Baghlayani Bible
उत्पत्ति 16
हाजिरा ओर इश्माएल
एबे सारै जो अब्रामो री लाड़ी थी तेसा रे कोई ल्वाद नि थी। पर तेसा गे हाजिरा नाओं री मिस्र प्रदेशो री एक दासी थी।1 एकी दिने सारै अब्रामो खे बोलेया, “देख, यहोवे तो आऊँ बच्चे ऊणे ते रोकी राखी, इजी री खातर आऊँ तांते बिनती करूँई कि तूँ मेरिया दासिया खे आपू खे लई लओ। ऊई सकोआ कि तेसा रे जरीये मेरे बच्चे ऊई जाओ।” अब्रामे सारै री ये गल्ल मानी ली। जेबे अब्रामो खे कनान प्रदेशो दे रंदे ऊए दस साल बीती चुके थे, तेबे तेसरी लाड़ी सारै आपणी मिस्री दासी हाजिरा लई की आपणे लाड़े अब्रामो खे देईती कि से तेसरी लाड़ी बणी जाओ। अब्राम हाजिरा साथे रया ओर से गर्भवती ऊईगी। जेबे तेसा खे पता लगेया कि से गर्भवती ए, तेबे से आपणी मालकणिया खे तुच्छ नजरा ते देखणे लगी।
तेबे सारै अब्रामो खे बोलेया, “एबे जो दु:ख आँऊ सईणे लगी री इजी रा जिम्मेबार तूँई ए। मैं तो आपणी दासी तेरी लाड़ी बणाई, पर जेबे तेसा खे पता लगेया कि से गर्भवती ए, तेबे से माखे तुच्छ समजणे लगी, इजी री खातर यहोवा मां ओर तां बीचे न्याय करो।”
अब्रामे सारै खे बोलेया, “तेरी दासी तेरे वशो दे ए, जो ताखे खरा लगोआ तेड़ा ई तेसा साथे कर।” तेबे सारै तेसा खे इतणा दुख देणे लगी कि से तेसा रे सामणे ते नठी गी।
तेबे यहोवे रे दूते तेसा खे सुनसाण जगा दे शूरो रिया बाटा दे एक पाणिए रिया सूबल़ा रे नेड़े मिली की बोलेया, “ओ सारै री दासी हाजिरा, तूँ केथा ते आई ओर केथो खे जाणे लगी री?” तेसे बोलेया, “आँऊ आपणी मालकण सारै रे सामणे ते नठी की आई री।”
यहोवे रे दूते तेसा खे बोलेया, “तूँ आपणी मालकणिया गे वापस चली जा ओर तेसा रे वशो रे रओ।” ओर यहोवे रे दूते तेसा खे ये बी बोलेया, “मां तेरा वंश इतणा जादा बढ़ाणा कि तिजी री गिणती नि ऊई सकदी।” ओर यहोवे रे दूते तेसा खे बोलेया, “देख, तूँ गर्भवती ए ओर तेरे पाऊ जमणा ओर तैं तेसरा नाओं इश्माएल2 राखणा; कऊँकि यहोवे तेरे दु:खो रा रोणा सुणी ला रा। तेरा पाऊ बणो रे गह्दे जेड़ा ऊणा, तेसरा आथ सबी रे खलाफ उठणा ओर सबी रे आथ तेसरे खलाफ उठणे ओर से आपणे सारे रिश्तेदारा बीचे दुश्मणिया साथे बसेया रा रणा।”
तेबे तिने यहोवे जिने तेसा साथे गल्ला कित्तिया थिया तेसरा नाओं अताएलरोई3 बोलेया, से आपणे आपू दे बोलणे लगी, “क्या मैं सच्चो खेई परमेशर देखेया ओर तेसखे देखणे ते बाद बी जिऊँदी रई?” इजी बजअ ते तेस कुएँ रा नाओं लहैरोई, कुआँ पड़ेया; ये कुआँ कादेश शईर ओर बेरेद प्रदेशो बीचे आ। हाजिरा रे अब्रामो रे जरीये एक पाऊ ऊआ ओर जेस पाऊए खे हाजिरे जन्म दित्तेया अब्रामे आपणे तेस पाऊए रा नाओं इश्माएल राखेया। जेबे हाजिरे अब्रामो रे जरीये इश्माएलो खे जन्म दित्तेया, तेस बखते अब्राम 86 साला रा था।
Source notes (3)
- Footnote गलाति 4:22
- Footnote इश्माएल इश्माएलो रा मतलब ए परमेशर सुणोआ
- Footnote अताएलरोई अताएलरोई रा मतलब ए तूँ से परमेशर आ जो माखे देखोआ।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.