Baghlayani Bible
निर्गमन 29
पुरोईतो रे पदो खे अभिषेक
तूँ हारूण ओर तेसरे पाऊआ खे पवित्र करने खे ये काम करना जेते कि सेयो मेरिया तँईं पुरोईतो रा काम करो; से ये ए कि तैं एक बिना नुक्शो रा बाच्छू ओर दो बिना नुक्शो रे खाडू लणे, कणका रे मैदे ते बणी री बिना सजेड़े रिया रोटिया, जैतूनो रे तेलो साथे गूने रे मैदे रे बिना सजेड़े रे फुलके ओर जैतूनो रे तेलो साथे चोपड़ी री बिना सजेड़े रिया पापड़िया बी लणियां। इना खे एक टोकरिया रे राखी की तेसा टोकरिया खे तेस बाच्छूए ओर तिना दुँईं खाडूआ समेत मां नेड़े ल्याऊणा।
फेर हारूण ओर तेसरे पाऊ मिलणे वाल़े तम्बूए रे द्धारो रे नेड़े आयी की पाणिए साथे नुल़ाणे। तेबे सेयो टाल्ले लई की हारूणो खे चोगा पन्याणा ओर एपोदो साथे पईनी जाणे वाल़ी पगड़ी, एपोदो ओर छातिया पाँदे पईनणे वाल़ी झिलम बानणी ओर एपोदो रा कढ़ाई कित्तेया रा पटका बी बानणा; तेसरे सिरो पाँदे पगड़ी राखणी ओर पगड़िया पाँदे सूईने रा पवित्र मुकुट राखणा। फेर अभिषेको रा तेल लई की तेसरे सिरो पाँदे पाई की तेसरा अभिषेक करना।
फेर तेसरे पाऊ नेड़े ल्याई की तिना खे चोगे पन्याणे हारूण ओर तेसरे पाऊआ रे लक पटके की बानणे ओर तिना रे सिरो पाँदे टोपिया राखणियां; जेते की पुरोईतो रे पद तिना खे सदा री रवाज ठईरो। ईंयाँ तैं हारूण ओर तेसरे पाऊआ रा पुरोईतो रे पदो रिया तँईं अभिषेक करना।
तेबे बाच्छू मिलणे वाल़े तम्बूए रे नेड़े ली आऊणा। हारूण ओर तेसरे पाऊ बाच्छूए रे सिरो पाँदे आपणे आथ राखो। तेबे तेस बाच्छूए खे यहोवे रे सामणे मिलणे वाल़े तम्बूए रे द्धारो पाँदे बलिदान करना, फेर तेस बाच्छूए रे खूनो बीचा ते कुछ लई की आपणी गूठिया साथे बेदिया रे सींगो पाँदे लगाणा ओर बाकि सारा खून बेदिया रे पावेया पाँदे लटी देणा। तूँ तेते चर्बिया खे जेते की आंतड़िया टकी रिया रओईया ओर जो झिल्ली कल़ेजे पाँदे ओई ओर चर्बिया समेत दोनो गुर्दे लई की सब बेदिया पाँदे फूकणे।
पर बाच्छूए रा मांस, खाल ओर गोबर लोका रे डेरे री जगा ते बारे आगी रे फूकी देणे, कऊँकि ये पापबलि ऊणा।
तेबे एक खाडू लणा ओर हारूण ओर तेसरे पाऊ तेस खाडूए रे सिरो पाँदे आपणे-आपणे आथ राखो, तेबे से खाडू बलि करना ओर तेसरा खून लई की बेदिया रे चऊँ कनारे छिड़कणा। से खाडू टुकड़े-टुकड़े करी की बाडणा ओर तेसरी आंतड़िया ओर खुर तोयी की तिना रे टुकड़े करी की तेसरे सिरो पाँदे राखणे। फेर से पूरा खाडू बेदिया पाँदे फूकणा; से तो यहोवे खे होमबलि ऊणी; से सुख देणे वाल़ा खुशबूदार ओर यहोवे खे अवन ऊणा।
तिजी ते बाद दूजा खाडू लणा फेर हारूण ओर तेसरे पाऊ तेसरे सिरो पाँदे आपणे-आपणे आथ राखो, तेबे से खाडू बलि करना ओर तेसरे खूनो बीचा ते थोड़ा जा लई की हारूण ओर तेसरे पाऊआ रे दाँणे कानो रे सिरे पाँदे, तिना रे दाँणे आथो रे गूठे रे ओर दाँणे पैरो रे गूठे रे लगाणा ओर बाकि खून बेदिया रे चऊँ कनारिये छिड़की देणा। तेबे बेदिया पाँदला खून ओर अभिषेको रा तेल, इना दुँईं बीचा ते थोड़ा-थोड़ा लई की हारूण ओर तेसरे टाल्लेया पाँदे ओर तेसरे पाऊ ओर तिना रे टाल्लेया पाँदे छिड़की देणा, तेबे हारूण ओर तेसरे पाऊ आपणे-आपणे टाल्लेया समेत पवित्र ऊई जाणे।
तेबे खाडूआ खे पुरोईतो रे संस्कारो रा समजी की तिजी बीचा ते चर्बी ओर मोटी पूँछ, ओर आंजा पाँदली सारी चर्बी जो कल़ेजे पाँदली झिल्लिया समेत दोनो गुर्देया पाँदे रओई ओर दाँणी खुटी, यो सब लई की लग राखणे।
