Baghlayani Bible
निर्गमन 26
पवित्र तम्बू
फेर मिलणे वाल़ा तम्बू दस पड़देया साथे बनवाणा; ये पड़दे नीले, बैंगणी ओर लाल रंगो रे टाल्लेया पाँदे कढ़ाई कराई की करूबो रे चित्रा साथे बनवाणे। एकी-एकी पड़दे री लम्बाई 28 आथ ओर चौड़ाई चऊँ आथा री ओ; सारे पड़दे एक जेड़े नापो रे ओ। पाँज पड़दे एकी-दूजे साथे सिली की जुड़े रे ऊणे चाईयो ओर जो पाँज पड़दे रणे सेयो बी एकी-दूजे साथे सिली की जुड़े रे ऊणे चाईयो। ओर जेती यो दोनो पड़दे सिली की जोड़े जाओ, तेती दुँईं कूणेया पाँदे नीले-नीले छल्ले लगवाणे। पड़देया रे दुँईं कूणेया पाँदे एक जेड़े आमणे-सामणे पंजा-पंजा छल्ले लगवाणे।
फेर सूईने रिया पंजा ऊका बनाणियां ओर पड़देया रे छल्ले ऊका रे जरीये एकी-दूजे साथे एड़े जुड़वाणे कि मिलणे वाल़ा तम्बू मिली की एक ई ऊई जाओ।
मिलणे वाल़े तम्बूए खे पांदा ते टकणे खे बाकरिया रे बाल़ो रे ग्यारा पड़दे बणाए जाओ। एकी-एकी पड़दे री लम्बाई 30 आथ ओर चौड़ाई चऊँ आथो री ओ, ग्यारा पड़दे एक जेड़े नापो रे ऊणे चाईयो। ओर पाँज पड़दे लग ओर छे पड़दे लग सिलाणे ओर छठा पर्दा मिलणे वाल़े तम्बूए सामणे मोड़ी की दोरा करी देणा।
ओर तैं पंजा कड़े तेस पड़दे रे कूणे रे जो बारा ते मलाया जाणा ओर पंजा ई कड़े दूजी तरफा रे पड़दे रे कूणे रे बनवाणे, जो बारा ते मलाया जाणा।
फेर पीतल़ी रे पंजा कड़े बनवाणे ओर कड़े छल्लेया रे लगाई की तम्बू एड़ा जुड़वाणा कि से मिली की एक ई ऊई जाओ।
ओर मिलणे वाल़े तम्बूए रे पड़देया रा लटकेया रा इस्सा, मतलब जो आदा बचेया रा टाल्ला रणा, से तम्बूए री पिछली तरफा खे लटकेया रा रओ। ओर मिलणे वाल़े तम्बूए रे पड़देया री लम्बाईया बीचा ते आथ परी ओरे ओर आथ परी पोरे तम्बूए खे टखणे खे तिजी रे दुँईं कनारे लटकेया रा रओ।
तेबे मिलणे वाल़े तम्बूए खे लाल रंगो रे रंगी की खाडूआ री खाला रा एक टखण बनाणा ओर तिजी पाँदे बाकरेया री खाला रा बी एक टखण बनाणा।
तेबे मिलणे वाल़े तम्बूए खे खड़ा करने खे बबूल नाओं रे डाल़ो री लकड़िया रे तख़्ते बनवाणे। एक-एक तख़्ते री लम्बाई दस आथ ओर चौड़ाई डेढ़ आथो री ऊणी चाईयो।
एकी-एकी तख़्ते रे एकी-दूजे साथे जुड़ी री दो-दो चूल़ा ओ; मिलणे वाल़े तम्बूए रे सारे तख़्ते ईंयाँ ई बनवाणे। ओर मिलणे वाल़े तम्बूए खे जो तख़्ते तां बनवाणे तिना बीचा ते 20 तख़्ते तो दक्खणा रिया तरफा खे ऊणे चाईयो ओर तिना तख़्तेया निठे चाँदिए रे 40 पावे बनवाणे, मतलब एक-एक तख़्ते निठे तिना रे चूल़ेया खे दो-दो पावे।
