Baghlayani Bible
नहेम्याह 10
बिधानो रे मुताबिक वादे रा कित्तेया जाणा
जिने छाप लगाई सेयो यो ए हकल्याह रा पाऊ नहेम्याह जो राजपाल था, ओर सिदकिय्याह; सरायाह, अजर्याह, यिर्मयाह; पशहूर, अमर्याह, मल्किय्याह; हत्तूश, शबन्याह, मल्लूक; हारीम, मरेमोत, ओबद्याह; दानिय्येल, गिन्नतोन, बारूक; मशुल्लाम, अबिय्याह, मिय्यामीन; माज्याह, बिलगै ओर शमायाह; यो तो पुरोईत थे।
लेविये यो थे: आजन्याह रा पाऊ येशुअ, हेनादादो री ल्वादा बीचा ते बिन्नूई ओर कदमिएल; ओर तिना रे पाई शबन्याह, होदिय्याह, कलीता, पलायाह, हानान; मीका, रहोब, हशब्याह; जक्कूर, शेरेब्याह, शबन्याह। होदिय्याह, बानी ओर बनीनू;
तेबे प्रजा रे परदान यो थे: परोश, पहत्मोआब, एलाम, जत्तू, बानी; बुन्नी, अजगाद, बेबै; अदोनिय्याह, बिगवै, आदीन; आतेर, हिजकिय्याह, अज्जूर; होदिय्याह, हाशूम, बेसै; हारीफ, अनातोत, नोबै; मग्पीआश, मशुल्लाम, हेजीर; मशेजबेल, सादोक, यद्दू; पलत्याह, हानान, अनायाह; होशे, हनन्याह, हश्शूब; हल्लोहेश, पिल्हा, शोबेक; रहूम, हशब्ना, मासेयाह; अहिय्याह, हानान, आनान; मल्लूक, हारीम ओर बानाह।
इस्राएली लोका रे जरीये कसम खाणी
बाकी लोक मतलब पुरोईत, लेविये, द्वारपाल, गाणे वाल़े ओर मन्दरो दे सेवा करने वाल़ेया लोके, ओर जितणे परमेशरो रा बिधान मानणे खे देशो-देशो रे लोका ते लग ऊए थे, तिने सबी आपणियां जवाणसा ओर तिना माठे-बेटिया साथे जो समजणे वाल़े थे, ओर आपणे अमीर पाईया साथे मिली की कसम खाई, कि आसा परमेशरो रे तेस बिधानो पाँदे चलणा, जो तेसरे दास मूसे रे जरीये देई राखेया ओर आपणे परमेशर यहोवे री सब आज्ञा, नियम ओर बिधिया मानणे दे चौकसी करनी। आसा ना तो आपणी बेटिया एस देशो रे लोका साथे ब्याणिया ओर ना आपणे माठेया रा ब्या तिना री बेटिया साथे करना। ओर जेबे एस देशो रे लोक रामो रे दिने नज्ज या कोई बिकणे री चीज बेचणे खे ल्याओगे तेबे आसा तिना ते ना तो रामो रे दिने, ना केसी पवित्र दिने कुछ लणा; ओर सातुए साले आसा डोरूआ दे कुछ नि बाणा ओर बाकी यहूदिया ते आपणा-आपणा कर्ज लणा छाडी देणा। तेबे आसे लोके एड़ा नियम बणाईता जेते कि आसा खे आपणे परमेशरो रे मन्दरो री सेवा खे लगभग चार ग्राम चाँदी देणा पड़ो। मतलब पेंटा री रोटी ओर हर रोजके नज्जो री बलि, होमबलि ओर रामो रे दिन ओर नये चाँद ओर ठराए रे त्योआर ओर पवित्र पेंट ओर इस्राएलो रे प्राश्चितो खे पापबलिया खे, बल्कि आपणे परमेशरो रे मन्दरो रे सारे कामो खे देया करना।
तेबे क्या पुरोईत, क्या लेवीय, क्या आम माणूं, आसे सबी लोके एसा गल्ला खे ठराणे खे पर्चिया पाईया, ताकि आपणे पितरा रे कराने रे मुताबिक हर साल ठराए रे बखतो पाँदे लकड़िया री पेंट, बिधानो रे लिखी री गल्ला रे मुताबिक आसे आपणे परमेशर यहोवे री बेदिया पाँदे बाल़ने खे आपणे परमेशरो रे मन्दरो दे ल्याया करिए। आसा आपणी-आपणी जमीना री पईली उपज ओर सब प्रकारा रे डाल़ा रे पईले फल हर साल यहोवे रे मन्दरो रे ल्याऊणे। ओर बिधानो दे लिखी री गल्ला रे मुताबिक, आपणे-आपणे जेठे पाऊ ओर डांगर, मतलब जेठे बाच्छू ओर मिन्टू आपणे परमेशरो रे मन्दरो दे तिना पुरोईता गे ल्याया करने, जो म्हारे परमेशरो रे मन्दरो दे सेवा-टईल करोए। आसा आपणा पईला बाटेया रा आटा, चकी री पेंट ओर सब डाल़ा रे फल ओर नया शराब ओर जैतूनो रा तेल आपणे परमेशरो रे मन्दरो रे कमरे दे पुरोईता गे ओर आपणी-आपणी जमीना री उपजा रा दशमांश, लेविया गे ल्याया करनी; कऊँकि सेयो लेविये थे, जो म्हारी उपजा बीचा ते सबी शईरा दे दशमांश लया करो थे।1 जेबे-जेबे लेविये इस्राएली लोका ते दशमांश लओ, तेबे-तेबे तिना साथे हारूणो री ल्वादा रा कोई पुरोईत रया करो; ओर लेविये दशमांशो रा दशमांश म्हारे परमेशरो रे मन्दरो री कमरे रे, मतलब पण्डारो रे पऊँचाया करोगे। कऊँकि जिना कमरे दे पवित्र जगा रे पांडे ओर सेवा-टईल करने वाल़े पुरोईत ओर द्वारपाल ओर गाणे वाल़े रओ थे, तिना दे इस्राएली ओर लेविये, नज्ज, नया शराब ओर जैतूनो रे तेलो री चकी री पेंट पऊँचाया करोगे। ईंयाँ आसा आपणे परमेशरो रे मन्दरो री देखपाल़ करेया करनी।
Source notes (1)
- Footnote (रोम. 11:16, लेवी. 23:7)
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.