Baghlayani Bible
गिणती 29
रड़सिंगेया रे त्योआरो री पेंट
(लेवी बिधान 23:23-25)
फेर सातुए मीन्ने रे पईले दिने तुसे मरी आराधना करने खे कट्ठे ओ ओर तिदे मईणती रा कोई काम नि करना। तेस दिने पुरोईत नरसिंगा बजाओ; तुसे मां यहोवे खे सुख देणे वाल़ी खुशबूआ खे एक बाच्छू, एक खाडू ओर एकी-एकी सालो रे सात मिन्टू चढ़ाणे; यो सब बिना नुक्शो रे ऊणे चाईयो। ओर बाच्छूए साथे चढ़ाई जाणे वाल़ी नज्जो री बलिया रे जैतूनो रे तेलो साथे मिलेया रा तीन किलो मैदा ओ ओर खाडूए साथे दो किलो मैदा ओ, ओर सातो पेडा रे बच्चेया बीचा ते हर एकी बच्चे साथे तेलो साथे मिलेया रा एक किलो मैदा चढ़ाणा। तिजी साथे एक बाकरा बी पापबलिया खे चढ़ाणा, ताकि तुसा रे पापो रिया तँईं प्राश्चित ओ। इना सबी ते ज्यादा नये चाँदो रा होमबलि ओर तिजी री नज्जो री बलि ओर हर रोज होमबलि ओर तिजी री नज्जो री बलि ओर तिना सबी रे अर्घ बी तिना रे नियमा रे मुताबिक सुख देणे वाल़ी खुशबू देणे खे यहोवे रिया तँईं आगी रे बलि करी की चढ़ाणी।
प्राश्चितो रे दिनो रे बलिदान
(लेवी बिधान 23:26-32)
फेर तेसी सातुए मीन्ने रे दसुए दिने तुसे मेरी आराधना करने खे कट्ठे ओ; तुसे बरत करी की आपणे-आपणे प्राणो खे दुःख देओ ओर केसी बी किस्मा रा मईणती रा काम नि करना; यहोवे रिया तँईं सुख देणे वाल़ी खुशबूआ खे होमबलिया खे एक बाच्छू, एक खाडू ओर एकी-एकी सालो रे सात बिना नुक्शो रे मिन्टू चढ़ाणे; ओर बाच्छूए साथे चढ़ाई जाणे वाल़ी नज्जो री बलि तेलो साथे मिले रा तीन किलो मैदा ओ ओर खाडूए साथे दो किलो मैदा ओ, ओर सातो पेडा रे बच्चेया बीचा ते एकी-एकी बच्चे साथे एक किलो मैदा चढ़ाणा, प्राश्चितो खे पापबलि ओर नज्जो री बलिया साथे हर रोज की होमबलि ओर तिना सबी रे अर्घो ते अलावा तुसा रे पापो रे प्राश्चितो रिया तँईं एक बाकरा बी चढ़ाणा।
चूँगड़िया रे त्योआरो रे बलिदान
(लेवी बिधान 23:33-44)
फेर सातुए मीन्ने रे पन्द्रुए दिने तुसे मेरी आराधना करने खे कट्ठे ओ ओर तिदे कोई मईणती रा काम नि करना ओर साता दिना तक यहोवे रिया तँईं त्योआर मनाणा;
तुसे यहोवे खे सुख देणे वाल़ी खुशबूआ खे तेरह बाच्छू ओर दो खाडू ओर एकी-एकी सालो रे चौदा मिन्टू आगी रे होमबलि करी की चढ़ाणे; ये सारे बिना नुक्शो रे ओ; ओर तेरह बाच्छूआ बीचा ते एकी-एकी बाच्छूए साथे तीन किलो नज्जो री बलि जैतूनो रे तेलो साथे मिले रा मैदे री ओ ओर दुँईं खाडूआ बीचा ते एकी-एकी खाडूए साथे दो किलो मैदा चढ़ाणा, ओर चौदा पेडा रे बच्चेया बीचा ते एकी-एकी बच्चे साथे एक किलो मैदा चढ़ाणा। ओर तुसा रे पापो रे प्राश्चितो रिया तँईं एक बाकरा बी चढ़ाणा; ये हर रोज की होमबलि, तिजी री नज्जो री बलि ओर अर्घो ते लग चढ़ाई जाओ।
फेर त्योआरो रे दूजे दिने बारा बाच्छू ओर दो खाडू ओर एकी-एकी सालो रे चौदा बिना नुक्शो रे मिन्टू बेदिया पाँदे चढ़ाणे; ओर बाच्छू ओर खाडू ओर पेडा रे बच्चेया साथे तिना री नज्जो री बलि ओर अर्घ तिना री गिणती ओर नियमा रे मुताबिक चढ़ाणा। तुसा रे पापो रे प्राश्चितो रिया तँईं एक बाकरा बी चढ़ाणा; ये हर रोज की होमबलि, तिजी री नज्जो री बलि ओर अर्घो ते लग चढ़ाई जाओ।
