Baghlayani Bible
न्यायियो 2
परमेशरो रे दूतो रा इस्राएली लोका खे बकणा
यहोवे रा स्वर्गदूत गिलगाल शईरो ते बोकीम जगा खे जाई की सारे इस्राएली लोका ते बोलणे लगेया, “मैं तुसे मिस्र देशो ते बारे ल्याई की एते देशो रे पऊँचाई राखे, जेतेरे बारे दे मैं तुसा रे बुजुर्गा ते कसम खाई थी मैं तिना खे ये बोलेया था: कि जो वादा मैं तुसा साथे करी राखेया से मां कदी नि तोड़ना।” इजी री खातर तुसे बी एते देशो रे रणे वाल़ेया साथे वाचा नि बानणी, तुसे तिना रिया बेदिया टाल़ी देणियां। पर तुसे मेरी गल्ल नि मानी। तुसे एड़ा कऊँ करी राखेया? एबे आऊँ बोलूँआ, कि मां सेयो लोक तुसा सामणे ते नि काडणे बल्कि सेयो तुसा रे बैरी बणी जाणे ओर तिना तुसे आपणे देवतेया री पूजा करने खे जाल़ो दे फसाणे। जेबे यहोवे रे स्वर्गदूते इस्राएली लोका खे यो गल्ला बोलिया, तेबे सेयो लोक चींगी-चींगी की रोणे लगे। ओर तिने तेसा जगा रा नाओं बोकीम1 राखेया। ओर तेती तिने यहोवे खे बलिदान चढ़ाए।
आज्ञा नि मानणा ओर आर
जेबे यहोशूए लोक बिदा कित्ते, तेबे सब इस्राएली लोक देशो खे आपणे अक्को दे करने खे आपणे-आपणे इस्से दे गये। ओर जदुए तक यहोशू ओर इस्राएलो रे स्याणे लोक जिऊँदे रये, जिने इस्राएलो रिया तँईं यहोवे रे जरीये कित्ते रे बड़े-बड़े काम देखी राखे थे, तदुए तक सेयो इस्राएली लोक यहोवे री सेवा करदे रये। ये सब ऊणे ते कुछ बखतो ते बाद प्रभुए रा दास, नूनो रा पाऊ यहोशू, 110 साला रा ऊई की मरी गा। ओर तेसखे इस्राएली लोके तेसरी आपणी जमीना दे तिम्नत्सेरह शईरो दे दबाईता, जो एप्रैमो रे पाह्ड़ी इलाके रे गाश नाओं रे पाह्ड़ो दे उतरी कनारे पाँदे। ओर जेबे तेसा पीढ़िया रे सारे लोक बी मरी गे; तेबे तिना ते बाद जो दूजी पीढ़ी ऊई तिना रे लोक ना तो यहोवे खे जाणो थे ओर ना तिना कामा खे जो तिने इस्राएलो रे लोका खे कित्ते थे।
इजी री खातर इस्राएली लोक से करने लगे जो यहोवे री नजरा दे बुरा था मतलब सेयो बाल नाओं रे देवते रिया मूर्तिया री पूजा करने लगे; सेयो आपणे बुजुर्गा रे परमेशर यहोवे खे, जो तिना खे मिस्र देशो ते निकयाल़ी की ल्याया था, छाडी की दूजे देवतेया री पूजा करने लगे ओर तिना गे माथा टेकेया ओर यहोवे खे रोष चढ़ाया। सेयो यहोवे खे छाडी की बाल देवता ओर अश्तोरेत देविया री मूर्तिया री पूजा करने लगे। तेबे यहोवे रा रोष इस्राएली लोका पाँदे पड़की गा ओर तिने इस्राएली लोक लूटेरेया रे वशो दे करी ते जो तिना खे लुटणे लगे। परमेशरे इस्राएली लोक दुश्मणा रे जरीये चऊँ कनारा ते केरे ओर इस्राएली तिना ते जीती नि सके। जेती केथी इस्राएली लोक आपणे दुश्मणा ते बारे लड़ने खे जाओ थे तेती यहोवा तिना खे तिना रे दुश्मणा ते अराई देयो था। जेड़ा यहोवे तिना ते कसम खाई की बोलेया था। ईंयाँ सेयो बड़ी मुसीबता दे पड़ी गे।
न्यायी चुणना
तेबे बादो ते यहोवे इस्राएली लोका खे न्यायी लोक ठराए, जिने सेयो लुटणे वाल़ेया ते बचाए थे।2 पर इस्राएली लोके आपणे न्यायिया री पनि मानी; बल्कि सेयो यहोवे साथे वफादार नि थे बल्कि एक व्याभिचारणिया जेड़े दूजे देवते री पूजा करो थे। तिना रे बुजुर्ग जो यहोवे री आज्ञा मानो थे, पर सेयो नवीं पीढ़िया रे लोक चट ई पीछे अटी गे ओर तिने परमेशरो री आज्ञा नि मानिया। जेबे दुश्मण इस्राएली लोका खे सताओ थे ओर तिना पाँदे अत्याचार करो थे तेबे इस्राएली बऊत दु:खी ऊई की रोणे लगो थे। तेबे यहोवा तिना री आवाज सुणी की तिना पाँदे दया करो था, ओर तिना खे एक न्यायी पेजो था जो तिना खे आपणी पूरी जिन्दगी तिना रे दुश्मणा ते बचाओ था। पर जेबे-जेबे न्यायी मरी जाओ था, तेबे-तेबे इस्राएली लोक आपणे बुजुर्गा ते बी जादा पाप करो थे। सेयो दूजे देवतेया पीछे चली की तिना री पूजा करो थे ओर सेयो आपणे हठो रिया बजा ते बुरे काम करना नि छाडो थे। इजी री खातर यहोवे रा रोष इस्राएली लोका पाँदे पड़की गा ओर तिने बोलेया, “एसे जातिये से वाचा जो मैं तिना रे बुजुर्गा साथे बानी थी, तोड़ी ती ओर मेरी गल्ल नि मानी, मां तिना जातिया रे लोक एते जमीना ते बारे नि काडणे जो यहोशूए रे मर्दे बखतो तक तिना बीचे रई गे थे; जेते कि तिना जातिया रे लोका रे जरीये आऊँ इस्राएली लोका री परीक्षा करुँ, कि जिंयाँ तिना रे बुजुर्ग मेरी आज्ञा खे मानो थे तिंयाँ ई यो बी मानोए की नि।” इजी री खातर यहोवे सेयो जातिया इस्राएली लोका बीचा ते नि निकयाल़िया, तिने ना तो यहोशू ओर ना ई तेसरे लोका खे तिना खे अराणे खे मताद कित्ती।
Source notes (2)
- Footnote बोकीम रोणे वाल़े
- Footnote प्रेरित 13:20
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.