Baghlayani Bible
यशायाह 53
लोक बेबीलोनो दे गुलाम आपणे साथी यहूदिया खे बोलोए, “जो सन्देश आसा खे दित्तेया, तेतेरा परोसा किने कित्तेया? ओर यहोवे री सामर्थ केस पाँदे प्रगट ऊई?1 कऊँकि यहोवे रे सामणे लूँगा जेड़ा ओर एड़ी जड़ी जेड़ा जम्मेया जो सूकी जमीना दे फूटी की निकल़े; मेरा दास ना तो कोई सुन्दर था कि आसे तेसखे देखदे ओर ना आसा खे तेसरी एड़ी शक्ल लगी कि आसे तेसखे पसन्द करदे।2 लोक तेसखे बेकार जाणो थे ओर माणूंआ रा त्यागेया रा था; से दु:खी मर्द था, तेसरी जाण-पछयाण बमारिया ते थी ओर लोक तेसखे देखदे ई आपणा मूँ फेरी लओ थे। से तुच्छ जाणेया गया ओर आसे तेसरी एहमियत नि जाणी।3 तिने पक्का म्हारिया बमारिया सई लिया ओर म्हारे ई दु:ख चकी ले; तेबे बी आसे से परमेशरो रा मारेया-कूटेया रा ओर बुरी दशा रे पड़ेया रा समजेया।4 पर से म्हारे ई पापो रिया बजा ते कायल कित्तेया, से म्हारे पापो रे कामो रिया बजा ते दबाया; म्हारी ई शान्तिया रिया खातर तेस पाँदे ताड़ना पड़ी, ताकि तेसरे कोड़े खाणे ते आसे ठीक ऊई जाऊँ।5 आसे तो सारे के सारे पेडा जेड़े राची गे थे; आसा बीचा ते हर एक आपणी-आपणी बाटा दे चली रा था।6 ओर यहोवे आसा सबी रे पापा रा बोज आपणे दासो पाँदे लादी ता।7 तेसखे दु:ख देंदे रये, तेबे बी से सयीन करदा रया ओर आपणा मूँ नि खोलेया; जिंयाँ पेड फाटणे रे बखते ओर ऊन कतरने रे बखते चुपचाप शान्त रओई, तिंयाँ ई से बी आपणा मूँ खोले बिना चुपचाप रया।8 अत्याचार करी की ओर दोष लगाई की सेयो तेसखे लईगे; तेस बखतो रे लोका बीचा ते किने बी एते पाँदे त्यान नि दित्तेया कि से जिऊँदेया बीचा ते चकी ता? मेरे ई लोका रे पापो रिया बजा ते तेस पाँदे मौता री सजा पड़ी।9 तेसरी कब्र बी दुष्टा साथे ठराई ओर मौता रे बखते से अमीरा रा साथी ऊआ, तेबे बी तिने कोई बी उपद्रव नि कित्तेया था ओर तेसरे मुंए ते कदी बी छल-कपटो री गल्ल नि निकल़ी थी।10 तेबे बी यहोवे खे ये ई अच्छा लगेया कि तेसखे केसो; तिने ई से बमार करी ता; जेबे से आपणा प्राण दोषबलि करो,11 तेबे से आपणा कुल देखी सकोआ, से बऊत दिना तक जिऊँदा रणा, तेसरे आथे यहोवे री इच्छा पूरी ऊणी। दासे दु:ख सईन कित्तेया ए, तेस जिंदगिया रा प्रयासा देखणा ओर खुश ऊणा, ओर तेसखे तसल्ली मिलणी; आपणे ज्ञानो रे जरीये मेरे तर्मी दासो बऊत सारे तर्मी ठराणे ओर तिना रे बुरे कामो रा बोज आपू चकी लणा।12 इजी बजा ते मां तेसखे महान लोका साथे इस्सा देणा ओर तेस तागतबरा साथे लूट बाँडणी; कऊँकि तिने आपणे प्राण मौता रे तोरे करीते, से अपराधिया साथे गिणेया गया, तेबे बी तिने बऊता रे पापो रा बोज चकी ला ओर अपराधिया रिया तँईं प्रार्थना करोआ।”13
Source notes (13)
- Footnote यूह. 12:38, रोम. 10:16
- Footnote मत्ती 2:23, मर. 9:12
- Footnote मत्ती. 9:12
- Footnote मत्ती 8:17, 1 पत. 2:24
- Footnote रोम. 4:25, 1 पत. 2:24
- Footnote पुराणे नियमो दे पेडा रा पटकणा परमेशरो रे बिधानो रा ना मानणे वाल़े लोका खे एक सादारण बात ए, पजन. 119:176, यिर्मयाह 50:6
- Footnote प्रेरि. 10:43, 1 पत. 2:25
- Footnote यूह. 1:29, मत्ती 27:12,14, मर. 15:4,5, 1 कुरि. 5:7, प्रका. 5:6,12
- Footnote प्रेरि. 8:32,33
- Footnote 1 कुरि. 15:3, 1 पत. 2:22, 1 यूह. 3:5, यूह. 19:38-42
- Footnote लेवी. 5:15-19
- Footnote रोम. 5:19
- Footnote मत्ती 27:38, मर. 15:27, लूक. 22:37, इब्रा. 9:28
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.