बिधान 24

तलाक ओर दूजा ब्या

1जे कोई मर्द केसी जवाणसा खे ब्याई लओ ओर तिजी ते बाद तेसा रे कोई शर्मनाक गल्ल देखी की तेसा ते दु:खी ऊई जाओ, तो से तेसा खे फारगती लिखी की ओर तेसा रे आथो रे देई की तेसा खे आपणे कअरो ते पेजी देओ।1 2जेबे से जवाणस तेसरे कअरो ते चली जाओ, तेबे दूजे मर्दो री ऊई सकोई। 3पर जे से दूजा मर्द बी तेसा ते नफरत करो ओर से तेसा खे फारगती लिखी की तेसा जवाणसा रे आथो दे देई की आपणे कअरो ते पेजी देओ या एस दूजे मर्दो री जिने से आपणी लाड़ी बणाई ती ओ मौत ऊई जाओ, 4तो तेसा रा पईला लाड़ा जिने से आपणे कअरो ते पेजी ती थी, तेसा रे अशुद्ध ऊणे ते बाद तेसा खे आपणी लाड़ी नि बणाओ, कऊँकि ये परमेशर यहोवे री नजरा दे नफरता रा काम ए। ईंयाँ तैं से देश जेतेखे तेरा परमेशर यहोवा तेरा इस्सा करी की ताखे देओआ पापी नि बनाणा।

नये ब्याए दे लाड़ा-लाड़ी

5जे किने मर्दे नवां-नवां ब्या करी राखेया ओ, तो से नवां ब्याया रा मर्द सेना साथे युद्धो रे नि जाओ ओर ना ई सेना रे केसी बी किस्मा रे कामो री जिम्मेबारी तेस पाँदे पाई जाओ। से एकी सालो तक आपणे कअरे आजादिया साथे रई की आपणी ब्यायी री लाड़िया साथे खुशी मनांदा रओ।

6कर्ज देणे वाल़ा कर्जदारो ते रईनो दे चाक्की या चाक्किया रा पूड़ नि राखो, कऊँकि एड़ा करना मानो तेसरे प्राण ई रईन राखणे जेड़ा ए।

अपहरण

7जे कोई माणूं आपणे केसी इस्राएली पाईए खे दास बनाणे या बेचणे री इच्छा ते चुरांदा ऊआ पकड़ेया जाओ, तो एड़ा चोर काई देणा, ईंयाँ तैं एड़ी बुराई आपणे लोका बीचा ते दूर करनी।2

कोढ़ो रे बारे दे चौकसी

8कोढ़ो री ब्यादा रे बारे दे चौकस रणा ओर जो कुछ लेवी पुरोईत ताखे सिखाओ तिजी रेई मुताबिक काम करने रे चौकसी करना, जेड़ी आज्ञा मैं लेवी पुरोईतो खे देई राखी तेड़ा ई करने रे चौकसी करना। 9जेबे तुसे मिस्र प्रदेशो ते निकल़ी की आऊणे लगी रे थे, तेबे बाटा रे जो बर्ताव मरियमा साथे तेरे परमेशर यहोवा कित्तेया था, तिजी खे याद राखेया।

कर्ज

10जेबे तूँ आपणे इस्राएली पाईए खे रईनो रे बदले कुछ त्वार देओ, तेबे तेसते रईन राखी री चीज लणे खे तेसरे कअरे नि जाणा। 11तैं कअरो ते बारे खड़े रे रणा ओर जेसखे तूँ त्वार दे सेई रईनो री चीज तांगे बारे ल्याओ। 12पर जे से माणूं गरीब ओ, तो तैं रईनो रे आपू गे राखी री तेसरी चादर लई की नि सऊणा, 13जेबे त्याड़ा छिपणे लगो तेबे तैं तेसरी चादर जरूर वापस करी देणी, ताकि से आपणी चादर टखी की सुती सको ओर ताखे आशीर्वाद देओ ओर ये तेरे परमेशर यहोवे री नजरा रे तार्मिकता रा काम मानेया जाणा।

गरीब आदमिया खे मजदूरी

14तैं दीन ओर गरीब मजदूरो पाँदे अन्देर नि करना, चाए से तेरे इस्राएली पाईया बीचा ते ओ, चाए तेरे देशो रे शईरो ते पीतरे रणे वाल़ा परदेशिया बीचा ते ओ। 15तैं सूरज डूबणे ते पईले तेसरी मजदूरी देई देया करनी कऊँकि से माणूं गरीब आ ओर तेसरा त्यान आपणी कमाई री मजदूरिया पाँदे लगेया रा रणा, एड़ा नि ओ कि से तेरे खलाफ यहोवे री दुहाई देओ ओर तां पाँदे पापो रा दोष नि रओ।3

मौता री सजा

16पाऊए रे पापो रिया बजअ ते बाओ खे मौता री सजा नि देणी ओर ना ई बाओ रे पापो रिया बजअ ते पाऊ काणा, जिने पाप करी राखेया ओ, सेई तेस पापो रिया बजअ ते काया जाओ।

कमजोर आदमिया साथे बुरा बर्ताव नि करना

17तैं केसी परदेशी माणूंए रा या अनाथो रा न्याय नि बिगाड़ना ओर ना ई केसी बिदुआ रे कर्जे रे बदले तेसा रे टाल्ले रईन राखणे। 18ये याद राखणा कि तूँ मिस्रो रे गुलाम था ओर तेरा परमेशर यहोवा ताखे तेथा ते छुड़ाई की ल्याया, इजी बजअ ते आज आऊँ ताखे ये आज्ञा देऊँआ।

आपणी फसला बीचा ते गरीबा खे छाडी देणा

19जेबे तूँ आपणी जमीना दे पाक्की री फसल बाडे ओर डोरूए रे एक पूल़ा पूली की रई जाओ, तो तिजी खे लणे वापस नि जाणा, से परदेशी, अनाथ ओर बिदुआ खे छाडी देणा; तेबे तेरे परमेशर यहोवे तेरे सबी कामा दे ताखे आशीष देणी।

20जेबे तूँ आपणे जैतूनो रे डाल़ा रे फल़ चाड़े, तेबे एकी बार चाड़ी लणे ते बाद तिजी री पाँगटिया दूजी बार नि चाड़निया, तिना रे फल़ परदेशी, अनाथ ओर बिदुआ खे राखी देणे। 21जेबे तूँ आपणे अंगूरा रे बगीचे रे फल तोड़े, तो तेतेरा दाणा-दाणा नि तोड़ना, से परदेशी, अनाथ ओर बिदुआ खे रई जाओ। 22ये याद राखणा कि तूँ मिस्रो रे गुलाम था, इजी खे ये काम करने खे आज आऊँ ताखे ये आज्ञा देऊँआ।