Baghlayani Bible
नसीअता 12
जो शिक्षा रिया गल्ला खे मानोआ, से ज्ञानो रिया गल्ला ते बी प्यार राखोआ,
पर जो चिड़कणे ते बैर राखोआ, से डांगरो जेड़ा मूर्ख ए।
खरे माणूं तो यहोवे रा अनुग्रह पाओए,
पर बुरी साजिश करने वाल़ेया खे से दोषी ठईराओआ।
कोई माणूं बुराईया रिया बजा ते बणेया रा नि रंदा,
पर तर्मी माणूं बणे रे रणे।
खरे सबाओ री जवाणस आपणे लाड़े रे सिरो रा मुकुट ओई,
पर जो शरमा जोगे काम करोई, तेसा रिया बजा ते तेसा रे लाड़े रिया आड्डिया तक सड़ी जाओईया।
तर्मिया री योजना न्याय री ओई,
पर दुष्ट छल ई सोचोआ।
बुरेया लोका रिया गल्ला अत्या करने खे ताक लगाणे रे बारे रे ओईया,
पर तर्मी लोका रिया बजा ते खतरे दे पड़े दे लोक बी बचणे।
जेबे बुरेया लोका ते बदला लया जाओआ, तेबे सेयो रंदे ई नि,
पर तर्मिया रा कराना हमेशा बणेया रा रओआ।
माणूंए री बुद्धिया रे मुताबिक तेसरी तारीफ ओई,
पर बुरा माणूं नबाग जाणेया जाओआ।
जो बडयाईया करोआ पर तेसगे खाणे खे रोटिया पनि ए,
तेसते दास राखणे वाल़ा तुच्छ माणूं बी खरा ए।
तर्मी आपणे डांगरा रे प्राणो री बी सम्बाल़ लओआ,
पर बुरेया लोका री दया बी निर्दयता ए।
जो आपणी जमीना दे बीज बाओआ, से पेट परी की खाओआ,
पर जो नकम्मेया री संगत करोआ, से मूर्ख ठईरोआ।
दुष्ट लोक बुरे लोका रे लुटे रे समानो री इच्छा करोए,
पर परमेशर खरेया लोका खे कमाणे रा तरीका देओआ।
बुरा माणूं आपणे मुंए रिया बुरिया गल्ला रिया बजा ते फन्दे रे फसोआ,
पर तर्मी मुसीबता ते बारे निकल़ोआ।
सजण माणूं आपणे मुंए रिया गल्ला रे फलो रे जरिए पलाईया साथे परेया रा ओआ,
ओर जेड़ा जो करोआ, तेड़ा ई तेस परना।
मूर्खो खे हमेशा आपणी ई चाल ठीक लगोई,
पर जो दूजेया रिया दित्तिया रिया सलाई खे मानोआ, से अक्लमंद ए।
जेबे कोई मूर्ख नराज ऊई जाओआ, तेबे से छोड़ आपणी नराजगी दखाई देओआ,
पर समजदार बेज्जतिया खे पुलाई देओआ।
एक ईमानदार गवा सच्च बोलोआ,
पर एक चूठा गवा चूठ बोलोआ।
एड़े लोक बी ए जिना रा बिना सोचे समजे बोलणा तलवारी जेड़ा चूबोआ,
पर अक्लमंद माणूंए रे बोलणे ते लोक ठीक ऊई जाओए।
मुंए ते निकल़ी दी सच्चाई सदा बणी री रणी,
पर चूठो रे पैर नि ऊँदे।
बुरी साजिश करने वाल़ेया रे मनो दे छल रओआ,
पर मेल-मलापो री योजना करने वाल़ेया खे शान्ति ओई।
तर्मी माणूंए खे कोई नुकशाण नि ऊँदा,
पर दुष्ट लोक सारी मुसीबता रे फसी जाओए।
चूठ बोलणे वाल़ेया ते यहोवा नफरत करोआ,
पर जो विश्वासो साथे काम करोए, तिना ते से खुश ओआ।
समजदार माणूं ज्ञानो खे प्रगट नि करदे;
पर मूर्ख आपणे मनो री मूर्खता जोरे की प्रचार करोआ।
कामकाजी लोक राज करोए,
पर आल़सी गुलामिया दे पड़ी जाओए।
चिन्ता तुसा रिया खुशिया खे लूटी लओई,
पर पली गल्ला ते से खुश ओई।
तर्मी माणूं आपणे पड़ोसिये री अगुवाई करोआ,
पर दुष्ट माणूं आपणी ई चाला रिया बजा ते पटकी जाओआ।
आल़सी कदी बी आपणे कामो खे पूरा नि करदा,
पर मईणत करने वाल़े माणूंए खे कीमती चीजा मिलोईया।
तार्मिकता रिया बाटा रे जिन्दगी मिलोई,
ओर बुराईया रिया बाटा रे मौत मिलोई।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.