Baghlayani Bible
गिणती 4
लेविया रे कहाती कुलो रे फर्ज
तेबे यहोवे मूसा ओर हारूणो खे बोलेया, “लेविया बीचा ते कहात वंशिया री, तिना रे कुल ओर पितरा रे कराने रे मुताबिक लग जे गिणती करो, तिना बीचा ते 30 साला ते लई की 50 साला तको री उम्रा वाल़े, जितणे मिलणे वाल़े तम्बूए रे काम-काज करी सकोए, तिना री गिणती करो। ओर मिलणे वाल़े तम्बूए रे परम पवित्र चीजा री देखपाल़ करना कहातिया रा ये सेवा रा काम ऊणा, जेबे-जेबे मिलणे वाल़ा तम्बू निकयाल़ी की नवीं जगा खे लई जाणा तेबे-तेबे हारूण ओर तेसरे पाऊ पीतरे आई की, बीचले पड़दे खे त्वारी की तिजी साथे गवाईया रे पवित्र सन्दूको खे टकी देओ; तेबे सेयो तिना सबी खे बाकरेया री खाला ते बणे रे आवरणो ते टको, ओर तेते खाला पाँदे पूरा नीले रंगो रा टाल्ला राखो ओर पवित्र सन्दूको रे लगे रे कड़ेया रे डण्डे पाओ। फेर पेंटा वाल़ी रोटिया री पवित्र मेजा पाँदे नीला टाल्ला बिछाई की तिजी पाँदे पराती, तंग्यारटी, कड़छी ओर अर्घो रे कटोरे राखो ओर रोज की खास रोटी बी तिजी पाँदे राखो; तेबे सेयो तिना सबी चीजा पाँदे लाल रंगो रा टाल्ला बिछाई की तिजी खे बाकरेया री खाला ते बणे रे आवरणो ते टको ओर मेजो रे लगे रे कड़ेया रे डण्डे पाई देओ। तेबे सेयो नीले रंगो रा टाल्ला लई की दिऊए, गुलतराश ओर गुलदानो समेत प्रयासा देणे वाल़े दिऊए खे ओर तिजी साथे आगी खे पकड़ने वाल़ा चिमटा ओर सबी जैतूनो रे तेलो रे पांडेया खे जिना साथे तिजी री सेवा ओई, तिना सबी खे टकी देओ; तेबे सेयो दिऊए राखणे री फट्टी ओर तिजी रे सारे समानो खे बाकरेया री खाले की लपेटी की तिजी खे लई जाणे वाल़ेया डण्डेया पाँदे राखी देओ। तेबे सेयो सूईने री बेदी जेते पाँदे तूप बाल़ेया जाओआ तिजी पाँदे एक नीला टाल्ला बिछाई की तिजी खे बाकरेया री खाला ते बणे रे आवरणो ते टको ओर तिदे लगे रे कड़ेया रे डण्डे लगाई देओ; तेबे सेयो पवित्र जगा रे सेवा करने रे सारे समानो खे लई की, नीले टाल्ले रे लपेटी की बाकरेया री खाले की टको ओर इना चीजा खे लई जाणे खे डण्डे लगे रे मेजो पाँदे राखी देओ। फेर सेयो बेदिया पाँदा ते सारी स्वा चकी की बेदिया पाँदे बैंगणी रंगो रा टाल्ला बिछाओ; तेबे जेते समाने की बेदिया री सेवा ओई, से सब, मतलब मासो खे कांडे, चर्बिया वाल़ी स्वा चकणे खे बेलचे, आग चकणे खे गिट्ठिया ओर खून छिड़कणे खे कटोरे बगैरा सारा समान बेदिया पाँदे राखो ओर तिजी पाँदे बाकरेया री खाला रा आवरण बिछाई की बेदिया रे लगे रे कड़ेया रे डण्डे लगाओ। ओर जेबे हारूण ओर तेसरे पाऊ पवित्र जगा रा सारा समान टकी चुको, तेबे तिजी ते बाद कहात वंशो रे लोक तिजी खे चकणे आओ, पर कोई पवित्र चीज नि छूँओ, नई तो सेयो मरी जाणे। कहातिया रे चकणे खे मिलणे वाल़े तम्बूए री येई चीजा ए।”