ओर मिलणे वाल़े तम्बूए री दूजी तरफा खे मतलब उत्तरो रिया तरफा खे 20 तख़्ते बनवाणे। तिना तख़्तेया खे बी 40 पावे बनवाणे मतलब एक-एक तख़्ते निठे दो-दो पावे ऊणे चाईयो।
ओर मिलणे वाल़े तम्बूए रे पिछली तरफा खे मतलब पश्चिमा रिया तरफा खे बी छे तख़्ते बनवाणे। पिछले इस्से रे मिलणे वाल़े तम्बूए खे दो तख़्ते बनवाणे इना दुँईं कूणेया खे बणाए रे दुँईं तख़्तेया रा नाप थाला ते पाँदले सिरे तक एक बराबर ओ ओर एकी कड़े रे लगाए रे ओ, तिना दुँईं तख़्तेया रा आकार एड़ा ई बनाणा ओ। आठ तख़्ते ओर ऊणे चाईयो ओर तिना रे चाँदिए रे 16 पावे ऊणे चाईयो मतलब एक-एक तख़्ते ते निठे दो-दो पावे ऊणे चाईयो।
बबूलो रिया लकड़िया रे डण्डे बनवाणे, मतलब मिलणे वाल़े तम्बूए रे एक तरफा रे पाँज तख़्ते, ईंयाँ मिलणे वाल़े तम्बूए री दूजी बगला रे तख़्ते खे पाँज डण्डे ओर मिलणे वाल़े तम्बूए री पश्चिमा री तरफा खे जो पिछले इस्से रे ऊणा तिजी खे बी पाँज डण्डे बनवाणे। बीचली कात जो तख़्ते रे बीचे ऊणी से तम्बूए रे एक सिरे ते दूजे सिरे तक पऊँचो।
फेर तख़्ते सूईने साथे मढ़वाणे ओर तिना रे कड़े जिना बीचे डण्डे लगाणे सेयो बी सूईने साथे मढ़वाणे।
तूँ मिलणे वाल़े तम्बूए खे ईंयाँ खड़ा कर जेड़ा एते पाह्ड़ो पाँदे ताखे दखाई राखेया।
मिलणे वाल़े तम्बूए रा पितरला इस्सा
फेर नीले, बैंगणी ओर लाल रंगो रे तागेया साथे बूणे रे लीलणो रे टाल्ले पाँदे कढ़ाई कराई की करूबो रे चित्रा साथे एक बीचला पड़दा बनवाणा। ओर तिजी खे सूईने साथे मढ़े रे बबूलो री लकड़िया रे चऊँ खम्बेया पाँदे लटकाणा। इना रे छल्ले बी सूईने रे ओ ओर ये चाँदिए रे चऊँ पावेया पाँदे खड़े रे रओ। ओर बीचला पड़दा छल्लेया निठे लटकाई की गवाईया रा सन्दूक तेस पड़दे पीछे पीतरे लई जाणा; इजी खे बीचला पड़दा तुसा खे पवित्र जगा खे परम पवित्र जगा ते लग करो। तेबे परम पवित्र जगा रे गवाईया रे सन्दूको पाँदे दया रे आसणो रा टकणा राखणा। तेस पड़दे ते बारे मिलणे वाल़े तम्बूए रे उत्तरो रिया तरफा खे पवित्र रोटिया खे मेज राखणी ओर तिजी री दक्खणा री तरफा खे मेजो रे सामणे दिऊए राखणे री फट्टी राखणी।
मिलणे वाल़े तम्बूए रा मुख्य दरवाजा
तेबे मिलणे वाल़े तम्बूए रे द्धारो खे नीले, बैंगणी ओर लाल रंगो रे तागेया ते बूणे रे लीलणो रे टाल्लेया रे कढ़ाईया रा काम कित्ते रा एक पड़दा बनवाणा ओर एस पड़दे खे लगाणे खे बबूलो री लकड़िया रे पाँज खम्बे बनवाणे; सेयो सूईने साथे मढ़वाणे; तिना रे कड़े सूईने रे ओ ओर तिना खे पीतल़ी रे पाँज पावे बनवाणे।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.