Baghlayani Bible
नहेम्याह 11
परदान जो यरूशलमो रे बसी गे
तेस बखते इस्राएली प्रजा रे परदान तो यरूशलेम शईरो दे रओ थे ओर बाकी लोके ये ठराणे खे पर्चिया पाईया, कि दसा बीचा ते एक माणूं यरूशलेम शईरो दे, जो पवित्र शईर ए, बसी जाओ ओर नौ माणूं ओरी शईरो दे वशो। जिने आपणी इच्छा ते ई यरूशलेम शईरो रे रणा चाएआ तिना सबी खे लोके आशीर्वाद दित्तेया। तेस राज्य रे बड़े-बड़े लोक जो यरूशलेम शईरो दे रओ थे, सेयो यो ए; पर यहूदा रे शईरो दे एक-एक माणूं आपणी जमीना दे रओ था; मतलब इस्राएली, पुरोईत, लेविये, मन्दरो दे सेवा करने वाल़े ओर सुलैमानो रे नौकरा री ल्वाद।
यरूशलेम शईरो दे तो कुछ यहूदी ओर बिन्यामीनी रओ थे। यहूदिया बीचा ते तो पेरेसो रे कुलो रा अतायाह जो उज्जियाह रा पाऊ था, ये जकर्याह रा पाऊ, ये अमर्याह रा पाऊ, ये शपत्याह रा पाऊ, ये महललेलो रा पाऊ था। मासेयाह जो बारूको रा पाऊ था, ये कोलहेजो रा पाऊ, ये हजायाह रा पाऊ, ये अदायाह रा पाऊ, ये योयारीबो रा पाऊ, ये जकर्याह रा पाऊ ओर ये शीलोईये रा पाऊ था।
पेरेसो रे कुलो रे जो यरूशलेम शईरो दे रओ थे, सेयो सारे मलाई की 468 शूरवीर थे।
बिन्यामीन गोत्रो बीचा ते एक माणूं सल्लू जो मशुल्लामो रा पाऊ था, मशुल्लाम योएदो रा पाऊ था, योएद पदायाह रा पाऊ था, पदायाह कोलायाह रा पाऊ था, कोलायाह मासेयाह रा पाऊ था, मासेयाह इतीएह रा पाऊ था, इतीएह यशायाह रा पाऊ था।
तेसते बाद गब्बै सल्लै जिना साथे 928 लोक थे। इना रा परदान जिक्रीए रा पाऊ योएल था ओर हस्सनूआ रा पाऊ यहूदा, जो यरूशलेम रे आदे शईरो रा परदान था तेसरी मताद करो था।
तेबे पुरोईता बीचा ते योयारीबो रा पाऊ यदायाह ओर याकीन। ओर सरायाह जो परमेशरो रे मन्दरो रा परदान ओर हिल्किय्याह रा पाऊ था, ये मशुल्लामो रा पाऊ, मशुल्लाम सादोको रा पाऊ, सादोक मरायोतो रा पाऊ, मरायोत अहीतूबो रा पाऊ था। ओर इना रे 822 पाई जो तेस मन्दरो रा काम करो थे ओर अदायाह, जो यरोहामो रा पाऊ था, यरोहाम पलल्याह रा पाऊ, पलल्याह अमसीये रा पाऊ, अमसी जकर्याह रा पाऊ, जकर्याह पशहूरो रा पाऊ, पशहूर मल्किय्याह रा पाऊ था। एसरे 242 पाई जो पितरा रे कराने रे परदान थे; ओर अमशै जो अजरेलो रा पाऊ था, अजरेल अहजै रा पाऊ, अहजै मशिल्लेमोतो रा पाऊ, मशिल्लेमोत इम्मेरो रा पाऊ था। इना रे 128 शूरवीर पाई थे ओर इना रा परदान हग्गदोलीमो रा पाऊ जब्दीएल था।