यहोवे रे सामणे राखी री बिना सजेड़े रिया रोटिया री टोकरिया बीचा ते तेलो साथे गूँने रे मैदे रा एक फुलका ओर एक पापड़ी लई की, यो सब हारूण ओर तेसरे पाऊआ रे आथो रे राखी की ईलाई जाणे री पेंट ठराई की यहोवे रे सामणे ईलाई जाओ। तेबे से मास ओर रोटिया तिना रे आथो ते लई की होमबलिया री बेदिया पाँदे फूकी देणियां, जेते कि से यहोवे खे सुख देणे वाल़ी खुशबू ठईरो, ये तो यहोवे खे आगी रे चढ़ाई री बलि ऊणी। फेर हारूणो रे संस्कार करने रिया तँईं ठराया रा जो खाडू ऊणा तेसरी छाती लई की ईलाई जाणे री पेंट जेड़ी यहोवे रे सामणे इलाणी; फेर से तेरा पाअग ठईरना। ओर हारूण ओर तेसरे पाऊआ रे संस्कारो रे खाडूए री छाती ओर पाट जो ईलाई जाणे री पेंट ए, यो दोनो पवित्र ठराणे। ओर ये इस्राएलिया री तरफा ते हारूण ओर तेसरे पाऊआ रा सदा री बिदिया रा यहोवे रे सामणे चकणे वाल़ी पेंटा वाल़ा पाअग ठईरो, कऊँकि ये इस्राएलिया री तरफा ते तिना री मेलबलिया बीचा ते ऊणी।
हारूणो रे पवित्र टाल्ले तेसरी मौता ते बाद तेसरे माठेया, पोतेया बगैरा खे पुरोईतो रे पदो खे मिलदे रओ, ताकि तिना टाल्लेया खे पईनी की सेयो अभिषेक पाओ ओर पुरोईतो रे पदो खे ठराए जाओ। तेसरा पाऊ जो तेसरी जगा पाँदे पुरोईत ऊणा, से जेबे पवित्र जगा रे सेवा-टईल करने खे मिलणे वाल़े तम्बूए रे पईले आओ, तेबे तिना टाल्लेया खे साता दिना तक पईनी की राखो।
फेर पुरोईतो रे संस्कार करने रा जो खाडू ऊणा से लई की तेसरा मास केथी पवित्र जगा रे पकाणा। तेबे हारूण आपणे पाऊआ समेत तेस खाडूए रा मास ओर टोकरिया री रोटी, दुँईं खे मिलणे वाल़े तम्बूए रे द्धारो पाँदे खाओ।
जिना चीजा साथे तिना रा अभिषेक ओर तिना खे पवित्र करने खे प्राश्चित करेया जाणा तिना खे तो सेयो खाओ, पर पराये कुलो रा कोई बी तिना खे नि खाओ, कऊँकि सेयो पवित्र ऊणे। ओर जे संस्कारो वाल़े मासो बीचा ते ओर रोटिया बीचा ते कुछ प्यागा खे बची जाओ, तो से बचेया रा आगी रे फूकी देणा, से नि खाणा, कऊँकि से पवित्र ऊणा। मैं ताखे जो-जो आज्ञा देई राखिया, तिना सबी रे मुताबिक तैं हारूण ओर तेसरे पाऊआ साथे करना ओर सात दिन तक तिना रा अभिषेक करदे रणा, पापबलिया रा एक बाच्छू प्राश्चित करने खे हर रोज चढ़ाणा ओर बेदी बी प्राश्चित करने रे बखते शुद्ध करनी ओर तिजी खे पवित्र करने खे तिजी रा अभिषेक करना। साता दिना तक बेदिया खे प्राश्चित करी की से पवित्र करनी; तेबे बेदी परम पवित्र ठईरनी ओर जो कुछ तेसा साथे छवांणा से बी पवित्र ऊई जाणा।
जो ताखे बेदिया पाँदे हर रोज चढ़ाणा से ये ए; मतलब हर रोज एकी-एकी सालो रे दो पेडा रे मिन्टू। एक मिन्टू तो प्यागा रे बखते ओर दूजा मिन्टू साँजके बखते चढ़ाणा। एकी पेडा रे मिन्टूए साथे एक किलो मैदा, एक लीटर जैतूनो रा कूटी की निकयाल़े रा तेल ओर एक लीटर अंगूरा रा रस देणा। ओर दूजा पेडा रा मिन्टू साँजके बखते पेंट चढ़ाणा ओर तेस साथे प्यागा री रीतिया रे मुताबिक नज्जो री होमबलि ओर अर्घ दोनो देणे, जेते कि से सुखदायक खुशबू ओर यहोवे खे अवन ठईरो। तुसा री पीढ़िया ते पीढ़िया तक यहोवे रे सामणे मिलणे वाल़े तम्बूए रे द्धारो पाँदे हमेशा एड़ी ई होमबलि ओया करो, ये से जगा ए जिदे आऊँ तुसा लोका साथे मिलेया करूँगा ताकि तुसा लोका साथे गल्ला करुँ। तेती बी मां इस्राएलिया साथे तेथी मिलेया करना ओर से मिलणे वाल़ा तम्बू मेरे तेजो साथे पवित्र करेया जाणा।
ईंयाँ मां मिलणे वाल़ा तम्बू ओर बेदी पवित्र करने ओर हारूण ओर तेसरे पाऊ बी पवित्र करने ताकि सेयो मेरिया तँईं पुरोईतो रा काम करो।
तेबे मां इस्राएलिया बीचे रणा ओर तिना रा परमेशर ठईरूँगा। तेबे तिना खे पता लगी जाणा कि आऊँ यहोवा तिना रा परमेशर ए, जो तिना खे मिस्र देशो ते इजी खे निकयाल़ी की ल्याया, ताकि आँऊ तिना बीचे रऊँ; आऊँ ई तिना रा परमेशर यहोवा ए।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.