Baghlayani Bible
उत्पत्ति 7
जाह्जो रे जाणा
फेर यहोवे नूओ खे बोलेया, “तूँ आपणे सारे कराने समेत जाह्जो रे चली जा, कऊँकि मैं एते जुगो रे लोका बीचे बस तूँई आपणी नजरा रे तर्मी देखेया। सबी जातिया रे शुद्ध डांगरा बीचा ते तैं सात-सात जोड़े, मतलब नर ओर मादा लणे। पर जो डांगर शुद्ध निए, तिना बीचा ते नर ओर मादा रा एक-एक जोड़ा लणा। ओर सर्गो रे पंछिया बीचा ते बी नर ओर मादा रे सात-सात जोड़े लणे ताकि तिना रा वंश बची की सारी तरतिया पाँदे बणेया रा रओ। एबे साता दिना बाद मां तरतिया पाँदे 40 दिन ओर 40 राती तक लगातार एड़ी बरखा करनी कि जितणी चीजा मैं बणाई राखिया, सेयो सारी तरतिया पाँदा ते खत्म करी देणियां।” यहोवे री एसा आज्ञा रे मुताबिक नूहे कित्तेया। नूह री उम्र 600 साला री थी, जेबे पाणिए रा प्रलय तरतिया पाँदे आया। नूह आपणे पाऊ, लाड़ी ओर बऊआ समेत, जल-प्रलय ते बचणे रिया तँईं जाह्जो दे चलीगा। शुद्ध ओर अशुद्ध दुँईं किस्मा रे डांगरा रे जोड़ेया बीचा ते, पंछी ओर तरतिया पाँदे लूरने वाल़ेया हर जन्तुआ बीचा ते बी, दो-दो मतलब नर ओर मादा, जाह्जो रे नूओ गे गये, जिंयाँ परमेशरे नूओ खे आज्ञा दित्ती थी, ओर एड़ा ऊआ कि 7 दिना ते बाद प्रलया रा पाणी तरतिया पाँदे आऊणे लगेया।
जल-प्रलय
जेबे नूओ री उम्रा रे 600 सालो रे दूजे मीन्ने रा 17 वा दिन आया, तेबे तेस दिने तरतिया ते सूबल़ा फटी की निकल़ने लगिया ओर सर्गो रे चरोखे खुली गे। ईंयाँ बर्खा 40 दिन ओर 40 राती लगातार तरतिया पाँदे ऊँदी रई। जेस दिने बरखा ऊणे लगी तेसी दिने नूह आपणे पाऊ शेम, हाम ओर येपेत ओर आपणी लाड़ी ओर तिंऊँ बऊआ समेत जाह्जो रे गया, तिना साथे सबी जातिया रे बणो रे डांगर, सबी जातिया रे करेलू डांगर, सबी जातिया रे सारे तरतिया पाँदे लूरने वाल़े प्राणी ओर सबी जातिया रे सारे उडणे वाल़े पंछी जाह्जो रे गये। हर किस्मा रे जितणे प्राणी जिऊँदे थे, तिना री सारिया जातिया बीचा ते, दो-दो नूओ गे जाह्जो रे गये। ओर सबी जातिया रे प्राणिया बीचा ते नर ओर मादा परमेशरो री आज्ञा रे मुताबिक नूओ गे पीतरे गये। फेर यहोवे तेते जाह्जो रा दुराजा बंद करी ता। 40 दिना तक तरतिया पाँदे जलजला ऊँदा रया ओर पाणी बऊत ई जादा बढ़दा गया, जेते कि जाह्ज तरतिया पाँदा ते ऊबे उठणे लगेया। पाणी बढ़दे-बढ़दे तरतिया पाँदे बऊत ई जादा बढ़ी गा ओर जाह्ज पाणिए पाँदे-पाँदे तैरदा रया। पाणी तरतिया पाँदे बऊत ई जादा बढ़ी गा, एथो तक कि तरतिया पाँदे बड़े ते बड़े पाह्ड़ बी डूबी गे। एथो तक कि पाणी पाह्ड़ा पाँदे पंद्रा आथ ओर ऊबे बढ़ी गा। ओर सारी तरतिया रे सारे लूरने वाल़े प्राणी, पंछी, करेलू डांगर, बणो रे सारे डांगर ओर सारे माणूं मरीगे। जो-जो तरतिया पाँदे जिऊँदे थे। सब डूबी की मरी गे। ईंयाँ परमेशरे तरतिया पाँदे रणे वाल़े हर एक जिऊँदे माणूं, पशु, लूरने वाल़े जन्तु ओर सर्गो रे पंछी मिटाईते ओर सेयो सब तरतिया पाँदा ते मिटीगे। बस नूह ओर जितणे तेस साथे जाह्जो रे थे, सेयो ई बचे थे। ओर पाणी तरतिया पाँदे 150 दिना तक रया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.