तेबे लेवी लोका बीचा ते शमायाह जो हश्शूबो रा पाऊ था, हश्शूब अज्रीकामो रा पाऊ, अज्रीकाम हशब्याह रा पाऊ, हशब्याह बुन्नीये रा पाऊ था। शब्बतै ओर योजाबाद खास लेविया बीचा ते परमेशरो रे मन्दरो रे बारले कामो खे देखो थे। मत्तन्याह जो मीका रा पाऊ ओर जब्दीये रा पोता ओर आसापो रा पड़पोता था; से प्रार्थना दे तन्यवाद करने वाल़ेया रा मुखिया था ओर बकबुक्याह आपणे पाईया बीचे दूजे पदो पाँदे था; ओर अब्दा जो शम्मूये रा पाऊ ओर गालालो रा पोता ओर यदूतूनो रा पड़पोता था। जो लेवी लोक पवित्र शईरो दे रओ थे, सेयो सारे मलाई की 284 थे।
तेबे अक्कूब ओर तल्मोन नाओं रे द्वारपाल ओर तिना रे पाई जो बड़े द्वारा रे रखवाल़े थे, 172 लोक थे। बाकी इस्राएली पुरोईत ओर लेविये, यहूदा रे सबी शईरा दे आपणे-आपणे इस्से दे रओ थे। मन्दरो दे सेवा करने वाल़े लोक ओपेल पाह्ड़ो पाँदे रओ थे ओर मन्दरो दे सेवा करने वाल़ेया पाँदे सीहा ओर गिश्पा ठराई राखे थे। जो लेविये यरूशलेम शईरो दे रई की परमेशरो रे मन्दरो दे कामो दे लगे रे रओ थे, तिना रा मुखिया आसापो रे कुलो रे गाणेवाल़ेया बीचा ते उज्जी था, जो बानीए रा पाऊ था, (बानी मीके रा पड़पोता था) बानी हशब्याह रा पाऊ, हशब्याह मत्तन्याह रा ओर मत्तन्याह हशब्याह रा पाऊ था। कऊँकि तिना खे राजे री आज्ञा थी ओर गाणेवाल़ेया खे हर रोजके दिनो खे जो कुछ चाईयो था तिजी रे मुताबिक ठीक प्रबन्द था। प्रजा रे सारे कामो खे मशेजबेलो रा पाऊ पतह्माह जो यहूदा रे पाऊ जेरह रे कुलो रा था, से राजे गे रओ था।
ओरी शईरा दे रणे वाल़े लोक
बचे रे गाँवो ओर तिना रे डोरू: कुछ यहूदी जो किर्यतअर्बा शईर ओर तिना रे गाँवो दे, कुछ दीबोन शईर ओर तिना रे गाँवो दे, कुछ यकब्सेल शईर ओर तिना रे गाँवो दे रओ थे। तेबे येशुअ शईर, मोलादा शईर, बेत्पेलेत शईर; हसर्शूआल शईर ओर बेर्शेबा शईर ओर तिना रे गाँवो दे; ओर सिकलग शईर ओर मकोना शईर ओर तिना रे गाँवो दे; एन्निम्मोन, सोरा, यर्मूत, जानोह ओर अदुल्लाम शईर ओर तिना रे गाँवो दे, लाकीश शईर ओर तिना रे डोरूआ दे अजेका शईर ओर तिना रे गाँवो दे सेयो बेर्शेबा ते लई की हिन्नोमो रिया तराईया तक डेरे लगाई की रओ थे।
तेबे बिन्यामीनी लोक गेबा शईरो ते लई की मिकमाश, अय्या ओर बेतेल शईर ओर तिना रे गाँवो दे; अनातोत, नोब, अनन्याह, हासोर, रामाह, गित्तैम, हादीद, सबोईम, नबल्लत, लोद, ओनो शईर ओर कारीगरा री तराईया तक रओ थे। यहूदा रे कुछ लेविया रे दल, बिन्यामीन गोत्रो रे राज्य दे बसी गे।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.