यशायाह 28

एप्रैम ओर यरूशलेम शईरो पाँदे हाय

1कमण्डो रे मुकुटो पाँदे लाणत ए!1 जो एप्रैमो रे नशेड़िये राए2 ओर तिना री पड़काणे वाल़ी सुन्दरता पाँदे जो मुरझाणे वाल़ा फूल ए, जो बऊत उपजाऊ तराईया रे सिरे पाँदे शराबो साथे नशेड़िया री ए। 2देखो, मेरे प्रभुए गे एक तागतबर ओर सामर्थी माणूं ए,3 जो ओल़ेया री बर्खा या उजाड़ने वाल़े तूफान बाढ़ा री प्रचण्ड नदिया जेड़ा ए, तेस तागतबर ऊई की तरती जमीना पाँदे रूड़ाई देणी। 3एप्रैमो रे नशेड़िया लोका रा कमण्डो रा मुकुट4 पैरा साथे केसेया जाणा। 4ओर तिना री पड़काणे वाल़ी सुन्दरता रा मुरझाणे वाल़ा फूल जो बऊत उपजाऊ तराईया रे सिरे पाँदे ए, से गर्मिया ते पईले पाक्के रे दाऊगल़े जेड़ा ऊणा, जेतेखे देखणे वाल़ा देखदे ई आथो दे लओ ओर खाई जाओ। 5तेस बखते सेना रा यहोवा आपू आपणी प्रजा रे बचे रे लोका खे सुन्दर ओर प्रतापी मुकुट ठईरना। 6ओर जो न्याय करने खे बैठोए तिना रिया तँईं न्याय करने वाल़ी आत्मा ओर जो अमला करदे ऊए दुश्मणा खे शईरो रे बड़े द्वारो ते टायी देओए, तिना खे से तागत ठईरनी। 7ये पुरोईत ओर नबी बी शराबो रिया बजा ते रूड़ोए ओर शराबो रिया बजा ते लड़खड़ाओए। पुरोईत ओर नबी बी शराबो रिया बजा ते लड़खड़ाओए, शराबे सेयो पुलाई ते रे, सेयो शराबो रिया बजा ते लड़खड़ाओए ओर दर्शण पाँदे ऊए पटकी जाओए ओर न्याय करदे ऊए पूली जाओए। 8कऊँकि सारी खाणा खाणे री जगा उल्टी ओर कूड़े साथे परी रिये, कोई शुद्ध जगा नि बची। 9सेयो मांते शकाईत करोए ओर पूछोए, “तेस केसखे ज्ञान सिखाणा ओर केसखे आपणे सन्देशो रा मतलब समजयाणा? क्या तिना खे जो दूद छुड़ाए दे बच्चे ओर दुदुआ साथे बिना लगाए दे बच्चे ए। 10कऊँकि आज्ञा पाँदे आज्ञा, आज्ञा पाँदे आज्ञा, नियमो पाँदे नियम, नियमो पाँदे नियम, थोड़ा एती, थोड़ा तेती।” 11फेर एबे यहोवे खे आपणे लोका ते परदेशी जो दु:ख देओ ए तिना रे जरीये गल्ल करनी पड़नी, जो एक लग ई पाषा बोलोए। 12यहोवे पईले तिना लोका ते बोलेया था, “राम एसते ई मिलणा, एसरे जरीये ई थके रेया खे राम देयो”, पर लोके परमेशरो री सुणनी नि चाई। 13इजी री खातर परमेशरो रा वचन तिना गे आज्ञा पाँदे आज्ञा, आज्ञा पाँदे आज्ञा, नियमो पाँदे नियम, नियमो पाँदे नियम, थोड़ा एती, थोड़ा तेती, जेते कि सेयो ठोकर खाई की बेओश ऊई की रूड़ो ओर कायल ऊई जाओ ओर फन्दे दे फसी की पकड़े जाओ।