फेर तीजे दिने ग्यारा बाच्छू, ओर दो खाडू ओर एकी-एकी सालो रे चौदा बिना नुक्शो रे मिन्टू चढ़ाणे; ओर बाच्छू ओर खाडू ओर पेडा रे बच्चेया साथे तिना री नज्जो री बलि ओर अर्घ, तिना री गिणती ओर नियमा रे मुताबिक चढ़ाणा। ओर तुसा रे पापो रे प्राश्चितो रिया तँईं एक बाकरा बी चढ़ाणा; ये हर रोज की होमबलि, तिजी री नज्जो री बलि ओर अर्घो ते लग चढ़ाई जाओ।
फेर चौथे दिने दस बाच्छू, ओर दो खाडू ओर एकी-एकी सालो रे चौदा बिना नुक्शो रे मिन्टू चढ़ाणे; बाच्छू ओर खाडू ओर पेडा रे बच्चेया साथे तिना री नज्जो री बलि ओर अर्घ, तिना री गिणती ओर नियमा रे मुताबिक चढ़ाणा। ओर तुसा रे पापो रे प्राश्चितो रिया तँईं एक बाकरा बी चढ़ाणा; ये हर रोज की होमबलि, तिजी री नज्जो री बलि ओर अर्घो ते लग चढ़ाई जाओ।
फेर पाँजुए दिने नौ बाच्छू, ओर दो खाडू ओर एकी-एकी सालो रे चौदा बिना नुक्शो रे मिन्टू चढ़ाणे; ओर बाच्छू ओर खाडू ओर पेडा रे बच्चेया साथे तिना री नज्जो री बलि ओर अर्घ, तिना री गिणती ओर नियमा रे मुताबिक चढ़ाणा। ओर तुसा रे पापो रे प्राश्चितो रिया तँईं एक बाकरा बी चढ़ाणा; ये हर रोज की होमबलि, तिजी री नज्जो री बलि ओर अर्घो ते लग चढ़ाई जाओ।
फेर छठे दिने आठ बाच्छू, ओर दो खाडू ओर एकी-एकी सालो रे चौदा बिना नुक्शो रे मिन्टू चढ़ाणे; ओर बाच्छू ओर खाडू ओर पेडा रे बच्चेया साथे तिना री नज्जो री बलि ओर अर्घ, तिना री गिणती ओर नियमा रे मुताबिक चढ़ाणा। ओर तुसा रे पापो रे प्राश्चितो रिया तँईं एक बाकरा बी चढ़ाणा; ये हर रोज की होमबलि, तिजी री नज्जो री बलि ओर अर्घो ते लग चढ़ाई जाओ।
फेर सातुए दिने सात बाच्छू, ओर दो खाडू ओर एकी-एकी सालो रे चौदा बिना नुक्शो रे मिन्टू चढ़ाणे। ओर बाच्छू ओर खाडू ओर पेडा रे बच्चेया साथे तिना री नज्जो री बलि ओर अर्घ, तिना री गिणती ओर नियमा रे मुताबिक चढ़ाणा। ओर तुसा रे पापो रे प्राश्चितो रिया तँईं एक बाकरा बी चढ़ाणा; ये हर रोज की होमबलि, तिजी री नज्जो री बलि ओर अर्घो ते लग चढ़ाई जाओ।
फेर त्योआरो रे शुरूओ रे आठुए दिने तुसा री एक पवित्र सभा ओ; तिदे मईणती रा कोई बी काम नि करेया जाओ। ओर तिदे होमबलि यहोवे खे सुख देणे वाल़ी खुशबू देणे खे एक बाच्छू ओर एक खाडू ओर एकी-एकी सालो रे सात बिना नुक्शो रे मिन्टू आगी रे बलि करी की चढ़ाणे; इजी ते अलावा बाच्छू ओर खाडू ओर पेडा रे बच्चेया साथे तिना री नज्जो री बलि ओर अर्घ, तिना री गिणती ओर नियमा रे मुताबिक चढ़ाणा। ओर तुसा रे पापो रे प्राश्चितो रिया तँईं एक बाकरा बी चढ़ाणा; ये हर रोज की होमबलि, तिजी री नज्जो री बलि ओर अर्घो ते लग चढ़ाया जाओ।
आपणी मान्नत ओर आपणी इच्छाबलिया ते अलावा, तुसे आपणे-आपणे बखतो रे, येई होमबलि, नज्जो री बलि, अर्घ ओर मेलबलि, मां यहोवे खे चढ़ाणा। ये सारी आज्ञा यहोवे मूसे खे दित्ती जो तिने इस्राएलिया खे सुणाई।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.