Baghlayani Bible
अय्यूब 36
परमेशर सर्वशक्तिमान ओर महान ए
तेबे एलीहूए ये बी बोलेया,
“मां साथे थोड़ा रूकेया रा रओ ओर मां ताखे सब कुछ समजयाई देणा,
कऊँकि परमेशरो रे पक्षो रे मां एबु कुछ ओर बी बोलणा।”
मांगे एबु बऊत ज्ञान ए; से तांगे बताई की मां ए गल्ल प्रकट करनी कि
जिने परमेशरे आऊँ बणाया ए, से तर्मी ए।
जो कुछ आऊँ तुसा ते बोलूँआ से सब सच्च ए।
तुसे इजी रे बारे दे पक्के ऊई सकोए कऊँकि आऊँ सई दे एक पूरिया तरआ ते समजदार माणूंआ।
देख, परमेशर सामर्थी ए ओर केसी खे तुच्छ नि समजदा;
तेसदे समजणे री शक्ति बऊत जादा ए।
से दुष्टा खे जिऊँदा नि राखदा
ओर गरीबा खे तिना रा अक्क देओआ।
से तर्मिया ते आपणियां आखी नि फेरदा,
बल्कि से राजेया साथे तिना खे सदा खे सिंहासनो पाँदे बठयाल़ोआ
ओर तिना खे ऊच्चे पदो पाँदे इज्जत मिलोई।
पर जे लोक जंजीरा दे बजे दे ए,
जो तिने करी राखेया तेतेरिया तँईं दु:खी ए,
जेबे एड़ा ओआ, तेबे परमेशर तिना खे दखाओआ
कि तिने क्या पाप करी राखे; ओर ये कि सेयो कमण्डी ऊईगे दे ए।
परमेशर तिना ई बुराईया ते दूर रणे रिया तँईं
आपणी चतौणी सुणाओआ।
जे सेयो परमेशरो रिया आज्ञा रा पाल़न करोए ओर तेसरी सेवा करोए,
तो सेयो आपणी जिन्दगिया शान्ति
ओर सुखो दे जिऊँणे जोगे ऊई जाणे।
पर जे सेयो तेसरी गल्ल नि सुणो, तो सेयो तलवारी साथे नाश ऊई जाओए
ओर सेयो बिना ज्ञानो साथे मरी जाओए।
जो अधर्मी ओए सेयो बऊत गुस्से ऊँदे रओए
ओर परमेशर रे सजा देणे पाँदे बी मतादा रिया तँईं प्रार्थना नि करदे।
सेयो जवानिया देई मरी जाओए
ओर तिना री जिन्दगिया रा अन्त लफंगेया बीचे ई ऊई जाओआ।
परमेशर लोका खे दु:ख देई की सिखाओआ;
ओर जो कुछ से तिना ते बोलोआ, तेस सुणाओआ
परमेशरे तूँ क्ल़ेशा ते निकयाल़ेया,
ओर तूँ बचाई की राखेया;
तेरे मेजो पाँदे खाणे रा टेर लगाई राखेया था।
पर एबे ताखे सजा देणे लगी रा जिंयाँ दुष्ट लोका खे सजा देओआ;
परमेशर ताखे सजा देणे लगी रा जेतेरा तूँ अक्कदार ए
देख, केथी तूँ गुस्से रिया बजा ते बुरिया बाटा रिये नि चली जाए
ओर ना प्राश्चितो खे जादा जाणी की केथी तूँ खरिया बाटा ते नि मुड़ी जाए।
मतादा रिया तँईं चींगणे ते तुसा खे कोई फाईदा नि ऊणा; तुसा री सारी तागत एबे तुसा री मताद नि करी सकदी
तेसा राती री इच्छा नि कर,
जेबे देशो-देशो रे लोक आपणियां-आपणियां जगा ते खत्म ऊणे।
चौकस रओ कि तुसे बुरे काम करने शुरू नि करो,
कऊँकि परमेशरे तुसे बुराई करने ते रोणे रिया तँईं तुसा खे कष्ट देई राखेया ए।
देख, परमेशर आपणी सामर्था साथे बड़े-बड़े काम करोआ,
तेस जेड़ा ओर कोई गुरू नि ए?
कोई बी परमेशरो खे ये नि बताई सकदा कि तेस क्या करना ए
या तेस पाँदे बुराई करने रा आरोप नि लगाई सकदे।
तेसरे महान कामा री महिमा ओर तारीफ करना याद राख,
जेसरी तारीफा रे गाणे लोक गांदे आई रे।
सबी लोके देखेया ए कि तिने क्या करी राखेया;
पर आसे सिर्फ दूरा ते ई देखी सकूँए।
देख, परमेशर महान ए ओर आसे तेसखे जाणी पनि सकदे; से म्हारी सोचा ते केथी पोरे ए
ओर तेसरे साला री गिणती अनन्त ए।
ये परमेशर ए जो तरतिया ते पाणी लओआ
ओर तिजी खे बर्खा रे टीपेया दे बदली देओआ।
से तिना बादल़ा ते सबी माणूंआ खे
हर जगा पाणी बरसाओआ।
कोई नि जाणदा कि बादल़ किंयाँ आगे बढ़ोए
या सर्गो दे बिजल़ी किंयाँ कड़कोई, जेती परमेशर रओआ।
से आपणे चऊँ कनारे बिजल़ी चमकाओआ,
पर से समुद्रो रिया थालिया दे न्हेरा करी देओआ।
कऊँकि से देशो-देशो रे लोका रा न्याय इना रे जरिए ई करोआ
ओर खाणे-पीणे रिया चीजा बऊत जादा लोका खे देओआ।
से बिजल़िया खे आपणे आथो रे लई की
तेसा खे आज्ञा देओआ कि नशाणे रिया जगा पाँदे पड़।
बिजल़िया रा कड़कणा आऊणे वाल़े तूफानो रा संदेशा देओआ,
ओर डांगर जाणोए कि बर्खा आऊणे वाल़ी ए।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.