जो चीजा हारूण पुरोईतो रे पाऊ एलीआजारो गे जिम्मेवारिया ओर देख-रेखा खे सम्बाल़ी जाओ सेयो ये ए, प्रयासा देणे खे जैतूनो रा तेल, खुशबू वाल़ा तूप, रोज की नज्जो री बलि ओर अभिषेको रा तेल ओर मिलणे वाल़े तम्बूए रिया सारिया चीजा ओर पवित्र जगा ओर तिजी रा सारा समान।
तेबे यहोवे मूसा ओर हारूणो खे बोलेया, “लेवी गोत्रो रे कहातिया रा कुल नाश नि ऊणे देणा; जेबे कहात वंशी परम पवित्र चीजा रे नेड़े आओ, तो सेयो नि मरो पर तिना रा जिऊँदे रणे खे एड़ा करो; हारूण ओर तेसरे पाऊ पीतरे आई की एकी-एकी खे तिना रा काम बताई देओ ओर हर एकी खे तिना जो समान लई जाणा चाईयो, ओर कहात वंशी पवित्र चीजा खे देखणे खे थोड़ी जी देरा खे बी पीतरे नि आओ, नई तो सेयो मरी जाणे।”
लेविया रे गेर्शोनियो कुलो रे फर्ज
तेबे यहोवे मूसे खे बोलेया, “गेर्शोनिया री बी गिणती तिना रे पितरा रे कराने ओर कुलो रे मुताबिक करना; 30 साला ते लई की 50 साला तको री उम्रा वाल़े, जितणे मिलणे वाल़े तम्बूए रे सेवा करी सकोए तिना सबी खे गिणी लओ। गेर्शोनिया रे कुलो वाल़ेया रा मिलणे वाल़े तम्बूए रे सेवा करना ओर समानो खे चकी की लई चलणा येई काम ओ; मतलब सेयो पवित्र तम्बूए रे पर्दे ओर मिलणे वाल़े तम्बूए रे पड़दे ओर इजी पाँदे बाकरेया री खाला ते बणेया रा आवरण ओर मिलणे वाल़े तम्बूए रे दरवाजे रे पड़दे, मिलणे वाल़े तम्बू ओर बेदिया रे चऊँ कनारे रे आँगणो रे पड़दे ओर आँगणो रे दरवाजे रे पड़दे ओर तिजी री रस्सिया ओर तिदे लगणे वाल़ा सारा समान, इना सबी खे सेयो चकेया करो ओर इना चीजा ते जितणा काम ओआ से सब बी येई लोक करेया करो। ओर गेर्शोनियो रे वंशो रे लोका रा सारा काम हारूण ओर तेसरे पाऊआ रे बोलणे ते ओ, मतलब जो कुछ तिना चकणा ओर जो-जो काम तिना करना ओर जो समान तिना लई जाणा से जिम्मेबारी तुसेई तिना गे सम्बाल़ेया करो। मिलणे वाल़े तम्बूए रे गेर्शोनियो रे कुलो रा येई काम ओ ओर तिना री सेवकाईया रा काम हारूण पुरोईतो रे पाऊ ईतामारो री देख-रेखा रे ओ।”
लेविया रे मरारिया कुलो रे फर्ज