सिय्योन देशो दे निऊँ

14ओ, यरूशलेम शईरो रे आज्ञा ना मानणे वाल़े कमण्डी परदानो, यहोवे रा वचन सुणो! 15तुसे लोक बोलोए, “आसे मौता साथे वाचा बानी ओर अधलोको ते प्रतिज्ञा कराई राखी, इजी बजा ते मुसीबत जेबे बाढ़ा जेड़ी बढ़ी की आओगी, तेबे आसा गे नि आऊणी, कऊँकि आसे चूठो री शरण लई ओर चूठो पीछे लूके रे रये।” 16इजी री खातर परमेशर यहोवा ईंयाँ बोलोआ, “देखो, मैं सिय्योनो रे पाह्ड़ो पाँदे निऊँआ रा पात्थर राखी राखेया,5 एक परखेया रा पात्थर, कूणे रा कीमती ओर बऊत मजबूत निऊँआ जोगा पात्थर ओर जो कोई परोसा राखोगा, तेस जल्दबाजी नि करनी।6 17ओर मां न्याय डोरी ओर तर्म साल़ ठराणा ओर तुसा रे चूठो री जगा ओल़ेया साथे बह्यी जाणी ओर तुसा रे लूकणे री जगा पाणिए दे डूबी जाणी।” 18तेबे जो वाचा तुसे मौता साथे बानी राखी, से टूटी जाणी ओर जो प्रतिज्ञा तुसे अधलोको ते कराई से नि ठईरनी, जेबे मुसीबत बाढ़ा जेड़ी बढ़ी जाओगी, तेबे तुसे तिदे डूबी जाणे। 19जेबे-जेबे से बाढ़ बढ़ी जाओगी, तेबे-तेबे तेसा तुसे लई जाणे, से रोज बल्कि दिन-रात बढ़ेया करनी ओर एस सन्देशो रा सुणना ई बेचैन ऊणे रिया बजा ते ऊणा। 20कऊँकि बछौणा खुटिया फैलाणे खे छोटा ओर टखण टखणे खे कम ए। 21कऊँकि यहोवा एड़ा उठ खड़ा ऊणा जेड़ा से पराजीम नाओं रे पाह्ड़ो पाँदे खड़ा ऊआ ओर जेड़ा गिबोनो री तराईया दे रोषे ऊआ था,7 तेस एबे फेर रोष दखाणा, जेते कि से आपणा काम करो, जो अचम्बे रे काम ए ओर एड़े काम करने जो नऊखे ए।8 22इजी री खातर एबे तुसे मजाक नि करो, नई तो तुसा रे बान गूड़े जाणे, कऊँकि मैं सेना रे यहोवे ते ये सुणी राखेया कि तेस सारे देशो रा सत्यानाश करना।

परमेशरो रा ज्ञान

23जो सन्देश आऊँ तुसा खे सुनाणे लगी रा, तेसखे त्यान लगाई की सुणो। 24क्या अल़ बाणे वाल़ा बेजा बाणे खे लगातार बांदा रओआ? क्या से सदा तरतिया खे चीरदा रओआ ओर मैड़ा फेरदा रओआ? 25एड़ा नि आ, एक जिम्मीदार डोरूए खे पईले सीदा करी की तिदे संफ सेटोआ, जीरा बाओआ ओर कणका खे सरेद-सरेद करी की फल्याओआ ओर जौ बी लग जगा दे लगाओआ। ओर कई प्रकारा रा कणका रा बीज डोरूआ रे कनारे पाँदे बाओआ। 26कऊँकि तेसरा परमेशर तेसखे ठीक-ठीक काम करना सिखाओआ ओर बताओआ। 27दाणा काडणे वाल़ी मशीना दे संफ काडी नि जांदी ओर गडिया रा टईर जीरे पाँदे नि चलाया जांदा, पर संफ डण्डे साथे ओर जीरा सोठे साथे चाड़ेया जाओआ। 28रोटिया रा नज्ज मशीना दे काडेया जाओआ, पर कोई तिजी खे सदा काडदा नि रंदा ओर ना ई कोई गडिया रे टईर या कोड़े तिजी पाँदे चलांदा, से तिजी रा चूरा नि करदा। 29ये बी सेना रे यहोवे रिया तरफा ते नियुक्त ऊई रा, से अद्भुत योजना वाल़ा ओर बड़ा समजदार ए।