Baghlayani Bible
गिणती 23
बिलामो री पईली भविष्यबाणी
बिलामे बालाको खे बोलेया, “एती माखे सात बेदिया बणवा ओर एसी जगा पाँदे सात बाच्छू ओर सात खाडू बलिया खे त्यार कर।”
तेबे बालाके बिलामो रे बोलणे रे मुताबिक कित्तेया ओर बालाक ओर बिलामे मिली की हर एकी बेदिया पाँदे एक-एक बाच्छू ओर एक-एक खाडू चढ़ाए।
तेबे बिलामे बालाको खे बोलेया, “तूँ आपणी होमबलिया गे खड़ेया रा रओ ओर आँऊ जाऊँआ; ऊई सकोआ कि यहोवा मां साथे मिलणे खे आओ तेबे जो कुछ से मांगे बताओ सेई मां तांगे बताणा।” तेबे बिलाम कल्ला एक बऊत ऊच्चे पाह्ड़ो पाँदे गया, जेती कोई बी डाल़-बूटे नि थे।
बिलामो रा इस्राएलिया खे आशीष देणा
तेबे परमेशर बिलामो ते मिलेया ओर बिलामे तेसखे बोलेया, “मैं सात बेदिया त्यार करी राखिया ओर एकी-एकी बेदिया पाँदे एक-एक बाच्छू ओर एक-एक खाडू चढ़ाई राखे।”
तेबे यहोवे बिलामो रे मुंए रे एक गल्ल पाई ओर बोलेया, “बालाको गे चली जा ओर ईंयाँ बोलणा।”
तो बिलाम बालाको गे वापस आईगा ओर देखोआ कि से सारे मोआबी हाकिमा समेत आपणी होमबलिया गे खड़ी रा। तेबे बिलामे आपणी गल्ल बोलणी शुरू कित्ती ओर बोलणे लगेया,
“बालाके आँऊ अराम देशो ते
मतलब मोआबो रे राजे आँऊ पूर्वो रे पाह्ड़ो ते बुलाया,
तिने बोलेया ‘आओ’ मेरिया तँईं याकूबो रे वंशो खे स्राप दे, आओ,
इस्राएलो रे लोका रे खलाफ बुरा बोल!
पर जिना खे परमेशरे स्राप नि दित्तेया तिना खे आऊँ स्राप कऊँ देऊँ?
ओर जिना रे खलाफ यहोवे बुरा नि बोलेया
तो तिना रे खलाफ आँऊ किंयाँ बुरा बोलूँ?
चट्टानी री चूँडिया पाँदा ते सेयो माखे दिशोए,
पाह्ड़िया पाँदा ते आँऊ तिना खे देखूँआ;
से एड़ा देश ए जो कल्ला बसेया रा रणा
ओर से दूजेया देशा ते लग गिणेया जाणा!
याकूबो रे लोक बालूए री कणियां ते बी ज्यादा ए,
तिना खे कुण गिणी सकोआ
या इस्राएलो रे करोड़ो लोका री गिणती कुण करी सकोआ?
मेरा सौभाग्य ऊणा जे मेरी मौत तर्मी लोका जेड़ी
ओर मेरा अन्त बी तिना जेड़ा ई ओ!”
