Baghlayani Bible
गिणती 2
इस्राएलिया रे डेरेया रा क्रम
यहोवे मूसा ओर हारूणो खे बोलेया, “इस्राएली लोक मिलणे वाल़े तम्बूए रे चऊँ कनारे आपणे-आपणे पितरा रे कराने रे नशाणो रे चण्डे आपणे डेरे रे नेड़े खड़े करो। ओर जो पूर्व दिशा री तरफा खे जेथा ते सूरज निकल़ोआ, आपणे-आपणे चूण्डो रे मुताबिक डेरे खड़े करो सेयो ई यहूदा रे गोत्रो री छावणिया रे चण्डे रे लोक ऊणे, ओर तिना रा परदान अम्मीनादाबो रा पाऊ नहशोन ऊणा, ओर तिना रे चूण्डो रे गिणे रे मर्द 74 ह्जार 600 ए। तिना रे नेड़े जो डेरे खड़े करो सेयो इस्साकारो रे गोत्रो रे ओ ओर तिना रा परदान सूआरो रा पाऊ नतनेल ऊणा, ओर तिना रे चूण्डो रे गिणे रे मर्द 54 ह्जार 400 ए। इना ते बाद जबूलूनो रे गोत्रो वाल़े रणे ओर तिना रा परदान हेलोनो रा पाऊ एलीआब ऊणा, ओर तिना रे चूण्डो रे गिणे रे मर्द 57 ह्जार 400 ए। ईंयाँ यहूदा री छावणिया रे जितणे लोक आपणे-आपणे चूण्डो रे मुताबिक गिणे सेयो सब कुल मलाई की 1 लाख 86 ह्जार 400 ए। सारी मण्डल़िया रे पईले यो ई चलेया करो।”
दक्खणो री तरफा खे रूबेनो री छावणिया रे चण्डे रे लोक आपणे-आपणे चूण्डो रे मुताबिक रओ ओर तिना रा परदान शदेऊरो रा पाऊ एलीसूर ऊणा, ओर तिना रे चूण्डो रे गिणे रे मर्द 46 ह्जार 500 ए। रूबेनो रे नेड़े जिना आपणे डेरे खड़े करने सेयो शिमोनो रे गोत्रो रे ऊणे ओर तिना रा परदान सुरीशद्दै रा पाऊ शलूमीएल ऊणा, ओर तिना रे चूण्डो रे गिणे रे मर्द 59 ह्जार 300 ए। तेबे गादो रे गोत्रो रे रये ओर तिना रा परदान रूएलो रा पाऊ एल्यासाप ऊणा, ओर तिना रे चूण्डो रे गिणे रे मर्द 45 ह्जार 650 ए। रूबेनो री छावणिया रे जितणे लोक आपणे-आपणे चूण्डो रे मुताबिक गिणे सेयो सब कुल मिलाई की 1 लाख 51 ह्जार 450 ए। सारी मण्डल़िया रे दूजी यात्रा रूबेनो री ओ।
तिना पीछे फेर सबी छावणिया रे बीचो-बीछीए लेविया री छावणिया समेत मिलणे वाल़े तम्बूए री यात्रा ओ; जेते पाल़िया रे सेयो डेरे खड़े करो तेते ई पाल़िया रे सेयो आपणी-आपणी जगा पाँदे आपणे-आपणे परिवारो रे चण्डे साथे चलो।
पच्छमा री तरफा खे एप्रैमो री छावणिया रे चण्डे रे लोक आपणे-आपणे चूण्डो रे मुताबिक रओ ओर तिना रा परदान अम्मीहूदो रा पाऊ एलीशामा ऊणा, ओर तिना रे चूण्डो रे गिणे रे मर्द 40 ह्जार 500 ए। तिना रे नेड़े मनश्शे रे गोत्रो रे रओ ओर तिना रा परदान पदासूरो रा पाऊ गम्लीएल ऊणा, ओर तिना रे चूण्डो रे गिणे रे मर्द 32 ह्जार 200 ए। तिना ते बाद बिन्यामीनो रे गोत्रो रे रये ओर तिना रा परदान गिदोनी रा पाऊ अबीदान ऊणा, ओर तिना रे चूण्डो रे गिणे रे मर्द 35 ह्जार 400 ए। एप्रैमो री छावणिया रे जितणे लोक आपणे-आपणे चूण्डो रे मुताबिक गिणे सेयो सब कुल मिलाई की 1 लाख 8 ह्जार 100 मर्द ए। सारी मण्डल़िया बीचे तीजी यात्रा इना री ओ।
उतरो री तरफा खे दानो री छावणिया रे चण्डे रे लोक आपणे-आपणे चूण्डो रे मुताबिक रओ ओर तिना रा परदान अम्मीशद्दै रा पाऊ अहीएजेर ऊणा ओर तिना रे चूण्डो रे गिणे रे मर्द 62 ह्जार 700 ए। ओर तिना रे नेड़े जो डेरे खड़े करो सेयो आशेरो रे गोत्रो रे रओ ओर तिना रा परदान ओक्रानो रा पाऊ पगीएल ऊणा, ओर तिना रे चूण्डो रे गिणे रे मर्द 41 ह्जार 500 ए। तिना ते बाद नप्ताली रे गोत्रो रे रये ओर तिना रा परदान एनानो रा पाऊ अहीरा ऊणा, ओर तिना रे चूण्डो रे गिणे रे मर्द 53 ह्जार 400 ए। ओर दानो री छावणिया रे जितणे गिणे सेयो सब कुल मिलाई की 1 लाख 57 ह्जार 600 ए। ये आपणे-आपणे कराने रे चण्डे साथे ऊई की सबी ते पीछे यात्रा करो। इस्राएलिया बीचा ते जो आपणे-आपणे पितरा रे कराने रे मुताबिक गिणे गए गोत्रो री गिणती येई ए ओर सबी छावणिया रे जितणे मर्द आपणे-आपणे चूण्डो रे मुताबिक गिणे गये सेयो सब कुल मिलाई की 6 लाख 3 ह्जार 550 थे। पर जिंयाँ यहोवे मूसे खे जो आज्ञा देई राखी थी तिजी रे मुताबिक लेविए तो इस्राएलिया साथे गिणी नि राखे। ईंयाँ जो-जो आज्ञा यहोवे मूसा खे दित्ती थी, तिजी रे मुताबिक इस्राएली लोके कित्तेया, सेयो आपणे-आपणे कुल ओर आपणे-आपणे पितरा रे कराने रे मुताबिक, आपणे-आपणे चण्डे रे नेड़े डेरे खड़े करो थे ओर यात्रा बी करो थे।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.