Baghlayani Bible
निर्गमन 36
तेबे मूसे बोलेया, “बसलेल, ओहोलीआब ओर सबी किस्मा री कारीगरी जाणने वाल़े जिना खे यहोवे एड़ी योग्यता ओर समज देई राखी ओ कि सेयो यहोवे री सारी आज्ञा रे मुताबिक पवित्र जगा री सेवकाईया रे सब प्रकारा रा काम करना जाणो कि से सब काम किंयाँ करना।”
इस्राएली लोका रा जरूरती ते जादा पेंट देणा
तेबे मूसे बसलेल, ओहोलीआब ओर सबी किस्मा री कारीगरी जाणने वाल़े, जिना खे यहोवे एड़ी कारीगरी ओर समज देई राखी जो आयी की काम करना चाओ थे सेयो सारे बुलाए।
फेर तिने लोके मूसे रे आथो ते सेयो सब चीजा लईया जिना खे इस्राएली लोक पवित्र जगा री सेवकाईया रे काम ओर तिजी खे बनाणे खे पेंट ली आए थे। हर रोज प्यागा सब लोक मूसे गे आपणी इच्छा ते पेंट ल्यायो थे। ओर पवित्र जगा रे काम करने वाल़े सब कारीगरी लोक आपणा-आपणा काम छाडी की मूसे गे आये ओर मूसे खे बोलणे लगे, “यहोवे री आज्ञा रे मुताबिक एस कामो खे करने खे जितणा समान चाईयो तिजी ते जादा सेयो लोक ल्याऊणे लगी रे।” तेबे मूसे तिना रे सारे डेरे रे ये आज्ञा देई की गल्ल पऊँचाई कि हर कोई मर्द या जवाणस पवित्र जगा खे ओर पेंट नि ल्याओ। ईंयाँ लोक ओर पेंट ल्याऊणे ते रोकी ते। कऊँकि सारे कामो खे जितणा समान जरूरी था तिथणा बल्कि तिजी ते जादा बनाणे वाल़ेया गे आयी चुकेया था।
रणे री जगा खे बनाणा
ओर काम करने वाल़े जितणे कारीगर अक्लमंद थे तिने मिलणे वाल़े तम्बूए खे दस पड़दे बणाए ओर तिना पाँदे लीलणो रे टाल्ले ओर नीले, बैंगणी ओर लाल रंगो रे तागेया ते कढ़ाई करी की करूब बणाए। एकी-एकी पड़दे री लम्बाई 28 आथ ओर चौड़ाई चऊँ आथा री ऊई, सारे पड़दे एक जेड़े नापो रे बणी रे थे। तिने पाँज पड़दे एकी-दूजे साथे जोड़ी ते ओर फेर दूजे पाँज पड़दे बी एकी-दूजे साथे जोड़ी ते। ओर पईले जोड़े रे पाँज पड़देया रे दुँईं कूणेया पाँदे बसलेले नीले-नीले छल्ले लगाए। तिंयाँ ई दूजे जोड़े रे पाँज पड़देया रे दुँईं कूणेया पाँदे बी तिने नीले-नीले छल्ले लगाए। तिने पईले जुड़े रे दुँईं कूणेया पाँदे एक जेड़े आमणे-सामणे 50-50 ऊक लगवाए। फेर तिने सूईने रे 50 कड़े बणाए ओर तिना रे जरीये दूई कनारले पड़दे एकी-दूजे साथे एड़े जोड़े कि मिलणे वाल़ा तम्बू मिली की एक ऊईगा।
फेर तिने मिलणे वाल़े तम्बूए खे पाँदा ते टकणे खे बाकरिया रे बाल़ो रे ग्यारा पड़दे बणाए। तिना एकी-एकी पड़दे री लम्बाई 30 आथ ओर चौड़ाई चऊँ आथो री थी, सेयो ग्यारा पड़दे एक जेड़े नापो रे थे। फेर तिने इना बीचा ते पाँज पड़दे लग ओर छे पड़दे लग जोड़ी ते। फेर तिने पईले जुड़े रे पड़दे रे कूणे पाँदे 50 ऊक लगाए ओर ईंयाँ ई दूजे जुड़े रे पड़दे रे कूणे पाँदे बी 50 ऊक एड़े लगाए ओर तिजी ते बाद तिने तम्बूए