ।
तार्मिकता खरी चाल चलणे वाल़ेया री रक्षा करोई,
पर पापी आपणी बुराईया रिया बजा ते नाश ऊई जाओआ।
कोई तो पैसा कट्टा करोआ, पर तेसगे कुछ नि रंदा,
ओर कोई पैसा उडाई देओआ, तेबे बी तेसगे बऊत रओआ।
अमीर माणूं आपणे प्राण बचाणे रिया तँईं पैसे रा इस्तेमाल करोए,
पर गरीब माणूं इना गल्ला रिया तरफा खे कोई त्यान पनि देंदा।
तर्मी माणूं तेस दिऊए जेड़ा ए जो हमेशा चमकेया दा रओआ,
पर दुष्ट माणूं तेस दिऊए जेड़ा ए जो बिजणे वाल़ा ए।
लड़ाई-चगड़े बस कमण्डो ते ई ओए,
पर जो लोक सलाह मानोए, तिना गे बुद्धि रओई।
तोखे की कमाया रा तअन छोड़ ई खत्म ऊई जाओआ,
पर जो मईणत करोआ, तेसरी बढ़ोतरी ओई।
जेबे उम्मीद पूरी ऊणे रे देर ओई, तो मन दु:खी ओआ,
पर जेबे इच्छा पूरी ओई, तेबे बऊत खुशी मिलोई।
जो माणूं परमेशरो रे वचनो खे तुच्छ जाणोआ, से आपू खे नाश करोआ,
पर यहोवे री आज्ञा मानणे वाल़ेया खे अच्छा फल मिलोआ।
अक्लमंदो री शिक्षा जिन्दगिया रे बराबर ए,
ओर तिजी रे जरिए लोक मौता रे फन्दे ते बची सकोए।
अच्छी बुद्धिया ते माणूं लोका रा साथ पाओआ,
पर विश्वासघातिया री बाट कठण ओई।
समजदार तो समजदारिया साथे काम करोआ,
पर मूर्ख आपणी मूर्खता फैलाओआ।
दुष्ट सन्देशा देणे वाल़ा दूत बुराईया रे फसी जाओआ,
पर परोसे जोगा दूत अच्छा समाचार लयाओआ।
जो शिक्षा खे सुणी-अणसुणी करोआ, से गरीब ऊई जाओआ ओर तेसरी बेज्जती ओई,
पर जो चिड़कणे खे मानोआ, तेसरी इज्जत ओई।
इच्छा रा पूरा ऊणा तो मनो खे शान्ति देओआ,
पर मूर्ख लोक बुराईया ते आटणे ते ना करोए।,
अक्लमंदो री संगति कर, तेबे तूँ बी अक्लमंद ऊई जाणा,
पर मूर्खो साथे चलणे वाल़ा माणूं नाश ऊई जाणा।
मुसीबता तो पापिया पीछे पड़िया दिया ई रओईया,
पर तर्मिया खे अच्छा फल मिलणा।
खरा माणूं आपणे पोते-दोईतेया खे सम्पतिया रा इस्सा छाडी जाओआ,
पर पापिए री सम्पत्ति तर्मिया खे मिली जाओई।
गरीब माणूंआ खे जिम्मीदारे ते बऊत खाणे रिया चीजा मिलोईया,
पर बुरे लोक अन्याय करी की तिजी खे लूटी लओए।
जो बाओ आपणे बच्चेया खे खरी शिक्षा नि देंदा, से आपणे बच्चेया रा बैरी ए,
पर जो तेस साथे प्यार राखोआ, से जिऊए ते तेसखे शिक्षा देओआ।
तर्मी पेट परी की खाओआ,
पर दुष्ट पूखे ई रओए।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.