Baghlayani Bible
उत्पत्ति 10
नूओ रे खानदानो री सूची
नूओ रे पाऊ शेम, हाम ओर येपेत थे, तिना रे पाऊ जो जलप्रलय ते बाद पैदा ऊए, तिना रा खानदान ये ए।
येपेतो रे खानदानो री सूची
येपेतो रे पाऊ: गोमेर, मागोग, मादै, यावान, तूबल, मेशेक ओर तीरास ऊए। ओर गोमेरो रे पाऊ: अश्कनज, रीपत ओर तोगर्मा ऊए। ओर यावानो रे वंशो रे एलीशा ओर तर्शीश ओर कित्ती ओर दोदानी लोक ऊए। इना रे वंश दूजिया जातिया रे द्धीपो रे प्रदेशो रे एड़े बंटी गे कि सेयो लग-लग पाषा, कुल ओर जातिया रे मुताबिक लग-लग ऊईगे।
हामो रे खानदानो री सूची
फेर हामो रे पाऊ: कूश, मिस्र, पूत ओर कनान ऊए। ओर कूशो रे पाऊ: सबा, हवीला, सबता, रामाह, ओर सब्तका ऊए ओर रामाह रे पाऊ शेबा ओर ददान ऊए। कूशो रे वंशो रे निम्रोद ऊआ, जो तरतिया पाँदे पईला वीर ऊआ। सेई यहोवे री नजरा रे पराक्रमी शिकार खेलणे वाल़ा ठईरेया। इजी ते ये कहावत चली री; कि निम्रोदो जेड़ा यहोवे री नजरा रे पराक्रमी शिकार खेलणे वाल़ा। ओर तेसरे राज्य री शुरूआत शिनार प्रदेशो रे बाबेल, एरेख, अक्कद ओर कलने ते ऊई। से शिनार प्रदेशो ते निकल़ी की अश्शूर प्रदेशो खे गया ओर तेती नीनवे, रहोबोतीर ओर कालहो खे, ओर नीनवे ओर कालहो रे बीचे जो रेसेन ए, से बी बसाया। जो एक बड़ा शईर ए। मिस्रो रे वंशो रे लूदी, अनामी, लहाबी, नप्तूही, ओर पत्रूसी, कसलूही ओर कप्तोरी लोक ऊए। कसलूहिया बीचा ते पलिश्ती लोक निकल़े। कनानो रा जेठा पाऊ सिदोन, तेसते बाद हित्त, यबूसी, एमोरी, गिर्गाशी, हिब्बी, अर्की, सीनी, अर्वदी, समारी ओर हमाती लोक बी ऊए। ईंयाँ ये सब कनानिया री ल्वाद सबी देशा रे फैली गी। ओर कनानिया रा बन्ना सिदोन शईरो ते लई की गरार प्रदेशो रिया बाटा ते ऊई की गाजा प्रदेशो तक ओर तेबे सदोम ओर गमोरा ओर अदमा ओर सबोयीमो नाओं रे शईरो रिया बाटा ते ऊई की लाशा प्रदेशो तक ऊआ। हामो रे वंश आपणे-आपणे कुल, पाषा, देश ओर जातिया रे मुताबिक लग-लग ऊईगे।
शेमो रे खानदानो री सूची
शेम, जो येपेतो रा जेठा पाई था से सारे एबेर कराने रा मूल़ मर्द ऊआ, तेसरे बी पाऊ पैदा ऊए। शेमो रे पाऊ: एलाम, अश्शूर, अर्पक्षद, लूद ओर अराम ऊए। अरामो रे पाऊ: ऊस, हूल, गेतेर ओर मश ऊए। ओर अर्पक्षदे शेलहो खे ओर शेलहे एबेरो खे जन्म दित्तेया। ओर एबेरो रे दो पाऊ पैदा ऊए, एकी रा नाओं पेलेग इजी बजअ ते राखेया कि तेसरे दिना रे तरतिया रा बटवारा ऊईगा ओर तेसरे पाईए रा नाओं योक्तान था। ओर योक्ताने अल्मोदाद, शेलेप, हसर्मावेत, येरह, हदोराम, ऊजाल, दिक्ला, ओबाल, अबीमाएल, शेबा, ओपीर, हवीला ओर योबाबो खे जन्म दित्तेया। येई सारे योक्तानो रे पाऊ ऊए। इना रे रणे री जगा मेशा प्रदेशो ते लई की सपारा प्रदेशो तक, जेते री पूर्वो रे एक पाह्ड़ी देश ए, तिजी री बाटा तक ऊई। आखरी रे शेमो रे आपणे-आपणे कुल, पाषा, देश ओर जातिया रे मुताबिक लग-लग ऊए रे पाऊ येईए। आखरी रे नूओ रे पाऊआ रे कुल़ येई ऊए ओर तीना रिया जातिया रे मुताबिक तिना रा खानदान येईए; ओर जलप्रलय ते बाद सब जातिया इना बीचा तेई पुरिया तरतिया पाँदे फैली गिया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.