फेर मरारिया खे बी तूँ तिना रे कुलो ओर पितरा रे कराने रे मुताबिक मर्दा खे गिणी लओ; 30 साला ते लई की 50 साला तको री उम्रा वाल़े, जितणे मिलणे वाल़े तम्बूए रे सेवा करी सकोए तिना सबी खे गिणी लओ। ओर मिलणे वाल़े तम्बूए री जिना चीजा खे निणे रा जो काम तिना खे मिलो से ए ओ, मतलब पवित्र तम्बूए रे तख़्ते, डण्डे, खम्बे ओर पावे, तिंयाँ ई चऊँ कनारे रे आँगणो रे खम्बे ओर तिना रे पावे, खूँडिया, रस्सिया ओर लग-लग किस्मा रे कामो रा सारा समान ओर जो-जो समान तिना खे टोणे खे तिना गे सम्बाल़ेया जाओ तिना बीचा ते एक-एक चीजा रा नाओं लई की तुसे गिणी लओ। मरारिया रे कुलो रा सारा काम जो तिना मिलणे वाल़े तम्बूए रे करना से येई ए ओर तिना री सेवकाईया रा काम हारूण पुरोईतो रे पाऊ ईतामारो री देख-रेखा रे ओ।
लेविया री गिणती
तेबे मूसा ओर हारूण ओर मण्डल़िया रे परदाने कहातिया रे कुलो खे, तिना रे कुलो रे ओर पितरा रे कराने रे मुताबिक गिणी ला, 30 साला ते लई की 50 साला तको री उम्रा वाल़े, जितणे मिलणे वाल़े तम्बूए रे सेवा करी सकोए, सेयो सब गिणी ले; ओर जो आपणे-आपणे कुलो रे मुताबिक गिणे गए सेयो 2 ह्जार 750 थे। कहातिया रे कुलो बीचा ते जितणे मिलणे वाल़े तम्बूए रे सेवा करने वाल़े गिणे गए सेयो इतणे ई थे; जो आज्ञा यहोवे मूसे रे जरीये दित्ती थी तिजी रे मुताबिक मूसा ओर हारूणे सेयो गिणी ले।
गेर्शोनिया बीचा ते जो आपणे कुल ओर पितरा रे कराने रे मुताबिक गिणे गए, जो 30 साला ते लई की 50 साला तको री उम्रा वाल़े, जितणे मिलणे वाल़े तम्बूए रे सेवा करी सको थे, तिना री गिणती तिना रे कुलो ओर पितरा रे कराने रे मुताबिक 2 ह्जार 630 थी। गेर्शोनिया रे कुलो बीचा ते जितणे मिलणे वाल़े तम्बूए रे सेवा करने वाल़े गिणे गए सेयो इतणे ई थे; यहोवे री आज्ञा रे मुताबिक मूसा ओर हारूणे सेयो गिणी लये।
तेबे मरारिया रे कुलो बीचा ते जो आपणे कुलो ओर पितरा रे कराने रे मुताबिक गिणे गए, जो 30 साला ते लई की 50 साला तको री उम्रा वाल़े, जितणे मिलणे वाल़े तम्बूए रे सेवा करी सको थे, तिना री गिणती तिना रे कुलो रे मुताबिक 3 ह्जार 200 थी। मरारिया रे कुलो बीचा ते जिना खे मूसा ओर हारूणे, यहोवे री तेसा आज्ञा रे मुताबिक जो मूसे रे जरीये मिली थी, जो गिणी ले सेयो इतणे ई थे।
लेविया बीचा ते जो मूसा ओर हारूण ओर इस्राएली परदाने तिना रे कुलो ओर पितरा रे कराने मुताबिक गिणे, जो 30 साला ते लई की 50 साला रे उम्रा वाल़े, जितणे मिलणे वाल़े तम्बूए री सेवा करने ओर बोजा चकणे खे काम करने खे आजीर ऊणे वाल़े थे, तिना सबी री गिणती 8 ह्जार 580 थी। ये आपणी-आपणी सेवा ओर बोजा टोणे खे यहोवे रे बोलणे ते गए। जो आज्ञा यहोवे मूसे खे दित्ती थी तिजी रे मुताबिक सेयो गिणे गए।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.