खे जोड़ने खे पीतल़ी रे 50 कड़े बी बणाए जेते साथे से एक ऊई जाओ। फेर तिने तम्बूए खे लाल रंगो रे रंगी रिया खाडूआ रिया खाला रा एक टखण ओर तिजी पाँदो खे बाकरेया री खाला रा बी एक टकणा बणाया। तेबे तिने मिलणे वाल़े तम्बूए खे खड़े करने खे बबूलो री लकड़िया रे तख़्ते बणाए। एक-एक तख़्ते री लम्बाई दस आथ ओर चौड़ाई डेढ़ आथो री ऊई। तिना तख़्तेया खे एकी-दूजे साथे जोड़ने खे दो-दो चूल़ा बणाईया, मिलणे वाल़े तम्बूए रे सारे तख़्ते तिने ईंयाँ ई बणाए। फेर तिने मिलणे वाल़े तम्बूए रे तख़्ते ईंयाँ बणाए कि दक्खणा रिया तरफा खे 20 तख़्ते लगे। ओर इना 20 तख़्तेया निठे चाँदिए रे 40 पावे, मतलब एक-एक तख़्ते निठे तिना रे चूल़ेया खे दो-दो पावे लगाए। ओर मिलणे वाल़े तम्बूए री दूजी तरफा खे, मतलब उत्तरो रिया तरफा खे बी तिने 20 तख़्ते बणाए। ओर इना खे बी तिने चाँदिए रे 40 पावे, मतलब एक-एक तख़्ते निठे दो-दो पावे लगाए। ओर मिलणे वाल़े तम्बूए री पिछली तरफा खे, मतलब पश्चिमो रिया तरफा खे तिने छे तख़्ते बणाए। ओर मिलणे वाल़े तम्बूए रे पिछले इस्से रे कूणेया खे तिने दो तख़्ते बणाए। इना दुँईं कूणेया खे बणाए रे दुँईं तख़्तेया रा नाप थाला ते पाँदले सिरे तक एक बराबर था ओर एकी कड़े रे लगाए, तिने दुँईं तख़्तेया रा आकार एड़ा ई बणाया। ईंयाँ 8 तख़्ते ऊए ओर तिना रे चाँदिए रे 16 पावे ऊए, मतलब एक-एक तख़्ते निठे दो-दो पावे ऊए। तेबे तिने बबूलो रिया लकड़िया रिया कड़िया बणाईया, मतलब मिलणे वाल़े तम्बूए री एक तरफा रे तख़्तेया खे पाँज कड़िया ओर मिलणे वाल़े तम्बूए री दूजी तरफा रे तख़्तेया खे पाँज कड़िया ओर मिलणे वाल़े तम्बूए रे पश्चिमा रिया तरफा खे पिछले इस्से खे बी पाँज कड़िया बणाईया। ओर बसलेले बीचली कात तख़्तेया रे बीचो-बिछिए एड़ी बणायी कि से तम्बूए रे एक सिरे ते दूजे सिरे तक पऊँची गी। ओर तिने तख़्ते सूईने साथे मढ़े ओर डण्डेया रे कड़े बी सूईने रे बणाए ओर डण्डे बी सूईने साथे मढ़े। फेर तिने लीलणो रे अच्छे टाल्लेया साथे नीले, बैंगणी ओर लाल रंगो रे टाल्लेया ते बीचला पर्दा बणाया, तिने तिजी पाँदे कढ़ाई करी की करूब बणाए। ओर तिने तिजी खे बबूलो री लकड़िया रे चार खम्बे बणाए ओर सेयो सूईने साथे मढ़े ओर तिना रे कड़े सूईने रे बणाए ओर तिने तिजी खे चाँदिए रे चार पावे बणाए। तिने तम्बूए रे द्धारो खे लीलणो रे टाल्लेया रा नीले, बैंगणी ओर लाल रंगो रे तागेया ते बेल-बूटे री कढ़ाई कित्ते रा पर्दा बणाया। ओर तिने कड़ेया समेत तिजी रे पाँज खम्बे बी बणाए ओर खम्बेया रे सिरे ओर तिना खे जोड़ने खे बी सूईने री पट्टी बणाई ओर तिना रे पाँज पावे पीतल़ी रे बणाए।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.