तेबे बालाके बिलामो खे बोलेया, “तैं मां साथे क्या करी राखेया? मैं तूँ आपणे दुश्मणा खे स्राप देणे खे बुलाई राखेया था, पर तैं तिना खे आशीष ई आशीष दित्ती।”
बिलामे बोलेया, “जो गल्ल यहोवे माखे बोलणे खे बोली राखी, माखे सेई बड़ी सावधानिया साथे बोलणी चाईयो।”
बिलामो री दूजी भविष्यबाणी
तेबे बालाके तेसखे बोलेया, “मां साथे दूजिया जगा खे चल, जेथा ते सेयो ताखे दिशणे; तेथा ते तूँ तिना सबी खे तो नि देखी सकणा पर बारलिया कुछ छावणिया खे देखी सकणा; तेथा ते तिना खे मेरिया तँईं स्राप दे।” तेबे बालाक बिलामो खे सोपीम नाओं रे मैदानो रे पिसगा रे पाह्ड़ो री चूँडिया पाँदे लईगा ओर तेती सात बेदिया बणवाई की हर एकी बेदिया पाँदे एक-एक बाच्छू ओर एक-एक खाडू चढ़ाया।
तेबे बिलामे बालाको खे बोलेया, “तैं आपणी होमबलिया गे एथी खड़े रे रणा, जेबे आँऊ तेती जाई की यहोवे ते मिलूँ।”
ओर यहोवा बिलामो ते मिलेया ओर यहोवे तेसखे एक संदेश देई की बोलेया, “बालाको गे जाई की ईंयाँ बोलणा।”
तो बिलाम बालाको गे गया ओर से मोआबी हाकिमा समेत आपणे होमबलिया साथे खड़ेया रा देखेया ओर बालाके पूछेया, “यहोवे क्या बोलेया?” तेबे बिलामे आपणी गईरी गल्ला बोलणिया शुरू कित्तिया ओर बोलणे लगेया,
“ओ बालाक, मन लगाई की सुण,
ओ सिप्पोरो रे पाऊ, मेरिया गल्ला त्यानो साथे सुण:
परमेशर माणूं निए कि चूठ बोलो
ओर ना ई माणूंए रा पाऊ ए कि आपणी सोच बदलो।
जो कुछ तिने बोलेया, क्या से तिजी रे मुताबिक नि करो?
जो परमेशरे वादा करी राखेया तिजी खे से पूरा नि करो?1
देख, मैं आशीर्वाद देणे री आज्ञा पाई राखी:
परमेशर आशीष देई चुकेया रा ओर आँऊ तिजी खे बदली नि सकदा।
परमेशरे याकूबो रे वंशो रे कोई दोष नि पाई राखेया
ओर ना ई इस्राएलो रे दुख देखेया।
तिना रा परमेशर यहोवा तिना साथे ए
ओर तिना रे राजे जेड़ी ललकार ए।
तिना खे मिस्र देशो ते परमेशर ई निकयाल़ी की ली आई रा,
इस्राएलो रे सेयो लोक जंगल़ी सांडो जेड़े तागतबर ए।
कोई बी जादू-मंत्र याकूबो पाँदे नि चली सकदा
ओर इस्राएलो रे खलाफ कोई दुष्ट बोली नि सकदा;
पर याकूब ओर इस्राएलो रे बारे दे एबे ये बोलेया जाणा
कि आई की देखो कि परमेशरे तिना बीचे क्या ई नऊखा काम करी राखेया!
सुण, से चूण्ड शेरनिया जेड़ा उठणा;
सेयो शेरो जेड़े खड़े ऊणे;
शेर जदुए तक शिकारो खे खाई नि लओ
ओर मरे रेया रा खून नि पी लओ,
तदुए तक तेस राम नि करना।”
तेबे बालाके बिलामो खे बोलेया, “तिना खे ना तो स्राप देणा ओर ना आशीष देणी।”
बिलामे बालाको खे बोलेया, “मैं ताखे बोलेया था कि जो कुछ यहोवा माखे बोलोगा, सेई माखे करना पड़ना।”
बिलामो री तीजी भविष्यबाणी
बालाके बिलामो खे बोलेया चल, “आँऊ ताखे एकी ओरी जगा पाँदे लई चलूँआ; ऊई सकोआ कि परमेशरो री इच्छा ओ कि तूँ तेथा ते तिना खे मेरिया तँईं स्राप दे।” तेबे बालाक बिलामो खे लई की पोर पाह्ड़ो रे कनारे पाँदे, जेथा ते सुनसाण जगा दिशोई, तेती लईगा।
बिलामे बालाको खे फेर बोलेया, “एती मेरिया तँईं सात बेदिया बणवा ओर एती सात बाच्छू ओर सात खाडू बलिया खे त्यार कर।” बिलामो रे बोलणे रे मुताबिक बालाके हर बेदिया पाँदे एक-एक बाच्छू ओर एक-एक खाडू चढ़ाया।
Source notes (1)
- Footnote रोमी 9:6, 2 तीमुथि 2:13
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.